Tınısh túnde (Qayıpnazarov)

by Bayniyaz Qayıpnazarov

Mawjıraǵan túnleri,
Sap hawalı tańdaǵı,
Jawdıraǵan gúlleri,
Qulpı dóngen baǵdaǵı.

Sayraǵan búlbil bolsań,
Men jaqlaǵan únińmen,
Pálpellep kelip qonsań,
Shaqa jayǵan gúlińmen.

Qulaǵımdı shıńlatıp,
Sayrap turǵan tilińnen,
Júregime tıńlatıp,
Sır uǵayın únińnen.

Tınısh túnde shámende.
Sayra-sayra saz etip.
Dawısıńdı tómende,
Men tıńlayın ház etip.