Колхозонь эряф/1940/09/Грива мархта ворхт

 

 

ГРИВА  МАРХТА  ВОРХТ

Эрясть синь колмонест: сонць алясь, бабац и кемгафксува кизоса цёрасна.

И синь алят-цёрат наживасть лама ярмак. Но атясь ёфси сиречнесь ни и марясы — курок кулы. Эста тердезе сон цёранц и макссь тейнза завещания:

— Ну, цёрай, монць, няйсак, калму ванан ни — кулан... Тядяцень кулхцончнек, винада пяк тят симонде, ломанень разумса тят эря, ичкозьге торгавама тят яка, кудонь трёшниксь цалковай тии... — и аляц кулось.

Цёрась ушедсь алянц лаца торгавама и сявонди оцю польза. Ярмаконзон кармась лувондомост аф сотняса, а тыщаса. И сон кулезе, што фкя ичкоздень ошса пяк уцест алашатне. Кеподсь мялец молемс тоза.

Наряжась купецекс, сявсь мархтонза лама ярмак и тусь ся ошу — алашань рамама.

Пачкодсь тоза и кизефни, коса таборсь. Тейнза няфтезь, што вона няеви губорса. Тусь губорть пяли, васьфтсь молембачк наряжаф баба. Бабась ваны — аф тя маластонь ломань. Лоткафтозе цёрать, здоровондась мархтонза, кизефтезе, кодама ошстонь.

Цёрась азондозе.

— Эй, да тон тейне раднят. Аляце шиса аш, кулось... Эх, пяк цебярель ломанць. Да вдь тонь тяса эряй сестраце. Тон афи содасак: мон вдь тонь ванекшнихтень. Эрянь пялонт нянькакс. Грехс сувань, аляцень мархта балвондань... Шачфтонь стирь, сон тейть пцтай родной сестра. Тонь бта шкайсь кандонзе!.. Тяни аде мархтон. Минь эрятама пяк козяста, кудоньке колма этажса. Тоса удат, сестрацень мархта няйхтяда, и ванды шобдаванга мольхтяда кафоненть. Кда мяльце, айдясть сембе таборть, ярмакне сатыхть.

И вага синь пачкодсть. Бабась чаказе кенкшть, и марясазь, кальтьфса валги куцемава барышнясь — „цёрать сестрац.“ Панжезе кенкшть и кизефтезе:

— Тядяй, а тя кие мархтот?

— Тя, стирняй, самай братцень шкайсь кандсь, самай конань азонкшнень фалу.

— Прокс?! — И стирсь пяк кенярдсь, ушедсь палсемонза.

Сувафтозь цёрать пяк убраннай залу, путсть шра лангс оцю угощения. Корхнесть синь мянь позднай илядти. И вов бабась и мярьги:

— Ну, идняне, давайте тяни маттама. Тинь арда сестрацень спальнязонза, тоса кафта кроватть. Удотада, а шобдава ранакиге мольхтяда базару.

Корхнесть-тисть васта трваса. Цёрась копордафоль винада и, сяс курок нувазевсь. Панжезень сельмонзон, ваны — сестрац аш тоса. Тя кенкш кундамати кярьмоди — аф панжеви, тона кенкш кундамати кярьмоди — аф панжеви. Ашезь панжев фкявок комната. Сонцень аф кирдемшка сась ушу молемац. Коридорса синь ульсь кемгафтува кизоса цёра дворниксна. Кизефтезе сон цёранять кядьста, коса уборнайсь. Ся няфтезе, и сонь пцтай ласькозь — тоза. Аньцек панжезе кенкшть, шятязе пильгонц — шунгодсть седяфне, и прась сон колмоце этажста алу и чопафтсь прянек-мезнек видеста уборнаи. Но идезе сонь прянц кувака седяфсь, конань юкстазе тоза или стак мезенди-мезенди кадозе золотарсь. Ся седяфть вельде сон вихца-вихца лиссь пирьф шири. Вадентьф пряста кочкярянзонды молемс.

Лиссь ортава, мольсь сяка кенкшти, куване сувсесть куд потму, и ушедсь кенкшть чакама:

— Сестра, панчк! Бабушка, панчк! — Каршезонза пшкяди аш.

Лиссь соседснон кудста фкя аля и корхтай кяжиста:

— Месть пешкочнят „сестра“, „бабушка“? Кодама сестра тон тяса муть?! Тя кудса эряй графиня! — и ушедсь, ушедсь сюцема аф пара валса, тяка лангс фатясь кев и сюдордазе сонь каряз ланга.

Няйсы цёрась — тевсь кальдяв. Ну-ка тоста ласькозь. Сонць кяпе, панар мархта и вазьфтома. Ласксь ляйня берякс, аварди... Лядсь мялезонза алянц завещанияц. „Эх, мон месендень: ашине кулхцонда алязень“. И ёрась сон пря ёрдамс ляйняв — ваямс. Аньцек нежедсь ляй беряку, няи комафтф венч. Лиссть алдонза кафта алят.

— Тон месть тяса вень кучкать шарат? — панчсть вайгяль алятне и видеста молихть лангозонза. Фкять кядьса — лом, омбоцеть — кирка. — Кодама ломанят тон?

Азондозе сон, кода тевоц ащи.

— Эх, шава пря, вов тя тейть сестра! И тяни ёрат ваямс од-пара прясот!.. Штайть и пувордайть панарцень и кальсоттнень и аде мархтонк. Минь меки тийхтядязь алякс. Тейнек самай тяфтама ломань и эряви, — корхтасть азондомдонза меле аф содафне.

Цёрась мархтост тусь. Пачкодсть фкя монастырьс и ушедсть оградать алга варянь шувома. Сувасть ограду. А тоза аф кунара калмаф архирей и лангсонза пяк питни вещат.

Калмоть лангса мраморнай кевонь памятник и катф эзонза варя, конац панчсеви люкть кеподезь.

— Ну, молодец, сувак тяни. Васендакиге путт прязт вазенц, конац ланга стаф золотаса и питни кевняса, кргазт щафтт наперстнай крезонц, а кядьстонза крёзть сявк кядезт, и минь тонь меки усктядязь тоста.

Аньцек кенерсь цёрась путомс прязонза вазть и щафтомс кргазонза крёзть, вдруг люкть сёлгозь. Учи алятне кати-мезе марясть и ворьгодсть.

Сон озась лазксть лангс, афи азондови, конашкава эводсь: „Но вага тяни тевозе ни кальдяв. Сави, маряк, куломс ужаснай куломаса“... Аф кирдемшка шине ловажать эзда. И оцю вайгяльхть аварди...

Йотась комозьшка минута, марясы, люкть эса кеподихть. Панжезь варять. Сафне ульсть кафонест: фкясь поп, омбоцесь дьякон. Тожа архирейть лангста питни вещатнень сявома. И — кармасть синь споряма: попсь мярьги дьяконти: тон сувак, а дьяконць мярьги: аф, тон сувак, морафтат молитва, штоба владыкась тяза кяжия лангозонк.

Цёрась стясь, кулхцонды, мезе корхтайхть и учи, мезе сяда товолу ули.

Попсь васендакиге каязень кямонзон, валхтозе лангстонза рясанц. Сяльде навазе прянц варява и ушедсь молитвань морафтома.

— „Владыко святое, не вмени во грех“, што мон валхтсайне лангстонза питни вещатнень, синь модаса сембе сяка наксадыхть, а мон престолса ушедан озончнема тонь инксот.

Попть шяяренза кувакат и нюрьгихть. Цёрась кодак ашкодСы гривада! Попсь кодак ювади:

— Эх, дьякон, монь владыкась прякедьта кундамань!

Дьяконць аньцек тянь кулезе — мезе вийц комотсь да ласькозь сяда курок кельязонза.

А попсь эводембачк кодак вархцодезень кундаф шяярензон и цёрать таргазе.

Мзярда мянцть ни попть цёрать кядензон перьф ашкотф гриванза, сон кадозе тозк рясанцка, кямонзонга и ёжефтома ласьксь келиязонза. Эрясь колмошка ши и кулось.

Цёрась щазень попть одёжанзон и лиссь оградаста. Ся драгоценностсь сембе илядсь тейнза. И ся пингста сявомок, сон эсь ошстонза иляс козонга торгавама афоль яка.

Сёрмадозе  ёфксть  Ковылкинскяй  рай-
ононь  Порапа  велень  колхозниксь

Я.  К.  Чекашкин.