Si̍ng-ging/Mâ-ta̍i/3
Dā̤ 3 Ca̤uⁿ
[edit]3:1 Dng hṳ̂ seo̍h sí, ū si-sâ̤-lâ̤ Io̤h-hāng lí, deó Iú-ta̍i ko̤̍ng-iâ dé̤ng-dō̤, gô̤ng,
3:2 Dṳ̂ gai-dng hôi-gâi, ing teng-go̤h gṳ̄ng leō.
3:3 Ca̤̍ náng cuh sī seng-di Î-se̤̍-a̍ sê̤ cî ē sê̤ cî ē, gô̤ng, Deó ko̤̍ng-iâ ū náng ē siaⁿ-ing gá̤a̍u gô̤ng, Ṳ̄-bī Cṳ̂ ē dō, siu-di̍h I ē dō-giô̤ⁿ.
3:4 Io̤h-hāng sē̤ng lo̤̍h-dó̤ mn’g, a̤u bo̤̍h pói-dua̍; sia̍h cuh sī hó̤ng-táng gah iâ-bi̍h.
3:5 Ca̤̍ sí-cā̤ Á̤-lō-sah-lêng, Iú-ta̍i, muâ-ūi, gah Io̤h-dāng seo̍h pa̍i ē náng, deó chōi ga̍u i hiô̤.
3:6 Go̤h-náng nīng ga̍i ē cōi, deó Io̤h-dāng có siū sâ̤ leo̍h Io̤h-hāng.
3:7 Io̤h-hāng gi̍ng Hah-li-se̤̍ gah Sah-tô-gai ga̍u ē náng, iā cīng sā̤ ciu i siū sâ̤-lâ̤, cuh gah i gô̤ng. Do̤̍h-sió̤ seo̍h-lūi ā, hn’g-náng cî-sī dṳ̂ piā cio̤ng-lái ē dō-ki̍ lē?
3:8 Go̍-cheô da̤u̍h geh go̍ih-cî, ta̤̍h bâ̤u-míng hôi-cōi gâ-go̤̍.
3:9 N̄g-tang sing-lî ga̍i guāⁿ gô̤ng, A̍-beh-la̍h-hâng sī guâ ē cô-co̤ng ā; guâ gah dṳ̂ gô̤ng, Siō̤ng-Da̤̍ ā̤ sâi ca̤̍ sa̤u̍h ceo̍ A̍-beh-la̍h-hâng ē giô̤ⁿ-seong ā.
3:10 Da bô-táu î-ging ba̍ng deó chiu̍-gṳng lē; háng chiu̍ beó geh heô go̍ih-cî ē, cuh dâ̤ⁿ kṳ̍, hi̍ng hôi lē.
3:11 Nō̤ guâ ē̤ng cûi si-sâ̤-lâ̤ leo̍h dṳ̂, sī sâi dṳ̂ hôi-cōi gâ-go̤; nō̤ deō-bôi guâ lí ē, ho̤h ā̤ ió̤ guâ, cuh guâ ta̤̍ I ta̤̍h á̤; guâ iā n̄g de̤̍ng-sâi; I beoh ē̤ng Si̍ng-Síng gah hôi si-sâ̤-lâ̤ leo̍h dṳ̂.
3:12 I chiû páng bua̍-gi, bua̍ ca̤̍ cho̤h-diáⁿ ē ba̍h, siū ba̍h di̍h chng, cuh ē̤ng bā̤ ma̍ih ē hôi sa̤u ca̤̍ cho-kng.
3:13 Hṳ̂ seo̍h sí, Á̤-so cé̤ng Gá-lī-lī ga̍u Io̤h-dāng, ciū Io̤h-hāng, a̍i-dí siū i ē sâ̤-lâ̤.
3:14 Io̤h-hāng sí I, gô̤ng, Guâ ing-gai siū sâ̤-lâ̤ leo̍h Dṳ̂, Dṳ̂ huâng lí ciu guâ lō̤?
3:15 Á̤-so gah i gô̤ng, Da meô ṳ̂ng-síng Guâ; ing guâ-go̤h-náng gai-dng ah-na cīng ló̤ng-cô̤ng ē gī lâ̤. Io̤h-hāng cuh ṳ̂ng-síng I.
3:16 Á̤-so siū sâ̤-lâ̤ lâ̤u, iú cûi lē sā̤uⁿ, ting ing-ūi I cuh kui, kua̍ⁿ-gi̍ng Siō̤ng-Da̤̍ ē Si̍ng-Síng chā̤uⁿ ba̍h-gah, ga̍ng-líng leo̍h I dêng-ni̍.
3:17 Cé̤ng ting lē ū siaⁿ-ing gô̤ng, Ca̤̍ sī Guâ sê̤ sā̤u ē Giô̤ⁿ, Guâ sê̤ huaⁿ-hí ē.