Stranja paroli ekiras mea boko
Quankam me certe naskis oficale che València, chefurbo di Valencia-lando, me sempre timabas esar vera exterterano. Voluntez atencar lo yena!
Vi omna, supozeble, experiencis to quo eventas, kande ni tenas ulo e ta ulo fugas acidentale de nia manui... Yen ke, se posibla, ni probas chasar tal objekto, mem per du o tri quika e rapida movi, ante ke ol tervenez, ka ne? Kelka-foye ni sucesas e kelka-foye ne, ma ni ya kustumas reaktar tale.
E nun, me questionas vi:
Quon vi dicas dum ke produktesas la chasado?
Ka nulo? Kad "aye"? Kad ula parolacho? Kad ulo altra?
Ye plura yari ante nun, me deskovris kun surprizo, ke, dum eventar tal fenomeno, stranja paroli esis ekiranta mea boko; ed omna-tempe la sama paroli...
Kande me fine rezolvis naracar lo a mea spozino, yen ke, ye mea astono, me esis tote ne-kapabla riproduktar la stranja paroli, quin me tante dicabis.
Me do mustis vartar til ke, pos du o tri plusa okazioni, me sucesis lernar l'exakta paroli ekirinta mea boko.
Lore, me fine povis transmisar oli a mea spozino...
Tamen, e maxim stranje, kande l' fenomeno repetesis, me konstatis, kun mem plus astono, ke tala stranja paroli ne plus esis ekiranta mea boko, e lore, me mustis vartar du o tri plusa okazioni til ke, tote spontane, olti retrovenis.
Ka vi prizus saveskar mea stranja paroli exterterana?
Yen oli, unesme tal qual me imaginas oli esar skribita, e pose Idigita, por kelke pluklarigar la pronunco:
"Yetz kApana hotz", "Yetz kapa nahOtz" o "Yetz kapa na hotz"
("Yec kapa-na hoc", "Yec kapa nahOc" o "Yec kapa na hoc")
E nun, kara samplanetani (?), voluntez respondar a me:
Ka tala stranja paroli memorigas da vi, ul-maniere, ula linguo teritorial, sive vivanta o mortinta?
Se yes, quon (plu o min) mea stranja paroli signifikus?
Verko da Partaka ye Posta Mundi nº 12