Tuwılǵan elge sálem (Qayıpnazarov)
Jawǵa qarsı sawash qızǵan jerlerden,
Tuwǵan elge fronttaǵı erlerden.
Amanlıq xat alıp pochtalon keldi,
Tıńlańız erlerdiń sálemin endi:
—Sálem sizge biziń tuwǵan elimiz,
Sálem sizge biziń ósken jerimiz!
Sálem sizge biziń ata-anamız,
Sálem sizge biziń bala-shaǵamız!
Sálem sizge biziń súygen yarımız,
Sálem sizge biziń ahıw-zarımız.
Tuwılǵan el, elde qalǵan atalar,
Aq sút berip asıraǵan analar!
Duway-duway sálem balalarıńnan,
Jaw jaǵıńa tirek panalarıńnan!
Awılda salamat bolsańız sizler,
Urıs maydanında caw júrmiz bizler.
Bizden qaygı jemeń, qayǵırmań bizdi,
Jeńis penen quwantamız biz sizdi.
Alıstan kóz tigip qarawshı bizge,
Qıpsha bel, súmbil shash, qarakóz sizge.
Sálemler aytamız sawlıq bildirip,
Sizlerdi kóz aldımızǵa keltirip.
Uyqıda jatqanda túsimizdesiz,
Sawashta júrgende esimizdesiz.
Tuwılǵan el, oynap ósken jerlerge,
Ata-ana, tuwısqanlar sizlerge.
Úmitlenip kóz tigiwshi bizlerge,
Alıstaǵı inkar, qara kózlerge.
Xat jazamız amanlıqtı bildirip,
Xat jazamız quwandırıp, kúldirip,
Xat jazamız qanlar tógilgen jerdey,
Xat jazamız eller búlingen jerdey.
Xat jazamız hámme jıyılǵan jerden,
Xat jazamız fashist qırılǵan jerden.
Biziń isimizdi bilmek bolsańız,
Xat júzinde bizden xabar tınlańız:
—Watan ushın!—dep sawashqa kiristik,
Partiya ushın!—dep jawǵa tiyistik.
Dushpanlarǵa qarsı hújimge óttik,
Jaw qamalın buzıp tas-talqan ettik.
Stalingradta qırdıq fashistti.
Qolımızǵa aldıq ullı jeńisti.
Jeńis kútken dushpan taptı góristan,
Jaw basına kúnler tuwdı zimistan.
Isimiz haq edi, haǵına jettik,
Búldirgen dushpandı sergizdan ettik.
Jeńistiń bayraǵın kóterip qolǵa,
Ana—Watan ushın umtıldıq alǵa.
Jaw ústine dóndik qara dawılday,
Ólim oǵın attıq etip jawınday.
Jeńistiń jobasın sızıp kórsetken,
Jawdı qalay jeńiw jolın úyretken.
Partiya basladı, izine erdik,
Jerdey, kókten jawǵa soqqılar berdik.
Biziń soqqımızǵa shıdam bere almay,
Jaw qashtı, biz quwdıq batısqa qaray.
Qashqan jawdıc ele de kóp kúshi bar,
Júzi ólse, júzi boladı tayar.
Biz bunı bilemiz, biyǵam emespiz,
Jaw kúshli dep qorqıp qayǵı jemespiz.
Óytkeni biz xalıqtan tuwǵan batırmız,
Watan ushın qorǵan bolıp atırmız.
Ózimiz ádilmiz, haq ne isimiz,
Dushpan túwe taw jıqqanday kúshimiz.
Bizge bunday kúsh bergen kim bilemiz,
Kommunistlik partiyanı súyemiz.
Tez arada jawdı jeksen etemiz,
Dańq kótergen jeńislerge jetemiz.
Jerimizdi dushpanlardan tazalap,
Bul urısta gúnákardı jazalap.
Shegaraǵa qaytadan qulp uramız.
Elge temir qorǵan bolıp turamız.
Sonda bizge islerińiz jaraydı,
Dep xalqımız kúlimsirep qaraydı.
Hám alǵıs aytadı ózlerimizge,
Jeńiske jol ashqan kúshlerimizge.
Erdiń sáni—eli, eldiń sáni—er,
Erdiń sáni—esten shıqpas ósken jer.
Tuwǵan elge temir qorǵan bizlermiz.
Kókirek kerip qorǵap turǵan bizlermiz.
Watan ushın kókireklerimiz qalǵan,
Atayı dushpandı etip tas-talqan.
Jaqın kúnde shaǵlap elge qaytamız.
Jeńistiń toyında qosıp aytamız!
Stalingrad frontı, 1943-jıl