Аҡ финдәр асҡан һуғыштан
Олатай имен ҡайтҡан,
Шинелен элеп ҡуйырға
Ағас сөй яһап ҡаҡҡан.
Тал сыбыҡ менгән малайы
Туҙҙырып сабып килгән,
Ҡыҙығыптыр, атаһына
Эшлекле һорау биргән:
- Ағастан юнылған ҡаҙаҡ
Оҙаҡҡа сыҙар микән?
Улына йылмайып ҡарап
Атаһы былай тигән:
- Ағас сөй - имән үҙәкле,
Оҙаҡҡа түҙер әле,
Имән сөй һынып сыҡҡансы
Шинелем туҙыр әле.
Туҙып өлгөрмәгән шинель,
Тағы иңенә һалған...
Әсәләре берҙән-бер көн
Ҡайғылы хәбәр алған.
Малайҙар еткән.
Алмашлап
Һалдатҡа барып килгән.
Алтаулап шинель элгәндәр -
Имән сөй һаман түҙгән.
Ҡыуаныс.
Һалдат ҡаршылап
Өй эсе шаулай-гөрләй.
Олатай ҡаҡҡан ҡаҙаҡҡа
Ейән дә шинель элгән.