Колхозонь эряф/1936/03/Горькийть эряфонь киц
| ГОРЬКИЙТЬ ЭРЯФОНЬ КИЦ |
Великай пролетарскяй писательсь Алексей Максимович Горький шачсь мартть 16-це шистонза (сире стильть коряс) 1868 кизоня Нижняй-Новгородса обойщик Пешковть семьяса. Алянц куломда меле церанясь илядсь ниле кизоса и эрясь атянц, Каширинтть пяля, кона лиссь бурлакнень еткста и арась красильнай заведениянь азоркс. Сисем кизоса Алексей Максимович ульсь максф школав, но афлама ковонь етамда меле сярядькстсь лифксса, ердазе тонафнеманц и сяда лама кодамовок школаса ашезь тонафня. 10 кизоса, мзярда Алексей Максимовичень кулось тидяцка, ушедсть сонь скитаниянза. Сон служась обувонь магазинца церошкакс, повонды чертежниконь пяли ученикокс, работай посудникокс волжскяй пароход-Смурай поворть кядь эшксса, кона кепедезе сонь мяленц книгань лувондомати. А. М. скитальческяй эряфсонза етнесь вастста-вастс, работаста работас. Киветия кизоса церокшсь прьняндаф статистокс нижгородскяй ярмаркань театрав, тяда меле работай ярмаркань зданиятьнень петни десятникокс и ст. тов.
1884 кизоня кизонда А. М. туй Нижняй-Новгородста Казани тонафнемя. Школав повомс теенза ашезь сав. Ярмакфтома, трущебава удцезь, сон ерай анокламс пря велень учителькс. Дворникокс, садовникокс, булочнайса пекарть подручнайкс, театраса хористокс работазь, сон упорнайста тюри существованиянц инкса. Казаньца, коса эста работасть народничествань и марксизмань инь цебярь представительхне — Н. Ф. Анненский, Н. Федосеев и илятьне, — Горький маладчни студенттнень и рабочайхнень еткса радикальнай и революционнай кружокненьди. Сон кармась тонафнемя народничествать и марксизмать, кружокнень эса лувонды Лавровть, Чернышевскяйть, Писаревть, А. Смитть и Марксонь „Капиталонц“, а 1888 кизоня туй народоволецть М. Ромасть мархта Красновидово вели крестьянттнень еткса революционнай пропагандань вятемя.
Сяльдя тага моли скитаниянь полоса мзярда сон работай то калонь кундама промысласа Каспийскай маряса, то вень сторожкс, надсмотрщикокс и весовщикокс кшнинь китьнень лангса. Кизонда 1889 кизоня Алексей Максимович сась меки Нижнай-Новгороду.
1889 кизоня октябрьста А. М. ульсь арестовандаф Сомов революционерть тевонц коряс и ков ащесь тюрьмаса. Тялонда васедьсь В. Г. Крыленко писательть мархта и тонафни сонь литературнай советонзон коряс. Нижняй Новгородса Алексей Максимович кирьди соткс интеллигентскяй группатьнень эса, но кафта кизонь етазь — тунда 1881 кизоня туй бралгама Россиять ланга. Волгать крайгя мольсь Царицынав, тоста Украинав, Крыму и Кавказу, а позна с‘ексенда пачкодьсь Тифлису. Тифлисса етафтф кизось арась писательти знаменательнайкс. Тяса сон служась кшнинь кинь мастерскойхнень эса, ялгакс тиевсть рабочай од ломатьтне, пуроптсть кой кона ялганзон мархта пропагандискяй кружок, тиенць читкат и беседат.
1892 кизонь сентябрьста тифлисскяй „Кавказ“ газетаса ульсь печатлаф Горькийть васеньце рассказоц „Макар Чудра“ — замечательнай романтическяй легенда ломатьтнень квалма, конат лувозь эрявиксоньди куломс рабкс арамода.
[ 8 ]Тифлиста меле, Нижняй-Новгородса и Самараса эрязь, сон сермады эсь од рассказонзон, конат явондакшнихть Поволожьянь газетатьнень эзга, сяльдя и столичнай газетатьнень и журналхнень эзганга. 1893 кизонь августста „Русские ведомости“ газетаса ульсь печатлаф сонь рассказоц „Емельян Пиляй“, а 1895 кизонь июньста „Русское богатство“ журналса явондась „Челкашсь“. Горькийть литературнай известностец кармась вишкста касома. Сонь произведениянза печатлакшневихть лама газетава и журналга: „Новое слово“, „Русская мысль“, „Северный вестник“. 1898 кизонь майста лиссть сонь кафта томса „Очерконза и рассказонза“, конат шарфтозь лангозост ламонц мяльснон. Тя пингоня А. М. Нижняй-Новгородса арестовандакшнесазь Тифлисонь пропагандистскяй кружокть членонзон тевснон коряс, конат ульсть пякстафт социал-демократическяй пропагандать инкса. Сонь тянкса усксазь Тифлису, но курок новлясазь.
Горькийть популярностец сембе кассь и кассь и сон 1899 кизоть пе маластонза васеньцеда явондась Петербургу. 1901 кизоня мартста сон примси участия Петербургса Казанскяй соборть ваксса демонстрацияса, а апрельста „Жизнь“ журналса явондакшни сонь замечательнай произведенияц „Песня о буревестнике“, кона кайгозевсь, кода юрнай манифест маладчни революционнай бурять квалма. Революционнай од ломатьтнень и рабочайхнень еткса Горькийть популярностец тя пингти ульсь сяшкава оцю, нлта оцязоронь правительствась кармась вешеньдемя туфталхт сонь „афвреднайкс“ тиеманц инкса: сон ульсь арестовандаф бта сормовскяй рабочайхненьди революционнай воззваниянь печатламанкса, а сяльдя прважафоль Арзамазу, а полицияти мярьгфоль ваномс мельганза. Тяса, эсь литературнай работанц сядонга вишкоптезь, Горький сермады пьесат: „Мещане“ и „На дне“, конат 1902 кизоня путневихть Московскяй художественнай театраса оцю сатфкс мархта.
Оцязоронь правительствась сембе лаца ванць Горькийть мельгя сонь литературно-общественнай деятельностенц инкса. Мзярда 1902 кизоня февральста Горький ульсь кочкаф почетнай академикокс наукань Академияв, выборхне ульсть машфтфт Николай второень мярьгоманц коряс. Сембе мархта шнави писательть лангс оцязоронь правительствать тя врьгятемац кеподьсь возмущения инголя моли интеллигенциять еткса. Короленко и Чехов тя еткть демонстративна атказасть почетнай академиконь лемть эзда.
Ссылкаста столицав самок, Горький 1902 кизоня тиеньди организационнай соткст революционнай социал-демократиять мархта, конань органкс ульсь омба масторса салава лисеньди „Искра“ гезетась, конань лангса руководствать вятезе В. И, Ленин. 1903 кцзоня Горький сувси большевистскяй работань кругти, лезды теенза ярмакса и тевонь пуроптозь. 1904 кизонь январьста Горький ушедчни новляма коллетивнай сборникт „Знание“, тянь мархта, пуропни синь перьфкаст литературнай единомышленниконзон. „Вяры воскресенияда“ меле Горький сермады отчет-прокламация 1905 кизонь 9-це январень событиятьнень квалма, лувонцы Николай второень муворкс „лама рузонь граждаттнень нарошна шавоманкса“, и серьгядьчнесыне сембень „куроконя, упорнайста и дружнайста тюремя самодержавиять каршес“. Горький ульсь арестовандаф и селкф Петропавловскяй крепости, но оцязоронь правительствась пельсь гласнай процессонь тиемать, и общественнай мяльть ширьде люпштамать лангс ваномок, вынужденай ульсь сонь нолдамс. 1905 кизоня октябрьста, Петербургса инь вишкя революционнай событиятьнень пингста, Горький пуропты од газета „Новая жизнь“, конац арси васеньце легальнай большевиконь органкс, и редакторкс ульсь В. И. Ленин. Москуса декабрьскяй восстаниять пингста Горький лезды революциять вооруженияса и боевой действиятьнень пуроптомаса.
Горькийть агитационнай выступлениянцты оцю значениянь максомок, большевиконь партиясь кучсесы сонь Америкав революцияти лезксоньди ярмаконь пуроптома. Америкав якаманц пингста Горький сермадозе значенияс коря эсь фкя инь цебярь произведениянц — „Мать“ повестенц, кона казьф рабочайхнень [ 9 ]организованнай политическай тюремаснонды.
1906 кизоня Горький ётась политическай эмигрантонь положенияти, кармась эряма Италияса, Капри островса, и работась эсь од произведениянзон лангса; 1909 и 1910 к. к. эзда листть замечательнай повестенза „Городок Окуров“ и „Жизнь Матвея Кожемякина“, конат няфнихть „уезднай“ мещанскяй Россиять сембе кальдяв вастонзон. Сон сермады жизнерадостнай сказкат Италиять квалма, конатьнень эзда аф ламось печатлафтольхть „Звездаса“ и получандасть цебярь оценка Ленинонь ширьде.
Большевистскяй партиять мархта ряцек работазь Горький 1907 кизоня майста сай кода делегат совещательнай вал мархта РСДРП нь лондонскяй с“езду, 1908 кизонь январьста сотневи фкя-фкяньди постояннай сермадчнемац Ленинонь мархта, конац пяк шназе Горькийть личностенц и талантонц, и оцю мяль шарфнесь партиять мархта сяда кеме сотксонь кирьдеманц лангс. Афваномок сянь лангс, што Горький маладсь „Вперед“ группати, конань каршес Ленин вятьсь оцю тюрема, сембе сяка Ленин сембе лаца аралакшнезе Алексей Максимовичень творческяй работанц.
1913 кизоня Горький арась редакторкс большевиконь „Просвещение“ журналть беллетристическяй отделонц лангс. 1913 кизоня декабрьста Горький сась Россияв и тя пингти аделась автобиографическай повестенц „Детство“. Мекпяли, мзярда ульсть сермадфт „В людях“, „Мои университеты“, ня произведениятьне тисть пяк цебярь эпопея ломанть квалма, конац эсь волянь, виенц мархта и оцю настойчивостьса сяськозень кисонза повонды сембе сталмотьнень, конатьнень мархта сон васедьчнесь оцязоронь Россиять условияса. 1914 кизоня Горкий пуропни эсь перьфканза пролетарскяй литературнай од вийхнень и новляй пролетарскяй писательхнень произведениянь васеньце сборникть.
1915 кизоть пе маластонза ушедсь лисеньдемя Горькийть руководстванц ала „Летопись“ журналсь, кона занясь войнань кизефкснень квалма антимилитаристическяй, интернационалистичсскяи позиция.
ССР-са великай пролетарскяй революциять Горький прьняндазе аф сразу. Но 1918 кизоть омбоце пялестонза кигя сон псиста кярьмодьчни од советскай республикать культурнай строительстванцты. 1921 кизоня Ленинонь настояниянц коряс Горький тусь лечиндама омба мастору, коса ульсь 1928 кизоть самс. Тя пингста сон, од произведениянь сермадомда башка („Мои университеты“, „Дело Артамоновых“ и „жизнь Клима Самгина“), Горький оду ванондсыня революциять квалма эсь оценканзон и лисеньди омба масторонь печатьса советскяй странать лангс „мерзкяй травлянь“ новляйхнень, эмигранттнень, каршес.
1928 кизоня эсь 60 кизонзон топодемаснонды Горький сась СССР-у и, кода подлиннай революционер-борец, кода пролетариатть великай писателец, эсь пяк оцю талантонь виенц мархта псиста ушеды лездома социалистическяй строительствати. Сонь тя пингонь литературно-общественнай деятельностец няеви аф аньцек оцю драматическай произведениятьнень сермадомаснон эса („Егор Булычев“. „Достигаев и другие), но и сермадсь лама цебярь публицистическяй статьядонга, конатьнень эрь валсна кайги кода мировой глашатанть валоц СССР-нь и сембе миронь рабочай классть тевонц инкса, коммунизмать победанц инкса. Сембе мекпяльдень цебярь кизонзон Горький макссесыня лакай и разнообразнай общестенно-политическай тевти. Сембесоюзнай советонь V-це с“ездса сон кочксеви СССР-нь ЦИК-ть членкс. Горький кода СССР-нь советскяй писателень союзть правлениянц председателец лама пингта и эрьгада макссесь минь великай эпоханеконьди достойнай советскяй литературань тиема тевти. Сонь инициативанц коряс кочкафт „История гражданской войны“ и „История фабрик и заводов“.
„Горький ялгась, — сермадсь 1909 кизоня В И. Ленин, — кемоста сотозе эсь прянц эсь великай художественнай произведениянзон вельде Россиянь и сембе миронь революционнай движениять мархта“. Революционнай пролетариатть и сонь авангардонц — большевиконь партиять мархта кеме сотксонь кирьдемать вельде, Горькийти шачсь од вий и сон псиста лисеньди касы военнай опасностть каршес, кяжиста пиксы войнань [ 10 ]поджигательхнень, сязеньди маскатьнень врагнень шамаста, штафни фашизмать подлиннай шаманц.
Эсь классонц цебярь боецоц, Горький казезе эсь эряфонц и творчестванц, „сембе трудяйхнень кенярьдьчнемаснонды, рабочай классть врагонзон эвфтеманцты“. (Сталин). Величайшэй художниксь-реалистсь, пламеннай революционерсь, Горький эсь талантонц сембе вийсонза эряфонц етамс корхтась ломантть кода модать лангса инь мазы и чудеснай явлениять, высочайшай призваниянц квалма.
„Щит“ сборникса фкя статьясонза сон сермадсь: „Ся пингть самс, мзярс минь аф тонадтама ломантть кельгсемонза, кода минь планетанеконь лангса инь мазы и чудеснай явлениять, ся пингть самс минь аф мянефтяма минь эряфонеконь мерзостенц и васькафнеманц эзда. Тя убеждениять мархта сувань мон мирти, сонь мархтонза туян мон мирста и, тузь, аф шерьхкозь карман верондама, што мзярда-мзярда мирсь мярьги: святойхнень святойсна — ломанць“.
Оцю писательть тя утверждениясь тиевсь ни тевса минь странасонок, коса тяни сась эпохатьнень эзда инь цебярьть паньжема пингоц, коса тевса етафневихть трудяй человечествать инь цебярь ломанензон инь смел арьсекшнемасна. Горькийть пяк козя литературнай наследствац кармай ащеме гениальнай Сталинтть руководстванц вельде миллионттнень мархта тиеньдеви классфтома социалистическай обществать культурань сокровищницасонза.