Wendoğanê Vir rê!

Wendoğanê Vir rê! Vetışê yew mecmua, heyecanêko newe yo. Ino heyecan hım qê wendoğan hım zi qê vetoğan muhim o. Wendoğ wexto ki yew mecmuaya newe geno xu dest, qayilo uja dı fıkırêko newe u hişêka newe bıvino. Vetoğ zi qayilo ki ına mecmuaya newe elaqeyêko pil bıvino u biyero wendış. Ma wextê hedrekerdışê Vir dı wırdi hetan ra zi ewniyayi. Ma pê çımanê wendoğan nuşteyi ardi pêser u mecmua vet. Yew wendoğ, yew mecmuaya edebiyat u folklor dı qayilo çıta bıwano u bıvino, ma ca dayo hemeyê inan. Pê çımo bin zi yew mecmua dı mizanpaj ra heta neşir, lazımo çıta rê diqet bıbo, ma hemeyê rê diqet kerd. Mecmuaya Vir, yew mecmuaya edebiyat u folklor a. Heti folklor ra estanıkan ra heta meseleyanê şar, fıkrayan ra heta vateyanê vêrinan, heme çi ca geno. Peşo bin ra zi Vir, yew mecmuaya edebi ya. Hikaye ra heta şiir, tiyatro ra heta kritik ca dana heme nuşteyan.Nameyê mecmuaya Vir ça ra yeno? Çı ra ıno name tercih biyo? Vir, mezg u hişa insani temsil kena. Ina hiş dı hım mazi esto hım zi istiqbal. Heti mazi ra vir, hişa folklori mojnena ra. Çımki ma zani ki estanıki ma, deyiri ma, vateyê vêrinanê ma bı se serran hişa insananê ma dı cuyayi u ameyi eyro. Eyro zi ına hiş, inan mıhafaza kena, inan dana zanayiş. Ino rıd ra mecmuaya Vir, ına hişa rewin temsil kena u mojnena ma. Peşo bin ra zi edebiyat zi verco hişa insanan dı zuhur beno. Edebiyat, hiş u mezgê insanan dı pêşeno, uja ra pê zi, pê qelem xu rê heyat vineno. Edebiyat u hiş ya zi vir, yewbinan ra ciya nêbeni. Qê inan ra mecmuaya Vir, yew het ra tarıxê hişa insananê ma temsil kena, peşo bin ra zi ına hiş dı zê yew febriqa nuşteyi newe vêjiyeni. Vir, derheqê edebiyat u folklorê Zazaki dı her nuşte qebul kena, heyetê mecmua u redaksiyon ra pê eg qerarê neşir bıvêjiyo o wext zi nuşte neşir beno.