nit? Sa siring na bagay pinapasakitan mo ako, alagad kun nagigiromdoman ko ito duman sa beaterio, minahoyomhoyom ako, hinihidaw ko ika tanganing magiwal naman kita... asin tolos mansana nagkakauli kita giraray. Saradit pa kitang mga aki: ominiba kita sa saimong ina sa pangarigos sa sapang ito sa lindong kan kabotongan. Sa pangpang kadakol kan mga nagtuturobong birak asin mga pananomon, na an mga dapleng pagngaran (86) isinasabi mo sako sa latin asin sa kastila, tara nagadal ka na kaito sa Ateneo. Dai ko ika pinakimanohan; nalilinga ako sa kabobokod kan mga kalibangbang asin mga atibagos, na sa mga saradit na hawak kan mga ini siring sa alfiler igwa kan gabos na karay kan hablon-dawani asin kan gabos na anilag kan nacar, na naninoksinok asin nagpaparalamagan sa tahaw nin mga burak; kun gayod, muya kong biglaon kan sakong kamot, sirikopon su mga sira-sira, na mga maliksing nagpapakapolnos sa lomot asin sa mga sorosaradit na gapo sa pangpang. Nawara ka sanang basang, asin kan pagbalik mo may dara kang koronang mga dahon asin mga burak nin lukban na ipinotong mo sa sakong payo, inapod mo ako nin Cloé; gominibo ka nin saro pang saimo man, alagad mga balagon. Alagad kinoa kan saimong ina, rinonot nin sarong gapo, sinalakan nin gogo ta ibabalogo satuya; nagbolos nin luha su saimong mga mata asin suminabi kang: dai syang pakasabot dapit sa mitologia: .. “‘Mangmang,’ an simbag an saimong ina, ‘makikita mo ta magaamyo nin mahamot an saindong mga buhok.’ Ngominisi ako, naraot su boot mo, habo kang makigolay sakuya, asin sagkod na natapus su aldaw dai mo ako piggironggirongan, mala ta garo na sana akong homibi. Kan papuli na kita sa banwaan asin huli ta makosog na marhay su saldang, kominoa ako nin mga dahon nin lakad-bulan na nagtuturobé sa gilid kan dalan, itinao ko saimo tangdning ibugtak mo sa irarom kan saimong kalo asin dai ka pagkologan nin payo. Hominoyomhoyom ka, dangan kinaptan ko ika sa kamot, nagkauli kitang duwa.” Hominoyomhoyom si Ibarra sa kamongayan, binuka su saiyang cartera asin may kinoang papel na may napapatés na mga maitom na dahon na mga ardlang asin mga maalimyo. “!Su saimong mga dahon nin lakad-bulan!” an simbag kan hagbayon sa hilingon kan daraga; “iyo ini gabos
