Usılar (Qayıpnazarov)
Men bir nárwan bolsam ósken hawalap,
Aqlıqlarım shıqqan nartlar shaqalap,
Júzi gúldey, aydarları jelkildep,
Kóz aldımda oynap júrer atalap.
Kem-kemnen jetiler, tolar kúshine,
Bel buwıp kiriser xalıqtıń isine,
Sózi pátiwalı, hújdanı taza,
Elin súyer, ǵamxor bolar kisige.
Kúnler óter, jaslar óser, erjeter,
Waqıt sınar, sınnan batır, márt eter,
Íǵbal soqpaqları kúter ózlerin,
Onnan ótiw jolın turmıs úyreter.
Aydı aylar, jıldı jıllar ısırar,
Hár atqan tań óz shuǵlasın usınar,
Bezeytuǵın ullı ómir shámenin,
Men ósirgen náwshe gúller usılar.