Пици-палакст/Ванстынь - и карман ванстомо

From Wikisource
Jump to navigation Jump to search
Ванстынь — и карман ванстомо  (1930) 
by Дуняшин, Алексей Васильевич
Пици-палакст. Ёвтнимат ды фельетонт. СССР-энь Наротнэнь Центрань Издательствась. Москов, 1930. — с. 91—93
[ 91 ]

ВАНСТЫНЬ — И КАРМАН ВАНСТОМО


М
ОН СЫНСТ картечьсэ шпилинь, прок карш алдо нумолот цятаинь. Яла сельмес тондынь (годинь) и вестькак мах эзинь максо...

Истя сыре партизан Иван Гусак ушодызе ёвтниманзо; кода сон боруцясь Колчаконь каршо. Сон течи сась тайгастонть Новосибирскоев служебной тев марто.

Ламо ютась те ломаненть прява, ламо вармат-пиземеть, лембеть-якшамот шлясть-нардасть эйсэнзэ. Сормсевсь чамазо одирьвань шуба удалкс лацо, ашолгаць прязо, черензэ аволь черть — прок паксясо кавил клокт.

Сизьгеменце ие эри Иван Гусак мастор ланксо. Шачума тарказо Костромской губерня. Эрясь Мурманскойсэ, эрясь Крымсэ, мейле вачкотець Сибирьс — и теск кадовсь эрямо.

— Мезе, браткай, а эрят Сибирьсэ! Тесэ охотникень раесь самай. Мон ва уш колоньгемень иеть эрян Сибирьсэнть — и те шкась ютась апак фатяяк. Шачинь мон ружия ваксс, касынь ружия марто — и кулан нать мартонзо. Коли бути сокинь-видинь, хозяйства кирьдинь. Ней вана охоткоперациясо членан. Башка а рабутан.

— Мекс эно кадык хозяйстват?

— Ды... мекс кадыя, цёра... Истямо тев лиссь. Хуторсонок ульнесть ансяк колмо кудот ды сетькак вейкедест-вейкедест эрясть сядонь-сядонь сажень. Вейке благой телень вене тайгастонть састь хуторонтень валынь-вачкотинь вергист и повсизь скотинан вейкень пес. Кадымизь чаво кеть. Бедась, нать, ськамонзо а сакшны, ковонь трокс простудадо кулось козейкам. Кадувинь ськамон, прок эрьксэ гога.

— Месть ней тейнемс? — думан ськамон чаво кудосонть, седейсэнь прок яжамо кев понгавтозь уски и [ 92 ]уски-алов, хоть кулок. Меельсь пелев меринь: чумот верьгиснэ, сынь кандызь монь кудос беданть, пингем эрямс карман сынст маштомо, кежемгак панцать ды ломатькак ламо идян зыяндо. Истя и теинь: комсеце ие ва уш эрян охотанть ланксо...

... Чись — азаргаць: аволь умок прок лисськак, но кода бути апак фатя куйсь обед малав и кармась жарямо прок кшнинь пецькасто...

— Эка жари корьмаесь! — лекси Иван атя. — Монень, цёра, те жарось — сок: ловажатне кармасть сыредеме, пачк яла якшамо тест.

Венельксэсь — прок нешке пире. Комсомолецнэ и пионертнэ якстере флаг марто ютыть ульцяванть. Вельксэст — менель ёжонть ёзыть ниле аэроплант. Прок ниле карцигант ливтнить сынь ошонть велькска. Цярны вайгелест човорявсть ульцяванть якиця демонстрациянть вайгелензэ марто.

— Ванан неень од ломатнень ланкс — седеем налкати, мелезэнь паро: неть уш коли кундасть тевентень — те од тевентень — а кацызь.

Ваксканок моразь кармась ютамо пионерэнь отряд.

— Марясак кода морыть, стака мортнэ! Прок горниповт жоинить... Мелезэнь паро, цёра, эщо вана мезде: монгак кода а кода лездынь не шкатнень самонтень... Ужо аштек, васня пипканть курвайсать, мейле уш ёвтнисать.

Пипказо Иван-атянь аволь вишкине, аволь покш — ансяк пель осьмушка табак тусь эйзэнзэ.

— Мон, цёра, аволь ансяк верьгист чавнынь. Савсь монень 1919 иестэ кавто пильксэ верьгисткак чавномс.

— Кода истя?

— Истя самай: появась Сибирьс Колчак, народонтень алтнесь ламо кой-месть, сонсь грабамодо башка народнэнь мезеяк эзь тее. Кармась народ вирев оргодеме ды Колчаконь каршо боруцямо. Монгак мартост.

— Нать тонтькак обижидизь?

— Монь эсинь хоть эзимизь тока, но мон астяко туинь партизанокс. Рас колчаковецнэ кармасть нарьгамо бедной сокицятнень ланксо, сынь аволь минек ломать, сынь — благой верьгист, конат ломаннень покш зыян кандыть. Секс мон и туинь партизанокс. Пек [ 93 ]туринек Колчаконть марто, ламо белогвардеецт кучинек „тона чив“. Кода кармась Колчак Омскойстэ оргодеме, аволь вейке поездэнзэ ломанень ды снаряжения марто нолдынек откос ало. Ламо лездынек Якстере армиянтень: миньтеменек стака улевель панемс Колчаконь Сибирстэ. Прянь апак шна кортан.

... Чизэ истя обеттэ велявць, валгомо ёнов кармась айгеме, демонстрацияськак срадомо кармась. Аэроплантнэ пекест пекшедемс ливтнесть ошость велькска — и тусть оймсеме.

— Истят тевтне, цёра. — Иван-атя стясь скамиканть ланксто. — Ламо тевть теинек, коли бути минекак ульнесь лезэнек, паряк эщо весть сави лездамс СССР-энтень. Ванстынек эйсэнзэ эсь прянь апак жаля — и карман ванстомонзо...

Иван Гусак прощась мартон, ёвтась кавто-колмо лембе валт ды тусь бульваронть куншкава. Мольсь сон апак чиремкшне, прок од цёра.

Мон ванынь те ломаненть ланкс: сонзэ уш сизьгемень иензэ, сонсь прок тумо. Сельмем мик сияц лангозонзо.

— Седе ламо бу истят атятнеде...