Канѡ́нъ а҆́гг҃лꙋ гро́зномꙋ и҆ воево́дѣ
| Канѡ́нъ а҆́гг҃лꙋ гро́зномꙋ, и҆ воево́дѣ, и҆ храни́телю всѣ́хъ чл҃вѣ̑къ, ѿ вседержи́телѧ бг҃а по́сланномꙋ по всѧ̑ дꙋшѧ̀ чл҃вѣ̑чєскаѧ. Творе́нїе ᲂу҆ро́дивагѡ парѳе́нїа by |
| This page contains Church Slavonic text. Without proper font support, you may see question marks, boxes, or other symbols instead of letters and diacritics. Click here to download required fonts. |
и҆ воево́дѣ, и҆ храни́телю всѣ́хъ чл҃вѣ̑къ,
ѿ вседержи́телѧ бг҃а по́сланномꙋ
по всѧ̑ дꙋшѧ̀ чл҃вѣ̑чєскаѧ.
По ᲂу҆́треннѣмъ пѣ́нїи гл҃го́ли: За мл҃твъ ст҃ы́хъ ѻ҆ц҃ъ: Цр҃ю̀ нбⷭ҇ный: Трист҃о́е. И҆ по Ѻ҆́ч҃е на́шъ: Гдⷭ҇и, поми́лꙋи, вⷤі. Сла́ва, и҆ нн҃ѣ: Прїиди́те, поклони́мсѧ, гⷤ, та́же ѱало́мъ н҃: Поми́лꙋй мѧ̀ бж҃е:
Канѡ́нъ, гла́съ ѕ҃. [edit]
Пѣ́снь а҃. [edit]
І҆рмо́съ: Ꙗ҆́кѡ по́ сꙋхꙋ ходи́въ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пое́мъ вопїѧ́ше.
Запѣ́въ: Ст҃ы́и а҆́гг҃ле, гро́зныи воево́да, молѝ бг҃а ѡ҆ на́съ.
Пре́жде стра́шнагѡ и҆ гро́знагѡ твоегѡ̀, а҆́гг҃ле, прише́ствїѧ ᲂу҆молѝ ѡ҆ мнѣ̀, грѣ́шнѣмъ, ѡ҆ рабѣ̀ твое́мъ, и҆́мⷬ҇къ. Возвестѝ мѝ коне́цъ мо́и, да пока́юсѧ дѣ́лъ сво́ихъ ѕлы́хъ, да ѿри́нꙋ ѿ себѐ бре́мѧ грѣхо́вное.
Дале́че мѝ съ тобо́ю пꙋтеше́ствовати, стра́шныи и҆ гро́зныи а҆́гг҃ле, не ᲂу҆страшѝ мене, маломо́щнаго. Да́и мѝ, а҆́гг҃ле, смире́нное своѐ прише́ствїе и҆ кра́сное хожде́нїе, и҆ велмѝ сѧ тебѣ̀ возра́дꙋю. Напо́и мѧ̀, а҆́гг҃ле, ча́шею спⷭ҇нїѧ!
Сла́ва: Ст҃ы́и а҆́гг҃ле, да мѧ̀ напои́ши ча́шею сп҃се́нїѧ и҆ ве́село текꙋ̀ во слѣ́дъ твоемꙋ̀ хожде́нїю и҆ молю́сѧ: не ѡ҆ста́ви менѐ си́ра.
И҆ нн҃ѣ: Ро́ждшаѧ тѝ цр҃ѧ̀ вы́шнимъ си́ламъ, прест҃а́ѧ цр҃и́ца, ты бо є҆сѝ млⷭ҇тива, мо́жеши бо ѡ҆блехчи́ти мое бре́мѧ грѣхо́вное, тѧ́шкое.
Пѣ́снь г҃. [edit]
І҆рмо́съ: Нѣ́сть ст҃а ꙗ҆́коже ты̀, гдⷭ҇и бж҃е мо́й, воз̾несы́и ро́гъ вѣ́рныхъ си бл҃же, и҆ ᲂу҆тве́рждь и҆́хъ на ка́мени и҆сповѣ́данїѧ тѝ.
Ст҃ы́и а҆́гг҃ле хрⷭ҇то́въ, гро́зныи воево́да, поми́лꙋй мѧ̀, грѣ́шнаго раба̀ своего̀, и҆́мⷬ҇къ. Е҆гда̀ прїи́детъ вре́мѧ твоегѡ̀ прихо́да, ст҃ы́и а҆́гг҃ле, по менѐ грѣ́шнаго и҆́мⷬ҇къ разлꙋчи́ти мою̀ дꙋ́шꙋ ѿ ᲂу҆бо́гагѡ мѝ тѣлесѝ: вни́ди съ ти́хостїю, да съ ра́достїю ᲂу҆срѧ́щꙋ тѧ̀ че́стно.
Молю̀ тѝ сѧ̀, ст҃ы́й а҆́гг҃ле, ꙗ҆вѝ ми сво́и свѣ́тлыи зра́къ и҆ ве́село возрѝ на мѧ̀, ѻ҆каѧ́ннаго, да не ᲂу҆страши́тъ менѐ прихо́дъ тво́и ст҃ы́и, да ᲂу҆гото́влюсѧ на срѣ́тенїе тебѐ че́стно.
Сла́ва: Ст҃ы́и а҆́гг҃ле, посла́нниче бж҃їй, да́жь мѝ, а҆́гг҃ле, ча́съ пока́ѧтисѧ въ согрѣше́нїи и҆ ѿри́нꙋти ѿ себѐ бре́мѧ тѧ́шкое. Дале́че мѝ тещѝ вослѣ́дъ тебѣ̀.
И҆ нн҃ѣ: Ст҃ы́и а҆́гг҃ле, не и҆́мамъ и҆на́гѡ ра́звѣ тебѐ застꙋ́пника ско́ра. Поми́лꙋи грѣ́шнаго раба̀ своего̀ и҆́мⷬ҇къ и҆ приведѝ дꙋ́шꙋ мою̀ ко влⷣчцы. Та̀ бо є҆́сть млⷭ҇тива ѿпꙋща́ти грѣ̑шнымъ согрѣшє́нїѧ.
Пѣ́снь д҃. [edit]
І҆рмо́съ: Хрⷭ҇то́съ мнѣ̀ си́ла бг҃ъ и҆ гдⷭ҇ь, чⷭ҇тна́ѧ цр҃кви бг҃олѣ́пнѡ зове́тъ вопїю́щи, ѿ со́ вѣсти чи́сты ѡ҆́ гдⷭ҇ѣ пра́зднꙋющи.
Молю̀ тѝ сѧ, стра́шныи и҆ гро́зныи посла́нниче вы́шнѧгѡ цр҃ѧ̀, воево́да: ве́село воззри́ши на мѧ̀ ѻ҆каѧ́ннаго, да не ᲂу҆жаснꙋ́сѧ твоегѡ̀ зра́ка и҆ ве́село съ тобо́ю пꙋтеше́ствꙋю.
Плача́сѧ и҆ вопїю̀, воево́да нбⷭ҇ногѡ цр҃ѧ̀: гро́зно возхожде́нїе твое, да не вско́рѣ растли́ши менѐ, грѣ́шнаго, но ве́село и҆ ти́хо напо́и менѐ сме́ртною ча́шею.
Сла́ва: Ѿ срⷣца вопїю̀ тѝ, гро́зныи воево́да и҆ во́ине цр҃ѧ̀ црⷭ҇твꙋющихъ, нѣ́сть силнѣ́е тебѧ̀ и҆ крѣпча́иши во бра́ни, и҆ ᲂу҆миле́нна въ сме́рти, и҆ прѧма̀ во и҆справле́нїи. И҆спра́ви дꙋ́шꙋ мою̀ на пꙋ́ть вѣ́ченъ.
И҆ нн҃ѣ: Гпⷭ҇жѐ бцⷣе, дв҃о, ро́жшїѧ цр҃ѧ̀ нбⷭ҇снаго, смертоно́снагѡ часа̀ не минꙋ́хсѧ, и҆зба́ви дꙋ́шꙋ раба̀ своего̀, и҆́мⷬ҇къ, ѿ сѣ̑ти ловѧ́щихъ.
Пѣ́снь є҃. [edit]
І҆рмо́съ: Бж҃їимъ свѣ́томъ тѝ бл҃же, ᲂу҆́тренюющихъ тѝ дш҃а любо́вїю, просвѣтѝ молю́сѧ, тѧ̀ вѣ́дѣти сло́во бж҃їе, и҆́стиннагѡ бг҃а, ѿ́ мрака грѣхо́внагѡ и҆зима́юща.
Ѽ срѡ́дници моѝ, є҆гда̀ ви́дите менѐ, ѿ ва́съ разлꙋче́на, и҆ зра́къ лица̀ моегѡ̀ измѣни́хсѧ, и҆ гро́бꙋ предаю́сѧ, и҆ ко сꙋдїѝ влеко́мъ бꙋ́дꙋ, и҆ моли́тесѧ ѡ҆ мнѣ̀ ст҃о́мꙋ а҆́гг҃лꙋ, да веде́тъ дꙋ́шꙋ мою̀ въ мѣ́сто поко́йно.
Ѽ дрꙋ́зи моѝ любе́знїи, є҆гда̀ ви́дите менѐ, ѿ ва́съ разлꙋче́нна и҆ землѝ предае́ма, помоли́тесѧ ѡ҆ мнѣ̀, грѣ́шнѣмъ, ко ст҃о́мꙋ а҆́гг҃лꙋ, да прово́дитъ дꙋ́шꙋ мою̀ всѧ̑ два́десѧть мыта́рствъ и҆ и҆зме́тъ ѿ всѣ́хъ поги́белеи.
Сла́ва: Лю́дїе бж҃їи бл҃гоче́стнїи и҆ всѧ̀ племена̀ зе́м̾стїи, є҆гда̀ ви́дите смертоно́сное тѣ́ло, на землѝ пове́ржено и҆ воне́ю ѡ҆б̾ѧ́сѧ, помоли́тесѧ ко а҆́гг҃лꙋ смертоно́сномꙋ ѡ҆ мнѣ̀, да веде́тъ дꙋ́шꙋ мою̀ въ ти́хое приста́нище невла́емо.
И҆ нн҃ѣ: Прест҃а́ѧ дв҃о бцⷣе, влⷣчце, ты̀ вѣ́си не́мощь земны́хъ чл҃вѣ́къ: вско́рѣ разорѧ́етсѧ є҆стество̀ пло́ти на́шей: ты̀, гпⷭ҇жѐ, бꙋ́ди на́мъ застꙋ́пница.
Пѣ́снь ѕ҃. [edit]
І҆рмо́съ: Жите́искагѡ мо́рѧ воз̾двиза́ема зрѧ̀, напа́стей бꙋ́рею, в̾ ти́хо приста́ни ще прите́къ вопїю́ ти, воз̾ведѝ ѿ тлѝ живо́тъ мо́й многомлⷭ҇тиве.
Ѿ бг҃а по́сланнагѡ и҆ стра́шнагѡ во́ина цр҃є́мъ, и кнѧ́зємъ, и҆ а҆рхїере́ємъ, и҆ всѣ̑мъ лю́дємъ вели́кое и҆змѣне́нїе ѿ сꙋ́етнагѡ вѣ́ка сегѡ̀, въ напа́стехъ пребыва́ющихъ и҆ въ ско́рбѣхъ трꙋжда́ющихъ сꙋ́щи вѣ́рныхъ.
Сла́ва в҃: Ст҃ы́й а҆́гг҃ле, ѿ всѣ́хъ на́съ, на землѝ живꙋ́щихъ, да́нь свою̀ прїи́меши, ѿ бг҃а повелѣ́ннꙋю тѝ, є҆гда̀ прїи́деши и҆ прїи́меши дꙋ́шꙋ мою̀, и҆ несѝ ю҆̀ въ сокро́вище свѣ́та.
Сла́ва а҃: Ст҃ы́й а҆́гг҃ле, гро́зный посла́нниче, и҆ менѐ и҆зба́ви ѿ сꙋ́етнагѡ жили́ща сегѡ̀.
И҆ нн҃ѣ: Ѽ цр҃це влⷣчце, си̑рымъ пита́телнице и҆ ѡ҆би̑димымъ помо́щнице, больны̑мъ надѣ́ѧнїе и҆ всѣ̑мъ грѣ̑шнымъ ѻ҆чище́нїе, и҆ мнѣ̀, грѣ́шномꙋ, и҆́мⷬ҇къ, бꙋ́ди мѝ помо́щница и҆ поми́лꙋй мѧ̀.
Конда́къ, гла́съ є҃. [edit]
Нбⷭ҇нагѡ цр҃ѧ̀ воево́да и҆ предста́тель прⷭ҇то́лꙋ бж҃їю и҆ сотвори́тель во́ли гдⷭ҇ни и҆ соверши́тель за́повѣдей є҆гѡ̀, не лиши́ши сѧ сла́вы велелѣ́пныѧ и҆ просла́вишисѧ, ско́ро плѣнѧ́еши и҆ не заме́длиши николи́же. Всю́дꙋ гото́въ стои́ши и҆ храбрꙋ́еши, и҆ ѕла̀ не ᲂу҆бои́шисѧ, ни ста́ра ѿрїе́ши, ни мла́да ѿстꙋпи́ши. Всѧ̑ и҆́меши и҆ веде́ши въ мѣ́сто поко́йно. И҆ менѐ поми́лꙋй, грѣ́шнаго и҆ ѡ҆каѧ́ннагѡ, и҆́мⷬ҇къ, да пое́мъ тѝ а҆ллїлꙋ́їа.
Пѣ́снь з҃. [edit]
І҆рмо́съ: Хладода́тельнꙋ ᲂу҆́бѡ пе́щь сотворѝ а҆́гг҃лъ, прпⷣбнымъ дѣ́темъ, халдѣ́и же ѡ҆палѝ велѣ́нїемъ бж҃їимъ. мꙋчи́телѧ ᲂу҆вѣща̀ вопи́ти, блгⷭ҇ве́нъ бг҃ъ ѻ҆ц҃ъ на́шихъ.
Вели́кїй, мꙋ́дрый хитре́цъ, никто́же мо́жетъ твоеѧ̀ хи́трости разꙋмѣ́ти, да́бы скры́лсѧ ѿ твоеѧ̀ неща́дности. Ст҃ы́й а҆́гг҃ле, ᲂу҆мили́сѧ ѡ҆ мнѣ̀, грѣ́шнѣмъ и ѡ҆каѧ́ннѣмъ.
Мꙋ́дрый а҆́гг҃ле и҆ свѣ́тлый, просвѣтѝ мѝ мра́чнꙋю мою̀ дꙋ́шꙋ свои́мъ свѣ́тлымъ прише́ствїемъ, да во свѣ́тѣ текꙋ̀ вослѣ́дъ тебѐ.
Сла́ва: Ст҃ы́й а҆́гг҃ле, ра́дꙋюсѧ дꙋше́ю и҆ трепещꙋ̀ рꙋко́ю и҆ показꙋ́ѧ лю́дємъ ча́съ разлꙋче́нїѧ дꙋ́ши мое́й грѣ́шнѣй ѿ ᲂу҆бо́гагѡ мѝ тѣлесѝ. Ст҃ы́й а҆́гг҃ле, помоли́сѧ ѡ҆ мнѣ̀, грѣ́шнѣмъ.
И҆ ны́нѣ: Прест҃а́ѧ Бцⷣе, Влⷣчце, поми́лꙋй грѣ́шнаго въ ча́съ разлꙋче́нїѧ. Ст҃ы́й а҆́гг҃ле, стра́шный посла́нниче, и҆змѝ дꙋ́шꙋ мою̀ ѿ сѣ́ти ловѧ́щихъ.
Пѣ́снь и҃. [edit]
І҆рмо́съ: И҆с̾ пла́мени ст҃ы́мъ ро́сꙋ и҆сточѝ, а҆ пра́веднагѡ же́ртвꙋ и҆ во́ды попалѝ, всѧ́ бо твори́ши хрⷭ҇тѐ, є҆ли́ко хо́щеши, тѣ́мъ тѧ превозно́симъ гдⷭ҇а во́ вѣки.
Цр҃ю̀ нбⷭ҇номꙋ сла́ва нетлѣ́нномꙋ и҆ непроходи́маѧ, сотво́ршемꙋ чи́ны а҆́гг҃льскїѧ, такова̀ стра́шна и҆ гро́зна смертоно́сна а҆́гг҃ла. Хвали́те, по́йте и҆ превозноси́те є҆го̀ во вѣ́ки.
Цр҃ѧ̀ нбⷭ҇снагѡ слꙋга̀ и҆ предста́тель прⷭ҇то́лꙋ бж҃їю, ст҃ы́й а҆́гг҃ле, сме́рть приносѧ̀ на́мъ, и҆змѣнѝ на́съ доброто́ю зда́нїѧ твоегѡ̀ и҆ приведѝ на́съ къ свѣ́тꙋ свѣтлѣ́йшемꙋ сꙋдїѝ. Хвали́те, по́йте и҆ превозноси́те є҆го̀ во вѣ́ки.
Сла́ва: Цр҃ю̀ нбⷭ҇номꙋ, бг҃ꙋ на́шемꙋ ᲂу҆гожда́еши, сла́вы не ѿпада́еши, и҆ за̑повѣди є҆гѡ̀ не престꙋпа́еши, и҆ во́лю є҆гѡ̀ твори́ши, и҆ въ любвѝ пребыва́еши. А҆́гг҃ла тѧ̀ ст҃а хва́лимъ, пое́мъ и҆ превозно́симъ є҆го̀ во вѣ́ки.
И҆ нн҃ѣ: Цр҃це, влⷣчце, ро́ждшаѧ и҆ вы̑шнимъ си́ламъ и҆ зємны́мъ бг҃а и҆ гдⷭ҇а, спⷭ҇телѧ ѿ находѧ́щихъ ны̀ бѣ́дъ, моли́сѧ бг҃ꙋ, да поми́лꙋетъ ны́ въ де́нь сꙋ́дный. Гдⷭ҇а по́йте и҆ превозно́сите є҆го̀ во вѣ́ки.
Пѣ́снь ѳ҃. [edit]
І҆рмо́съ: Бг҃а чл҃кѡмъ неꙋдо́бь ви́дѣти, на́нь же несмѣ́ютъ чи́ни а҆́гг҃льстїи зрѣ́ти. тобо́ю бо пречⷭ҇таѧ ꙗ҆ви́сѧ на́мъ сло́во воплоще́нно, є҆го́же велича́юще, с̾ нбⷭ҇ными во́и тѧ̀ велича́емъ.
Ѡ҆скверни́вше дꙋ́шꙋ ѕлы́ми похотмѝ и҆ те́плыми слеза́ми не ѡ҆мы́вше и҆ млⷭ҇тынею не ѡ҆чи́стивше, стра́шнагѡ а҆́гг҃ла посла́нника не помина́юще, мы̀ же тѧ̀, а҆́гг҃ле, по достоѧ́нїю велича́емъ.
Бг҃а намъ повѣ́даеши, ст҃ы́й а҆́гг҃ле, и҆ дꙋ́шꙋ мою̀ ѡ҆каѧ́ннꙋю и҆зъ тѣ́ла и҆з̾има́еши, и҆ пло́ть разтли́ши и҆ гро́бꙋ предае́ши, мо́лимъ тѝ сѧ, ст҃ы́й а҆́гг҃ле, и҆змѝ дꙋ́шꙋ мою̀ ѿ сѣ́ти ловѧ́щихъ. Тѧ̀ велича́емъ.
Сла́ва: Ѿ бг҃а по́сланномꙋ, всѣ́хъ а҆́гг҃лъ пристра́шенъ є҆сѝ, ст҃ы́й а҆́гг҃ле, не ᲂу҆страшѝ мою̀ дꙋ́шꙋ ᲂу҆бо́гꙋю, напо́лненꙋ ѕлосмра́дїѧ, и҆ ѡ҆чⷭ҇ти, и҆ преста́ви ю҆̀ престѡ̀лꙋ бж҃їю непоро́чнꙋ. Тѧ̀ велича́емъ.
И҆ нн҃ѣ: Ѽ бж҃їѧ мт҃и прчⷭ҇таѧ, всѧ̑ сп҃са́еши и҆ ми́лꙋеши, та́кожде поми́лꙋй менѐ, грѣ́шнаго и҆ ѕлосмра́днаго, въ ча́съ разлꙋче́нїѧ. И҆ въ мꙋ́кꙋ по́сланномꙋ, тогда̀ же мѝ помозѝ, ѿ ѻ҆гнѧ̀ и҆зхи́ти мѧ̀ и҆ ѿ мꙋ́ки и҆зба́ви мѧ̀. Тѧ̀ велича́емъ.
Та́же Досто́йно є҆́сть: Трист҃о́е. И҆ по Ѻ҆́ч҃е на́шъ: Тропа́рь, гла́съ є҃:
Нбⷭ҇ныхъ си́лъ и҆збра́ннаго воево́дꙋ, ѿ бг҃а по́сланнаго мꙋ́драго ѻ҆рꙋ́жника и҆ гро́знаго полчени́на и҆ побѣди́телѧ вра̑жїимъ си́ламъ, ст҃а́го а҆́гг҃ла, пою́ще, хва́лимъ. Сме́ртїю на́съ назира́етъ, и҆ ѿ сꙋеты̀ мі́ра и҆збавлѧ́етъ, и҆ на сꙋ́дъ првⷣны ко хрⷭ҇тꙋ̀ представлѧ́етъ, и҆ ѿ вѣ́чныхъ мꙋ́къ и҆збавлѧ́етъ.
Сла́ва, и҆ нн҃ѣ: Бг҃оро́диченъ:
Оу҆пова́нїе на́ше, бцⷣе, крѣ́пкаѧ помо́щнице скорбѧ́щымъ, и҆ ѿ сме́рти и҆зима́еши и҆ ѿ мꙋ́ки и҆збавлѧ́еши, комꙋ́ждо по достоѧ́нїю блⷣгть дае́ши.
Та́же и҆ ѿпꙋ́стъ: Чⷭ҇тнѣ́йшꙋ херꙋві̑мъ: Сла́ва, и҆ нн҃ѣ: Гдⷭ҇и, поми́лꙋй, вⷤ. Гдⷭ҇и, блгⷭ҇вѝ.