Безбородов М. И. Сочиненият 1-це томсь (1939)/Молемста

From Wikisource
(Redirected from Молемста)
Jump to navigation Jump to search
Сочиненият 1-це томсь  (1939)  by Безбородов, Михаил Ильич
Молемста
Михаил Безбородов. Сочиненият, Васенце томсь. Мордовскяй государственнай издательствась. Саранск, 1939.

[ 76 ]

МОЛЕМСТА


Вирьть вельхкска
Якстерь котфокс таргавсь
Кельме тялонь
Щьокань архты зарясь.
— Валом, Якстерь,—
Пара мяльса кардась
Налхкозь арды
Алашать Кузярясь.
Нурдта поласне
Ловть мархта морайхть,
Нурдти — кельме,
Ловти стака — маряй.
Якстерсь парксни,
Шиньфоц кожфти солай.
— Кулхцондт, Миша.
Лятфтасак тон каряйть?
Тя — сон вашесь.
Эк кодама эрек,
Аванц коряс
Колмоксть сяда вии,—
Шарфтсь каршезон,
Корхтазевсь Кузярясь,
А трванза
Сединь петикс пеедсть.
— Няйсак тонцьке,
Кодама жуватась,
Тя аф кадсы,
Аванц лаца, усфонц.
Тянь изь няендь
Атянеськонь атяц...—

[ 77 ]

Якстерсь вишкомсь,
Бта шнаманц кулхцондсь.
— Стакаль, Миша,
Йотась кизоть кирдемс,
Уликс вийнеськ
Кемокстафоль лафчста,
Якстерьтиге
Лядондсть аньцек
Ирьдест,
Сянкса тядде
Козятама сатфксса.
Апак лядть
Илядондсть, Миша, лятьфне,
Лядондсь паксяв
Сьороть пцтай пялец.
Эх, месть улендсть—
Савихть ламос лятфнемс,
Кулаксь вииель,
Тядде сязеськ мяленц.
Кели курга
Митясь улендсь азоркс,
Колхозть лангса
Мезе мялец тиендсь.
Ульсь кулакти
Альнякакс и сазоркс,
А колхозникть
Люпштась, рахась, пеедсь.
Сембе вийса
Тюрсь, ширенцты таргась
Сятнень, кие
Кулакть ужяльди, кельги.
Минь эсонок
Кильнесь меки арбас,
Тяфта кядьстонк
Вожиятнень нельгондсь.
Кяжда, вихца
Марстопнезь синь тракснень,

[ 78 ]

Штоба синнемс
Колхозть кеме ширенц.
Синнемс лядоль
Тифтень йоряф кархчнень,
Но аф мяньдемс
Колхозть марстонь виенц!
Виде, лама
Кулофтсть синь жуватат,
МТФ-ста
Кормоть мишендсть, салсесть.
Ускихть тише —
Йотай афи фатят,
Тяфта срафтомс
Колхозть синне арьсесть.
Аньцек тунда
Пизоснон минь срафтоськ,
Тяни колхозсь
Минцень Миша, минцень.
Туйхнень меки
Колхозу сувафтоськ...
Эй, тон, Якстерь,
Тят кадонда кицень.
Лугав тядде
Тишеть ашеськ када,
МТФ-ста
Аф кулы фкя тракс ни.
Минь вдь минцьке,
Вийнеське — бригада,
Кона тевса
Эряфть валдти таркси.—
Тяфта корхтась
Кельгома Кузярясь,
Фкат мархтонза
Мялене,— фкат, моньге!
Кизефтине:
Тяни кода эрят?
Саты ль одти

[ 79 ]

Сьороняце тонне?
— „Сьоронь ширде
Козятама минь,
Аф стак марса
Пара мяльса
Тефнень тихтяма.
Эрян нильнень,
Колма сятт трудшине,
Эрь трудшити
Сатсь мянь кемонь утямат”
— „Мезе утямась?”
— Ха, ха! килограмма,
Тя эсь лацон.
Тядде сьорось саты.
Видьмонь фондта
Лама минь усктама
Государствав.
Мзяра содак?— сядот.
Планць ни пяшкотьф,
Каршек план примаме,
Сяньге пяленц
Улхка ошу ускоськ.
Тяни тишень
Усксема кундаме,
Ковонь йотамс
Шумордаманц путоськ.
Вов и велесь,—
Няфтезе Кузярясь
Локшенц мархта,
Коса касонь, велеть.
Аф крфай ни
Кельме тялонь зарясь,
Шинять каршес
Ловнясь цифтордсь келес.