Поладкстомо (2016)/Кискань уцяска
| ←Телесь нарвасы тундонть | Кискань уцяска (2016) by , edited by Ломшина Л. А., Маризь Кемаль, Малахова Е. П. |
Шожда кить сон эзь вешне→ |
| Нуянь Видяз. Поладкстомо. Без продолжения. — Саранск, 2016. — с. 313—321 |
[313]
| КИСКАНЬ УЦЯСКА |
Кодамо эрси пси...
Шорянь Вежай одов сась велев эрямо. Ускизе мартонзо «ошонь» кискинензэяк. Эрясь цёрась ламо этажсо кудосо малав пинге. Секскак пачкодсь аволь ськамонзо — ламо иень перть таштазь-кемекстазь эрямонь лувонзо марто. Кие велесэ кшнань ведьме вельде ветси кискат? Вежай. Ансяк сон. Сыргась вана ней, — ванан вальмава — кода тень маряви, лавка ёнов. Кшинь рамамо. Вакссонзо, ведьме вельде — «ялгазо».
«Я! Кодамо чинесь тантей! — эль эзь цийнезеве кискась кеняркстонть, зярдо судоварянзо пештизе ламбамо-лажаня чинень зэхельне. — Кона ёндо сон качады?»
Пинесь каявиксэль тов, кона ёнов никсесь судось.
[314] «А мерян!» — керязь керизе азоронть пшти вайгелезэ. Теке марто ноцковтызе ведьме ведстенть.
«А стяко мерить — кискань эрямо, — арсезевсь никсицясь, — ёжозояк мик кольсь, — а нолдыть натой тов, косо эйсэнь учить, косо эряван».
Нусманясто, прянь нолдазь ды мельтеме мольсь-чийсь Пондакш кардыцянзо мельга.
Сонзэ лангс ванозь монськак арсезевинь: кода кери, кодамо пси сакшны лиясто кирьгават сюлмазь ведсттенть. «Лиясто...» Кисканть кирьгасо сон свал.
Кавто пайстомот
Палманень сэрьсэ, куш аволь эчкетнеде, цёрась апак эрязкале эскели кудотнень икельга та-ков капшиця янганть. Вети раужо нурькине пона кискине. Сенень цяк сась: «молемс» тензэ вельть а ён. Секе тев тукшнови чиеме. Ков туят эсь обуцядот? Азорось а эрязкали. Сонензэ ялатеке, моли ломанекс, аволь чиезь чии.
«Мекс тон истямо чаулат? Паряк, удемсормсевксэть коськсть? — машнетезь арсезевсь Раужкай. — Каня а неят — пильгенек кувалмост аволь вейкеть? Тонь, теке ологат, монь...»
Ривезень пансиця пинесь зяроксть эзизе снартне ёвтнемс эсь арсеманзо азоронстэнь, тевезэ эзь лисе. Эзть ёвтаво мелензэ. Мекс, мекс ломанентень кодаяк а чарькодеви: кискась аволь ломань, аволь скалгак, сон «молеме» а машты.
Мезе лангскак апак вано, пинень вечкицясь ноцковтнесь секе тев ведьменть: кармавтсь Раужкаень молеме чуросто, сонсензэкс, эскелязь. Тона эрьва кода бажась савтомс ветицянтень, ансяк тень эйстэ мезеяк эзь лисне. Берть-берть-берть, берть-берть-берть... — секе тев пракшнось чиеме.
Кувать ванынь мельгаст.
«Кавто пайстомот...» — меринь эсь пачкам ды сыргинь эсь киявам.
[315]
Виесь — аволь лавгамосо
Каинь тензэ кочомне, омбоце... Истя теевинек содавиксэкс ды зярыя шкань ютазь — паро оякс. Вирев — сон мельгам, мон шабратненень — сон монень пулокс. Онгайтне — кода минсь. Эрьванть эсензэ коезэ, обуцязо, арсеманзо... Верьгай, конань истя лемдия сэрензэ ды келей конянзо кис, лиятнеде явови Чатьмонемасонзо. Паряк, истятнэде самай кортытькак: ёмавты — чатьмони, муи — чатьмони. Мик истят мельтькак совсесть прязом: паряк, сон сэреди? Улевельгак келезэ...
Эйстэнек колмошка кудонь ютазь, Тарнаень, эрясь-аштесь ды ванстась улипарост кискине. Лемезэ — Оска. Псакадо аламнеде покш. Сень кис кежтнеде эйсэнзэ — покш паргос а кельгить. Кудост икельгаяк куш иля юта, сеске каяви лангозот. Верьгаень сон анок сезнемс панксонь панкс. Натой пулозонзо амзори. Верьгай марикс-неицякскак а тейни. Ансяк пулосонзо — «Мезть педсемс те лавгаенть марто...» — яхои. Мейсэ седеяк ацирьгавтни эйсэнзэ. «Те кода истя? Монь кургсто човт лисить, онган, сон — понанзояк а стявтсы!»
Весть сыргинь Пичепев. Мартом, кода свал, пине ялгам. Ансяк пачкодинек Тарнаень видьс, кижнэзь-онгозь каявсь, теке мода потсто лиссь, Оска. Верьгай, содазь, неикскак эзь тее. Ятозо каявсь весть, омбоцеде, колмоцеде автордась канжамозонзо. Верьгай вырк! велявтсь, кундызе сонзэ сявдикстэ, кепедизе ды колмоксть-нилексть сорновтызе истя, марявсь, кедензэяк ваткасы. Сэредькстэнть Оска цийнезевсь, кирьгастонзо тусь верь. «Маштсы, маштсы кежпаргонть!» — тандадынь монськак. «Лоткак!» — серьгединь ялганень. Кунсолымим. «Паргось» цийнезь-кавнозь ношкстась ды совась кенкш ало варяванть.
Мезе-мезе, Верьгаень пельде истят тевть эзинь учне. Арсинь, седеезэ сонзэ — кшнинь. Лиси, кшниськак, пачтиндерясак, лаказевкшны.
[316]
Эрьвась бажи...
Мерить тензэ Ашакай.
Те а истя. Сон ашо-тюжалт. Кодамо илязо уле, мерить тензэ, кода монськак, Ашакай. Вишкине, валаня, стядо пиле. Ванат — вановлить лангозонзо! Велень атяка «ванстыцятне» онстосткак, кеман, нейнить сонзэ. Явныть-арась, алкукскак, сынь мазычинь коряс вейкест-вейкест? Се оно, Черькаень Овтаз, мазыйтнестэ мазый, Аржаень Пондакш лангс аволить варштаяк. Монь койсэ, чарькодить кой-мезть неть тевтнесэ. Теке жо Овтазось, содан, Ашакаень кис анок велень весе кискатнень повсемс, ки лиятненень а максы.
Кискань вечкема...
Весть кудонок-чинек куродызь сёрмайть, раужкайть, пондакшт... Зяронест ульнесть — эзть ловово. Певтеме. Сеске эзь чарькодеве, мезень давол кандынзе минек вальманок икелев. Мейле ванан: эрьванть сельмсэ кивчкаить вечкемань сяткинеть, ды эрьвась эйстэст бажи вастовомс Ашакай марто.
«Ужодо, ужодо, невтян тенк, идемевсень понат! Ашакаень а максса покордамс. Истя каванятадызь, кинтькак тей стувтсынк...» Васняяк пекстнинь ортатнень, пирень варятнень. Мейле анокстынь ёртнемапельть: кирьпець пелькст, мода покольть... Лисинь ушов ды верендинь «леднемест». Пансинь вейкень пес. «Ну, весе», — шождасто таргия оймем ды совинь кудос. Зярыя шкань ютазь варштынь вальмава ды полгарьгадсть сельмем! Икеленек кискань митинг... Седеяк ламо пурнавсть. Савсь таго лисемс.
Истя мон майсевинь ветешка чить.
Те шканть ютазь теевсь тамаша. Мерят, чадыведь шлинзе кудонок перька велицятнень. Кецнезевинь: ура! Ашакаень идия.
Ютась шка.
Та-кода пирявксонь кувалт вачказь пенгтнень алдо каятотсь цийнема. Я! Те мень дюния? «Кискалевкст? Косто сыненст улемс? Каинзе кияк? Кардазозонок кияк эзь совсе... Ашакай?»
[317] Пирявксонть ванномсто эртевинь вана мезес: ве лазонть алксозо наксадозель. Поремс сонзэ ульнесь а стака. Теде башка, пенть алга чувозель лушмине. Нуи... Истямо стака тевде мейле, содави, ульнесть палсемат-кутморямот ды вана шкань ютазь те Цийнемась...
...Минь весемеде превейть, мазыйть, виевть... Минь весементень масторонть лангсо инязорт. Минь, минь, минь... Пе, лиясто тень маряви, а ули шнамо валтнэнень! Кить, алкукскак, минь? Ледсь мелезэм Пупоронь Индял. Кол ульнесь цёрась, эрьва ёндо превей. Ансяк вана... Эвсень симемапелесь. Сонзэ лангс полавтызе весемеде виев ёжонтькак.
А стяко ёвтакшнынзе неть валтнэнь вейке превспутниця. «Ков седе содасыть ломантнень, тов седе мельс тукшныть пинетне...»
Васолдонь вайгель
Ашакай уш аволь од. Кавксошка кизэть тензэ монь ловомга. Кода мерить, эрьвантень — эсензэ. Ве авась сизьгемень иесэ неяви чикор-лакор крандазокс, лиясь — од урьвинекс. Юты, кочкарянзояк модас а токшить. Ашакайгак истятнэде. Иензэ оно зяро, ардтни теке левкске, мукшны шка вастневемс Овтаз мартояк.
Зярдо ванстыцянок майсеви тевень аразде, уды. Лиясто мик цярсо корнозь. Тарказо — кудо икеленек луга панкскесь. Уды, теке кулось. Пильгензэяк венстьсынзе. Содамс: некшни-арась сон онт? Кодат сынь: раужо-ашот эли ламо тюсонь? Кинь седе сеедьстэ некшни? Аволь Овтазонь?
Кода ломантне, истя кискатнеяк: эрьванть эсензэ обуцязо. Вейкесь эйстэст онги чинь-чоп, сиземаяк а соды, омбоцесь чуросто, сень кис вайгелезэ сравтневи веленть келес, колмоцесь... Ашакаень эсензэ «лавшочизэ». Косо сон илязо уле — кардазсо, вальмало, — ансяк мари икельганок кияванть ардыця — машина, велосипед, скал, лишме... — прянь-полдань синдезь, жойсэ онгозь каяви мельгаст. Весе тевензэ стувтсынзе...
[318] Мезень тансть мукшны теньсэ?
Прынь истямо мельс: Ашакайнень пачколить васолдонь-васолдонь покштянзо вайгельть. Сынь, кода ней верьгизтнэ, зярыянь-зярыянь кайсевкшнесть сярдо лангс.
Сестэ эно минек потсо кодамо вайгель вельмси, зярдо, теке превстэ лисицят, кайсевтяно валсо-мейсэ малавиксэнк лангс?
Кадык сон азгун...
Улить-арасть велесэ псакавтомо эрицят? А содан. Ошсо тевесь лия. Тесэ чуросто кие саи мель кирдемс сынст. Кшнисэ вельтязь кенкштне а мерить тень теемс. Велесэ, ды седеяк пек зярдо ломанесь эри ськамонзо, сынтемест а кода.
Патяньгак ули, кода сон мери, ялгинезэ. Сонсь ашо, кургинезэ ды лапинензэ — раужот. Лемезэ Кашлай. Сынь кавонест вечксызь каштлангсо сэставтнеманть, Кашлай — весемеде пек. Минек песэ, кеман, лембень истямо вечкиця арась.
Сэрьс-келес Кашлай аволь покштнэде. Од шказо умок ютась, те лангс апак вано, пекень пештема а соды. Свал вачо. Зяро тензэ иля кая, урядасынзе. Ков зняро пори — превс а саеви. Веши, кода машты. Чары-вели пильгеть юткова, секень вант, правттанзат. Сялгсынзе сельмензэ лангозот ды учи... Кода а максат мезеяк тантейне истя ветицянтень! А максат, сонсь саи. Ансяк стят-велявтат стуворонть экшстэ, сон уш тосо. Апак вельтя мезеяк а кадат. Понгонеськак тензэ тень кис аволь весть. Стяко, эци эрьва козонь визьксэнь апак сода. Истя пря три.
Омбоце ялганок, Ашакаень, коензэ лият, лиякс пекензэ пешти. Ансяк нейтянзат, пулозо паразеви велямокс. Сеске мади пекензэ лангс ды уезь уи каршот. Вановтозо?! Цивтердозь-цивтердыть сельмензэ, вешить. «Вечктян, вечктян! — тошкить теть. — Каиндерят мезеяк, седеяк пек карман вечкеметь». Кода а каят истя энялдыцянтень, седееть а кирди. А максат, поладсы нернеманзо [319] лиякс: мади кутьмерензэ лангс ды ушоды лапинесэнзэ ахолямо. Сонсь ваны лангозот... Ах, те вановтось!
А содан мекс, ансяк набой Кашлай седе мелезэм тукшны. Кадык кежем савтни, кадык сон истямо лытагай, сонзэ мон вечкса.
Покордамо
Озязонь полккенть теке варма нолштызе. Ш-ш-р!.. — каятотсь пертьпельганть. Сынь валгсть ламартнень пряс, ды чувтынесь, мерят, полавтовсь. Лекшеденть сиякс цитниця тарадонзо мазылгавтызь горниповт.
Вастневи те тюжала сёлмине нармуннесь эрьва кува. Сонзэ ваньксстэ жойниця «чив-чив» вайгелензэ марясак лато эли пирявкс прястояк, келей килангстояк. Вастоват мартонзо вирьсэяк, паксясояк. Ков иля моле, сон тосо.
Мелезэм тукшны ояксчисэ эрямонзо кис. Чуросто нейсак ськамонзо. Вешнемс ярсамопель, удома таркине — весементь теить вейсэ. Вейкень-вейкень туртов апак лезда телень тол якшамотне ды седеяк пек ловтне-даволтнэ авольть изняво.
Савкшны истят валткак марсемс: те нармунесь, келя, сехте пек сюронь паксятнень лангс кайсеви. Те весе, — чевтинестэ мерезь, чаво кортамот. Сондензэ лезэв нармунь а муят. Зяро унжат-шанжат кандтни левксэнзэ трямсто — превс а саеви. Секскак парозо тенек пинге а пандови. Пандомадонть ледстнемскак а мезть. Куш лоткавлинек лангсонзо нарьгамодо:
Вор! Воробей! — лемдить сонзэ рузтнэ.
Эрзятне дёлязь лемдизь — озяз — озямонзо кис.
Покордамось — шнамо
«Кежей кодамо! Теке пача кайсеви...» — савкшны марямс ломанень кургсто ломанде. Мезеяк а ашти псинзэ пачк лемдямс верьгизэкс эли гуекс. Улиндеряй ава — кобракс. «У-у, кобра!» — рангсты лиясь ды сюлми мельганзо истямо вал, пильге лангсто прат.
[320] Совить пилезэть неть «зоопарконь» тешкстнэ ды арсезеват: кить, алкукскак, минь?
Верьгизт?
Аволь.
Верьгизтнэ кайсевить вейкест-вейкест лангс ансяк вачочиде, левксэст идемстэ, таркань кис. Лиякс меремс, верьс стяконь кис а пачколить.
Мезе а сатны ды мезень кис кирьгапакшос кундси весемень лангсо «инязорось»?
Турвань артовкске, мазый тешкс марто нулыне, ченькс сулика, трокс варштавкс... Вана толгельтне, конатнень эйстэ, визькс тенек улемаль, гувкаить толбандят.
Вирень «ялаксонок» чевтинестэ кортамонь наукат а ютыть, университетэст арасть.
«Экзамен» валонтькак а содасызь. Тень кис пародо ды берянде койтнень топавтыть педе-пес. Ветить эсь пряст «ломанекс».
Таго верьгиздэнть.
Сондензэ ламо ёвтневи ёвкстнэсэ, косо сон превей, ёжов ды нардев. Ули, ёвтазденть башка, эрямонь лувсонзо лия ёнкскак: сон кочки ве авака ды явови нистэнзэ, ансяк зярдо понги ледницянь сельме икелев.
Миядонть кортамскак а мезть. Сон — весть вечкиця ды нинь полавтнемат те пачась а соды.
Сонзэ ваксс аравтомс «инязоронть» визькс.
Эно кить минь сестэ?
Превсэть зяро иля кайсе, зяро иля майсе, лиси истя: «кобра», «пача», «гуй», «верьгиз» ды лия лемтне тенек — алкуксонь шнамо валт.
Вадря тосо, косо минь аразтяно
Стака, ёвтнить, ськамот эрямс. Вал а марят, пшкадемскак а кинень. Паро куш ней телевизоронть полгаря сельмезэ кувтолды, яла ялга.
Седеяк ламо майсемат канды ськамочись аваломанентень. Кодат сынь, соды ансяк чатьмониця тодовось. Эрьвась [321] эйстэст те а шождыне канстонть канды эсензэкс. Вейкесь рипакады, прок валскень кельме вачкодьсы, омбоцесь кунды мадстеме сэредьксэнть «палыця» ведьсэ, лиятне прянек-пильгенек совсить кодамояк вейсэнь валдонь кандый тевс.
Монень лиясто маряви, лейтне-лейнетнеяк шольнезь чиить ськамост кадовомадонть. Чиить удалов апак варштне.
Вейсэ, вейсэ, вейсэ.
Монгак кавто таргодо ламо ськамом а цидярдан. Ансяк аволь весе истя арсить. Ве содавикс ялгам
тень каршо истя мерсь: куш куломадом икеле ськамочисэ оймсемс.
Олячи
Кирдемс пекстазь нармунне, кода ламот тейнить, мелезэм а тукшны. Вечкат — а вечкат, эрямонть — эсензэ коензэ.
Уш омбоцеде ки соды косто совась кудозонок попугай.
Мезе теемс? Нолдамс мекев?
Врады. Ёми.
Савсь рамамс сонзэ кирдемга мезть эрявить.
Олячи...
Сондензэ тантей-эрявикс, монень маряви, мезеяк арась. Весемеде питнеекс лован олячинть ды теемс се тевенть, кона канды мельспаро ды а сизевти. Улевельгак истя, эрявлинек ламоксть седе парсте. Ансяк эрямонть, таго ледстяса, коензэ эсензэ. Сави котьмамс сеньсэ, мезесь андтанзат эли куш кшикочом максы.
Кувака пуло ялгинентькак минек кондят тевензэ.
Истя ушоды рангомо, зярдо пекстаса туворозонзо, куш кудот кадык. «Нолдамак! Нолдамак!» Сави панжомс кенкшензэ.
Ансяк вана...
Ливтни-теи, ютавтсы тошначинзэ ды сонсь сови налкставикс кудынезэнзэ. Ков лияв молят? Тосо лиясто кансёрот, лиясто чиньжарамот. Веднеськак а маштни.
Мезде лиядо, пекеде олячи стака муемс. А стяко мереви: ломанесь — модамасторонь инязор, теке марто эсь пекень уре.