Si j’esteus riche

From Wikisource
Jump to navigation Jump to search
Joyeux rèspleus  (1899)  by Jean Bury
Si j’esteus riche
[ 20 ]
SI J’ESTEUS RICHE

MONOLOGUE

Po magnî n’souwêye crosse di pan,
Ji m’crèvinte et ji m’towe à m’visse
Qwand c’est qu’ji m’veus n’pêce di 5 francs,
Di totes mes k’noyes ji sos roûvice.
Ji beus n’houlêye gotte di pèket,
Ji m’ragostêye d’ine porchon d’frîche…
Ah ! ji m’pây’reus des bons boquets
Si j’èsteus riche.
On n’mi noum’reut pus crîve di faim ;
Ji sâreus bin fer danser m’poche :
J’âreus n’dimèye câve di bon vin ;
J’ènn’ ireus mâye pus qu’è caroche.
I n’âreut nouk pus awoureux,
Ji sèreus calé, ji freus l’friche…
Ah ! ji sèreus st-ine homme d’adreut
Si J’èsteus riche.
J’âreus n’mohonne comme on palâs,
J’âreus des vârlets d’totes les cognes,
J’âreus des chins, j’âreus des ch’vâx,
Des cannes, des âwes et des chigognes,
J’âreus des oûhais, des colons ;
Ji freus des millions d’mirlifliche ;
« Ah ! je n’jaspin’rais plus l’wallon »
Si j’esteus riche.
Ji marèy’reus n’feume riche ossu,
Laide di coèps èt belle di toèlettes,
Min ji n’sèreus nin co là-d’sus :
J’âreus des crapaudes è cachette.
Ji n’ravis’reus pus on haring,
Enn’ on pan ji r’trouvreus mes miches.
Ah ! ji n’rèscoul’reus pus po rin
Si j’esteus riche.

[ 21 ]

Qwand on m’divreut traitî d’sottai,
Ji furlangreûs : j’âreus des pèces !
Avâ l’aiwe j’âreus des batais…
On jâs’reus sûr di mi timpèce.
Ax pauves co jamâye ji n’donreus,
C’est tos ingrâtes ! et, diale mi s’tiche,
So deux treus ans ji m’riwin’reus
Si J’èsteus riche !