Колхозонь эряф/1939/03/Михаил Ильич Безбородов

From Wikisource
Jump to navigation Jump to search
Колхозонь эряф (1939), № 3 Март
Михаил Ильич Безбородов
Колхозонь эряф (Колхозная жизнь). Литературно-художественнай и общественно-политическяй журнал. Мордовскяй АССР-нь советскяй писателень союзонь правлениять органоц. Лисенди кемгафтувоце кизось, ковти весть. — № 3 Март 1939 киза. — с. 55—56
 
[55]
МИХАИЛ   ИЛЬИЧ   БЕЗБОРОДОВ
(Кулома  шистонза  4  кизонь  топодемати)

Тя кизонь мартть 11-це шистонза топодсь ниле кизот, кода проклятай чахоткась сявозе минь йоткстонк мокшень инь талантливай поэтть — Михаил Ильич Безбородовть.

Безбородовсь кулось ся пингста, мзярда мордовскяй трудовой народсь нинге сяда пяк кармась вешема родной кяльса цебярь произведеният. Мишась тя вешфксть лац шарьхкодезе и макссесь эсь читателензонды стама произведеният, кодапт вешсь массась, кодапт вешсь минь сталинскяй эпоханьке.

Сонь произведениянзон простотасна, художественнай насыщенностьсна, народностьсна завоевали симпатия читательхнень ширде.

Народонь вракне — буржуазнай националисттне эсь наксада вайгяльсост иватькшнесть, што Безбородовсь ащи аф правильнай ки лангса, што сонь стихонза наивнайхть, но Михаил Ильичсь ня увсематнень синдезень эсь настойчивай стихонзон мархта:

„Тяни сяда касфтонь тюремазень,
Сяда кяжда кулакть каршес моран,
„Куломс тюремс“
— валозень мон азонь...“

Да, Михаил Ильич видекс эсь нюрьхкяня эряфонц (сон эрясь аньцек 28 киза) йотафтозе тюрезь. Сон нинге йомланяста лядсь аляда. Тейнза савсь тюремс нужа шить каршес, сяда цебярь эряфонкса, а мзярда кармасть валда факелкс эвондакшнема велева колхосне, Мишась арась колхоснень инкса фкя инь цебярь агитаторкс и кулачествать каршес аф ужяльдезь тюрикс.

Сон сьормадсь поэма „Матовсь кяжец“, коса пяк цебярьста няфнесы велеса классовай тюремать и колхоснень оцю победаснон.

„...Касыхть велева колхосне,
Озсесть тумокс модать лангс.
Пори пейхть и шовай пеельхть
Велень козясь — пяляс пангсь...“

Михаил Безбородовсь аф случайна максозень ня питни строкатнень. Сон лац няезе колхоснень касомаснон, классовай врагть — кулачествать предсмертнай тюреманц колхоснень каршес, мзярда:

„...Батраксь, ашусь,
Середнякне
Фкя кига инголи
Тусть...“

Улемок колхоснень инкса борецокс, Михаил Ильич тернесыне колхозникнень политическяй бдительностти, вракнень каршес тюремати и колхоснень хозяйственнай ширеснон кемокстамаснонды:

„Анокт уледа, колхозникт,
Колхозть вийнц кемокстасть.
Марстонь вийса, эрек мяльса,
Пильге алу врагть люпштасть“...

Мзярда классовай вракне — кулакне кармасть яцема, колхоснень страфтома, Михаил Ильич эсь читателензонды макссь пьеса „Кафта ширет“, кона разоблачал вредительхнень и тейст лездыхнень. „Кафта ширет“ пьесась колхоснень организационно-хозяйственнай ширеснон кемокстамаса сыграл оцю роль.

 

* * *

Михаил Безбородовсь нинге йомланяста няезе трудовой народть сире эряфонь стака долянц, а сянкса сон „Колма пинкт“ эсь поэмасонза реальна няфнесы козянь паксяса стака работать пингста велеть стане, кода сон уленькшнесь.

Тяка поэмать эса Михаил Ильич няфнесы авать ингольдень проклятай стака эряфонц. Алдусь беднайнь стирь. Сон шачемда и касомда удалась, но беднай шинц сюнеда козятне сонь лангсонза издевались кода повсь и Алдусь салаване ольксезь пеняцяй аканцты:

[56]

„...Эх, акай, акай,
Лятфнемаське пелькс,
Лама сельме ведь
Эряфсь кядьстон нельгсь.
Кафкса кизоса,
Кштирькс-лапас кундань,
Пачк мон ломаненди
Кесакт шумордань.
Касонь козянди,
Акай, покотькшнезь,
Крга алганя
Эздост топотькшнезь...“

Мишась мокшень литератураса ульсь — цебярь новатор и учитель. Сонь эздодонза тонадсть лама од поэт и писатель. Сон маштозь и чуткайста касфнесь и нинге сонь произведениянзон эзда кармайхть касома од писательхть.