Xalqım meniń (Qayıpnazarov)
Keleshekti kóretuǵın,
Gáwharısız kózlerimniń,
Jurtqa aytıp beretuǵın,
Jalǵasasız sózlerimniń.
Jelkildegen jerińizde,
Men bir janlı gúlińizben,
Íqtıyarım ózińizde,
Kóterińki únińizben.
Sahra-shóldi bostan eter,
Qúdiretli kúsh qolımda,
Miynet sazı jańlap keter,
Iygilikli is jolında.
Alǵa shıyraq qádem taslap,
Júrmesem keń dalańızda,
Qolǵa qaǵaz, qálem uslap,
Kórinbesem arańızda.
Meni eske alatuǵın,
Qaraqalpaq xalqım meniń,
Mennen sońǵa qalatuǵın,
Hárbirińiz dańqım meniń.