Tórt tut (Qayıpnazarov)
Sarhawız boyında kógergen tórt tut,
Bastan ótti talay aqlıq, talay jut,
Kóp ásirdiń gúwasınday shalqayıp,
Shaqańdı keń jayıp turısıń bir kút.
Kelsem, qarap tursam hám oy jibersem,
Janlılar ishinde kóp jasaǵan sen,
Ne kórdiń, kimlerge túsirdiń saya,
Buxara tarıyxın sóylep ber bilseń!
Túbińde tabısqan kewlin shad etip,
Aynımaǵan atıń menen ant etip.
Súyediń be súyisken qız, jigitti,
Ózińe óziniń boyın úyretip.
Qorǵadıń ba qısım kórgen jarlını,
Jaqladıń ba ot júrekli arlını,
Japıraǵıńdı jawıp kózden jasırıp,
Saqladıń ba erk izlegen zarlını.
Bilemen, bárin de bilemen deyseń,
Kóp jıllardı kórip kelemen deyseń,
Ǵuj-ǵuj qabıqlarıń sayrap tursa da,
Til qatıp sózime juwap bermeyseń.
Sonda da sondaǵı úniń kelip tur,
Sóyle, sóyleytuǵın kúniń kelip tur.
Ásirler boyına etken ármanıń.—
Azat baǵdıń gúli iniń kelip tur.
Sóyle kórgenińdi qulaǵım sende,
Zamanlar izi bar bul alıp tánde,
Qısılshań kúnlerde shıdaǵanıńdı,
Jeńgenińdi aytıp júreyin men de.