Колхозонь эряф/1938/07-8/Н. Г. Чернышевский

From Wikisource
Jump to navigation Jump to search
Колхозонь эряф (1938), № 7—8 Июль-Август edited by Руськин Ф. С., Пинясов Я. М.
Н. Г. Чернышевский
Колхозонь эряф (Колхозная жизнь). Литературно-художественнай и общественно-политическяй журнал. Мордовскяй АССР-нь советскяй писателень союзонь оргкомитетть органоц. Лисенди кефкиице кизось, ковти весть. — № 7—8 Июль-Август 1938 киза. — с. (3,) 5
 

[3]

Колхозонь эряф 1938-07-8 05стр изобр1.jpg
[5]
 
Н.  Г.  Чернышевский
(110 кизот шачема шистонза сявомок
(1828—1938 к. к.).
 

Великай русскяй революционерсь-демократсь Николай Гаврилович Чернышевский шачсь июлть 24-це шистонза 1828 кизоня Саратов ошу, городской священниконь семьяс. 1846 кизоня сон мольсь тонафнема Петербургскяй университету. Исключительна одаренай юношась жадиайста лувондсь философскяй и научнай содержанияса книгат. Тонафнемок университетса, Чернышевский ушеткшни критически ванондома окружающайти. Вию влияния од Чернышевскяйти тисть 1848 кизоня западса революционнай событиятне.

Университетть аделамдонза меле 1850 кизоня Чернышевский арась преподавателькс родной Саратов ошенц гимназиязонза. 1853 кизоня Чернышевский эсь дневникозонза сьорматкшни: «Минцонок курок ули бунт, а кда сон ули, мон непременна карман участвовандама эсонза».

Чернышевскяйть великай заслугац ащи сянь эса, што сон 1861 кизонь реформать эзда няезе сонь буржуазнай сущностенц и пощадафтома разоблачандакшнезень либеральнай болтуттнень. В. И. Ленинць сьормадсь: «Эрявсь именна Чернышевскяйнь гениальностец, штоба эста, крестьянскяй реформать самай лифтеманц эпохаста... тяфтама яснайста шарьхкодемс сонь основной буржуазнай характеронц».

«Пролог» эсь романцонза «эмансипатор господатнень» лиякс мярьгомс дворянскяй либералхнень, Чернышевский лемнесыне «васькафнике, болтункс и дуракокс». Сон верондасы, што народть настоящайста освободиндамац можна тиемс аньцек восставшай народть эсь вийнц мархта.

Лама кизонь йотамс публицистонь пераса Чернышевский отстаивал народть интересонзон, редакторть Некрасовонь вельде «Современник» журналть шарфтозе революционно-демократическяй мыслянь трибунакс. Чернышевский маштозь йотафнезень «цензурать препононзон и рогатканзон пачк — крестьянскяй революциять идеянзон, сембе сире власттнень йордамаснон инкса массатнень тюремань идеяснон» (Ленин).

Помещикнень и царскяй самодержавиять каршес тюремаса народть интересонзон Чернышевский аралакшнезень тяфтама вийса и последовательностьса, што 1914 кизоня Ленинць сьормадсь: «Сонь сочинениянзон эзда веет классовай тюремань духсь. Сон резкайста йотафнезе либерализмать изменанзон разоблачандамаса ся линиять, кокань мянь тянимс пяк аф кельксазь кадеттне и ликвидаторхне».

К. Маркс пяк цениндакшнезень Чернышевскяйнь экономическяй работанзон, характеризовал сонь кода «великай ученайнь», конац «миллень политическяй экономиянц очерконзон» эса... мастерски няфтезе «буржуазнай политическяй экономиять» банкротстванц.

1862 кизоня Чернышевский ульсь арестовандаф и пякстаф петропавловскяй крепости. Царскяй правительствась шарьхкодезе Чернышевскяйнь революционнай деятельностенц сембе опасностенц и сонь каршезонза тюрсь пощадафтома: 20 киза кирдезе сонь Сибирьса каторгаса и ссылкаса.

Кулось Н. Г. Чернышевский 1889 кизоня октябрть 29-це шистонза Саратов ошу.

Советскяй народсь пяк чтит Н. Г. Чернышевскяйнь памятенц: 1936 кизонь февральста минь правительстваньке лифтсь постановления, штоба тиемс Чернышевскяйнди памятникт Москуву и Ленинграду.