Колхозонь эряф/1941/06/Офтть ширеса - инжикс

From Wikisource
Jump to navigation Jump to search
Колхозонь эряф (1941), № 6 Июнь edited by Игнатьев Г. А.
Офтть ширеса — инжикс
Колхозонь эряф. Эрь ковонь литературно-художественнай и общественно-политическяй журнал. Мордовскяй Советскяй писателень союзть органоц. — № 6 Июнь 1941. — с. 62—64
 
[62]
 
ОФТТЬ  ШИРЕСА — ИНЖИКС

Эрясть-ащесть атят-бабат, синь ульсть колма стирьсна.

Весть атясь срхкась вири пенгянь аноклама. Тумстонза бабанцты корхтай:

— Кафта шида меле кучк Ольгань запасонь кандома.

— А кода тонь мутанза Ольгась?

— А мон коза молян, кизень лангс тараткат ёрян, синь корязост катк и моли.

Атясь срхкась и тусь вири. Молемста сон ёрясь тараткат, штоба мульхце сонь стирец Ольгась.

Иотасть кафта шит, кодак атясь тусь вири. Бабась срхкафтозе Ольгать, макссь мархтонза запаст и кучезе алянцты вири.

Мзярда атясь ёрясь тараткат, офтсь сонь няезе, тараттнень тоста кочказень и ёрязень эсь кудонц шири.

Ольгась моли сияне, куване тараткятне ёряфт. Мольсь, мольсь, ваны: куд, а кудть потмоста вальмава ваны офта. Ольгась эводсь и кармась потама меки. Но офтсь лиссь и вятезе Ольгать эсь кудозонза и корхтай тейнза:

— Тяни тонь сяфте эстейне рьвакс.

Ольгась эводсь и тейнза мезевок изь азов ответс. А офтсь тага корхтай Ольгати:

— На тейть панжематнень и ащек кудса. — И няфтсь тейнза колма утопт.

— Кафта утопнень варжайть, а колмоцеть тяк варжа, — указвась Мишкась Ольгати и тусь охотас.

Ольгась тумдонза меле нолдась мзяра врема, панжезе фкя утомнять и ваны: эсонза ломанень телат, а омбоцеть эса прят. Панжезе сон колмоцетьке и ваны: эсонза вер. Навазе верти суронц и ёразе нардамс, но версь коданга изь штав и ашезь нардав. Сон сёлгозе утомть и сотозе суронц лоскоткаса, штоба афольхце няе верть офтсь. Йотась част, ётась омбоцесь, сась охотаста офтсь и ваны: Ольгать суроц сотнеф лоскотса. Офтсь кизефтезе Ольгать:

— А мес тонь сурце сотнеф?

— А мон керыне сонь пеельса шявонь лазомста.

— А-а, лазомста!.. — пшкядсь офтсь. — Адека мархтон утомти.

Сявозе Ольгать утомти и керозе прянц. Теланц ёрдазе телатнень ёткс, а прянц — прятнень ёткс.

Бабась учсь-учсь стиренц эса и кучезе омбоцеть — Аннать, [63]макссь запаст, и Аннась тусь алянцты запасонь кандома вири. Аннаське мольсь офтть кудонц малас и няйсы, офтсь вальмава ванонды, и — эводсь.

Офтсь корхтай тейнза:

— Мон тонь сяфте рьвакс эстейне, и кармат тейне пидема-панема, а мон охотас якама.

Аф лама времада меле офтсь тусь охотас. Утом панжематнень кадозень Аннати и мярьгсь:

— На тейть панжематнень, кафта утопнень варжайть, а колмоцеть тяк варчсе.

Аннась тумдонза меле панжезе фкя утомть, тоса ломанень телат, панжезе омбоцеть — тоса прят, и кармась думандама, мес изь мярьге панжемда колмоцеть.

„А ожу панчса и варжаса, мезе тоса“, — мярьгсь Аннась. Панжезе и ваны: тоса вер, навазе верти суронц, а версь коданга сурстонза аф штави, аф нардави. Сась офтсь, няезе Аннать лоскотса сотнеф суронц и пшкядсь:

— Анна, мес тонь сурце сотнеф?

— А мон керыне пеельса, — мярьгсь Аннась.

— Эста, аде мархтон утомти, — пшкядсь офтсь и вятезе сонь утомть ваксс. Керозе Яннать прянц и ёрдазе сонь теланц — телатнень ёткс, а прянц — прятнень ёткс.

Бабась учсь-учсь стирензон эса — и кучезе колмоце стиренц Марять. Макссь мархтонза запаст. Маряське алянц тейс изь пачкоде, а мольсь офтть кудс.

Офтсь тейнза корхтай:

— Мон тонь сяфте эстейне рьвакс, и кармат пидема-панема, а мон охотас якама. На вов тейть утомонь панжематнень, кафттнень варжайть, а колмоцеть тяк варчсе.

Офтсь тусь охотас, а Маря кармась варчсема утопнень. Панжезе фкя утомть — тоса телат, конатнень ёткса аканзонга теласна, панжезе амбоцеть, ваны: тоса ломанень прят, и прятнень ёткса аканзон прясновок, панжезе колмоцеть, ваны: тоса вер.

Марясь кундась нармонь, керозе прянц, сявсь утомста куцюса вер, вадезе нармонть крганц и путозе прянц сялдазонцты, — пряц педсь, и нармонць живолгодсь.

Атясь учсь-учсь запаст, и коданга исть учев, и тусь куду. Мольсь куду и кизефнесы бабанц:

— А косот минь стиреньке?

— Синь вдь тонь тейзт тусть запасонь кандома.

Атясь и бабась кармасть ювачнема и горядост аварьгодсть...

Сась охотаста офтсь и Марянди мярьгсь:

— Андомак, мон пяк вачень.

Марясь офтти корхтай:

— Офта, а офта, мон пяк лажадонь тядязенди и алязенди, нолдамак, молян гостинецть кандан.

— А тон, Маря, вандыс аноклак, и монць кандсайне.

[64]Маря аноклась оцю кептерь, учезе, мзярда офтсь тусь охотас, живолгофтозе Ольгать и мярьгсь:

— Эцек тя кептери, и канттанза куду, а мзярда кармай варжакснема фталу, тон валомне юватть: — Няйхте! — Кяшезе Ольгать кептери.

Аф лама времада меле сась офтсь, и Марясь мярьгсь:

— На вов, тейть кептерть и арт, кантк алязень-тядязень шири. А мон куцян кудть пряс и карман ванома мельгат.

Офтсь кеподезе кептерть копозонза и тусь. Лоткась няевомода кудоц, и мярьгсь:

— Норак, варжаса, мезе потмосонза.

А кептерть потмоса Ольгась ювади: — няйхте! няйхте!

Офтсь корхтай:

— Эх, конашка васта няят, вирть пачканга няят! — Кеподезе копозонза кептерть и тусь тага молема.

Мольсь атятнень-бабатнень ортаснон ваксс и ёрдазе кептерть калдазозост. Сонць тусь меки ардозь и азозе Марянди, што гостинецнень кандозень. Тяфта Маря офтть кядьста Аннаньге кантфтозе. Офтсь кандозе Аннать и корхтай:

— Нинге весть молян гостинецень кандома, а оду мле аф молян.

— А мес? — кизефтезе Маря офтть.

— Пелян, — мярьгсь офтсь.

Аф лама времада меле офтсь тусь охотас, а Маря живолгофтозень сембе ломаттнень и кучезень кудгаст. Тись Маря шуфтонь ломань и куцфтезе кудть пряв, щафтсь лангозонза щам и сонць эцесь кептери.

Сась офтсь, и кептерьста Маря пшкядсь:

— Вона сявк кептерть, а мон кудть пряста ванан мельгат.

Офтсь кеподезе кептерть копозонза и тусь. Ки лангса ёразе варжамс, мезе эсонза, но Маря ювадсь: — няйхте! няйхте! Кандозе кептерть орта лангу и ёрдазе калдазу, а сонць меки тусь ардозь. Сась кудозонза, утьксни Марянди:

— Валк, гостинецнень кандыне кудозонт.

Но шуфтонь Марясь мезевок аф корхтай. Офтсь кяжиясь, кундазе щамда шуфтонь Марять и ускозе эсь лангозонза. Чучелась прась видеста сонь конязонза, и офтсь шавовсь.

 
Сёрмадозе  И.  А.  Туманов  (Зубово-По-
лянскяй р-нонь  Од  Выселка  велеста).