Túrkmen tuwısqan (Qayıpnazarov)
Kiygen tonımız bir eltir jaǵalı,
Jabımız bir Ámiudárya saǵalı,
Ekken paxtamız bir qımbat bahalı,
Irgemiz bir elmiz túrkmen tuwısqan.
Iske birge shıqsań qollar uslasqan,
Jolǵa shıqsań jollarımız duslasqan,
Taxiatas GRЕS imiz nur shashqan,
Erkimiz bir elmiz túrkmen tuwısqan.
Jerimiz bir Ámiuden suw ishedi,
Barımız bir baxtımızǵa pisedi,
Tańımız bir tep-ten nurı túsedi,
Kúnimiz bir elmiz túrkmen tuwısqan.
Siziń menen abırayǵa sherikbiz,
Siziń menen bir-birewge kórikbiz,
Wáde bersek wádemizge berikbiz,
Kewlimiz bir elmiz túrkmen tuwısqan.
Aq altınǵa tolı Ámiw boyımız,
Bir maqsette aqılımız, oyımız,
Birge ótkeriler jeńis toyımız,
Sazımız bir elmiz túrkmen tuwısqan.
Miynet súygen miynetkeshbiz bel bekkem,
Aq paxtaǵa aqıl jekken, kúsh jekken,
Náwbáhárden baslap jerge ger tókken,
Jazımız bir elmiz túrkmen tuwısqan.
Altın gúz kelgende shaqqan is etip,
Shalqıp tursız tawday tabısqa jetip,
Sizler betten shadlı xabar esitip,
Tolıp taskan elmiz túrkmen tuwısqan.
Xalıq qlası jerdiń bawırın jibitti,
Altın bol dep jerge sepken shigitti,
Jeńis tapqan qız jawandı, jigitti,
Xúrmetlegen elmiz túrkmen tuwısqan.
Bul kúnde tolısqan kemislerińiz,
Dasturqanǵa túsken jemislerińiz,
Miynette jetisken jeńislerińiz,
Kutlı bolsın deymiz túrkmen tuwısqan.
Azamatlar mańlaydaǵı qundızlar,
Bizde de, sizde de kóp batır qızlar,
Atızdaǵı shamshıraqlar juldızlar,
Jaynay bersin deymiz túrkmen tuwısqan.