სამარგალო (როზმერ გოგენია)
მიჸორს ჩქიმი სამარგალო
თიშ გოლა დო, თიში რზენი.
დღასუ გლახა ვამათქუე
თუდო დაჩხირ ქათმორზენი.
შონეშ გოლაშე მოხირჩანსუ,
მოსოფუნს დო მოხირჩანსუ,
მარგალ კოჩი ხვამელ ორე
ღვინი ვარკუ დღას ჭირქასუ.
სუმარც შეხვად გოძიცელო
თიშ ჭირც დიხას ვაჸათანცუ,
ქახუტოლუ, გოქუნუნცუ
თუდო რდას დო ლაკადასუ.
ეზო–კარი მოკვანწილცუ
ჯოღორ ინოყვაყვალანცუ,
თაქიანი გორდი ხოლო
ბირებული ყაყალანცუ.
ცა ირო რე მოსარკილი
რწკინუნცუ დო ვარკალანცუ,
ქაცარ დო ოჩი ოჸვილარი
ირო მუჭომ ჯღვარკალანსუ.
წყარიშ წისქვილ სქიბუს ურთანც
ლატის ქუნც დო ღარღალანცუ,
სქვამი ცირა ჯარალუას
ძიცას ღურუ ტკვარჩალანცუ.
კუნთხუ უჯგუშ ვამწონებუ
შხვეფი ტყურათ ყვარვალანცუ
ათეჯგუა სქურიშ წყარი
სოთინ ვამოხვარჩალანცუ.
უჩაშეფიშ პატიცემა
უჩქუ კაბეტ, ბაღანასუ,
ძღაბეფ ირო დოგორუნა,
მუშ ოსქვაფურ – მახანასუ.