Пици-палакст/Историянь гарячка...
| ←Кунсолок, эрзя! | Историянь гарячка... (1927) by |
Ванстынь — и карман ванстомо→ |
| Пици-палакст. Ёвтнимат ды фельетонт. СССР-энь Наротнэнь Центрань Издательствась. Москов, 1930. — с. 85—90 |
ИСТОРИЯНЬ ГАРЯЧКА...
Москов — ошось покш.
Московонь ульцятне кичкереть, мерят, шайтян меньшинзе. Московсо ламо ломать эрить. Эрьва кодат. Сюпавт и нищейть, виде ойметь и маньшицят, превейть и дуракт.
Улить пек превейть. Тонавтозь.
Московсо улить эрзяткак. Эрьва кодат. Улить учонойтькак.
— Месть кортат?!
— Виде паро!
— Иля кенгеле!
— Сак вана...
* * *
— Нать, Московсо виде паро улить тонавтозь эрзят?
— Сядоксть, нать, теть ёвтамс?
— Кемдян. Месть тейнить?
— Робутыть?
— Кодамо роботаст?
— Сёрмадыть...
— Месть яла сёрмадыть?
— ? ? ? ? ? ?
Аламне „шайтянонь чарыденть“.
— Эй, кооператор!
— Мезе теть эряви?
— Товартнэнь ланкс питнетнень алкалгавтынк?
— Умок уш!
— Колбаса фунтонть зняро питнезэ?
— Кодкемень трёшник.
— Мекс пек питней?!
— Мень питней?
[ 86 ] — Косо жо питнень алкалгавтомась?!
— Мень питнень алкалгавтома???
* * *
— Эрзятне умок появасть масторонть ланкс?
— А повнявияк зярдо!
— Историяст ули?
— Рустнэ мерить „история богата!“
— Кияк сёрмады эйсэнзэ?
— Мезенть?
— Историянть...
— Месть лабордат?!
* * *
— Монь койсэ, народонть прятне поцо „светопреставления“ кармась сырьгамо...
— Мекс истя?
— Ды мезе, натой, все кармасть сёрмадомо...
— Месть яла сёрмадыть?
— Содазь месть: конат — история, конат — словарь, конат — граматика. Прок, ай, стенас кснавт чавить!
— Кадык сёрмадыть, коли кедест кинетить.
— Монгак истя мерян: кадык сёрмадыть. Паряк — оймить колияк...
Пеле масторось эрзя-мокшонь, эли Самаронь историкне.
— Шайтян, тон мезеяк а содат.
— А содан, стака давул саинзат! Месть ёвтат?
— Од кулят течи маринь.
— Мазыть?
— Преветькак чаракадыть!
— Месть онксят?!
— Кедень-пильгень коськест!
— Ёвтнить седе курок!
— Самарс появасть историкт...
— А кемиват мекс бути.
— Сельмень лисест, бути маньшан!
— Кить истя не ломатне?
[ 87 ] — Колмо эйстэст: вейкесь сыре, омбоцесь — седе од, колмоцесь пек однэ эщо. Превейть ломатне!
— Парсте сёрмадыть?
— Да. Курок дивадо пештясамизь...
— Мейсэ?
— Вана мейсэ: вейкесь корты: Макар Евсеевичнэнь историясь а сёрмадови. Сонзэ арась „марксической мировозрениязо“. Истя вана эряви сёрмадомс историянть: „Тула ошонть сроизь эрзят. Тула — эрзянь валось. Киев ошонтькак эрзят сроизь. Киев — эрзякс гуй. Саратовгак эрзянь. Саратов — сюронь тов, эрзянь валт. Харьков — эрзянь. Карень ков, эли лиякс, ковось прок карь. Эрзянь вал. Эстониясояк эрзят ульнесть. Столицасть лемезэ Ревель. Те эрзянь валсто — реве. Китайсэяк эрзят ульнесть. Столицаст лемезэ Пекин. Эрзянь валось — пеке...“ И эщо ламо кой-месть кортась историкесь...
— Ха-ха-ха-ха! О-хо-хо-хо!
— Месть ракат! Нать берять историкне?
Весе масторось эрзя-мокшонь, эли „Пенза рекорд сайсь“.
— Не вана кулят тык кулят!
— Таго, натой, историядонть?
— Эно мезде! Эряви сёрмадомс!
— Ки таго „сёрмадыцясь“?
— Пензань историк. Те вана ломань! Пря макссь тензэ пазось!
— Удемев, мерят, прязо?
— Натой Соломононь прядонть вадря. Соломононь прясь те историкенть пря черьдензэяк айащи.
— Месть сон сёрмады?
— Парт штукатнень ёвтни: весе светэнть кундызе.
— Ну!!?
— Вот теть — ну! Весе светэсь лиссь эрзя-мокшосто. Кунсолок кодамо научной „истинасо“ пакштяди историянть:
— Лондон — лондаць. Токио — токия. Париж — паризе (банясо эли локшосо паризе). Варшава — вор чави. Бухарест — бука ресты. Амстердам — амсордемс (каподемс). [ 88 ]Америка — мерика (мерик, ёвтык). Коканд — кокадемс (вачкедемс).
— Сатыть, некетькак сатыть! Пекем сезевцак! Куловцамак раказь!
— Ават эзь куло, тонгак а кулат!.. Корея — карыя, сокария. Япония — поныя (лошконть эли пиксэнть). Кантон — кант тон (ловсо эли лия). Мукден — мук тон, мезеяк мук. Монголия — мон колыя. Норвегия — норовия (годия). Сербия — эрбия (вачкодия). Испания — пания (ломаненть пания).
— Саты, идемевсь! Лоткавтык гуень келеть. Жалить сюлонь-пекень.
— Ней кемат, што весе светэсь лиссь эрзя-мокшосто?
Вадря историясь? Тон кода арьсят?
— Вадря, вадря, ансяк лоткак ёвтнимадо!
— Ней куть лоткак, куть лия...
— Мекс?
— Секс самай: истят „исторической даннойть“ печатазь газетсэ. Сынст эйсэ ловныть эрзя-мокшотне.
— Косо печатызь?
— Содазь косо. Пензасо, газетэнть лемезэ „Од веле“.
— Кодамо... ломань печатызе?
— Муевсть истят мудрецт.
Остатка вал, эли „сон всех давиш“.
— Шумбра чи!
— Тонтькак се песэнть!
— Тевтне яла молить...
— Мень тевть?
— Историянь тевтне.
— Тон таго историянть? Листь кудостонть.
— Загодь иля причавкшно, кунсолок васня, месть ёвтан...
— Курготкак иляк автне! Пилень потомдасынь.
— Историянть курок печатамонзо кармить.
— Пензаньсенть?
— Вейке ломань сёрмаць виде-паронь история.
— Кода ломаненть лемезэ?
— „Всех давиш“!
— Мекс истямо?
[ 89 ] — Ули вейке ёвкске: паксясо аштесь куло алашань пря. Потмозонзо эрямо совасть чеерь, криса, нумоло, ривезь ды верьгиз. Мейле мольсь овто. Сонзэ кевкстизь:
— Тон кият?
— Я вас всех давиш! — мерсь овтось. Озась сон алашань прянть ланкс и весе звертнень лепштинзе.
— Чаркодинь.
— Мелезэнь паро! Мон арьсинь преветь сыре грацень...
Теде мейле — весе.
— Пенза ошось берянь. Рудазось пек ламо эйсэнзэ.
— Сень кис Самар ошось мазы: Рав чиресэ сроязь.
— Пензань перька ламо мокшот эрить.
— Самаронь перька — эрзят.
— Пензасо ули историк.
— Самарсо — колмо.
— Московсояк улить...
— Сынст лемест сёрмацызь историяс?
— Сёрмацызь.
— Кодамо буквасо?
— ? ? ? ? ? ?
* * *
— Ломатнень мейсь мурнить—сёвныть?
— Берянь тевень кис.
— Эрзянь-мокшонь научной ды литературной роботникне мезень кис мурнимакт?
— Ламонь кис. Сынь вейкест-вейкест а содыть. Робутыть башка-башка. Ютксост арась связь. Эрьвейкесь омбоценть лови шожда превекс. Вейсэ-лувсо, ве превсэ и ве мельсэ кияк а робуты. Тестэ и лисить весе апаро таркатне:
Вейке сеери: „Ваян материал поц“, — но тев арась меньгак. Омбоце роботы тия-тува пурназь сускомо ланксо, — тев таго арась. Колмоце пурнась ламо материалт, клукакс озась лангозост — и малазонзо иля эце. Нилецетне кармасть пурнамо эрьва мень „тамашат“, мень бути пейдима валт и нень эйстэ арьсить сёрмадомо история. Истямо историянть марто васов а йардат. Сон курок сёрмадови, но седеяк курок стувтови. Крылов коли бути истя мерсь:
[ 90 ]„Писатель, берясь ты за работу, |
Кой-кинень не валтнэнь стувтомс а эрявить.
Москов. ГИЖ 1927 ие.