Kun tu bzang po klong drug pa'i rgyud

From Wikisource
Jump to navigation Jump to search

@1
111
kun tu bzang po klong drug pa'i rgyud ces bya ba bzhugs
112
rgya gar skad du
bod skad du
kun tu bzang po klong drug pa'i rgyud ces bya ba
bcom ldan 'das dpal kun tu bzang po rdo rje bde ba chen po la phyag 'tshal lo
'di skad bdag gis bstan pa'i dus gcig na
bcom ldan 'das dpal kun tu bzang po ye ci bzhin pa'i mnga' bdag
113
sangs rgyas kun gyi rang bzhin du ye nas rang shar ba yin te
nga ni snang ba thams cad kyi bdag nyid du rang byung bas
'di dag gi don ngas bstan gyis
stong pa nyid kyi 'khor rnams nyon cig mi mdzad pa yi mdzad pa las
sangs rgyas kun gyi skur gsal bas
ngas ni rtog pa med pa rnyed
snang ba 'di la sus spyod pa
bla na med pa'i zhing khams rdzogs
de phyir ngas bstan lung 'di nyon
de skad ces mi gnas pa'i yul la rang rig pa'i ston pas gzigs nas
114
mkha' rnam par dag pa'i nam mkha' nas
snying po bcud kyi rgyal po 'di
dus gsum mnyam pa nyid du gsungs so
gsung ngo
gsung bar 'gyur ro
'di skad bdag gis thos pa'i dus gcig na
chos nyid rnam par dag pa rgyan ma bkod par snang ba'i pho brang na
bcom ldan 'das dpal kun tu bzang po rgyud thams cad kyi mnga' bdag gis
bstan pa rin po che'i 'dul stangs la gzigs te
'gro ba rnam par dag pa'i gzugs rnams mi gnas pa'i mya ngan las 'das pa'i lam du gzung pa'i phyir
rdo rje snying po rgyan gyi dkyil 'khor zhes bya ba nyid kyi thugs las rnam par spros nas
ljags kyi dbang po las gsung gi 'od zer dpag tu med pa rang byung ba'i tshe
sangs rgyas thams cad kyi sku'i mdzad pa dang
gsung gi mdzad pa dang
thugs kyi mdzad pa dang
yon tan gyi mdzad pa dang
phrin las kyi mdzad pa rnams dang
115
dus gsum mnyam pa nyid du bzhugs so
de nas byang chub sems dpa' 'od zer kun 'dus kyis
ston pa kun tu bzang po la 'di skad ces gsol to
kye kun tu bzang po
sangs rgyas thams cad kyi mdzad pa med pa'i tshe
ston pa nyid ci skad bya bar bzhugs
bstan pa'i 'dul stangs ni gang lags
bdag la bstan du gsol
de nas ston pas bka' stsal pa
kye ma 'od zer kun 'dus khyod nyon cig
sangs rgyas thams cad kyi mdzad pa mi snang ba'i tshe
nga'i sku ni phung po thams cad bsdus pa zhes bya ba mi snang mi 'byed
mi len
mi 'dor
mi rtog
mi 'dzin
mi gnas
mi 'gyur
mi mngon
mi gsal
mi mdzad
mi gtong
mi sems
mi rig
mi 'dug
mi gtod pa'i snang ba rang shar nas
stong pas yul gyi spros pa med
116
gsal bas yod med mtha' las 'das
dran pas mi brjed gzungs dang ldan
snang ba mngon sum nyid kyi lam
mtshon tshig du ma'i spros dang bral
sngags las ma bskyed ye rdzogs nyid
rgyu ma dang rkyen dang yongs su bral
lta sgom dri ma kun las 'das
mtha' med dbus su dmigs pa med
snang ba med cing yul yang med
lha med sngags kyang yod pa min
chos med btags pa kun las 'das
dgra med bshes kyang yod ma yin
lus med dbang po snang ba med
chos ni bsam pas mi snang ste
gang med gang du 'dzin pa med
nga med nga yi 'khor yang med
dbyings med rig pa'i sku yang med
dge med sdig pa'i rnam smin med
srog med bcad pa'i dmigs pa med
tshogs med bsags pa'i yul yang med
sangs rgyas med cing sems can med
117
gnas med ston pa nyid kyang med
thabs med nyan pa'i 'khor yang med
yul med dus gsum nyid kyang med
dus gsum tshogs pa yod pa min
de phyir cir yang med pa ni
nga ni ma phyis mi 'byed snang
sa las 'das pa nga yi yul
mdzad dang spyod par ma phye bas
dus gsum mnyam pa nyid du ste
nga yi yul med gzhi bsam bral
nyag gcig cha phra'i snying por gnas
stong pa chen po'i ye gdangs las
snang ba med pa'i phyogs nas ni
dri ma med pa'i rig pa nyid
brdzun med bden pa'i mngon sum pa
'di nyid sus mthong nga yi sras
nga yi snang ba de ltar na
'di kun rig pa'i rang gdangs yin
'dus pa'i snang ba klong gcig tu
nges pa'i lung chen 'di la spyod
de nas byang chub sems dpa' 'od zer kun nas 'dus pas 'di skad ces gsol to
118
kye ston pa kun tu bzang po ston pa nyid kyi snang ba ji lta bu lags
sems can kun snang ba dang
khyad par mchis sam ma mchis
bdag la bstan du gsol
zhes zhus so
de nas ston pa kun tu bzang pos bka' stsal pa
byang chub sems dpa' 'od zer kun 'dus khyod nyon cig
ngas bstan pa'i 'dul stangs kyis
bstan pa'i dgongs pa las langs la
khyod la 'di lta bu'i don ngo mtshar che ba shin tu gsang ba chen po
rang bzhin rdzogs pa chen po'i don ma nor bar mtshon pa'i tshig gis gtan la phab nas bstan na
sangs rgyas thams cad kyi sku gsung thugs kun tu bzang po rang bzhin rnam par dag pa'i snang ba yin te
rigs drug gi 'gro ba rnams la dus gsum mnyam pa nyid du bstan pa ste
'di ni nga'i snang ba dang khyad par med par
yul can du ma'i klong gcig tu dril ba zhes bya ba chos thams cad ngan pa'i rnam rtog dang bral te
119
nga nyid spros bral kun tu bzang po'i klong du thim pa'o
yang klong ni rgya mtsho lta bu'i nga'i snang ba rang shar nas
dkyil 'khor thams cad kyi klong ye nas rang la 'dus pas
phyag rgya chen po'i klong mi gnas pa gcig tu 'khyil ba'o
sems dpa' chen po nga'i snang ba ni mi snang ba'i snang ba ste
yod thos snang grags thams cad la khyab cing 'jug nus pa yin pas
snying po gsang ba'i klong zhes bya ste
sku kun tu bzang po rang byung
nga'i snang ba ni cir yang med pa las
cir yang shar nas khyab pa rang dag gi snying po 'dus pa'i klong zhes bya ste
gsung kun tu bzang po rang byung
nga'i snang ba 'di ltar smra bsam kun gyi bdag nyid du rang shar nas
dran pa rang stong nyid kyi snying po 'dus pa'i klong zhes bya ste
thugs kun tu bzang po rang byung ba'o
kye sems dpa'i chen po
sangs rgyas thams cad dus gsum mnyam pa nyid du rig pa'i skyes bu nga
kun tu bzang po'i klong gcig tu 'khyil pa zhes bya ste
de bzhin nyid de ma bcos pa nam mkha' sprin gyis ma bsgribs bzhin
120
ye gdangs ye nas gsal ba che
de ltar nam mkha' dangs pa las
nyi ma'i snying po rang snang ltar
ngo bo dri ma med pa'i sku
gcig bsdus snying po nges pa ni
nga yi dkyil 'khor nyid yin no
chos can rnams ni bsdus pa las
chos nyid rnams kyi grangs mtha' zad
'di ni kun bzang nga yi sems
rtog pa med pa'i sangs rgyas ngas
dri ma phra ba'i zhen grol bas
ma bsgribs 'od rnams mngon du snang
chos kyis chos rnams mi mthong bas
nga la mthong ba'i yul med do
kye sems dpa' chen po
dngos po thams cad kun tu bzang po'i rol pa yin no
snang ba thams cad ni kun tu bzang po'i mdzad pa yin no
stong pa thams cad ni kun tu bzang po'i yul yin no
de'i phyir na sangs rgyas kun tu bzang phongs phyogs thams cad du
mdzad pa med pa'i phrin las kyis 'gro ba rnams gnyis su med par byas nas
121
lung nyed zad pa zhes ba'i bsam gtan thob ste
de nas mi snang ba'i nam mkha' dang gnyis su med par gyur pa'o
sems dpa' chen po nga kun tu bzang po'i mdzad pa 'di ltar sku gsung thugs kyi bdag nyid pa zhes bya ste
rgyu rnam par dag pa'i sangs rgyas kyis
'bras bu ye rdzogs chen po zhes bya ba'i lta ba thob ste
de'i tshe nga ni byed pa po med par rang byung nas
sku'i ye shes dang gsung gi rol pa dang
thugs kyi mdzad pa rgya chen por snang ste
ye mi 'gyur ba'i snang ba de
chos zad pa'i dus gyi mtha'i spros pa rang dengs
nam mkha'i yid can du rang byung rig pa'i snying po sra ba'i rang
snang la dbang dus gcig tu thob nas
kun tu bzang po'i dkyil 'khor thams cad kyi mnga' bdag chen po zhes bya bar gyur to
'od zer kun 'dus kyis 'di skad ces gsol to
122
kye ston pa kun tu bzang po
dus gsum mnyam pa nyid ces bgyi ba gang la gsungs pa lags
'di bdag la gsung du gsol
de nas ston pa kun tu bzang pos bka' stsal pa
kye ma byang chub sems dpa' sems dpa' chen po 'od zer kun 'dus
khyod nyon cig
skyes bu gang gis 'das pa'i rjes ma bzung
ma 'ongs pa'i sngon ma bslangs
da lta'i shes pa rang so la bzhag na
shes pa thams cad snga phyi med par 'dres nas
gcig 'dus ngo bo rtse gcig ces bya ste
dus gsum mnyam pa nyid du rtogs pa'i rnal 'byor ro
yar 'das pa'i bag chags rnams kyi rjes su ma 'brangs
phyis 'byung bag chags rnams kyi sngon ma bsu
da ltar gyi bag chags rnams rgyud la ma brten pa ni
dus gsum mnyam pa nyid du rig pa'i rnal 'byor pa zhes bya'o
dran pa rang zad kyi thabs kyis 'khor 'das gnyis med du bsre ba ste
'das pa'i dran pa rnams mtshams bcad pa dang
123
ma 'ongs pa'i dran pa rnams mgo mnan pa dang
da ltar gyi dran pa rnams rang yal du btang ba ni
dus gsum mnyam pa nyid du rig pa'i rnal 'byor pa zhes bya'o
yang 'das pa'i sems la phugs mi gtad
ma 'ongs pa'i sems la rgyab mi gtad
da ltar gyi sems la blo mi gtad pa ni
dus gsum mnyam pa nyid du rtogs pa'i rnal 'byor pa yin no
'das pa'i ma rig pa la gzed ma bskur
ma 'ongs pa'i ma rig la g.yab ma 'dor
da ltar gyi ma rig pa phang du ma blangs na
dus gsum mnyam pa nyid du rig pa'i rnal 'byor pa yin no
'das pa'i zhe sdang la zhe ma chags
ma 'ongs pa'i zhe sdang la lcags kyus ma bzung
da ltar gyi zhe sdang la ngar ma blud pa ni dus gsum mnyam pa nyid du
rtogs pa'i rnal 'byor pa zhes bya'o
'das pa'i gti mug gi sprin ma bsdu
124
ma 'ongs pa'i gti mug gis bcad
da ltar gyi gti mug gi char pa ma phab na
dus gsum mnyam pa nyid du rtogs pa'i rnal 'byor pa zhes bya'o
'das pa'i nga rgyal la len ma gdab
ma 'ongs pa'i nga rgyal la khungs ma gdab
da ltar gyi nga rgyal la thog ma gtad pa ni
dus gsum mnyam pa nyid du rtogs pa'i rnal 'byor pa zhes bya'o
'das pa'i 'dod chags nyid sun phyung
ma 'ongs pa'i 'dod chags rnams zhe bcad
da ltar gyi 'dod chags rnams yul phyung ba ni
dus gsum mnyam pa nyid kyi rnal 'byor pa yin no
'das pa'i phrag dog la dam du ma bzung
ma 'ongs pa'i phrag dog la sems ma bsdu
da ltar gyi phrag dog la sems ma bcug pa ni
125
dus gsum mnyam pa nyid du rtogs pa'i rnal 'byor pas
'khor 'das gnyis med du rtogs pa'i rnal 'byor pa chen po zhes bya'o
sems dpa' chen po mya ngan las 'das pa'i zang thal du rtogs pa'i rnal 'byor pa ni
nga kun tu bzang po chos thams cad kyi byung khungs su byung ba ste
'das pa'i sku gsum la sna gtad
ma 'ongs pa'i sku gsum la rgyab brten
da ltar gyi sku gsum la longs spyod pa ni
sangs rgyas rnams kyi 'bras bu mngon du byas pa ste
dus gsum mnyam pa nyid du ye nas gnas pa zhes bya'o
'das pa'i ye shes lnga la gzhi bca'
ma 'ongs pa'i ye shes lnga la rtse mo gtad
da ltar gyi ye shes lnga lam du byed pa ni
gsal bas gsal ba'i 'od du 'dus pa zhes bya ba ste
dus gsum mnyam pa nyid du rig pa'i rnal 'byor ro
'das pa'i rig pa la yid ches bya
ma 'ongs pa'i rig pa la tshad bzung
126
da ltar gyi rig pa la mngon sum du byed pa ni
ma yis bu bzung ba zhes bya ste
dus gsum mnyam pa nyid du rig pa'i rnal 'byor ro
'das pa'i thig le la cha bzung
ma 'ongs pa'i thig le la blo gtad
da ltar gyi thig le rnams gcig tu bsdu ba ni nyag gcig gi rtsa ba bcad pa zhes bya ste
dus gsum mnyam pa nyid du rig pa'i rnal 'byor pa zhes bya ba yin no
'das pa'i dbyings dang mtshams sbyar
ma 'ongs pa'i dbyings dang rgya bskyed
da ltar gyi dbyings dang sa gcig la gnas pa ni
rig pa khyim du tshud pa zhes bya ste
dus gsum mnyam pa nyid du ye nas 'brel bar gnas pa zhes bya'o
'das pa'i sgron ma rnams la snag gtad
ma 'ongs pa'i sgron ma rnams lam du bzung
da ltar gyi sgron ma rnams la gsal gdab pa ni
stong pa chos 'byung gi sgron ma rang dag gi blta ba ste
127
dus gsum mnyam pa nyid du ye nas snang ba yin no
'das pa'i 'od rnams la lam btod
ma 'ongs pa'i 'od rnams la sems bzhag
da ltar gyi 'od rnams la blo phab pa ni
snang ba thams cad rang rgyas thabs pa zhes bya ste
dus gsum mnyam pa nyid du ye nas 'du 'bral med pa'o
de nas 'od zer kun 'dus byang chub sems dpas gsol pa
kye bcom ldan dpal kun tu bzang po
dus gsum mnyam pa nyid ces bgyi ba'i dus ci la gsung
gsum zhes pa ni gang rnams lags
mnyam pa ces ci la gsung
nyid ces gang lags
'di dag rnams kyi don bdag gas ma 'tshal na
ston pas don 'di dag bdag la gsung bar zhu
zhes gsol pas
ston pa kun tu bzang pos zhal 'dzum pa mdzad de
'di dag bka' stsal to
kye ma kye ma byang chub sems dpa' chen po 'od zer kun 'dus
ngas sngon yul dbyings shin tu gsal ba zhes bya bar
sangs rgyas rnams kyi rnam par brgyan pa'i sa bya bar
128
'khor gyi byang chub sems dpa' rnams la 'di skad du lung bstan pa yin no
kye 'khor gyi byang chub sems dpa' rnams nyon cig
snang ba thams cad rang dbang du gyur nas
rig pa mngon sum du bstan pa'i tshe
dgongs pa bden pa mthong ba'i dus zhes bya'o
snang ba thams cad rang thad du shar te
nyams kyi sa bon 'phel ba'i tshe
rig pa nyid srang la 'debs pa'i dus zhes bya'o
skyes bu 'byung ba'i stobs zad nas
shes pa rnams kha nang du bltas pa'i tshe
rig pa byung sa 'debs pa'i dus so
chos nyid rkyen dang bral nas snang ba thams cad bde bar brdal ba'i tshe
chos nyid ma bu mnyam pa'i dus zhes bya'o
sangs rgyas rnams kyi bden pa'i 'od zer gyis
rang gi lus gang zhing rgyas nas sku mngon par byang chub pa'i tshe
brtan pa rang thob kyi dus zhes bya'o
kye ma kye ma 'khor gyis byang chub sems dpa' rnams nyon cig
lta ba stong pas sems pa rang gsal gyis ngag rgyas
129
spyod pa rgyas 'debs kyi lus rgyas pa ni
'bras bu rang lus kyi dus gsum zhes bya'o
chos sku spros dang bral ba'i rtsi thob
longs sku tshig dang bral ba'i bar bzung
sprul sku mtshan dang bral ba'i rtsa ba bcad pa ni
drod rtags mthar phyin gyi sku gsum ye rdzogs kyi dus gsum zhes bya'o
sgrib g.yogs 'byung rkyen dang bral ba'i nam mkhar thog 'phang
mi 'gyur lu gu rgyud kyi gzer gdab nas
rgya mtsho snang byed kyi lcags kyus de nyid rang bzung ba ni
goms pa rang shugs kyi dus gsum zhes bya'o
e ma ho
'khor gyi byang chub sems dpa' rnams nyon cig
chos nyid ma bcos pa'i klong du
sangs rgyas thams cad kyi mdzad spyod du snang ba ni
'khor 'das gnyis su med pa'i snang ba chen po zhes bya'o
dbyings rig goms pa'i gnad kyis yul du ma'i shes pa rang 'gags nas
130
'bras bu ye dag chen po'i dgongs pa rang byung ba'i tshe
nyams blang gding du tshud pas
lha sgom spyod pa rnams gnyis su med par 'dres pas
rang gnas yongs 'dres kyi mnyam pa chen po zhes bya'o
kye 'khor gyi byang chub sems dpa' rnams nyon cig
dri ma rang sar dag pa'i chos sku las
rang rig rnal du babs pas nyid ces bya
dran pa rang rig dag pa'i dgongs pa las
'dzin pa ngang gis nub pas nyid ces bya
phra rags 'byung ba zad pa'i 'od lnga las
bdag 'dzin lus dang bral bas nyid ces bya
stong pa ye nas khyab pa'i chos nyid la
dbyings rig zad par phyin pas nyid ces bya
phyi nang 'byung ba zad pa'i rang lus la
lnga lnga zung du 'jug pa nyid ces bya
ma rig ye nas gnas lugs ka dag las
snang ba rang sar grol ba nyid ces bya
de ltar skyes pas rang gi rgyud kyang dag
'dzin pa gzung ba phra ba'i las nyid do
zhes kun tu bzang po klong drug pa zhes bya ba'i rgyud
131
rang bzhin rdzogs pa chen po'i don bstan pa las
chos thams cad dus gsum mnyam pa nyid du bstan pa'i klong zhes bya ste dang po rdzogs so
lha'i skye gnas dag par byed pa chos nyid rtsol ba dang bral ba'i skabs te dang po'o
@2
de nas ston pa kun tu bzang pos chos thams cad mnyam pa nyid
gnyis su med pa'i ting nge 'dzin gnyis med rdo rje'i snying po zhes bya ba la snyoms par zhugs so
de nas byang chub sems dpa' chen po 'od zer kun 'dus kyis 'khor te rnams la bos nas
bcom ldan 'das ni ting nge 'dzin la bzhugs nas
sems can gyi don cang mi mdzad par snang bas
bdag cag rnams kyis ston pa nyid mnyam par bzhag pa las bzhengs pa'i tshig rnams kyis rab tu bskul lo
zhes bcom ldan 'das kyi 'khor rnams la tshig de skad du brjod pas
'khor de dag gi nang nas byang chub sems dpa' chen po glog gi 'od zer kun nas sprin dang bral ba zhes bya bas 'di skad du tshig tu brjod do
kye ston pa'i 'khor du 'dus pa'i sras dang byang chub sems dpa' dang
132
lha dang mi rnams nyon cig
ston pa ni ting nge 'dzin las bzhengs pa dang
bzhugs pa mi mnga' ba'o
de ci'i phyir zhe na
chos thams cad mnyam pa nyid ye nas rdul dang bral bar mkhyen pa'o
de nas 'od zer kun 'dus kyis gsol pa
byang chub sems dpa' mnyam pa nyid ces bya ba de'i don ci zhig
glog gi 'od zer kun nas sprin dang bral bas smras pa
chos thams cad mnyam pa nyid ye nas rdul dang bral ba zhes bya ba ni mtha' thams cad dang bral zhing
rnam par rtog pa'i dri ma med pa'o
yang gsol pa
de nyid gang
smras pa
de ni brjod pa thams cad nye bar zhi ste
blo gang yang mi 'jug pa'o
gsol pa
de ci lta bu
smras pa
de nyag gcig spros pa thams cad dang bral ba'o
gsol pa
de de bzhin no
de ltar chos thams cad dal yang kun tu bzang pos bstan pa yin
khyod kyis kyang de ltar go ba ni shin tu legs so zhes smras so
de dag gis gleng bslang ba ston pa kun tu bzang pos mi rtog pa'i ngang la gnas nas
133
byang chub sems dpa' sems dpa' chen po glog gi 'od zer kun nas sprin dang bral ba la legs so zhes bya ba gnang ste
'di skad du gsungs so
kye byang chub sems dpa' sems dpa' chen po 'od zer kun nas 'dus pas kyang
chos thams cad kyi don de ltar khong du chud pas mi skye ba mngon par gzigs pa zhes bya ba'i chos nyid rnyed pa yin no
de bzhin du byang chub sems dpa' sems dpa' chen po khyod kyis kyang go
zhing shes nas rtogs pa de shin tu legs so
ngas khyod la snang ba rnam par dag pa'i chos kyi tshig spro yis
byang chub sems dpa' khyod nyon cig
rgyud dag pa'i rdo rje 'chang chen pos zhing khams nyi ma stong gis rab tu brgyan pa'i tshad ces bya ba na yod pa'i dus nas lung bstan pa
mi gnas pa'i ye shes chen po ye nas rnam par dag pa'i tshe
'khor 'das snod bcud du snang ba thams cad til gyi 'bras bu gcig gi nang du mnyam par bzhag na
134
'khor 'das dus gcig la gsal ba'i ting nge 'dzin la mnyam par bzhag pa yin no
yang de la dbugs phyung nas sku rdo rje chen po la longs spyod pa yin no
de la longs spyod pas snying po 'od zer gyis brgyan pa'i zhing khams stong mthong bar 'gyur ro zhes lung bstan pas
ngas snying po yul thams cad sdud pa zhes bya ba'i chos nyid kyi ro myangs pas lus ngag thams cad rdo rje ltar cis kyang mi shigs pa'i rdo
rje'i ting nge 'dzin thob bo
de bzhin du khyod kyis kyang sems rnam par dag pa'i 'od gsal chen po'i don nyams su ma longs na
sku rdo rje snying po la ltos shig
de bltas pas 'jigs pa med pa'i gding thob nas
snang ba thams cad sku gsum gyi bdag nyid du rang shar te
chos dang chos ma yin pa gang du yang ma grub pa'i rtogs pa khong du chud par 'gyur ro
byang chub sems dpa' khyod kyis thams cad mnyam par bzhag pa gtad pa'i tshad ma rnyed na
bzhag pa'i sa lnga la goms par bya'o
135
snang ba thams cad sgyu ma lta bur sems rnam par sbyong bas mi rtag pa rgyud la brtan pa'i sa la goms par byas na
'khrul pa'i snang ba thams cad kyis gnod pas skyes bu'i sems la g.yeng bar mi nus pa ni sems rnam par sbyong ba la mkhas pa'i rnal 'byor pa zhes bya'o
'byung ba thams cad 'dus pa'i gnas su
sems rnam par zhi bar byed pa'i sbyor brgyud la brten pa'i skyes bu ni zhi gnas la bkod pa'i gnas zhes bya'o
rnam par shes pa thams cad 'dus pa'i sa
yid 'byung gi rtog pa dang bral ba'i snang ba
sems rang bzhin gyis rnal du phebs pa'i rnal 'byor pas
sems nyid rang gnas su rnal du phebs pa'i gnas zhes bya'o
gzhi thams cad gcig tu gyur pa'i gnas su sgra'i don gyi sems rab tu gnas par byed pa'i sbyor ba'i skyes bu'i snang ba rang bcad nas
sems rang dal du 'dug pa'i sa zhes bya'o
ye shes kyi rol pa shar ba'i dus na
136
sangs rgyas kun gyi mdzad par rnam par rol pa'i sa ni sems rnam par bzhag pa'i dpung bskyed pa'i sa yin no
byang chub sems dpa' sems dpa' chen po de dag gis
bzhag pa'i thabs la mkhas par bya ba'i phyir
gzhag thabs chen po lnga la mkhas par bya'o
sems kyi snang ba rnam par snang ba'i dus na
sems rnam par sbyang ba dang
rnam par 'dul ba dang
rnam par mi rtog pa ste sems kyi las thams cad rnal du dbab pa'i thabs la mkhas par bya'o
ye shes kyi snang ba rnam par snang ba'i dus na
ye shes rnams kyi ngo bo dang
rang gi mtshan nyid lnga dang
ye shes kyi ldog pa dang
log pa'i dus dang
de nyid log pa'i tshad kyi thabs la mkhas par bya'o
de'i chos nyid kyi snang ba rang snang gi dus na
chos nyid rnam par dag pa'i yul dang
137
sa dang lam dang chos nyid rang gi ngo bo dang
chos nyid kyi tshad dang
snang ba dang
ci ltar shar ba'i yul dang
chos nyid kyi ldog pa'i thabs la mkhas pa zhes bya'o
dbyings kyi snang ba rang snang ba'i dus na
rang gi mtshan nyid rnam par dag pa'i dbyings rang gi ngo bo dang
de'i snang ba'i dus dang
snang ba ci ltar tshad la dbab pa dang
dbyings rnams kyi mtha' gang yin pa dang de dag gi thabs la mkhas par bya'o
rig pa'i snang ba rang snang ba'i dus na
'khor 'das ru shan 'byed pa'i lus ngag gi spyod pa sngon du bya bas rig pa 'khor ba dang 'brel pa bcad pa dang
lus ngag rnal du dbab pa
rig pa rang gi ngal bso ba'i sa la slob pa dang
de nyid mngon sum du rig pa'i rnal 'byor gyis
snang ba rnams la 'dris par bya ba'i thabs la mkhas par bya'o
138
dbyings rig gnyis su med pa'i dus na
dbyings dang rig pa tshad la dbab pa dang
snang ba thams cad ci yang ma yin par chos nyid zad pa'i thabs la mkhas par bya'o
byang chub sems dpa' chen po glog gi 'od zer kun nas sprin dang bral ba de'i don rnams la yid ches ma skyes nas
bzhag pa'i tshad lnga mkhas par bya'o
snang ba thams cad kyi tshad ni
rang gi lus rnams kyi rdos pa mi snang bas bzung ngo
ye shes rnams kyi tshad ni
thig le phyi nang du snang ba dang 'brel bas bzung ngo
'od kyi tshad ni snang ba thams cad sku dang gnyis su med pas bzung ngo
rig pa'i tshad ni 'gro 'ong med pa'i ye shes rang bzhag tu gnas bas bzung ngo
chos nyid zad pa'i tshad ni
snang ba thams cad gang gi ngo bor yang ma grub pas bzung ngo
de nas byang chub sems dpa' sems dpa' chen po glog gi 'od zer 'od kun nas sprin dang bral bas
139
ston pa kun tu bzang po la 'di skad ces gsol to
kye kye ston pa kun tu bzang
de ltar bzhag pa'i don rnams kyis
bdag gis skye med mig kyang thob
shes rab rnams kyi lus zungs rdzogs
sku gsum 'bras bu cer bzhag rnyed
bzhag pa lnga don de ltar na
sems can rnams kyi rang snang yul
ma btsal bzhag pa'i don de gang
ston pa nyid kyis bdag la gsung
kun bzang ston pas bka' stsal pa
kye ma byang chub sems chen po
nga yis bstan gyis legs par nyon
sems can kun gyi rang snang che
gzhan nas btsal ba'i gnas med de
rang gi mthu yis rang rig las
stong gsum 'jig rten gang nas kyang
de nyid btsal yang rnyed gnas med
'jig rten kun gyi spyod yul ni
de nyid snang ba'i rang bzhin la
sus kyang mthong ba med pa yi
snang ba rang rig bde ba'i zhing
140
'di la goms pa'i rnal 'byor pa
kun tu bzang po nga yi sku
skal dang ldan pa de yis mthong
rang rig skal mnyam stong nyid grogs
'di la goms pa'i skal pa can
rtog pa med pa'i sku bzung ste
nga yi thugs rje'i 'od la zhugs
'di dang nga nyid skal ba mnyam
nga yi dkyil dang 'khor yang yin
nor bu rin chen po 'od 'bar ba'i
sangs rgyas rnams kyi gsang chen 'di
dus gsum sus kyang mthong med nga yis bstan
nga ni kun bzang rtog med la
thugs rje'i snang mtha' ma 'gags pas
sems can rnams kyi re gnas sa
ma btsal bzhag pa'i rin po che
kun gyi spyod yul min pas na
'di nyid rtogs pa'i rnal 'byor pa
mi yi nang na rgyal ba'i sku
dbang phyug yin gyis gus phyag 'tshol
kun tu bzang po nga yi sems
su yis rig cing rtogs pa de
sangs rgyas stong dang skal ba mnyam
skal ldan skyes bu blo rtsal can
mi g.yo mnyam gzhag rjes su 'dzin
dkyil 'khor 'dus pa'i mnga' bdag go
141
'di lta su yis rig cing shes
ma btsal bzhag pas don dang 'phrad
'di 'phrad rnal 'byor skal ldan du
bskal pa brgya phrag bye bar 'gyur
de phyir 'di la 'dris par gces
rtag tu 'di la goms spyod na
rdo rje sems dpa' nyid dang mnyam
de nyid klong du gyur bar bya'o
de nas glog gi 'od zer ni
kun nas sprin dang bral ba yis
ston pa kun tu bzang po la
tshig ni 'di skad nyid du gsol
kye kye ston pa kun tu bzang
ma 'ongs sems can kun rgyud la
rtogs pa'i ye shes ci ltar gnas
'di kun bdag gis ma 'tshal na
ston pa thugs rje chen pos gsung
kun tu bzang po ston pa yis
zhal nas gsung pa cang med par
tshig gi rgyal po 'di dag kun
ma gsungs 'khor gyi blo la snang
rnyog pa med dang rang sems dang
rtog pa med pa'i rang rig gnyis
'dra'o 'dra'o nor ra re
ma bsgribs gting gsal snang ba dang
142
'gro ba'i bsam rgyud zhen pa gnyis
'dra'o 'dra'o nor ra re
ma btsal bzhag pa'i bsgom pa dang
rtsa rlung sems kyi ngal bso gnyis
'dra'o 'dra'o nor ra re
dran med rig pa yul snang dang
dran bsam 'gro drug 'khrul pa gnyis
'dra'o 'dra'o nor ra re
chos nyid dag pa'i bar do dang
yi dam lha yi sgyu lus gnyis
'dra'o 'dra'o nor ra re
rang bzhin sprul sku'i zhing khams dang
theg pa bgrang ba'i sangs rgyas gnyis
'dra'o 'dra'o nor ra re
sku gsum 'bras bu'i mthar thug dang
sna tshogs ma nges lhun grub gnyis
'dra'o 'dra'o nor ra re
theg pa rnams kyi yid dpyod dang
rig pa mngon sum blta ba gnyis
lta ba'i phyogs nas 'dra 'dra la
143
'dra'o 'dra'o nor ra re
rtsol med rig sku yul snang dang
mtshan ma sgom pa'i gzugs brnyan gnyis
'dra'o 'dra'o nor ra re
rig pa'i mdzad spyod rol pa dang
'gro drug 'khrul pa'i snang ba gnyis
'dra'o 'dra'o nor ra re
rang bzhin rnam dag thig le dang
rlung bzung mtshan bcas thig le gnyis
'dra'o 'dra'o nor ra re
chos sku rnam dag snang ba dang
mya ngan 'das pa'i grong khyer gnyis
'dra'o 'dra'o nor ra re
rang rig bsam pa bral ba dang
sems kyi byung tshor sna tshogs gnyis
'dra'o 'dra'o nor ra re
shes rab rang rtsal rdzogs pa dang
yid kyi dran pa phyir shor gnyis
'dra'o 'dra'o nor ra re
gsang chen nges pa'i bden tshig dang
ldem dgongs bcug pa'i 'gal tshig gnyis
144
'dra'o 'dra'o nor ra re
nges pa'i bcu gsum man ngag dang
mtshan ma dpe yi bslu bring gnyis
'dra'o 'dra'o nor ra re
gal te gsang pa'i bden pa'i tshig
nyid kyi zhal rnams ma gsungs par
rmi lam lta bu'i mtshan nyid du
'khor gyi byang sems rnams la ni
shes rab rtog dpyod blo la snang
de ltar rang rang rgyud grol nas
shin tu ngo mtshar nyid gyur nas
'di skad tshig ni yang gsol to
kye ma ston pa kun tu bzang
nyid kyi zhal nas ma gsungs par
bden gnyis 'dra gzhi'i tshig rnams ni
bdag cag rnams kyi blo la yang
rmi lam lta bu'i tshul du'o
'di dag rnams ni ci ltar lags
ston pa nyid kyis bdag la gsung
de nas ston pa kun tu bzang
rang bzhin nyid kyi yul dag nas
glog gi 'od zer sprin bral la
'di skad ces ni bka' stsal to
kye ma byang chub sems dpa' sems dpa' chen po
glog gi 'od zer sprin bral ba
nga yis bstan gyis legs par nyon
de ltar rmi lam lta bu'i tshig
145
ngas ni tshig tu ma brjod par
khyod la sogs pa'i 'khor rnams kyi
blo yi gting du yid ches pa
ngas ni bshad pa ma yin te
nga la de yi bar dag tu
sangs rgyas stong phrag drug khri yis
lung rnams gcig tu dril nas bstan
de tshig khyod kyis thos pa legs
de kun sangs rgyas de dag dang
skal pa mnyam par 'gyur ba'o
mi rtog ye shes las byung ba
ma btsal bzhag pa'i man ngag gis
ye yod dang po'i sangs rgyas rnyed
'di tshe nga ni snang ba dag
dag pa'i rtags ni chos rnams zad
'di nyid zad pas 'khor ba stongs
'khor ba nyid ni stong pa'i rtags
rigs drug gzugs rnams mi snang ngo
de ltar mi snang 'od kyi sku
'gro dang 'ong dang 'dug pa dang
ji ltar ji bzhin sgra rigs pa
'di ni bden pa goms pa'o
bden goms rnal 'byor skal ldan pa
sus ma rnyed pa'i don rnyed de
146
'di la rin thang dpag tu med
dpag med nor dang 'phrad pa'i mis
sus ma mthong ba'i snang ba mthong
'di mthong rang nyid rin re che
de ltar sems la ltang che ba
chos can du ma bu'i phyag mas btab
chos can du ma bur sus chod pa
'dis ni rang rig spar gyis zin
'di ltar zin pa'i skyes bu yis
sangs rgyas pas kyang sngar sangs rgyas
bden pa yi ni dkyil 'khor la
su yis blta bar nus pa de
rigs rnams kun gyi gtso bor 'gyur
dpal ldan tshogs kyi bdag po zhes
he ru ka yi dbang rnams rdzogs
khyad par can zhes 'khor los sgyur
mi de ngan song gsum 'das zhes
'das pa'i sangs rgyas thams cad kyis
'di la lung rnams ston par 'gyur
kye ma byang chub sems dpa' nyon
rnal 'byor skal dang gang ldan pa
khyad par 'di rtogs nyid du shes
sgra bzhi goms pa'i rnal 'byor pas
147
lus kyi rtags rnams mngon du 'byin
gang gis 'od la 'dris pa yi
sa rdo ji brag rang sar 'gags
thig le dag nang ba la sus goms pa
nyag gcig dgongs pa rtsad kyang chod
sku la gom pa'i rnal 'byor pas
rigs drug gzugs kyang longs skur gsal
rig pa nyid la sus goms pa
'dis ni chos rnams zad par 'gyur
snying po yang nas yang bsdus pa
nges pa 'di la gang goms pa
chos kun bslab pa med par shes
de bzhin ma bsgoms ting 'dzin thob
de las grub pa'i mtha' med pas
lung dang rig pa dus gcig rdzogs
sngags dang phyag rgya dkyil 'khor dang
mchod dang dbang dang dam tshig ni
ma btsal bzhag pa'i tshul du thob
'das dang ma 'ongs da lta rnams
skad cig cha la dus gsum rdzogs
sa dang lam dang tshogs rnams ni
bgrod cing sbyang dang bsag med par
148
skal ldan sems la dus gcig rdzogs
gzhi dang lam dang 'bras bu ni
ci ltar gnas pa'i tshul du snang
ngo bo rang bzhin thugs rje ni
rtog med rang sangs nyid du gnas
chos sku longs sku sprul pa'i sku
ma bskyed rdzogs pa'i tshul du thob
lta dang sgom dang spyod pa dang
ma bstan 'khor ba'i tshul du rdzogs
sangs rgyas chos dang dge 'dun ni
ye rdzogs rang gi lus la gnas
snang dang stong dang dbyer med ni
ma byas ye rdzogs nyid du gnas
sa dang chu dang me dang rlung
nam mkha' ye rdzogs tshul du gnas
dmigs pa dag pa'i rnal 'byor pas
dri ma med pa'i phyogs nas ni
gzung 'dzin med pa'i lta ba mthong
dpe bral ye shes gzhi dag las
nyan thos rang sangs rgyas rnams kyis
'di kun rig par rab tu dka'
gal te 'di nyid sus rig pa
stong gsum kun kyang til 'brur tshud
rgya mtsho chen po hu bas kyis btab
des ni ri rab srang la gzhal
khams gsum po ni gting nas bzlog
149
srid pa gsum ka gdar sha bcad
sems can ma lus srog bcad nas
sangs rgyas rnams dang dbyer mi phyed
kun tu bzang po byang chub sems
mi snang mi 'byung rang rig gsal
gleng bral 'di la 'dris pa'i mi
brjod med rang dag rnyed pa'o
'di nyid yon tan dpag tu med
dpag med sangs rgyas rnams dang mnyam
mnyam nyid shes pa kun gyi rje
rang rig mnyam pa'i rgyal po la
bla ma'i lung gis gsal gdab pa
'di ni gser 'gyur rtsi bzhin du
brjod du med pa'i klong zhes bya
gcig shes bya ba sus shes pa
des ni gnyis kyi grangs zad par
kun bzang nga yi sems la shar
de la shar nas yongs kyis med
nub med snying po'i don 'di la
dag pas zhugs pa'i lung rab can
'di kun sa ste mi 'gyur rdzogs
'gro ba'i mgon po dri med ngas
mdzad pa med pa'i thugs rje yes
zin pa med pa'i las rnams byas
150
chags dang bral ba'i yid kyis ni
sngar ma mthong ba'i yul mthong nas
bla ma'i gdams pa'i rtsad rnams ni
dus ni skad cig mtha' la chod
kye ma yang nyon sems dpa' che
kun bzang nga la lta ba med
lta ba med phyir snang ba zad
de bzhin sgom pa nyid kyang med
sgom pa med phyir dran pa 'gags
spyod pa zhes ni brjod du med
spyod pa med phyir lus 'byung zad
zad pa 'di la mtha' brten nas
mi de mi yi snang ba med
lha dang srid pa'i bdag po kun
'di la skrag cing sdangs nas ni
'jig rten mthun pa'i gzugs bzung nas
'phags pa'i bden pa nyid dang bral
'khor ba'i dpung la mngon par zhen
'di kun rang gi las spyod phyir
sngags la 'jug pa'i yan lag gis
thugs rje ldan pas sems gzung bya
de nas rig snang yul 'di bstan
151
'di la 'dris pa skal ba che
de yi phyir na kun bzang ngas
'di kun rig pa'i skyes bu ni
'phags pa rnams dang rdzu 'phrul mnyam
sangs rgyas rnams kyis gsungs pa'o
ngas ni 'di kun yang phye bar
tshig gis rnam par mtshon nas ni
yang dag gsang ba'i don rnams su
gzhung du rnam par bkod nas bstan
'di la 'bras bu sus 'dris pa
rnal 'byor rnams kyi rnal 'byor ro
zhes kun tu bzang po klong drug pa gsang ba'i rgyud chen po las
chos nyid thams cad gtan la phab pa'i klong zhes bya ste gnyis pa'o rdzogs so
lha min rnams gnas su dag par byed pa'i skabs te gnyis pa'o
@3
de nas yang ston pa kun tu bzang po nyid
chos nyid sgyu ma rab tu snang ba zhes bya ba'i ting nge 'dzin la
snyom par zhugs te
zhal 'dzum pa mdzad pas
zhal gyi sgo la sogs pa nas 'od zer stong phrag dpag tu med pa 'phros nas
sangs rgyas dang byang chub sems dpa' dang nyan thos dang rang sangs rgyas dang
152
lha dang mi dang lha ma yin dang
mkha' 'gro ma la sogs pa rnams kyi
yid kyi rtog pa rnam par sbyangs so
de nas 'khor de dag gi nang nas
byang chub sems dpa' sems dpa' chen po
'od zer kun 'dus mtha' yas pa zhes bya ba langs te
bla gos phrag pa la gzar te
ston pa kun tu bzang po la ma chags pa'i mchod pa rnams kyis mchod ma glengs pa'i tshig 'di skad ces gsol to
kye ston pa kun tu bzang po lags
'gro ba rigs drug gis bsdus pa'i sems can rnams la
sems nyid ces pa ci lta bu lags
'di bdag gis ma 'tshal na
ston pas gsung du gsol
de nas ston pa kun tu bzang po ting nge 'dzin las bzhengs nas
'khor rnams kyi nang du 'di skad du bsgrags so
kye 'od zer kun nas mtha' yas pa'i byang chub sems dpa'
'khor 'di dag gi nang du ngas seng ge'i sgra bsgrags gis
khyod la sogs pa dbang po rab tu dang bas nyon cig
rigs drug gi sems can la sogs pa 'di dag rnams ni sems kyis bsdus pas na
153
sems can zhes tshig thams cad du 'byung ba'o
byang chub sems dpa' khyod sems la rnam par dang na 'di ltar yid la zung zhig
mnyam par gnas pa'i sems nyid la
khyab gdal chen po'i yul snang bas
gnyis med snang ba ye 'brel zhes
kun tu bzang po nga yis bstan
mtshan ma med pa'i sems nyid la
chos rnams grangs su snang ba ni
rang grol gnyis med ces bya'o
kun tu bzang po nga yis bstan
brjod du med pa'i sems nyid la
gling gzhi bral ba'i tshig snang ba
smra bsam yul las 'das pa zhes
kun tu bzang po nga yis bstan
btsal du med pa'i sems nyid las
rang byung chen po rang snang ba
rang byung ye shes chen po zhes
kun tu bzang po nga yis bstan
dri ma med pa'i sems nyid la
yul rkyen bral ba'i snang ba ni
rang dag chen po'i dgongs pa zhes
kun tu bzang po nga yis bstan
rtog pa med pa'i sems nyid la
ma bzung 'gag med rang shar ba
154
rang rig gsal ba'i rang ngo shes
kun tu bzang po nga yis bstan
bsam pa med pa'i sems nyid la
rang gnas lhun 'byams snang ba ni
sgra bzhi rang log dgongs pa zhes
kun tu bzang po nga yis bstan
dran pa med pa'i sems nyid 'di
'gyu byed rang dag snang ba ni
'dzin pa rang grol bsam gtan zhes
kun tu bzang po nga yis bstan
byung tshor med pa'i sems nyid la
ma bsams lhag mthong snang ba ni
'gro 'ong zad pa'i dgongs pa zhes
kun tu bzang po nga yis bstan
gzung ba med pa'i sems nyid la
ma 'gags rig pa snang ba ni
rol pa chen po'i ting 'dzin zhes
kun tu bzang po nga yis bstan
'dzin pa med pa'i sems nyid la
rang shar chen po'i snang ba ni
ma 'gags mi rtog dgongs pa zhes
kun tu bzang po nga yis bstan
gzung du med pa'i sems nyid la
bdag rtog bral ba'i snang ba ni
rang bzhag chen po'i dgongs pa zhes
kun tu bzang po nga yis bstan
rtag chad med pa'i sems nyid la
bzang ngan med pa'i snang ba ni
155
spang blang bral ba'i dgongs pa zhes
kun tu bzang po nga yis bstan
blang dor med pa'i sems nyid la
phyogs med rang grol snang ba ni
khyab gdal chen po'i dgongs pa zhes
kun tu bzang po nga yis bstan
bying rgod med pa'i sems nyid la
btang snyoms chen po'i bsgom pa ni
tshogs drug lhug pa'i dgongs pa zhes
kun tu bzang po nga yis bstan
ya nga med pa'i sems nyid la
re dogs bral ba'i snang ba ni
ye bzhag gding ldan dgongs pa zhes
kun tu bzang po nga yis bstan
snang cha med pa'i sems nyid la
nyag gcig cha phra'i snang ba ni
spros bral chen po'i dgongs pa zhes
kun tu bzang po nga yis bstan
de ltar rang dangs dgongs pa ru
sems kyang gtan la phab pa yis
rnal 'byor sems la rang dbang thob
dri mas bcings pa las grol ba'o
de nas byang chub sems dpa' ni
'od zer kun tu mtha' yas pas
ston pa kun tu bzang po la
'di skad tshig gis yang zhus so
kye kye ston pa kun tu bzang
med pa'i sems nyid de ltar na
156
yod pa'i sems nyid ci ltar lags
'di dag bdag la bka' stsol cig
ston pas gsungs pa sems dpa' che
nga yis bstan gyis nga la nyon
yod pa rnams ni 'di lta ste
skye ba yod pa'i sems nyid la
'gro drug snang ba rang shar bas
tha dad gzugs rnams 'dzin par ni
snang ba gzugs su smin par rdzogs
'gag pa yod pa'i sems nyid la
mi rtag rgyu ru rang shar bas
rang bzhin med pa'i snang bar ni
dper na rmi lam bzhin du rdzogs
spros pa yod pa'i sems nyid la
sna tshogs snang ba rang shar bas
sgo lnga so sor snang ba ni
rang sa bzung ba'i cha nas rdzogs
bstan du yod pa'i sems nyid la
sgra tshig ming rnams rang shar bas
tha snyad blo rnams rang dag par
bla ma'i man ngag gsang ba rdzogs
mthong du yod pa'i sems nyid la
'byung rkyen du ma rang shar bas
snang ba'i yul la mngon du ni
ma 'dres rang sal nyid du rdzogs
rgyun du yod pa'i sems nyid la
snang ba'i phung po so sor shar
157
zung 'jug chen por rang 'brel par
mi brjed gzungs dang ldan par rdzogs
yul du yod pa'i sems nyid la
snang ba rnams ni rang shar bas
bdag 'dzin gnyis po rang dag par
yul drug rnams ni so sor rdzogs
brjod du yod pa'i sems nyid la
rgyud dang lung dang man ngag ni
gcig la gcig brten gcig par ni
grub pa'i mtha' dang bcas par rdzogs
bsgom du yod pa'i sems nyid la
zhi gnas lhag mthong rang shar bas
mnyam par bzhag dang rjes su ni
mi g.yo bsam gtan chen por rdzogs
blta ru yod pa'i sems nyid la
snang srid gcig par rang shar bas
khams gsum rang sar grol ba ni
a ti rang bzhin chen por rdzogs
spyod du yod pa'i sems nyid la
bya byed rnams ni rang shar bas
snang ba rang 'dzin cha nas ni
sems nyid brtul shugs sna tshogs rdzogs
thob tu yod pa'i sems nyid la
re ba nyid dag rang snang bas
rtsol bsgrub rnams dang bral bar ni
sku gsum rang la log par rdzogs
158
bgrang du yod pa'i sems nyid la
theg pa so sor rang shar bas
'dod rgyal yid dpyod min par ni
snying po yang gsang chen por rdzogs
dmigs su yod pa'i sems nyid la
snang ba sna tshogs rang shar te
ming dang kha dog so sor ni
gzugs sku rnam pa gnyis su rdzogs
dpag tu yod pa'i sems nyid la
snang ba'i yul la rang shar te
gtad pa'i sa nyid rang snang bar
dmigs pa'i rten dang bcas par rdzogs
bsgrag tu yod pa'i sems nyid la
ngo mtshar tshig kun rang shar bas
brjod bya kun gyi gzhi mar ni
ston pa'i tshig dang bcas par rdzogs
bzhag tu yod pa'i sems nyid la
snang ba rang bzhag gzhir shar bas
cog bzhag chen po'o lta ba ni
btsal ba med pa'i tshul du rdzogs
bsgyur du yod pa'i sems nyid la
nyon mongs rnams ni rang shar bas
dug las sman du bsgyur ba bzhin
sku dang ye shes nyid du rdzogs
dag tu yod pa'i sems nyid la
sgo lnga'i yul rnams rang dag par
ma rnyogs chu nyid rang dangs bzhin
159
snang ba rnams ni rang sar rdzogs
grol du yod pa'i sems nyid la
'di ltar snang ba'i yul dag la
sprul gyi mdud pa rang grol bzhin
rang gi 'dug sar grol te rdzogs
gzhal du yod pa'i sems nyid la
rang snang dag pa'i tshad rnams ni
bre srang tshad la phab pa bzhin
nyams myong gong nas gong du rdzogs
de ltar yod pa'i sems nyid ni
snang ba kun gyi bdag por 'byung
de kun 'byung ba'i sems rnams kyi
dri ma thams cad rang dag pa'o
de nas byang chub sems dpa'i ni
'od zer kun tu mtha' yas pas
ston pa kun tu bzang po la
'di skad tshig gis rab zhus pa
kye kye ston pa kun tu bzang
yod pa'i sems nyid de ltar na
snang ba'i sems nyid ci ltar lags
ston pa thugs rje che mnga' bas
rim pa bdag la phye la gsung
ston pas gsungs pa sems dpa' che
sems zhes 'dzin pa'i rnal 'byor pas
'di ltar nyid du rnam par bshad
tshogs drug snang ba'i sems nyid la
rtog tshogs rnams ni rang sar dag
sgra tshig snang ba'i sems nyid la
160
tha snyad ming rnams rang sar dag
rags par snang ba'i sems nyid la
'byung bzhi'i rkyen rnams rang sar dag
gzung 'dzin snang ba'i sems nyid la
bcings pa'i bdag 'dzin rang sar dag
yod par snang ba'i sems nyid la
dngos po rnams ni rang sar dag
med par snang ba'i sems nyid la
stong pa nyid rnams rang sar dag
yod med snang ba'i sems nyid la
grub pa'i mtha' gnyis rang sar dag
chos sku snang ba'i sems nyid la
rang gi mtshan nyid rang sar dag
chos med snang ba'i sems nyid la
'khrul pa rnams ni rang sar dag
gnyen por snang ba'i sems nyid la
dri ma rnams ni rang sar dag
babs su grub pa'i sems nyid la
gzhi bzhag chen po rang sar dag
thog babs chen po'i sems nyid la
snang ba thad kar rang sar dag
yin par snang ba'i sems nyid la
rdzun gyi tshig rnams rang sar dag
min par snang ba'i sems nyid la
ma byin len pa rang sar dag
yin dang min pa'i sems nyid la
161
mi tshangs spyod pa rang sar dag
'chal pa med snang sems can la
dag 'khyal rnams ni rang sar dag
yul la snang ba'i sems nyid la
phra ma'i tshig rnams rang sar dag
'gyu bar snang ba'i sems nyid la
'dod log rnams ni rang sar dag
ka nas dag pa'i sems nyid la
srog gcod pa yang rang sar dag
rkyen du snang ba'i sems nyid la
brnab sems rnams ni rang sar dag
'bras bur snang ba'i sems nyid la
gnod sems rnams ni rang sar dag
sgra ru snang ba'i sems nyid la
grags pa rnams ni rang sar dag
gzugs su snang ba'i sems nyid la
'dzin pa'i cha rnams rang sar dag
dri ru snang ba'i sems nyid la
shes pa'i cha rnams rang sar dag
ro ru snang ba'i sems nyid la
myong byed shes pa rang sar dag
reg tu snang ba'i sems nyid la
reg bya'i shes pa rang sar dag
chos su snang ba'i sems nyid la
spyi dang ngar 'dzin rang sar dag
bdag tu snang ba'i sems nyid la
zhen pa'i blo rnams rang sar dag
162
bdag med snang ba'i sems nyid la
cha dang bral ba rang sar dag
zag bcas snang ba'i sems nyid la
bskyed pa'i 'byung ba rang sar dag
zag med snang ba'i sems nyid la
'khrul rkyen dri ma rang sar dag
dmigs par snang ba'i sems nyid la
dmigs med cha rnams rang sar dag
blo tshogs snang ba'i sems nyid la
tshor ba rnams ni rang sar dag
yid du snang ba'i sems nyid la
spyod byed cha rnams rang sar dag
gzugs su snang ba'i sems nyid la
'byung ba 'dus pa rang sar dag
rnam shes snang ba'i sems nyid la
rgyu rkyen rnams ni rang sar dag
tshe rab snang ba'i sems nyid la
nyams myong rnams ni rang sar dag
'du shes snang ba'i sems nyid la
gzung 'dzin cha rnams rang sar dag
'du byed snang ba'i sems nyid la
nyon mongs grangs rnams rang sar dag
rtog 'dzin snang ba'i sems nyid la
dran pa'i gzung rnams rang sar dag
ces ston pa nyid kyis gsungs pas
byang chub sems dpa' sems dpa' chen po 'od zer kun tu mtha' yas pa la sogs pa'i 'khor de dag gis sems la ci lta ba bzhin du dbang thob nas
163
rdo rje 'chang chen po'i lta stangs dang ldan par gyur to
de nas yang 'od zer kun tu mtha' yas ba'i byang chub sems dpa' sems dpa' chen pos
ston pa kun tu bzang po la 'di skad ces zhus so
kye ston pa kun tu bzang po sems su snang ba de dag rnams kyi don ci lta bu lags
'di dag bdag gis ma 'tshal na
gsung gi mnga' bdag chen pos gsung du gsol
zhes zhus pa dang
de nas ston pa kun tu bzang pos bka' stsal pa
kye byang chub sems dpa' sems dpa' chen po nyon cig
sems kyi bye brag bsam gyis mi khyab kyang 'di dag gi don rnams ni 'di ltar shes par bya'o
rig pa dang rig pa las byung ba'i sems nyid dang
rang gi mtshan nyid 'dzin pa'i sems rnams so
yang gsol pa
kye ston pa kun tu bzang po rig pa dang rig pa las byung ba'i sems nyid de gang lags
rang gi mtshan nyid 'dzin pa'i sems de gang lags
'di kun bdag la gsung bar zhu
164
zhes gsol pas
ston pas gsungs pa
kye sems dpa' chen po
rig pa dang rig pa las byung ba'i sems nyid ni
dri ma dang rnam par rtog pa thams cad las 'das pa ste
mdor na mya ngan las 'das pa'i rgyu dang 'bras bu thams cad de
rig pa'i rang snang mthong ba'i skyes bu rnams kyi spyod yul lo
rang gi mtshan nyid 'dzin pa'i sems ni
'di ltar rtag par snang ba rnams dang
yod par snang ba dang
de bzhin du med par snang ba thams cad dang
snang ba dang
grags pa dang
lta ba dang
sgom pa dang
spyod par snang ba thams cad dang
'dzin pa dang
rtog pa dang
nyon mongs pa rnams te
bsam pa'i yul du snang tshad thams cad yin no
mdor na 'khor ba'i chos thams cad ni
rang gi mtshan nyid 'dzin pa'i sems te
'gro ba rigs drug rang ka ma'i snang ba thams cad do
kye sems dpa'i chen po
sems dang ye shes rang gi ngo bo ma phyed na
nyi ma sprin phung gis bsgribs pa dang 'dra ste
phyir snang ba'i don byed mi nus so
de'i phyir na sems la mkhas pa'i rnal 'byor pa rnams kyis phyi rol gyi yul bdag med du rtogs
165
ye shes la mkhas pa'i rnal 'byor pa rnams kyis
rig pa nyid kyis ye shes la dbang bsgyur nus pa'o
yang gsol pa
kye ston pa kun tu bzang po
sems kyi gnas gang lags
ye shes kyi gnas gang lags
bstan tu gsol
zhes zhus so
yang bka' stsal pa
kye sems dpa' chen po sems kyi gnas ni kun gzhi yin no
de ci'i phyir zhe na
kun gzhis ni bsam pa'i yul thams cad sdud cing sems su 'du shes pa'i phyir ro
ye shes kyi gnas ni chos kyi sku yin no
de ci'i phyir zhen na
chos kyi sku ni drang rtog thams cad mi mnga' zhing
yul can tha dad du 'dzin pa'i shes pa med pa'i phyir ro
byang chub sems dpa' sems dpa' chen po 'od zer kun tu mtha' yas pa
de'i phyir na kun gzhi dang chos sku ma phyed na
gzugs gcig la tha dad du 'dzin pa dang 'dra ste
don so sor snang bar mi nus so
'di ltar snang ba dang
mi snang ba dang
yod pa dang med pa dang
thams cad la sems kyis ma khyab pa gang yang med do
166
de ltar chos nyid gdal ba chen po la
chos can tha dad du snang ba thams cad gcig tu 'dus te
gnas mi 'gyur bar rang 'dug
lam mi 'gyur bar rang byung
yul mi 'gyur bar rang brdal
snang ba mi 'gyur ba rang brdal ba ni
kun tu bzang po nga'i mdzad spyod yin no
kye sems dpa' chen po
chos sku nam mkha' lta bu la
longs sku skar ma'i tshogs lta bu rang shar nas
sprul sku sprin phung lta bur rang 'dus nas
sems can kun gyi don ma 'gags par byed pa ni
sangs rgyas rnams kyi mdzad spyod dang
sems can kun gyi rang spyod gnyis
'dra gzhi gcig la khyad par che
de ltar kun bzang nga yis bstan
'di la 'dris pa su yin pa
kun bzang nga dang skal ba mnyam
zhes kun tu bzang po klong drug pa'i rgyud gsang ba chen po las
sna tshogs spros pa sems su gtan la phab pa'i klong zhes bya ba ste gsum pa rdzogs so
mi'i skye gnas rnam par dag pa'i skabs zhes bya ste gsum pa'o
@4
de nas ston pa kun tu bzang po nyid
sangs rgyas thams cad kyi snang ba rjes su dran pa sems kyi rdul rnam par dang pa zhes bya ba'i dgongs pa las langs nas
167
mi snang bar seng ge rnam par brtse ba zhes bya ba'i tshig 'khor gyi nang du 'di skad du gsungs pa'o
'khor ba'i thog mang yin te
mi zad pa rgyun gyi shes pa rang 'dzin du gnas pa'o
de'i phyir na 'khor ba rnams kyi tha mar kyang ba rang byung ba yin pas
zad pa shes pa'i don nyag gcig tu go ba'i rnal 'byor pa zhes bya'o
kye nga'i 'khor du 'dus pa'i sangs rgyas dang byang chub sems dpa' dang
nyan thos dang
rang sangs rgyas dang
lha dang
mi dang
lha ma yin la sogs pa rnams kyis
'khor ba nyid thog mtha' bcad pa la mkhas par bya'o
zhes tshig tu bsgrags pas
'khor de dag gi nang nas
byang chub sems dpa' sems dpa' chen po nyi ma 'dus pa'i 'od zer zhes bya bas 'di skad ces ston pa kun tu bzang po la gsol to
kye kye ston pa kun tu bzang po
sangs rgyas thams cad kyis 'khor ba thog mtha' bcad pa'i lus su yod lags sam
ston pa nyid kyis 'khor ba thog mtha' bcad pa lags sam
168
'di ston pa la bdag nyan par 'tshal lo
de nas ston pa kun tu bzang pos bka' stsal pa
kye byang chub sems dpa' sems dpa' chen po nyi ma 'dus pa'i 'od zer khyod nyon cig
'khor ba thog mtha' bcad pa zhes bya ba ni
ngas ci ltar bcad pa de bzhin du
sangs rgyas thams cad kyis kyang bcad pa yin no
sangs rgyas thams cad kyis bcad pa bzhin du
ngas kyang bcad pa ste
tha dad pa ni ma yin no
de bzhin du byang chub sems dpa' sems dpa' chen po khyod kyis kyang
rig par gyis shig
nga kun tu bzang po spros pa thams cad nye bar zhi nas
'gran zla med par sangs rgyas pa'i tshe
chos thams cad kyi mig rdul dang bral ba rnyed de
zhing khams kun tu mtha' yas pa mthong nas
snang ba phyi nang gnyis su med par 'dres pa'i tshe
klong rnam par dag pa'i dgongs pa thob ste
de'i tshe 'khor ba nyid thog mtha' chod pa zhes bya'o
de nas byang chub sems dpa' sems dpa' chen po nyi ma 'dus pa'i 'od zer gyis
'di skad ces ston pa kun tu bzang po la gsol pa
169
kye ston pa kun tu bzang po thog mar ston pa nyid med pa'i sngon rol na
'di ltar sems can sems can zhes kyang ma grub
sangs rgyas sangs rgyas zhes kyang bya bar ma grub pa'i sngon rol na
gzhi 'di ci ltar gnas pa lags
'di bdag gis ma 'tshal na ston pas bstan du gsol
zhes zhus so
de nas ston pas bka' stsal pa
kye ma byang chub sems dpa' sems dpa' chen po nga yis bstan gyis nga la nyon
thog ma babs kyis grub pa'i gzhi
yod pa gcig las med pa la
'khrul par snang ba'i phyogs dag nas
rtog tshogs dag ni gtan phab na
rim pa bdun gyi tshul du snang
rim pa bdun gyi snang ba yang
ngo bo gcig gi snang tshul las
gcig ma shes pas de ltar snang
'on kyang de don 'di lta ste
lhun grub nyid du gnas pa la
170
sna tshogs bsdus pa'i snying por snang
nges pa med par gnas pa la
'gyu byed yid bcas rnam par snang
nges par rang ngor gnas pa la
dran byed 'pho ba med par snang
bsgyur du btub par snang ba la
'bad de blo yi snang bar snang
ci yi ngo bor gnas pa la
gang snang rang gi ngo bor snang
khro bo dag tu gnas pa la
sna tshogs so sor tshul du snang
ka nas dag par gnas pa la
dri ma ye nas med par snang
'di kun blo yi rim pa las
rang ngo ka nas dag pa'o
de kun brjod pa'i tha snyad tsam
yang na yod pa med snang bas
don gyis 'khrul pa'i blo rim phyi
des ni 'di ltar snang ba'o
nyi ma 'dus pa'i 'od zer gyis
ston pa nyid la yang gsol pa
kye kye ston pa kun tu bzang
lhun grub zhes pa'i gnas lugs te
nges par kho nar gzhi lags sam
171
'on te snang tshul nyid kyi gzhi
'di la brten pas don rnyed dam
yang na 'di nyid shes bya ste
dang du blangs ma lags sam
'di kun bdag la ston pas gsung
ston pas gsungs pa sems dpa' che
ngas bstan khyod kyis legs par zung
de nyid don yang 'di lta ste
'di nyid shes par bya ba las
dang du blang ba ma yin no
snang ba nyid kyi tshul tsam las
'di la brten pa ma yin no
de ltar gnas pa'i gzhi de la
lhun grub mtshon pa'i bdag nyid do
de nas sems dpas yang gsol pa
kye ma ston pa kun tu bzang
lhun grub sna tshogs gzhi de ni
yang dag gzhi nyid ma lags te
gal te yin na 'di ltar 'gyur
'di dag sems can 'bad pas ni
grol ba nyid du mi 'gyur te
ma rig nyid kyis sbags pa'i phyir
rig pa yod pas grol gsungs na
172
'bras bu gnyis grol mi 'gyur ram
dper na sol ba nag po la
byi dor dag gis dkar po yi
mdog 'gyur ba ni mi nus bzhin
rgyu dang 'bras bu tha dad pas
yang na lhun grub ma lags so
de bzhin rgyu dang 'bras gcig na
'bad pa rnams la dgos med 'gyur
de phyir lhun grub ces pa'i gzhi
don de btub pa lags ma lags
kun tu bzang pos bdag la gsung
ston pas gsungs pa sems dpa' che
ci ltar khyod kyis go ba bzhin
'di nyid shes bya'i chos can las
yang dag ngo bo ma yin no
nye ma 'dus pa'i byang chub sems
ston pa nyid la 'di skad gsol
kye kye ston pa kun tu bzang
ston pa nyid kyi sngar gsungs pa'i
ma nges gnas pa'i gzhi gsungs pa
'di yang gzhi nyid mi btub par
bdag gis blo rim 'di ltar go
173
'bras bu res 'jog can nyid dam
yang na ldog bcas nyid du 'gyur
ma nges nges pa can 'gyur zhing
ma nges pa ni nges can 'gyur
rang gis ma nges rang yod pas
nges pa yis ni las mtha' bzhin
'di kun shes bya ma lags sam
ston pas gsungs pa de bzhin no
yang gsol nyi ma 'dus pa yis
kye kye ston pa kun tu bzang
nyid kyis gong du gsungs pa yi
nges pa'i gzhi zhes gsungs pa la
'di yang yang dag snying po min
dper na mig ser can dag la
dud la ser po snang ba bzhin
rang sa ldog pa'i khyad kyis ni
rang gzhan gnyis med nges mtha' bral
174
de phyir de yang yang dag min
yang na rgyur nges 'bras nges par
bdag rtag pa dang khyad med 'gyur
'di yang shes bya ma lags sam
gsungs pa de yang gong dang mtshungs
de nas 'di skad yang gsol pa
bsgyur tu btub ces sngar gsungs pa
rang gi gnas lugs bsgyur btub na
'di yang nges pa med par mtshungs
'bras bu nyid ni rgyur ldog phyir
'bad pa rnams la dgos med par
yang dang yang du ldog pas nas
sems po rnams ni rig bcas su
'gro bar btub pa ma yin bzhin
'di yang shes bya ma lags sam
gsungs pa de yang de bzhin no
byang chub sems dpas yang gsol pa
ston pas gong du khra bo gsungs
175
'di yang phyogs dang mi 'thad pas
rgyu gcig 'bras bu tha dad par
gang gis ngo bo 'di snang bas
'bras bu tha dad don de mtshungs
mang ba'i sgra yis nyams pa'i phyir
'di yang shes bya ma lags sam
gsungs pa de yang de bzhin no
yang gsol ston pa kun tu bzang
khas len rnams dang ldan par ni
ston pa nyid kyis sngar gsungs pas
'di kun phyogs kyi 'phen pa tsam
thams cad yin ngor bsgrub pa'i phyir
thug pa med pa'i skyon 'gyur bas
'di yang shes bya ma lags sam
ston pas gsungs pa sngar dang mtshungs
de nas byang chub sems spa'i yang
nyi ma 'dus pa'i 'od zer gyis
ston pa kun tu bzang po la
tshig ni 'di skad rab tu gsol
kye kye ston pa kun tu bzang
ston pa nyid kyis sngar gsungs pa'i
ka nas dag pa'i gzhi zhes gsungs
176
de yi mtshan nyid bzhugs tshul gang
bdag la gsungs shig kun tu bzang
de nas ston pas bka' stsal pa
kye ho sems dpa' chen po nyon
ngas bstan tshig la 'khrul med pas
khyod kyis 'di dag legs par zung
spros bral chos nyid ka dag ni
rang ngo rnam dag snying po'i gzhi
de la tshig dang yi ge bral
brjod pas gtan la dbab tu med
sgro 'dogs tha snyad kun bral te
gzung dang 'dzin pa'i rnam rtog med
sangs rgyas med cing sems can med
chos med chos kyi 'du shes med
gang med ci med ci yang med
de ltar med pa'i snying po la
re zhig tshig gis gtan phab nas
ngo bo nyid la ka dag pas
rang bzhin du ni lhun grub po
mtshon bya nyid la de ltar ro
ston pa kun tu bzang po la
byang chub sems dpas yang gsol pa
ngo bo nyid la ka dag pas
177
sems can 'khor ba 'di mi rigs
ma rig dri ma ye zad phyir
ston pas gsungs pa sems dpa' che
rang bzhin lhun gyis grub pa'i phyir
de yang ma 'gags rol par snang
sems dpa' nyid kyis yang gsol pa
rang bzhin nyid la lhung grub na
sems can 'di dag rang grol rigs
ye nas lhun gyis grub pa'i phyir
gsungs pa sems can 'di dag ni
ngo bo ka nas dag pa'i phyir
grol ba rnams kyang rol par snang
byang chub sems dpas yang gsol pa
ngo bo nyid ni ka dag pas
lhun grub la yang dgos med 'gyur
yang na lhun gyis grub pa'i phyir
ka nas dag pa min par 'gyur
ston pas gsungs pa 'dug tshul lo
gang gis brjod pa'i tshig med pas
brjod pa'i sgra tshig rang bral bas
ci yi ngo bor grub med phyir
tshig gis 'di la gnod pa bral
178
sems can bdag 'dzin blo yul la
sna tshogs dran bsam ma 'gags pas
tshig gnod ngo bo khyad par med
don dam kun rdzob tha dad phyir
de nas nyi ma 'dus pa yi
'od zer gyis ni yang gsol pa
kye kye ston pa kun tu bzang
gzhi de'i mtshon tshig de ltar na
de nyid bzhugs tshul ci ltar lags
'di nyid bdag gis ma 'tshal gsungs
kun tu bzang pos bka' stsal la
kye ma byang chub sems dpa' che
'di ltar nyid ni yang zung zhig
ye shes nyid ni rnam gsum gyis
gzhi yi khyad par tshig tu bstan
ngo bo ka dag ye shes kyis
ma rig pa yi dri ma bral
rang bzhin lhun grub ye shes kyi
'khrul pa'i tshig gis gnod pa bral
thugs rje kun khyab ye shes kyis
thams cad dbyings rig 'brel par snang
de yang ye shes tshig mtshon tsam
de ltar chos nyid ka dag la
ye shes med cing sku yang med
179
'od med kha dog rnams dang bral
gang gi ngo bor grub med pas
ma rig pa dang nyon mongs kyang
smos ci dgos te yod pa min
rang bzhin gyi ni snang ba la
mtshan mar 'dzin pa ye med de
kha dog ma yin rang gsal bas
shes shing snying po cha rnams tshang
'dzin pa'i med phyir gzung yul gang med phyir
rnam par rtog pa'i 'dzin cha med
'od las 'das pa'i ye gdangs su
ye nyid nas ni khyab par gnas
sku las 'das pa'i ngang gdangs su
rnam dag phyag rgya chen por gnas
'on te rang bzhin snang ba la
mtshan mar dmigs pa dkar yon tan
don gyi cha la 'di ltar gnas
rang gdangs bskyed pa'i dkar po'i cha
gting gsal chen po nyid du gnas
180
gting gsal ngo bo'i bkrag bskyed pa
snang ba rang zad ser po'i cha
mi mngon gting nas rang ngo gsal
rang ngo chags med mdangs bskyed pa
rang gis bcings pa bral ba yis
chags pa rang zad dmar po'i cha
gting gsal ma 'dres chen por gnas
ma 'dres so so'i mtshan 'dzin pa
bya btsal bskyod pa rang bral bar
mdzad pa med par ljang gur ni
thog ma rnams kyi zer du yang
mi mngon gting nas gsal ba'i tshe
gting gsal khyab pa'i 'brel byed pa
'gyur med rdzogs pa'i mthing gar ni
ye rdzogs byas pa med par gnas
de ltar de yi rang bzhin la
sku ni snang ba mtshan nyid bral
ye nas rang dag chen po la
rdzogs pa rnams kyi rtse mor gnas
181
'di dag dbang por snang ba med
jos bcas mtshan ma rang dag phyir
gting gsal chen po'i gzhi mar gnas
khyab dang khyab pa nyid kyis stong
phyang nas chad pa med par snang
gsal byed snang ba'i cha ma 'gags
snying po thams cad bcud 'dus pas
dri ma med cing rang sar dag
sangs rgyas rnams kyi gsang chen du
rang bzhin gyi ni cha la bzhugs
thugs rje'i snang cha sna tshogs 'char
stong cha 'gag pa med pa las
shes bya'i ye shes rnam gnyis su
snang ba'i cha las snang ba gsal
med pa'i snang ba rang dag las
rang bzhin shugs kyi thugs rje ni
mdzad pa'i rtsol ba ye med pas
ma byas snang ba'i tshul dag tu
182
ye nas dbye ba med par snang
nyi ma la ni 'od bzhin du
rang gis byas pa ma yin te
rang gis rang bzhin de ltar snang
shes bya'i ye shes gnyis med na
bems po rnams dang khyad ci yod
yang na stong pa phyang chad du
'di snyid 'gyur ba kho na'o
shes bya ji lta nyid mkhyen pa'i
thugs rje'i cha yi ye shes kyis
rang gi dngos po gnas lugs mkhyen
ye shes de yi cha med na
'byung bzhi'i gzugs dang khyad ci yod
shes bya ji snyed mkhyen pa yi
thugs rje yi ni ye shes kyis
gdul bya rnams kyi bsam pa mkhyen
'di med nam mkha' nyid dang mtshungs
de phyir thams cad mkhyen pa yis
ye shes thugs rje'i cha las snang
183
'di kun dran pos bzung ba min
rang bzhin du ni gnas pa las
gzung 'dzin rags par mi gnas so
gting gsal phra ba'i char snang ba'o
'di ni sems can rnams kyi lam
gong du sa bon bzhin du 'phel
'di yi snang ba ma 'gags par
rang mthun sman gyi nus pa bzhin
rigs drug rnams la mthun par snang
de yi phyir na thugs rje'o
de phyir rang gshis 'dug tshul lo
ngo bo nyid dang rang bzhin dang
thugs rje yi ni snang ba yang
blo can rnams la snang ba'o
ngo bo gang du ma grub pas
rang bzhin snang cha gsal bar snang
thugs rje'i cha la ye shes gnyis
bya dang byed pa med par shar
shar snang blo rim gnyis kyi phyir
ye shes mdzad pa gnyis lta bu
184
rtsol bsgrub rnams dang bral bar snang
sangs rgyas rnams kyi ye shes ni
gzhi nas 'di ltang snang ba dag
de ltar dngos po'i 'dug tshul la
ngo bo'i cha nas phar bltas pas
dge dang mi dge ba yang med
srog med gcod pa'i 'du shes bral
gang gi ngo bor grub pa med
mi mdzad snang ba'i bdag por gnas
de ltar gnas pa'i ngo bo la
lta dang sgom dang skyod pas kyang
de yi phyogs cha mthong ba med
sngags dang ting 'dzin bsam gtan gyis
de yis grwa la reg mi 'gyur
sbyin dang tshul khrims bzod pa dang
brtson 'grus bsam gtan shes rab kyis
'di la phan dang gnod pa bral
rgyud dang lung dang man ngag gis
'di la dgos pa rdul cha med
dbang dang dam tshig sdom pas kyang
'di la phan par gnod ma bskyal
dus gsum bzhugs pa'i sangs rgyas kyis
'di nyid sus kyang mthong ba med
de yi phyir na dngos gzhi 'di
tshig gis gtan la dbab pa dka'
185
brjod pas thog tu pheb pa med
bsam pas 'di rjes mi chod de
mngon sum thabs la gang goms pa
'di ni skyes bus mnga' 'phangs bzhin
slar la ldog pa ma yin no
zhes kun tu bzang po klong drug pa'i rgyud gsang ba chen po las gzhi
dngos po'i gnas lugs gtan la phab pa zhes bya ste bzhi pa rdzogs so
@5
byol song gi skye gnas rnam par dag pa'i skabs de bzhi pa'i
de nas ston pa kun tu bzang pos chos nyid mnyam pa chen po'i rgyan
rnam par rol pa zhes bya ba'i dgongs pa la 'byol nyog tu gnas par gyur to
de yis kyang sangs rgyas kyi mdzad pas 'jig rten gyi khams thams cad
til gyi gang bu bzhin du
sangs rgyas thams cad kyi mdzad pa rang shar rang snang
rang grol rang rig rang thob nas
lha dang mi la sogs pa rnams kyis kyang
stong pa nyid kyi rang shugs kyi spyod pa la gnas nas
shes pa rnams ci mi snyam pa'i klong du rang dag rang sangs rang rnyed nas dran pa'i rgyun rnams dus gcig la chad do
186
bsam pa thams cad kyang rang bzhin gyis rnam par dag nas dgongs pa rnams cig char skad cig ma dang dang
rim gyis dang
thar chags sems dang
thod rgal dang
ye dag dang
ye gnas dang
ye rdzogs dang
ye byung dang
ye bkod chen por rang grol nas
rang la rang ngo mtshar nas
rang la rang khyad yid ches
rang la rang stobs skyes nas
de dag thams cad kyis ston pa kun tu bzang po la mgrin gcig tu thal mo
sbyar nas 'di skad zhus so
kye ston pa kun tu bzang po 'di ltar ston pas sems can thams cad la byin brlabs mdzad cing
mya ngan las 'das pa'i dbyings la bkod pa shin tu ngo mtshar lags so
bdag cag ni mi skye ba'i chos nyid la rang bzhin gyis bzod pa thob nas
187
sangs rgyas thams cad dang skal pa mnyam par gyur pas mchog tu dga' mgu yi rang ngo
zhes gsol nas thugs kyi dgongs pa dbyer mi phyed par gyur to
de nas 'khor de dag rnams kyi nang nas byang chub sems dpa' sems dpa' chen po glang po che'i 'od zer rab tu snang byed ces bya bas
langs te
bla gos gyon nas ston pa la 'di skad ces gsol to
kye ston pa kun tu bzang po sangs rgyas kun gyi snying po ji lta bu lags sangs rgyas kyi lam gang yin
'bras bu zhes pa gang la bgyi ba lags
'di kun ma 'tshal bas bstan du gsol
zhes zhu ba nyid rab tu zhus so
de nas ston pa kun tu bzang pos dgongs pa de dag las bzhengs nas
zhal 'dzum pa mdzad nas 'od zer bsam gyis mi khyab par snang bar byas nas
byang chub sems dpa' sems dpa' chen po glang po che'i 'od zer kun tu snang bar byed pa la 'di skad du bka' stsal to
kye kye dad pas rab tu 'dus pa'i sems dpa' che
ngas bstan mi 'gyur dangs pa'i sems kyis zung
188
'das dang ma 'ongs da ltar bzhugs pa yi
sangs rgyas kun gyi snying po gsang mchog bla med pa
'di ltar yod ces brjod pa'i sgra dang bral bas na
'on kyang tshig tsam phyogs kyis mtshon pa ni
byang chub sems dpa' khyod la bdag gis spro yis zung
yang dag snying po bcud bsdus sgron mar byung
nyag gcig spros bral rnyog pa rang dangs pa'i
dbyings kyis nang nas stong nyid rang gsal snying po ni
mtha' med rdul dang bral ba'i rang rig 'od po che
sgra tshig ming gis blo gting yid ches byas nas ni
re dogs g.yangs chod pa'i snying po gsang chen pas
'di ni sangs rgyas kun gyi snying po gsang ba mchog yin te
dgongs don man ngag rnams kyis de yi phyogs brtags nas
lta ba'i snying po sgron ma rin po che 'di ni
rgya ma chad cing phyogs su lhung ba med par snang ba ste
'di dang su 'dris skyes bu rnams ni mya ngan 'da' ba'i gzhi
dgongs don snying po rnams kyi bcud du 'di 'gro bas
phyir phyir dkon pa'i don 'di smra bsam brjod pa med pa'o
189
sgom pa kun gyi snying po lus kyi gnad gcud pas
zhi bar gnas dang lhag mthong ye zung 'brel
'di nyid mnyam pa chen po'i don bsgom rnal 'byor pa
mi yi nang du gnas pa 'jig rten kun gyi gtso bo ste
yang rab mchog tu gyur pa lha mi'i bkur bsti'i gnas
mnyam gzhag gnad gsum zin pas bde ba rang che ste
bde ba nyid las mi rtog ye shes nyams shar ba
snang ba kun kyang bde ba'i klong du rnam par rol pa'o
de phyir las kyi bde bas sku gsum gnad nas zin te bde
ngag gi bde bas chos kun brjod med rtogs te bde
sems kyi bde bas 'khor 'das gnyis med 'dres pas bde
bde ba'i snying po 'di ni sangs rgyas kun gyi yang snying ngo
bcos pa med pa'i snying pos thams cad rnal du phebs
'gag pa med pa'i snying pos rang snang thad kar gcod par byed
skye ba med pa'i snying pos 'khor ba dong nas 'don par byed
rang bzhin gnas pa'i snying pos thog mtha'i ru shan 'byed par byed
khyab gdal chen po'i snying pos chos kyi dbyings rnams sdud par byed
190
ye dag chen po'i snying pos chos kun cham la 'bebs par byed
stong pa chen po'i snying pos dngos rnams zad par byed
rang gsal chen po'i snying pos mun pa'i smag rum bzlog par byed
ye rdzogs chen po'i snying pos mtho dman thams cad snyoms
rtog med yang gsal snying pos 'khor ba gting nas zlog par byed
gsang ba yang tig snying pos sems can gnas rnams stong par byed
dbyings rig yongs rdzogs snying pos snang ba mngon du lta bar byed
lu gu rgyud ni rten med mkha' la snang bas chos kun tshad la phebs
snying po nges pa'i bka' gsang 'di lta nyag gcig rtsol bsgrub kun bral ba'o
glang po 'od zer rab tu snang byed byang chub sems dpa' nyon
sangs rgyas rnams kyi lam ni lnga lnga zung dang ldan pa thams cad la yang snang
lam snang ye shes cog bzhag rnal 'byor rtsol bsgrub kun bral ba
191
sangs rgyas gyis nyag gcig gting zab rgya che lam snang bas
spros bcas sdug bsngal rnams dang ye nas bral ba'i lam du su 'jug pa
'di ni 'jig rten yongs kyi spyod pa spangs te bde ba'i lam dang nye
sangs rgyas kun gyi gsang chen lam 'di sus shes pa
dri ma zad cing tshad med gzhal dang bral ba'i lam gyi snying po ni
ye lnga shes pa lnga dang yul lang
rtog pa lnga'i bdag nyid du snang
sems lnga chos lnga 'byung ba chen po lnga
192
rang bzhin du'ang shar
mdzad pa'i thugs rje lnga
dang gcod pa'i shes rab lnga'i snang ba nyid du'ang shar
snying po lnga dang phyag rgya lnga'i
bdag nyid du yang snang ba rnam par rol
ma lnga bu lnga snang ba lnga ste thog ma bab kyi yul du snang
rlung lnga sa lnga chu lnga'i bde ba rgyas par lus kun la'ang khyab
193
me lnga nam mkha' lnga yi rang bzhin du yang khyab par ye nas rdzogs
sgra lnga dri lnga gzugs lnga'i yul can du ni rang byung ngo
ming lnga tshig lnga tha snyad lnga yi bdag nyid du ni rang byung ngo
ro lnga rig lnga chos lngas lus sems ye nas tshims pa'i rgyu
194
lung lnga rten lnga mkha' lnga'i byung khungs nyid du yang ye nas shar
yid lnga dran pa lnga yi rten du lam nyid ye nas 'du 'bral med snang ba
bdag lnga gzhan lnga'i chos can du ni chen po ye nas byung
'dod chags lnga dang zhe sdang lnga ste gti mug lnga'i cho 'phrul du ni ye nas snang ba ste
nga rgyal lnga dang khong khro lnga ste phrag dog lnga yi mdzad pa rnams su'ang snang
195
gzung ba lnga dang 'dzin pa lnga yi chos nyid dangs pa'i lam du'ang sher
yod pa lnga dang med pa lnga ste mu bzhi'i grub pa rnams su ye nas snang ba'o
dbyings lnga rig pa lnga dang kha dog lnga yi snang ba'o
dkar po ser po lnga ste dmar po lnga yi snang ba ye nas rdzogs
ljang gu lnga dang mthing ga lnga yi yul du rang rdzogs nyid du'o
ye shes lnga dang sku rnam snang lnga'i bdag nyid chen por ye nas rnam par bzhugs
196
thig le lnga dang dangs ma lnga yi dkyil 'khor du ni ye nyid nas ni mnga' bdag go
rtsal yon tan lnga yi 'bras bu ru ni ye nas gdangs
ye gdangs lnga dang zer gdangs lnga dang khyab byed lnga yi tshul du gnas te rang dag go
gsal ba lnga dang stong pa lnga ste 'degs stobs lnga ni ye nyid nas grol bar ro
'char byed lnga dang snang tshul lnga dang shes pa lnga yi ngo bor bzhugs
dpe lnga rtags lnga don lngas mtshon pa'i tshul du shar
dbang lnga dam tshig lnga ste phyag rgya lnga yi rten du ye nas rdzogs pa'o
197
mngon shes lnga dang gzugs lnga dang ni dran sngags kyi gnas pa lnga yi ngo bo rdzogs
dkyil 'khor lnga dang rigs lnga dang ni bdag po lnga yi lam du rnam par rang dag pa'o
rtogs pa lnga dang shes rab lnga dang lha dag gis ni snang bar ye rdzogs pa'o
ting 'dzin lnga dang rang gnas lnga dang mi rtog lnga ni yang dag rdzogs
lta ba lnga dang bsgom pa lnga ste spyod pa lnga yi rtsal du rdzogs par snang
snying po lnga dang gdal ba lnga ni rang dag chen por ye nas rdzogs pa'o
kye ma byang chub sems dpa' glang po'i 'od zer kun tu snang byed khyod nyon cig
198
dus gsum bzhugs pa'i 'bras bu ngas bstan khyod kyis legs par zung
chos sku stong gsal khyab pa'i gdangs la sus goms pas ni rang lus gcig tu grol
longs sku gsal snang gzugs skur shar de gang gis mthong ba'i mi
dkyil 'khor kun gyi bdag po yin pas kun tu bzang po'i lta ba nyid du 'dug
sprul sku bdag tu gzung ba med pa'i ngang du sus 'dris sems nyid mthong ba'i skyes bu ni
'khrul pa yul rkyen rnams kyi phan gnod dngos po gang yang grub pa med pa yis
sku gsum phyir mi ldog pa'i sa la rnal 'byor bde ba sus rnyed rig pa can
'di ni sangs rgyas stong gi bde ba 'dzin pa nyid du kun tu bzang po nga yi sems yin no
sku yi snang ba lhug par sus mthong rnal 'byor kun gyi brten pa yin par nga yis 'di yang bkod
gang gis phyir mi ldog pa'i gdings che na longs ba'i tshad rnams sus 'dzin pa
bla ma mkhas pa'i lha dang ngo sprod don 'di bde ba'i rang bzhin rin po che
de la dri ma med cing gdags pa'i sgra rnams kun gyi 'du shes nyid dang bral
199
de rtogs cog bzhag thabs bzhi'i rnal 'byor gding du yang dag snying po nyid tshud ba'o
dran shes rnams ni mya ngan 'das pa'i tshe na brjod pa'i mtha' kun rang gis rang zang pa'o
phung po khams dang skye mched mya ngan 'das pa'i tshe na snang srid thams cad bde ba'i zhing du snang
dbang po yul rnams mya ngan 'das pa'i tshe na phyag rgya mchog gi longs spyod chen po rang snang ba'o
sgra tshig rnams ni mya ngan 'das pa'i dus na snang ba kun la pha rol phyin pa'o
lta dang sgom dang spyod pa mya ngan 'das pa'i dus na rtsol bcas dran pa rang zang yin
chos dang shes rab mya ngan 'das pa'i dus na lha yi sku rnams mi dmigs rgya yis theb pa rang yang shar
nyams myong mya ngan 'das nyid zad pa'i dus na byung tshor rnams kyi sgo yang rang gis rang 'gags so
drod dang rtags ni rang zad mya ngan 'das pa'i tshe na nyon mongs rnams ni rang gis rang zad stong par byas pa yin
zad pa'i chos 'di spyod pa'i gang zag bskyed dang rang rdzogs pa
snying po 'di la gnas pa'i skyes bu skal can sus mthong ba
200
'di ni dus gsum sangs rgyas kun gyi 'bras bu kun tu bzang po'i ngo bor
rang 'dug yin
sangs rgyas rnams kyi 'bras bu 'di la sus goms dpal ldan rdo rje 'dzin pa nyid du'ang 'gyur
thog ma'i mgon po dri med dag pa 'od kyi dbus nas rang byung rang shar bas
sangs rgyas kun gyi mdzad pa'i bdag nyid du yang gsang mchog chen po nyid kyi sku thob ste
de la mi ldog shes pa'i rnal 'byor blo rtsal stobs dang ldan pa'i skal ba can
'bras bu kun gyi tshad du phyin pas kun tu bzang po nga dang skal pa mnyam pa'o
zhes kun tu bzang po klong drug pa gsang ba chen po'i rgyud las
snying po lam dang bcas pa 'bras bu rang dril bar bstan pa'i klong zhes bya ste lnga pa rdzogs so
yi dwags kyi skye gnas dag par byed pa'i skabs te lnga pa'o
@6
de nas ston pa kun tu bzang pos rang gis 'khor rnams sdud pa'i ched du zhal gyi sgo rnams nas 'od zer kha dog du ma byung ste
sangs rgyas kyi zhing khams rnams snang bar byas pa ni 'di lta ste
'od zer dkar po dang rab tu dkar po dang shin tu dkar bar snang ba dang
201
mchog tu dkar ba snang ba dang
tshad med par dkar bar snang ba dang
de bzhin du dmar pa dang
rab tu dmar po dang
shin tu dmar po dang
mchog tu dmar po dang
tshad med pa'i dmar po'o
yang ser po dang
rab tu ser po dang
shin tu ser po dang
mchog tu ser po dang
tshad med pa'i ser po'o
mthing ga dang
rab tu mthing ga dang
shin tu mthing ga dang
mchog tu mthing ga dang
tshad med pa'i mthing ga'o
de bzhin tu ljang gu dang
rab tu ljang gu dang
shin tu ljang gu dang
mchog tu ljang gu dang
tshad med pa'i ljang gu rnams spras so
gzhan yang shel gyi kha dog lta bu dang
dngul gyi kha dog lta bu dang
mu tig gi kha dog lta bu dang
bya ngang pa'i sgo nga'i kha dog lta bu dang
rin po che ma rgad lta bu dang
rin po che mthon mthing lta bu'i kha dog dang
rak ta dmar po lta bu'i kha dog dang
bung ba'i rgyab lta bu'i kha dog dang
bse sgong rnying pa lta bu'i kha dog dang
rma bya'i mdongs lta bu'i kha dog dang
202
phug ron gyi ske lta bu'i kha dog dang
ri skegs kyi gshog pa lta bu'i kha dog dang
seng ge'i dbral ba lta bu'i kha dog dang
mkha' 'gro'i mig lta bu'i kha dog dang
brgya byin gyi lag pa lta bu'i kha dog dang
gser gyi g.ya' lta bu'i kha dog dang
dug gi rlangs pa lta bu'i kha dog dang
'bring bya'i gshog pa lta bu'i kha dog la sogs pa rnams spros so
de ltar 'od dang kha dog de dag rnams rnam par spros pas sangs rgyas kyi zhing khams rnams ras tu snang bar byas te
rgyan dang kha dog dang bzhugs tshul dang
sku'i ngo bo thams cad rang gsal zhing rang dag chen po'i bsam gtan du brtan pa thob ste
sangs rgyas rnams kyi rang rang gi tshom bu dang bcas pa'i zhal rnams dus gcig la mthong ngo
de nas 'khor de dag gi nang nas byang chub sems dpa' sems dpa' chen po
rang gi 'od zer gyis 'khor ba thams cad 'jigs par byed pa zhes bya bstan las langs te
203
bla gos gzar nas
ston pa kun tu bzang po la 'di skad ces zhu ba zhus so
kye kye ston pa kun tu bzang
nyid kyi zhal gyi dkyil 'khor nas
'od dang kha dog rnam spros pas
sangs rgyas zhing rnams snang bar byas
de ltar sangs rgyas thams cad kyi
'khor dang bcas pa'i dkyil 'khor ni
dus gcig la ni snang mdzad pas
bdag cag rnams kyi rnam rtog zang
nyid dang skal ba mnyam gyur kyang
ma 'ongs pa yi sems can rnams
yang dag lam la 'dzud pa'i phyir
nyid kyi ting 'dzin ci lta bu
de yi tshad rnams gang gis bzung
ma 'ongs pa yi sems can gyis
'di la ci ltar bslab par bgyi
'di kun sems can kun don du
snying rje chen po nyid bzhengs la
bdag gis zhus pa'i don 'di gsungs
de nas ston pa kun tu bzang
snying rje chen po'i yid g.yos nas
zhal nas spros tshig 'di skad gsungs
kye ma byang chub sems dpa' che
rang gi 'od zer 'khor ba 'jig
khyod kyis zhus pa de legs so
nga yi tshig tu 'di skad brjod
204
khyod kyis 'di kun rab tu zung
ting nge 'dzin zhes ngas bshad pas
de kun don ni 'di ltar snang
nga la ting 'dzin gsum yod de
rang gnas cog bzhag bsam gtan kyis
dngos po'i gnas lugs mnyam par 'jog
thog bab chen po'i ting 'dzin gyis
rang snang thad ka'i zhen pa bzlog
rgyas 'debs chen po'i ting 'dzin gyis
snang ba thams cad rang sar 'jog
rang gi 'od zer snang ba yis
'khor ba 'jig pa'i byang sems kyis
ston pa nyid la 'di skad gsol
kye kye ston pa kun tu bzang
rang gnas cog bzhag ting 'dzin ni
ston pa'i thugs la ci ltar shar
de yi don ni gang tsam zhig
thog bab chen po ting 'dzin ni
'di ni nang gi dus su skye
'di don blo la ci ltar bsgom
de bzhin rgyas 'debs ting 'dzin ni
'di nyid lam du ci ltar bya
sgom pa ji ltar bsgom pa lags
'di kun bdag gis ma 'tshal na
ston pa thugs rje chen pos gsung
de nas ston pas bka' stsal pa
205
byang chub sems dpa' chen po nyon
ngas bstan pa la nor ba med
khyod kyis nor med sems kyis zung
rang gnas cog bzhag ting 'dzin ni
nga yi sems la 'di ltar bas
phyi rabs sangs rgyas 'dod pas kyang
'di ltar blo la snang byas la
rdo rje sems dpa'i rigs su 'gyur
ting 'dzin dang po cog bzhag gis
sku gsum rim gyis goms pa yin
dngos po gshis kyi rnal 'byor la
don 'di mchog tu nye bar 'gyur
sku gsum goms pa'i gting nyams ni
cig char skye ba ma yin te
'di kun rim gyis blo yul lo
thog mar sprul sku'i ting 'dzin thob
de dus rang gi shes pa la
sngar ma mthong ba'i chos rnams ni
bsam pa med par blo la 'char
rang gis gdams pa'i tha snyad tshig
ma bzung bzhin du sems la bkra
skyes bu skal dang ldan pa la
chos kyi ro yis sems rgyas pas
lus kyang zhag ni drub bdun du
yod pa dag ni mi tshor cing
sa yi ster las 'phags nas ni
206
bar snang dag la 'gro ba'i nyams
rang gi spyod yul nyid du 'byung
rig pa rtsol med mkhar bzhag nas
rang gi sprul sku de ltar thob
de 'das rig pa ma 'gyur bas
longs spyod rdzogs pa'i sku nyid kyang
rang gi shes pa'i rgyud du ni
rang snang rtsol ba kun bral bar
nyams su myong ba 'di ltar 'byung
sngar ma mthong ba'i 'od snang yang
dum bu dum bur sus mthong ba
'di yang longs spyod sku la spyod
skal ldan rnal 'byor rigs ldan de'i
shes pa rang la nyams regs la dran
bsam dbang po ma 'gags par
yed rtog gzhan la mi 'jug cing
rig pa rang dal bde bdag med
rang gsal blo la goms pa yis
nang gsal 'gyu yid phyir mi 'chor
dngos po'i rjes su sems mi 'breng
'jig rten bya ba blor mi snang
'dis ni longs spyod rdzogs pa thob
de nas rig pa nam mkha' la
cog bzhag chen po'i lta stangs kyis
yengs pa med par nyam gzhag pas
yang ni chos sku'i ting 'dzin snang
de dus shes pa gting nas gsal
lu gu rgyud la mngon du spyod
207
snang ba 'phel ba'i tshad yin te
shes pa rno la myur ba yis
sngar ma mthong ba'i sangs rgyas mthong
'di yis de yi ming rnams ni
brgya stong bye ba blo la snang
lus kyis sngar ma byas pa yi
shes pa med pa'i tho rnams dang
sgyu rtsal rnams dang yi ge dang
skad dang brda' dang rten 'brel ni
ci ltar sngar ma mthong ba yi
'di kun nyams su myong ba dang
sa dang chu dang me rlung gis
sgra yang 'di yis bde bar thos
mdor na mngon shes drug rnams kyang
skal dang ldan pa 'dis thob ste
rang dang pha rol don rnams ni
skyes bu 'di yis byed par 'gyur
kye ma byang chub sems dpa' che
sku gsum rang byung dgongs pa ni
mdor na 'di ltar nyams tshad rnyed
sprul pa sku yi rnal 'byor spyod
sngar rnyed snying rje chen po ni
rang gi rgyud la mchog tu skye
'di dus sprul sku'i ting 'dzin thob
gsal la mi rtog shes pa'i nyams
longs sku'i ting nge 'dzin zhes bya
zag med thig le stong pa'i sku
rtsol ba med par rang shar tshe
chos sku'i ting nge 'dzin zhes bya
208
rnal 'byor ldan pa 'dis thob po
kye ma byang chub sems dpa' nyon
thog bab chen po'i ting 'dzin ni
gang gis 'di la goms spyod na
snang ba kun la dbang bsgyur thob
de yi rim pa'i rtsal rnams ni
rnam par bsgom pa gang 'dod pa
'di kun blo yi yul du bya
yul rkyen rtog par rang shar tshe
'di kun rang bzhin med shes na
snang ba thams cad sgyu ma'am
rmi lam dang ni gzugs brnyan ltar
mi rtog gzugs snang chen po'i nyams
su yi rgyud la shar ba de
snang ba rnams ni thog babs su
snang rkyen rgyud la mi 'char bar
phyir mi ldog pa'i ting 'dzin thob
kye ma rang gi 'od zer gyis
'khor ba 'jig pa'i byang chub sems
rgyas 'debs chen po'i ting 'dzin ni
su zhig bsgom par 'dod pa'i mis
mi 'gyur ba yi gnad gzir phyir
lus kyi 'dug stangs gzir byas nas
shes pa nam mkha' mthongs su 'phangs
de bzhin mig gis bar snang la
glang po che yi lta stangs kyis
dran med rgyas 'debs chen por bzhag
de ltar rig pa nam mkhar gtad
209
'di dang 'bral ba med par ni
rnal 'byor rgyun du gang bsgom pa
nyin dus snang ba rgyas 'debs so
mtshan dus rang rig gnas khang du
dus bzhi mnyam pa'i tshad bzung phyir
dbang po'i sgo rnams rab bsdus nas
thig le stong pa'i sgron ma la
rnal 'byor ldan pas sems bzhag pas
thig le nyid ni 'phel ba na
shes pa nyid kyang 'phel bar gtad
de bzhin thig le phra 'gyur tshe
thig le je 'phra je 'phra la
shes pa je phra je phrar bzhag
gnyid dang rmi lam gnad kyis ni
sngar zhen bag chags rtsad nas dbyung
'di ltar mtshan mo'i dus rnams su
rnal 'byor skal dang ldan pas spyod
'dis ni snang ba rang rgyas thebs
kye ma byang chub sems dpa' nyon
nga yi ting 'dzin tshad rnams ni
sus kyang bzung bar mi nus te
210
'on kyang tshig gis 'di ltar sprad
rang gnas chog bzhag ting 'dzin tshad
'byung ba'i dgras mi gnod pas bzung
de bzhin thog bab ting 'dzin tshad
'dod chags la sogs nyon mongs rnams
rang gi rgyud la gtan mi skye
mi dge'i bsam pa skye mi srid
'dis ni de yi tshad rnams bzung
rgyas 'debs chen po'i ting 'dzin tshad
rags pa'i snang ba 'gags pas bzung
kye ma byang chub sems dpa' nyon
ngas bstan khyod kyis legs par zung
ma 'ongs pa yi sems can gyis
ting 'dzin gsum la 'di ltar bslab
rang gnas cog bzhag ting 'dzin ni
dbang po'i sgo rnams mi dgag cing
lus kyi spyod pa spyad mi bya
gnyid kyang spang bar mi bya ste
sems kyis gud du bcad pa min
mdor na lus ngag rang so la
yid 'byung cha rnams phyir ma shor
dbang po'i yul rnams drug la yang
shes bzhin dpyod pa'i yid ma 'gyus
rang snang mi rtog chen po la
gsal la rtog med nyams skye'o
thog bab chen po'i ting 'dzin la
211
lus ni tha mal lta bu la
ngag gi smra brjod tshig rnams bral
sems ni dam du ma bcings pa'o
snang ba rgyas 'debs ting 'dzin ni
lus dang yul dang rig pa yis
rang snang dag pa'i tshad rnams bzung
de ltar rang snang tshad zin na
'gro drug 'khrul pa'i snang ba 'gags
'di snyid 'gags pa'i dus kyi tshe
rig pa srang la thebs pa yin
de ltar srang la nam theb na
rang gi lus kyang mi snang ste
'byung bas bskyed pa'i sha khrag lus
'byung ba rang sar dag pa'i phyir
'di ni yul du snang ba med
'khrul pas bzung ba'i yid kyi lus
'gyu ba rang sar sangs pa'i phyir
'di yang mi snang rang sar yal
rig pas bzung ba'i 'od kyi lus
chu zla'i dkyil 'khor bzhin du'o
'di tshe chos nyid zad dang nye
'di la gang goms sangs rgyas zhing
de nas lus gsum mtha' zad nas
bya bral rdzogs pa'i lus thob ste
tshe 'di'i lus kyi mtha' rnams dang
bral ba la ni nye ba yin
gzhi la goms pa'i rnal 'byor pas
212
rang gi gnas kyang stongs par 'gyur
lam la goms pa'i rnal 'byor pas
'byung ba rags pa'i dri ma zad
'bras bu la ni sus goms pa
mi ldog sa la 'di yis phyin
kye ma sems dpa' chen po nyon
de ltar nga yi ting 'dzin ni
'di la goms pa skal ba ldan
snang ba gsum las rnyed pa thob
ting nge 'dzin 'di sus gzung ba
sku gsum la yang mngon par gnas
'di nyid su yis bslab pa la
sde snod chos rnams blo la snang
'di gsum gang gis goms pa'i mi
'khrul pa'i zhen yul rtsad nas chod
'di nyid nyams myong shar ba'i mi
ma btsal bzhag pa'i bsam gtan thob
kye ma byang chub sems dpa' nyon
da ni ting 'dzin rnam gsum gyi
tshad la goms pa'i rnal 'byor pas
ldog pa med pa'i lam zhugs nas
stong gsal chen po'i gnas su phyin
lu gu rgyud kyi lus blangs te
dran bsam zad pa'i rtser phyin nas
sngar ma mthong ba'i yul mthong nas
gsal byed dbyings kyi go rar tshud
tshud pas sku gsum rang lus zad
de ltar lus kyi mtha' zad nas
213
nyams su skye ba nyid kyang med
'di la ci yang yod pa min
brjod par bya ba'i tshig kyang med
med pa yang ni ma yin te
yon tan 'char tshul 'gag pa med
'di la gnas pa'i sa med pas
brten par bya ba'i chos rnams zad
'di la dmigs pa'i rgyu med pas
bzung ba'i chos rnams ye nas stong
'dzin pa'ang ni rang sar stong
'di la stong zhes gdags su med
de bzhin gsal ba'i snang ba ci
gang du yod par ma myong ste
de bzhin med kyang ma myong bas
yod med mtha' yi dri ma med
dri med dag pa'i skur snang ngo
zhes kun tu bzang po klong drug pa'i rgyud gsang ba chen po las
nyams su blang ba'i ting nge 'dzin gyi klong bstan pa ste drug pa rdzogs so
dmyal ba'i skye gnas dag par byed pa'i skabs te drug pa'o
de nas ston pa kun bzang gis
tshig gi mtha' sdud 'di skad gsungs
e ma ngo mtshar rmad du byung
lha rnams 'bros khungs bcad pa'i phyir
nga ni lha yi dbang po'o
mi rnams 'bros khungs bcad pa'i phyir
214
nga ni mi yi thub pa'o
lha min 'bros khungs bcad pa'i phyir
nga ni lha min kun gyi gtso
byol song 'bros khungs bcad pa'i phyir
nga ni byol song rnams kyi sgron
yi dwags bros khungs bcad pa'i phyir
nga ni yi dwags kun gyi gter
dmyal ba'i 'bros khungs bcad pa'i phyir
nga ni dmyal ba'i rgyal por snang
de ltar ston pa kun bzang gis
rigs drug bros pa'i khungs bcad pas
'khor gyi byang chub sems dpa' rnams
dga' mgu ngang pa'i sems skyes nas
ston pa nyid la rab bstod nas
de ltar gsungs la rjes yi rang
zhes kun tu bzang po klong drug pa'i rgyud ces bya ba las
'gro ba rigs drug gi skye gnas dag par byed pa
rang bzhin rdzogs pa chen po
'bum 'phrag drug cu rtsa bzhi'i bcud phyung ba rdzogs so
kun tu bzang po klong drug pa'i rgyud la
'grel pa rin chen phreng ba zhes bya ba bzhugs so
rdzogs so
klong chen drug gi rgyud la ma bu lnga
dge'o dge'o dge'o