Xalqıma (Qayıpnazarov)
Xalqım, meni shayır etken ózińseń,
Yosh keledi márt maydanda kórinseń,
Kaharmanlıq shejiresin oqıyman,
Seniń ullı júregińe úńilsem.
Talay jıllar kún-tún attan túspepseń,
Saq júripseń, sawıtbawın sheshpepseń,
Geyde basqı tawıp, qısqı kórseń de,
Óziń birewge qısım etpepseń!
Bazda el basına qauip tuwǵan gezde,
Qaytpay gúresipseń, kúsh jıynap tezde,
Az bolsańda saqlap awız birlikti,
Tánnen bas ketse de turıpsań sázde.
Usı saltıń júregime ornaǵan,
Sen haqqında oy saladı ol maǵan,
Tabınarım, tawday arqa súyerim,
Sen turǵanda kim kógerer qol maǵan.
Sarı qumnan tayınbaǵan tabanı,
Oylap tursam ótken ata-babanı,
Kúsh kórsetken jawǵa súyem jer bermey,
Solar korǵap kelgen bul keń dalanı.