Колхозонь эряф/1941/03/Иван Девицей
| ←Аф удалаф ки | Колхозонь эряф (1941), № 3 Март edited by Игнатьев Г. А. Иван Девицей |
Валпрякс→ |
| Колхозонь эряф. Эрь ковонь литературно-художественнай и общественно-политическяй журнал. Мордовскяй Советскяй писателень союзть органоц. — № 3 Март 1941. — с. 83—86 |
| ИВАН ДЕВИЦЕЙ |
Ульсь оцязоронь стирь. Эрясь сон дворецса и козонга афоль лисенде. Йотась мзяра нинге, сон кармась содама алянц конюхонц мархта, конань эзда пекиясь.
Аляц — оцязорсь — содазе, што стирец пекиясь конюхть — низкай ломанть эзда. Конюхть сянкса шавозе. Сяда меле пуроптсь эсь баяронзон, и кармасть арьсема, кода сяда мучендазь шавомс стирть. Конат корхтайть, што сотома стирсь алашань пулос, и алашась нолдама наксяв арнема; конат корхтайхть — пякстама тюрьмас и кулофтома вачеда.
Ся пингть, мзярда корхнесть стане стирть колга, ошева ётась анци сире атяня и сувась дворецу. Кулезень валснон синь и макссь тяфтама предложения: стирть аф машфтомс, аф пякстамс, а нолдама коза няи сельмоц.
Стане и тисть. Стирть нолдазь.
Стирсь мольсь-мольсь фкя шири ламос али аф ламос — тихтедсь велес и сувась фкя кудс удома. Тозк и шачфтсь. Шачфтсь сон цёра, путсть тейнза лем Иван Девицей.
Идсь кассь аф шиста-шис, а частста-частс. Йотась аф лама ши, Девицей кармась ни корхтама. Вов сон и тядянцты мярьги:
— Тяни, тядяй, нолдамак кядьстот. Монцьке ни мархтот якаван ялга.
И тусть синь ся веленяста. Мольсть-мольсть паксява — савсь киснон инголе ляй. Ляйть туркс строяф оцю седь, седть ваксса столба и шавф тоза седяфкя, коса ульсь сёрматф: «Тя седть ланга ётни богатырь».
Иван Девицей тядянц мархта думандасть учемс тя богатырть. Ащесть аф ламос — кульсазь, сай богатырсь. Пачкодсь седть малас, пупордась алашац. Богатырсь корхтай тейнза:
— Мезьда эводеть, мес тон пупордать, ялгай? Минь тонь мархтот эвфтиньке ашель и афи ули. — Аньцек кенерсь валонзон азомс, маряй седть алда вишке вайгяль:
— Тят фаленда инголькиге! — Иван Девицей лиссь каршезонза и тага мярьги: — Давай-ка варжасаськ, поганай богатырь, эсь вийньконь, эста няйсаськ, ули али аш тонь эвфтице.
Эстокиге кярьмодсть тюрема. Тюрсть ламос. Поганай богатырсь кармась сизема. Мекпяли Иван Девицей эрьхтезе сонь пря ланга, и пезсь сон сисем аршитт модав, и тись пря кулыкс. Пельсь педа-пес аделавомда. Иван Девицей корязонза ульсь ламонь-крда таза.
[ 84 ]Иван Девицей няезе, што врагоц — кула, и тусь тядянц мархта сяда тов.
Мольсть ламос али аф ламос, но кармасть синь пачкотькшнема кели паксяс, конань лангса работасть лама сядот ломань.
— Кинне тя паксясь, алянят-аванят, и мес лангсонза тяфта ламос работатада? — кизефтезе народть Девицей, мзярда нежедсь малазост.
Народсь отвечась, што тя паксясь поганай богатырть, што тяса шинек-венек работакшнихть стак лангс.
— Мон поганайть шавине. Арда тяни эсь кудгант и спокойна эряда, кивок тинь оду аф токатядязь, — мярьгсь Девицей, и народсь кармась тушендома.
Тяфта молемстост лама шит синь васьфнесть ломатть, конат работасть поганай богатырти.
И вов фкя шиня няйсть инголест оцю куд. Пачкодсть малазонза, синдейст азондозь, што тяса эряй поганай богатырь, а сейчас аш кудса — тусь разбойничендама.
Иван Девицей тясонга азондозе, што поганай богатырть шавозе. Народсь тя куляти пяк кенярдсь.
А поганай богатырсь седть лангста Иван Девицейнь тумда меле ваймосесь-тись, кочкась эрьгя и лиссь модать потмоста. Веть кяшендезь, ниле пильге лангса мольсь эсь кудонц малас, сяльде салава сувась седялозонза.
Мзярда Девицей тусь паксяв якама, поганайсь лиссь седялда и кармась корхнемонза Иван Девицейнь тядянц, штоба машфтомс сонь цёранц, а сонцень сявомс рьвакс. Тядяц согласиндась, но цёранц шавомда пельсь. Думандакшнесть, думандакшнесть поганай богатырть мархта и кода-аф кода думандазь, кода юмафтома цёрась. Тядяц тии пря сярядикс, и кучсазь Девицейнь колма мастор вельф тишенкса, конань сивомда меле прибавай вийце. Ся тишеть ванцы кота пряса куй. Синь арьсесть, што кда моли авать цёрац тишенкса, куйсь сонь сивсы. А кда аф сивови куйти и канды тишет, то ся тишетнень сивсыне аф тядяц, а поганай богатырсь. Тянь эзда касы сонь вийц, и шавсы мле Иван Девицейнь.
Кода арьсесть, стане и тисть.
Сась Иван Девицей паксяста, тядяц куфксни вастса и корхтай:
— Эх, церай!.. Тячи мон вишкста сярятькстонь. Сашендсть варжамон ломатть, корхтайхть, што колма мастор вельф касыхть стама тишет, конатнень эзда кодак ярхцат, и пчкат. Тон ба молелеть стама тишенкса, кандолеть, и мон ярхцамда меле пчкялень. А тяфтак аф кирдян, кулан.
Иван Девицей ластязе эсь алашанц и тусь. Ардсь лама шит. Пачкодсь азф вастти, коса касы ся тишесь. Тишесь — оцю шяй кучкаса, коза коданга аф эцеват, фкя вастта башка, коса ащи кота пряса куй.
Аньцек варьхмодсь, Иван Девицей мольсь куйть малас, и ушедсть тюрема. Куйть шавозе сон. Сязсь тоста тишет и тусь меки куду.
Кудса туф тишетнень тядяц андозень, цёранц паксяв тумдонза [ 85 ]меле, поганай богатырти. Но богатырсь, кодак сивозень тишетнень, марязе, што вийц Иван Девицейнь каршес нинге аф саты. Эста сон мярьгсь кучемс Иван Девицейнь колма мастор вельф вейхкса пря куйть эшксста стиренкса. Ся стирсь кармаль ухаживандама тядянц перьф, и тядяц Иван Девицейнь пчкяль. Но стирть куйсь апак тюрьхть коданга аф макссы, а кармайхть тюрема — цёрать обязательна шавсы.
Кода арьсесть, стане и тисть.
Сась Иван Девицей паксяста, тядяц и корхтай тейнза:
— Цёрай, монь шиста-шис урмась солафты эсон. Тяфтак ни аф пчкан, маряса. Азондыхть, колма масторонь вельф, вейхкса пря куй эшксса стирь ули. Сон кармаль монь перьфкан ухаживандама, и монь ёталь сярятьфозе. Тук ся стирть, цёрай. Кда ни аф тусак, мон кулан.
Аньцек варьхмодсь, Иван Девицей тусь. Мольсь сон лама ши. Куйть эряма вастонц маласа валгсь алашанц лангста. Алашанц сотнезе шуфтоняс, сонць тусь куйть шири ялга.
Куйсь ичкоздекиге няезе сонь и кармась кургстонза ноляма толмархт. Но Иван Девицей ашезь эвфтев. Сон эцесь лангозонза. Кармасть куйть мархта тюрема. Сязьсы куйть фкя прянц — меки полады, сязьсы омбоцеть — сявок полады. Конацка ашезь сясконде. Мекпяли куйсь Иван Девицейнь сазе алонза. Тяса сонь улель ни пец... Но вдруг марявсь алашань цяфама. Ардсь сонь лишмоц и кармась куйть тапама. Сязендезень сембе прянзон, и Иван Девицей матразень синь кев алу, а сонцень куйть плхтазе.
Сявозе Иван Девицей ся стирть, кона вете кизот ни ащесь темницаса, и састь кафцьке куду. Стирсь якафты-ваны тядянц мельге. Сон ульсь аф азовомшка мазы, весёлай. Иван Девицей ков ши, то сяда пяк кармась кельгомонза.
А поганай богагырсь и Иван Девицейнь тядяц станяк кирдсть прясост мяль, кода ба машфтомс Иван Девицейнь. Раз куйти ашезь шавов, синь арьсезь шавомс сонь синць, веть удомбачк. Аньцек мадсь фкя веня цёрась, матодовсь, — поганай богатырсь и тядяц шавозь сонь. Калмазь колма ки рашкс, а стирть омбоце шинякиге панезь.
Йотась лама пинге, стирсь шачфтсь колма цёрат. Цёратне кассть и кармасть кизефнема, коса алясна. Тядясна азондозе, што аляснон шавозе поганай богатырсь и калмазе ки рашкс. Цёратне тя куляти аварьгодсть. Пяк ужялькс арась тейст алясна. Сяльде решили вешемс аляснон калмонц.
Омбоце шиня, аньцек лиссь шись, озондсть синь шкайти и тусть кизост. Лама шида меле музь калмонц, штафтозь и таргазь Иван Девицейнь. Меле вешсть живой ведь, валозь ся ведть мархта, алясна сргозсь и мярьгсь:
— Эх, куватьс удовонь!
Цёранза тейнза корхтайхть:
— Кда аф минь, тон удолеть кувака удомаса — вечна.
[ 86 ]Мрдасть куду. Иван Девицей содазе эсь аванц. Кенярдемась пефтомоль. Тисть пир. Пиравасть ламос.
Мзяра ши ётазь, тусть поганай богатырть пяли. Машфтозь тоса кафцьконь: поганай богатыртьке и Девицейнь тядянцка.
Иван Девицей тядянц шавомста мярьгсь:
«Смерть ся ломанти, кона мишендьсыне эсь ломанензон!»
«Смерть изменникти!»
Иван Девицей цёранзон мархта тусь меки, и кармасть эряма павазу эряфса.
| Сёрмадозе Карл Черакшев (Атюрьевскяй райононь Барановка веле). |