Эрзянь Мастор/2004/21/А эряви музгордемс! Седеяк сёвномс...

←Господин "Назло"

Эрзянь Мастор, № 21 (196), 3 ноября 2004 edited by Нуянь Видяз, Кшуманцянь Пиргуж А эряви музгордемс! Седеяк сёвномс...

Декларация об официальном названии эрзянского народа→

Статья на сайте газеты: № 196, 03.11.2004, А эряви музгордемс! Седеяк сёвномс...

 

А эряви музгордемс! Седеяк сёвномс...

Кой-кить пеняцить, мик сёрма сась: мекс эзинек васто «ломанькс» Раськень Озкс сыцятнень Мордовиянь томбальде. Покордавсть, васняяк, Самара ды Обран Ош ёнксто сакшныцятне. Лиссь, витькстатано, ильведькс — арасель тешкстамонь (регистарциянь) коряс ломаненэк. Эряволь куш микрофон вельде яволявтомс. Теньгак певтеме тевтнеде нолдынек вакска.

Каршо чистэ сыцятнень марто вастневинек: Ульян Ош, Марий Эл, Мурман ёнкс, Удмуртонь Мастор, Москов Ош… Озксонь чистэнть истя эзь лисе. Шка арасель. Тевть, тевть, тевть... Минсь пурныцят-теицят, минсь жо топавтыцят. Парсте, музгордицят, содатадо: аволь аламо вастневить превс путыцят, тонавтыцят ды вельть аламо тевс правтыцят. Эряви тень чарькодемс. Секскак илядо капша чумондомс.

Эзь саво аволь ансяк кортнемс, мик неемс Оренбург ёндо пачколицятнень. Пек эряволь. Эзь саво сювордамс кедест Екатеринбургонь, Тулань ломантнень. Колмо-ниле валсо прядовсь кортамонок (эрзякс!) Индрек Сярг ды сонзэ киногруппанзо марто Тартусто.

Аволь ансяк тешкстамонь тевесь. Кой-мезе лияськак лиссь аволь арсезенть коряс. Эль эзинек аймельгадо Озаванть прясо пангонь аразденть! Эзь тееве сокасо кирькс Маронть перька, эзь лисе «спиралесь»... Те весе башка-башка пелькст. Покш тевсэ свал истя эрси. Весемга жо Озксось ютась, виенэк коряс, аберяньстэ. Кулясь — вельмевтеви Россиясо кезэрень пингень, покш смусть марто, мазый ды превей кой — срадсь аволь ансяк Россиянть, весе Модамасторонть келес. Валонть поладомга: Оренбург ёндо, пачтясть тенек, сакшность кавксо телекамера марто. Интернетс совасть, ловт мирэнь келес срадсть, тёжат фотографият, репортажт, кулят. Ней микшневи Раськень Озкстонть видеокассета. Лемезэ фильманть «Эрзянь Раськень Озкс». Те аволь «шум», аволь «шорох», аволь «греть руки», те — оймеёжонь кепедема, марямс эсь прянть эрзянь раськень петнявкскекс, те — тев.

А эряви кежиявтнемс, а эряви вешнемс сардт. Сынь, содатано, эрявиндеряйть, мукшновить алстояк. Сынст таркас, пеняцицят, редямо валдо ёнкстнэнь, паро тевтнень, марямо маласот аштицянть кенерепакарензэ. Теке марто, лангс таргсема чопода тевтненьгак, конатнень сеедьстэ тейнить кирдийтне-властне.

Аламо седейшкава эрзянь келенть кис аштицятнеде. Секскак эсенек юткова музгордематне — покштояк-покш пежеть, весемеде покш аванькс тев. Сёвномат лиятнень. Ванодо, кеветее иес а садиктнес, а школатнес, а телевиденияс-радиос эрзянь келенть эзизь нолда. А нолдыть Мордовиянь томбалев, онкстязь кирдить «Чилисема» журналонь. Вана сынст, неть анолдыцятнень, эрявитькак сэмедемс. Улевлинекак седе ламонек, седе «лаксевлинекак» келенэк куловтыцятнень. Сынь истямо нульгодькс тев тееме авольть карма. Ней вана...мукшновить «лаксицят» сетнень, кить кеветееде ламо иеть максыть эрямост Ине тевентень — идемс куловтомадо Эрзянь Раськень. Тень лемезэ аволь пежеть, мезе-бути лия.

«Вейсэ, ансяк вейсэ, эрзят, виевтяно!» — тень свал кирдема мельсэнек.