Поладкстомо (2016)/Истямо сонзэ обуцязо

by Нуянь Видяз

[332]

Очерк

ИСТЯМО СОНЗЭ ОБУЦЯЗО

Минек содавикс ломантне...

Ёвтнемстэ Федор Иванович састо велявтнесь альбомонь лопатнень. Войнань шкань фотографиятнень ванкшномсто сельмеванзо, мерят, ютась сув. Сон аламос каштмольсь ды ледстинзе сеть стака иетнень.

...Частесь, конасонть служась Ф.И. Сетин, вастызе ятонь васенце толонть. Солдатнэнень савсь печтямс пек стака тюремат, ды уш 1941-це иень умарьковонтень кадовсть эйстэнзэ ансяк зярыя ломанть. Сынь кувать эзть лисеве ятонь пинксэнть юткосто, ламот саезельть полонс. Истя Федор Ивановичненьгак савсь неемс эсь сельмесэ ды киськесэ фашистэнь лагертнень «мазычист».

Стака теде ледстнемс ветеранонтень, ялатеке сон а стувтни: пленсэяк минектне, эзть синдеве ятонтень, тосояк верьга кандсть советской ломанень лементь.

Ветексть сайнизь Ф.И. Сетинэнь пленс ды ветексть сон оргодекшнесь. Меельцекс ульнесь Харьков маласо Лозовой ошсонть.

[333] — Минек панимизь скалонь кардс, — евтни Федор Иванович. — Сельмес сеске каятотсь: полонс саезтнень ютксто вейкесь кортни немецень офицер марто. Эзинек кеме васня: те предатель, алкукс лиссь самай истя. Уш чокшне юткстонок сайсть кавто ломанть, читькак, зярдо кармавтымизь стямс стройс, сон невтсь таго кавто офицер лангс. Зярдо строенть нолдызь, ды ванстыцятне кадымизь, минь эзинек кирдеве, весе каявинек микшницянть лангс ды повинек.

Зярдо туростортнэ састь, ятось уш ёжовтомоль. Мезе ули теде мейле, весе парсте чарькодсть, секс ансяк учость, кода сынст тердьсызь кевкстнема таркав. Сетинэнь ды лия колмо цёратнень явизь весень эйстэ. Ней учок куломанть.

Ансяк лиссь вана мезе. Ванстыцятнестэ вейкесь, кода Федор Иванович чарькодсь кортамстонзо, ульнесь словак. Келенть, конасонть сон кортась, Федор Иванович аламодо содылизе, секс чарькодсь, мезе тона корты. Весть кода-бути ваксканзо ютамсто Ф.И. Сетин маризе, кода тона моткоди мезе-бути пеень пачк. Лоткась ды маринзе валонзо: «учотано эсэсовецт, конат кармить тынк леднеме».

Се вестэнть мольсь виев пиземе. Ёндолось кивчкаесь апак лотксе ды валдомтсь пертьпельксэнть. Пиземе алга пансть тей пленс саезень од партия. Сетингак човорявсь юткозост. Сон редизе: кенкшенть вакссо ашти се ванстыцясь, кона ёвтась тензэ эсэсовецтнэде. Лоткась малазонзо ды састо, чачома кельсэнзэ кевкстизе, кие сон.

Ламо валт арасельть ёвтазь. Васня торосторось аштесь, мейле ландясь, нежедсь винтовканзо лангс ды автизе кургонзо: «Удомам сась!..»

Сон, алкукскак, теке матедевсь, ды те шкастонть, зярдо лия ванстыйтне срадсть ве ёнов, Сетин вейке цёра марто ношкстасть кардстонть лагерень ортатнень тона ёнов. Но лиссь апак учнень тев. Ялганть пильгезэ понгсь кодамо-бути кшнис, тень эйстэ каятотсь зэрть. Ушодовсь леднема. Ялатеке цёратне оргодевсть. Шкань ютазь ютызь фронтонь линиянть ды пачкодсть эсь частезэст.

[334] Меельце колмо иетнень Федор Иванович фронтсоль. Тюрезь-недявозь ютась Украинаванть, Молдавияванть, Болгарияванть, Венгрияванть. Ульнесь полконь разведкасо, аравтозель взводонь, мейле ротань командирэкс. Е. Долматовский поэтэнть марто важодсь газетасо. Колмоксть томбазель. Но стясь пильге лангс, ды, видьстэ меремс, кеместэ стясь.

Мезесь лездась те ломанентень эрямосонть, мезесь макссь вийть изнякшномс стакачитнень, кемемс вандынь валдо чис? Чарькодемс тень, арсеви, а стака. Сон чачсь эрзянь семиясо, косо ульнесь кеменце эйкакшокс. Велинесэнть, косо сон эрясь, паряк, ульнестькак ансяк комсь кудот. Захаркина эрзянь покш велентень кото вайгельпеть ды сетнеяк — вирень пачк. Каня нолдасак сисем иесэ эйкакшонть тов ансяк тонавтнемань кис?.. Васенце классос мольсь, зярдо сонзэ иесэ цёрынетне ды Тейтерьнетне тонавтнесть уш колмоце — нилеце классо.

Федорнэнь кувать эзь саво аштемс васенце классо. Сень неезь, кода эрязасто сон ловны, вадрясто реши задачат тонавтыця авась ютавтызе омбоце классос. Тонавтнема од иестэнть кувать эзь саво якамс школав: вансь кудосо сазорканзо. Но уш истя покшоль мелесь тонавтнемс, истя бажась ламонь содамо, мик кудосо аштезьгак яла ловнось ды тонавтнесь. Секс уш нилеце классос тонавтнеме мольсь лелянзо марто.

1937-це иестэ Федор Сетин пек парсте прядызе Вишка Толкайсэ педагогонь техникумонть, важодсь школасо, ды уш комсь иесэ ульнесь школань директорокс, теке шкастонть тонавтнесь заочна Куйбышевань пединститутсо.

Одонь содамо бажамось кармавтсь сонзэ войнадо мейлеяк молемс тонавтнеме. Экзаментнэнь максынзе Московонь модаоень (нефтень) институтс, зярыя ковонь ютазь чарькодсь: те аволь сонзэ тевесь. Превензэ яжавтсть Федор Достоевскоень произведениянзо, минералогиянь лекциятнесэ сон арсесь Анна Каренинань а стувтовикс чачодонть. Секс теке шкастонть Федор [335] Иванович ушодсь тонавтнеме Московонь пединститутсо. Лездась фронтсо кастозь кемечись, эрзянь обуцясь. Ды кадык лиясто савкшнось ве шкасто макснемс экзамент кавтонест вузтнэсэ, тонавтнеманть сон ялатеке прядызе вадрясто.

Ламо вийть макссть вадря ломань марто вастовоматне.

Фёдор Ивановичень эрямозо истят вастовоматнесэ пек сюпав. Пединститутонть прядомадо мейле сонензэ савсь вастовомс Федор Фролович Советкин марто, конадо сестэ истя мерстькак: «Эрзянь паз». Педагог ды превей, седеймариця ломань, сон ламонень лездась муемс эрямосо эсь кинть. Зярдо вастовсь Сетин марто ды кармась содамонзо, кармавтызе сонзэ молемс аспирантурав.

Школасо важодемстэ уш Федор Иванович кемсь: эрзянь эйкакштнэнь туртов содамочитнес кись ушодови художествань литературанть ловномсто. Секс наукасо васенце важо левксэнзэяк сон лемдизе истя: «Мокшо-эрзянь школань 5-7 класстнэсэ художественной литературанть ловномась». Кармавтомс эйкакштнэнь неемс рузонь келенть вельде эрямонть мазычинзэ ды сюпавчинзэ, кемекстамс эйзэст паро мельть-арсемат, — тенень алтазель се материалось.

Тень эйстэ, мерема, ушодовськак наукав сонзэ кись. Течи Федор Иванович Сетин — филологиянь доктор, СССР-нь Журналистэнь союзонь член, профессор. Сон важоди Московсо Культурань государственной институтсо литературань кафедрасо, сёрмадсь ламо научной статьят, конат мейле лиссть башка книгакс. Профессоронть теевксэнзэ содасызь аволь ансяк минек масторонь литературоведтнэ, содасызь Франциясо, Польшасо, Румыниясо; ГДР-нь, Англиянь, Сириянь, Франциянь од ученойть важодсть Ф.И. Сетинэнь кедьало.

Содавикс ученоесь-филологось а стувтни эсь раськень ломантненьгак. Сарансо лиссть сонзэ ламо книганзо эрзянь ды рузонь кельсэ.

Сетин профессорось ловови покш специалистэкс эйкакштнэнь туртов литературанть коряскак.

[336] Тедеде Московсо ютавтовсь эйкакштнэнь туртов литературань тонавтнемань Раськеютконь вейсэндявксонь ветеце конгресс. Сонзэ эйсэ пачтямо тейсь минек содавикс ломанесь Федор Иванович Сетин.

Газета «Эрзянь правда», 1981, 11.24