Si̍ng-ging/Mâ-ta̍i/4
Dā̤ 4 Ca̤uⁿ
[edit]4:1 Dng hṳ̂ seo̍h sí, Á̤-so siū Si̍ng-Síng îng ga̍u ko̤̍ng-iâ, gi̍ng sih-po̤̍ leo̍h mó̤-gûi.
4:2 Gi̍ng-sia̍h si̍-se̍h di̍h si̍-se̍h má, î-hā̤u bah-dô a̤u.
4:3 Sih-po̤̍ ē náng cuh ciū I gô̤ng, Dṳ̂ nō̤ sī Siō̤ng-Da̤̍ ē Giô̤ⁿ, ā̤ sâi ca̤̍ sa̤u̍h be̍ng ceo̍ biâⁿ.
4:4 Á̤-so i̍ng gô̤ng, Si̍ng-ging ū gi̍-ca̍i gô̤ng, Náng deh ua̍h, beoh-cî nō̤ ciā ca̤̍ biâⁿ, iā da̤u̍h ciā háng Siō̤ng-Da̤̍ chu̍i sê̤ gô̤ng ē uā.
4:5 Mó̤-gûi cuh dua̍ I ga̍u si̍ng-siáⁿ, sâi I kiō̤ deó dēng cih-táu-dêng;
4:6 gô̤ng, Dṳ̂ nō̤ sī Siō̤ng-Da̤̍ ē Giô̤ⁿ, tang ga̍i ta̤̍u lôi; ing Si̍ng-ging ū gi̍-ca̍i gô̤ng, Cṳ̂ ūi dṳ̂, mīng I ē seo̍-ciâ, dih-dih ē̤ng chiû hú Dṳ̂, mêng dih Dṳ̂ ko̤ teh sa̤u̍h lē.
4:7 Á̤-so gô̤ng, Si̍ng-ging iā ū gi̍-ca̍i gô̤ng. N̄g-tang sih-po̤̍ Cṳ̂ dṳ̂ ē Siō̤ng-Da̤̍.
4:8 Mó̤-gûi buh dua̍ I ga̍u da̍i gá̤ⁿ ē suaⁿ, ta̤̍h ting-ō̤ māng-go̤h gah māng-go̤h ē ṳ́ng-ā̤u, gî keoh I kua̍ⁿ;
4:9 gô̤ng, Dṳ̂ nō̤ pah ciâ ba̍i guâ, guâ cuh ta̤̍h cca ló̤ng-cô̤ng ē mo̍ih-nō̤ seō Dṳ̂.
4:10 Á̤-so i̍ng i gô̤ng, Sah-dāng te̤̍ kṳ̍, Si̍ng-ging gi̍-ca̍i gô̤ng, Ing-do̤ng ba̍i Cṳ̂ dṳ̂ ē Siō̤ng-Da̤̍, do̤̍h-do̤̍h hō̤ng-seō I.
4:11 Iú ciâ mó̤-gûi cuh lī Á̤-so kṳ̍: teng-seo̍ lí, cuh ho̤̍h-seō I.
4:12 Á̤-so tiaⁿ-mói Io̤h-hāng siū goiⁿ-gang, cuh kṳ̍ Gá-lī-lī.
4:13 Lī Ná-sah-leh, ga̍u Gia-beh-nó̤ng do̍; ca̤̍ dā̤-ho̤ng gṳ̄ng hâi, diō̤ Sa̤-bo̍-leóng, Da̍h-dāi-lī dā̤-ga̍i lī-li̍.
4:14 Ca̤̍ sī i̍ng-ngiāng seng-di Î-se̤̍-a̍ ē uā gô̤ng;
4:15 Sa̤-bo̍-leóng dā̤ Da̍h-dāi-lī dā̤, gṳ̄ng hâi, gṳ̄ng Io̤h-dāng ī-bang náng ē Gá-lī-lī,
4:16 do̍ leo̍h o-a̍ng ē bā-sa̍ⁿ, î-ging kua̍ⁿ-gi̍ng duā gng, do̍ leo̍h sî dā̤ o-a̍ng ē, iā ū gng, ca̤̍u i.
4:17 Cé̤ng ciâ Á̤-so kî-chiû dé̤ng-dō̤, gô̤ng, Dṳ̂ gai-dng hôi-cōi gâ-go̤̍l i̍ng teng-go̤h gṳ̄ng leō.
4:18 Á̤-so le̍ng leo̍h Gá-lī-lī hâi-bing, kua̍ⁿ-gi̍ng hiaⁿ-dī nn̄g gá̤, cuh sī Sa̤-meóng, buh ching Bî-deh, gah i ā-dī Ang-deh-le̍h; nn̄g gá̤ po̤ⁿ-māng leo̍h hâi i̍ng i sī teô-hṳ́ ē náng.
4:19 Á̤-so gah i gô̤ng, Do̍i Guâ, Guâ beoh sâi dṳ̂ ceo̍ teô náng ē teô-hṳ́-náng.
4:20 I cuh ba̍ng māng, do̍i Á̤-so.
4:21 Á̤-so iú ciâ giáⁿ geo̍, buh kua̍ⁿ-gi̍ng hiaⁿ-dī nn̄g gá̤, cuh di Sa̤-bbî-ta̍i ē giô̤ⁿ Ngâ-go̤h, léng i-dī Io̤h-hāng. gah i ló̤-bō̤ deó seóng lē bô-māng; Á̤-so dā̤u i.
4:22 Nn̄g gá̤ náng cuh lī seóng, lī-be̍h ló̤-bō̤ do̍i Á̤-so.
4:23 Á̤-so giáⁿ Gá-lī-lī seo̍-chṳ̍, deó go̤h hōi-dn’g ga̍u-heo̍ng, dé̤ng teng-go̤h ē ho̤h-ing, léng do̤h-lia̍h bā-sa̍ⁿ do̤-ng go̤h cê̤ng ē ci̍h-bīng.
4:24 I miá-siaⁿ ió̤ng-dé̤ng leo̍h Sṳ̄-lī-a̍ go̤h dā̤-ho̤ng; háng sing ū ci̍h, hāng go̤h-cê̤ng bāⁿ-tia̍ⁿ ē náng, léng keoh gûi pua̍h ē náng, deng-gó̤ng ē náng, ho̤ng-bāⁿ ē náng, náng deo chio̤̍ i ga̍u Á̤-so hiô̤; Á̤-so deo ta̤̍ i do̤h-lia̍h heô.
4:25 Iú ah-na, cé̤ng Gá-lī-lī, Dá̤-ga-bo̤-lī, Á̤-lō-sah-lêng, Iú-ta̍i, Io̤h-dāng eó guā-li̍, ū cīng-sā̤ náng do̍i Á̤-so.