Izler edim

by Berdaq

Joǵımnan tappadım dárek,
Sárdarımdı izler edim,
Men sorlıǵa dáwran kerek,
Dáwranımdı izler edim.

Zaman neshik zaman boldı,
Qaraǵay basın shortan shaldı,
Dúnyadan kóp kewlim qaldı,
Qardarımdı izler edim.

Haqqa nalısh eteyin men,
Ótirik soylep neteyin men,
Haq joq izlep keteyin men,
Bir imkanın gózler edim.

Uzaqta qáwmi-qardashım,
Ne sawdaǵa tústi basım,
Márt jigit bolǵay joldasım,
Qáwenderim izler edim.

Bir kókirek, eki arıs,
Jollar awır, mánzil alıs.
Júregi misli jolbarıs,
Naǵız sherdi izler edim.

Aǵa begler, bolmań qapa,
Súriń besh kún zawqı-sapa,
Shekken bolsań jábiri-japa,
Saǵan dárman izler edim.

Berseler alla dadımdı,
Esitseler páryamdı,
Shad áylesem elatımdı,
Dártke dawa izler edim.

Qam sút embegen anadan,
Bir ushqan kózsiz sonaman,
Soǵan dım kúyip-janaman,
Jaqtılı jol izler edim.

Jolınan adasıp qalǵan,
Móhminlerge sárdar bolǵan,
Ǵárip-qáserdi qollaǵan,
Miyirbanım izler edim.

Sozsam qolımdı hawaǵa,
Dártim dus kelse dawaǵa,
Ketsem bulmannan Kabaǵa,
Haqlıq jolın izler edim.

Kópti kórgen qáriyanı,
Aqtarıp panıy dúnyanı,
Keship teńiz hám dáryanı,
Men joǵımdı izler edim.

Qoyandı óltirer qamıs,
Jigitti óltirer namıs,
Edige menen Alpamıs,
Tirilse men izler edim.

«Shar kitap»tan tura qashtım,
Nawayıdan sawat ashtım,
Fizuliden dúrler shashtım,
Dilwarlardı izler edim.

Maqtımqulını oqıǵanda,
Aytar edik hár zamanda:
«Kemis bar ma, begler, anda?»
Sózin tawap qılar edim.

Men sharq urıp Shamǵa ketsem,
Bilgenimdi bayan etsem,
Haslı ǵayrı elge jetsem,
Qanday mádet alar edim?

Berse maǵan Dawıstandı,
Túsirse de zimistandı,
Jaqsı dese Hindistandı,
Joǵım izlep keter edim.

Bendem dese biysharanı,
Tárk ayleyip bu káranı,
Men aqtarıp Buxaranı,
Luqmanımdı izler edim.

Haqlıq ushın saldım kúshti,
Alıwǵa zalımnan óshti,
Aralasam Úrgenishti,
Yaranımdı tabar edim.

Joldas etip jolǵa shıqsam,
Jayhunda sal bolıp ıqsam,
Yaqshılardı awzın baqsam,
Aytar sózim tabar edim.

Ótken Arastu, Áflatun,
Jaratıp ilimniń kánin,
Sheshiw ushin pikir bántin,
Men máǵrifat izler edim.

Tórt nárse ― dúnya tórkini,
Áwel haq, insan, bil bunı,
Bul dúnyanıń joqdur mini,
«Baxıtlı bol!» dep izler edim.

Aqılı kámil, ilimi zor,
Bilimli el bolmaydı xor,
Baxıt ushın siltese jol,
Orısıyattı izler edim.

Bedil, Attar hám Bidandı,
Tákrirarlap atırdım tańdı,
Zaman qıynap tur adamdı,
«Hidayanı» izler edim.

Bir sebepker jalǵız Alla,
Ferdawsiydey dana bar ma?
Túsindirer, «Sharxı molla»,
Men alımlıq izler edim.

Qarataw qarsımnan kelse,
Aydarhası adam jese,
Sol jerde jolıń bar dese,
Men taysalmay barar edim.

Qulaq sal meniń sózime,
Sarǵısh enip tur júzime,
Ráhim etse haq ózime,
Isim rawaj áyler edim.

Haqqa ásirlik áylemeyin,
Dánekersiz júylemeyin.
Hasla jalǵan sóylemeyin,
Mudam tuwrı sózler edim.

Berdimurat, izle-izle,
Haq jolını tuwrı gózle,
Ne sóyleseń, jaqsı sózle,
Haq diydarin izler ediń...