Колхозонь эряф/1933/16/Партактивть васечнемац писательхнень мархта
| ←Валпрякс | Колхозонь эряф (1933), 16 № Август ков edited by Шестов Н. С., Порватов Т. М. Партактивть васечнемац писательхнень мархта. |
Кивейхксыеце МЮД-сь.→ |
| Колхозонь эряф. Мокшонь литературно-художественнай и общественно-политическай журнал. Нолдаец Сембе союзонь писателень Мокшэрзянь областень оргкомитетсь. Лисенди 6-це кизось эрь ковти кафксть. — 16 № Август ков 1933 киза. — с. 0 (2) |
| Партактивть васечнемац писательхнень мархта. |
Сентябрь ковть 21-це шиста компросонь кудса йотафневсь Саранскай организациянь партактивть панжада пуромксоц, конац кочксезень Советскай художественнай литературать колга кизефкснень.
Нюрьхкяня ингольдень вал мархта корхтама лисенць Мокшэрзянь автономнай областти саф писательсь Алексей Дорогойченко — „Большая каменка“ и лия книгань авторсь. Эсь валсонза, писателень организациятнень инголе ащи задачатнень колга корхтамста сон мярьксь, што:
— ...Васеньце задачакс писательхненди арси эсь культурнай уровеньцнон касфтомац, марксистско-ленинскай теориять содамац, конафтома тяниень пинкть писательти аш кода работамс, марстопнемс пяк оцю сатфкснень работамань эряфонь, бытонь сембе ширетнень эса, конат йотафневихть минь масторсонок. Эряви минь советскай художественнай литературанеконь тиемс ниньге сяда партийнайкс, конац ба лездоль эрь коммунистти, рабочайти, колхозникти и трудяй единоличникти, шарьхкодемс ся пяк оцю работать, конац мольфневи большевистскай партиять руководстванц ала вишке классовай тюремань шовор. Тиемс литературать стамокс, конац ба няфнелезень минь сатфксонеконь, видексонненс няфтелезень сембе ширетнень, лифнелезень лангу афсатыкснень и штафнелезень нят афсатыкснень юрсон, — няфнелезень нят оцю перспективатнень, конат минь улихть, терделезень трудяйхнень и кеподелезе синь энтузиазмаснон социализмать инкса тюрема. Тя ули кода тиемс социалистическай реализмань методтнень коряс работазь.
Пренияса корхтай „Волжская коммуна“ краевой газетать редактороц Рубинштейн ялгась лифць задача — пуроптомс Самараса мокшэрзянь культурань недяля.
ВКП(б)-нь обкомонь секретарьс Уморин ялгась Дорогойченко ялгать саманц колга корхтамста, корхтась сянь колга, што Дорогойченкоти эряви лездомс опытонзон мархта минь мокшэрзянь писательнеконди сяс, мес сон соньць эрьзя и цебярьста содасы кодама положенияса ащи литературась и Мордовиясь и эряви ширьденза максомс произведение, конац ба няфтелезе Мокшэрзянь областть тяниень шаманц, конац моли классфтома социалистическай обществати.
Пренияса корхтай писательхне: Иркаев, Нартман, Раптанов и Виард корхтамаснон шумордамода меле морафтозь эсь произведенияснон.