Si̍ng-ging/Mâ-ta̍i/12
Dā̤ 12 Ca̤uⁿ
[edit]12:1 Dng hṳ̂ seo̍h sí, Á̤-so leo̍h Ang-sih-di̍h, ging-geo̍ ba̍h-chéng; meóng-seng bah-dô a̤u, cuh dia̍ng ba̍h-su̍i sia̍h.
12:2 Hah-li-se̤̍ náng kua̍ⁿ-gi̍ng, cuh gah Á̤-so gô̤ng, Dṳ̂ meóng-seng sê̤ ceo̍ ē, sī Ang-sih-di̍h n̄g gai-dng ceo̍ ē.
12:3 Á̤-so i̍ng gô̤ng, Si̍ng-ging gi̍-ca̍i Dāi-bi̍h léng do̍i-giáⁿ ē náng, bah-dô a̤u sí-cā̤, sê̤ ceo̍ ē sê̤ō, dṳ̂ meh bōi ta̍h lō̤?
12:4 I di̍h Siō̤ng-Da̤̍ dēng, sīah bá̤-seh ē biâⁿ: ca̤̍ n̄g-sī i ā̤ sia̍h lē, do̍i-giáⁿ ē náng iā n̄g-tang sia̍h, nō̤ ca̤̍-si ā̤ sia̍h dih.
12:5 Buh bōi ta̍h leo̍h-hah sê̤ gi̍, ca̤̍-si leo̍h Ang-sih-di̍h ē lā̤, cuh beó cōi lō̤?
12:6 Guâ gah dṳ̂ gô̤ng, Deó cî-ciâ ū seo̍h gá̤ piāⁿ ca̤̍ náng ho̤h ā̤ duā.
12:7 Si̍ng-ging gô̤ng, Guâ a̍i-dí kô̤-léng, n̄g a̍i-dí ca̤̍-seō; dṳ̂ nō̤ cai ca̤̍ uā ē i̍-seo̍, cuh bā̤ diāⁿ-cōi ca̤̍ beó cōi ē náng ā.
12:8 Ing Cíng-Ceô iā sī Ang-sih-di̍h ē Cṳ̂.
12:9 Á̤-so hṳ̂-hiô̤ , di̍h kṳ̍ hōi-dn’g.
12:10 Hōi-dn’g do̤-ng ū náng seo̍h bá̤ⁿ chiû ko-chiû. Ū náng ka̍ng I gô̤ng, Ang-sih-di̍h ta̤̍ náng do̤h lia̍h bāⁿ ā̤-sâi-di̍h bā̤?
12:11 Á̤-so gô̤ng, Dṳ̂ de̤ng-gang hn’g-náng hn’g-náng ū á̤uⁿ, Ang-sih-di̍h la̍u leo̍h kaⁿ, n̄g tua i bā-kî lē?
12:12 Náng meh n̄g ā̤ ceong-gu̍i leo̍h á̤uⁿ lō̤? Go̍-cheô Ang-sih-di̍h héng-sēng ā̤-sâi-lē.
12:13 Cuh gah ko-chiû ē náng gô̤ng, Dṳ̂ chiû cheong chōi. Cuh cheong chōi, chiû cuh heô kṳ̍, gah hn’g-bá̤ⁿ chiû seo̍h-ā̤uⁿ.
12:14 Hah-li-se̤̍ náng chōi kṳ̍, cá̤ bá̤u-úi be̍h Á̤-so.
12:15 Á̤-so cai ca̤̍ seō, cuh lī hiô̤; ū cīng sā̤ náng do̍i I; do̤-ng ū bāⁿ ē náng, Á̤-so deo ta̤̍ i do̤h-lia̍h.
12:16 ngiáng-ngiáng gîng-ga̍i go̤h-náng, n̄g-tang ió̤ng-dé̤ng I ē miá.
12:17 Ah-na i̍ng-ngiāng sê̤ngdi Î-se̤̍-a̍ sê̤ gô̤ng ē ūa,
12:18 gô̤ng, Kua̍ⁿ Guâ nó-cái, sī Guâ sê̤ gâ̤ⁿ-tôiⁿ ē, Guâ sê̤ sā̤u ē; Guâ sīng cīng huaⁿ-hí I: Guâ beoh cio̤ng Guâ Si̍ng-Síng seo̍ keoh I, I dih-dih ta̤̍h cing-hah go̤̍ ī-bang náng.
12:19 I beó gah náng seo-caⁿ, beó gah náng chau-nāu, beó náng tiaⁿ-mói I ē siaⁿ-ing deó ga̤-dō.
12:20 Beoh si̍h ē ûi-châu iā beó geh ô̤ kṳ̍, beoh geo̍ ē co̤h-hôi iā beó geh beóng kṳ̍, ga̍u bôi sâi cing-hah duā deh-si̍ng.
12:21 Ī-bang náng iā dih-dih ngiô̤ng-mō̤ng I ē miá.
12:22 Dng hṳ̂ seo̍h sí, ū náng chio̤̍ seo̍h gá̤ leo̍h gûi pua̍h chaⁿ-má buh ō̤-kâu ē náng, lí ciū Á̤-so; Á̤-so ta̤̍ i do̤h-lia̍h, î-di̍ ca̤̍ chaⁿ-má buh ō̤-kâu ē náng ā̤ kua̍ⁿ-gi̍ng, ā̤ gô̤ng-uā.
12:23 Ce̤̍ng-náng deo hâi-léng gô̤ng, Ca̤̍ náng n̄g-sī Dāi-bi̍h ē giô̤ⁿ-seong lō̤!
12:24 Hah-li-se̤̍ náng tiaⁿ-mói cuh gô̤ng, I de̤̍h gûi beó n̄g-sī ciā gûi-ó̤ng Beh-sa̤-bo̤h ā.
12:25 Á̤-so cai i sing-i̍, cuh gah i gô̤ng, Háng go̤h lē nō̤ ga̍i seo-caⁿ, dih-dih be̍h kṳ̍; háng sáⁿ gah ga, nō̤ ga̍i seo-caⁿ, dih-dih beó-dang dng síng-li̍h.
12:26 Seh-seô Sah-dāng de̤̍h Sah-dāng, cuh sī ga̍i seō caⁿ, i ē go̤h deoh-leo ā̤ síng-li̍h?
12:27 Seh-seô Guâ ciā Beh-sa̤-bo̤h de̤̍h gûi, cuh dṳ̂ ē ceô-dā̤ de̤̍h gûi do̍o̍-dâ̤ sī ciā hn’g-náng lē? go̍-cheô i beoh gî-leōng dṳ̂ ā.
12:28 Seh-seô Guâ ciā Siō̤ng-Da̤̍ ē Síng de̤̍h gûi, cuh Siō̤ng-Da̤̍-go̤h î-ging ga̍ng-líng dṳ̂ lâ̤u.
12:29 Náng seh-na ā̤ di̍h ê̤ng-seō ē cho̍, cuh giah i ga-cái lē? n̄g-sī ceo̍-sa̤ⁿ bo̤̍h ca̤̍ ê̤ng-seō, do̍i-āu cia̍ⁿ ā̤ giah i ē cho̍ lō̤?
12:30 Háng n̄g gah Guâ cá̤ ē nángm cuh sī gah Guâ e̤ng-ga; n̄g gah Guâ cá̤ siū ē náng, cuh sī diāⁿ Guâ iō̤ kṳ̍.
12:31 Go̍-cheô Guâ gah dṳ̂ gô̤ng, Háng cōi-o̤h gah seh-do̤̍h deo ā̤ sia̍ dih kṳ̍; bí-do̤̍h seh-do̤̍h Si̍ng-Síng bā̤ sia̍ dih kṳ̍.
12:32 Ē̤ng uā hûi-bo̤̍ng Cíng-Ceô ē náng, ho̤h ā̤ sia̍ dih kṳ̍; nō̤ ē̤ng uā hûi-bo̤̍ng Si̍ng-Síng, beó leōng ging-sa̤̍, lái-sa̤̍, ṳ̂ng-ê̤ng bā̤ deh sia̍ kṳ̍.
12:33 Dṳ̂ he̍h-chiâⁿ ta̤̍h chiu̍ ceo̍ heô, i ē go̍ih-cî iā sī heô; he̍h-chiâⁿ ta̤̍h chiu̍ ceo̍ gái, i ē go̍ih-cî iā sī gái: i̍ng kua̍ⁿ ca̤̍ go̍ih-cî cuh cai ca̤̍ chiu̍.
12:34 Do̤̍h-sió̤ seo̍h lūi ā! dṳ̂ gi̍-céng sī gái, uā deoh-leo ā̤ heô lē? Ing-ūi kn’g leo̍h sing-lî ē, cuh gô̤ng chōi leo̍h chui ā̤.
12:35 Heo náng iú sing sê̤ ceóng ē sī heô, cuh huah chōi iā sī heô: gái náng iú sing sê̤ ceóng ē sī gái, cuh huah chōi iā sê̤ gái.
12:36 Guâ gah dṳ̂ gô̤ng, Háng náng sê̤ gô̤ng chōi ē hṳ-uā, ga̍u sîng-pua̍ng ē di̍h-cî dih-dih siū gé̤ng-giu̍.
12:37 Ing ca̤̍u dṳ̂ ē uā, cuh ching dṳ̂ ceo̍ gī-lî; iā ca̤̍u dṳ̂ ē uā, cuh ciāⁿ dṳ̂ ceo̍ cōi.
12:38 Hṳ̂ seo̍h sí ū ta̍h-cṳ-náng léng Hah-li-se̤̍ gûi gá̤ náng, gah Á̤-so gô̤ng, Seng-Saⁿ ā, guâ ngōi kua̍ⁿ Dṳ̂ héng ī-cih.
12:39 Á̤-so i̍ng i gô̤ng, Gang-o̤g ē sa̤̍-dāi giú ī-cih; nō̤ seng-di Io̤h-ná ci̍ ī-cih î-gōi. beó ta̤̍h ī-cih keoh dṳ̂ kua̍ⁿ.
12:40 Io̤h-ná so̤ⁿ di̍h so̤ⁿ má deo duā-hṳ́ bah-dô-lî; ah-na Cíng-Ceô iā beoh so̤ⁿ di̍h so̤ⁿ má deo dā̤ do̤-ng.
12:41 Ní-ní-bí náng dng sîng-pua̍ng sí-cā̤, beoh bā kî diāⁿ-cōi cî sê̤oh dāi; ing Ní-ní-bí náng tiaⁿ Io̤h-ná dé̤ng-dō̤ cuh hôi-gâi; da deó ciâ ū ā̤ duā leo̍h Io̤h-ná ē náng.
12:42 Náng-ho̤ng dṳ̂-ó̤ng dng sîng-pua̍ng sí-cā̤, iā beoh bā-kî diāⁿ-cōi cî seo̍h dāi; ing ca̤̍ dṳ̂-ó̤ng iú dā̤-gi̍h lí, a̍i tiaⁿ Sê̤-ló̤-meóng di̍-hā̤ ē uā; da deó cî-ciâ, ho̤h ū ā̤ duā leo̍h Sê̤-ló̤-meóng ē náng.
12:43 Siá-gûi lī náng lâ̤u, tā-lá̤u leo̍h gang-hāng ē dā̤, giú ang-h1ng, cuh bā̤ deh da̤u̍h,
12:44 cuh gô̤ng, Guâ hó̤-beoh-cṳ́ hói-táu kṳ̍ sê̤ cheoh ē cho̍; gi̍-céng gá̤8u, cuh kua̍ⁿ-gi̍ng ca̤̍ cho̍ kang-kang, sa̍u cīng ching-geh, siū cīng bā̤u-li̍.
12:45 I cuh kṳ̍, buh chio̤̍ chih gá̤ gûi, ho̤h ā̤ gái leo̍h beông-sing, cá̤ di̍h, cuh gṳ-cṳ̄ hn̄g-lî; ca̤̍ náng ē hā̤u-huāng, piā kî-táu ge̍ng ló̤ng-bōi. Ca̤̍ gái-o̤h ē sa̤̍-dāi iā dih-dih chā̤uⁿ na.
12:46 Á̤-so gah ce̤̍ng-náng gô̤ng-uā sí-cā̤ , I ná̤u-lâ̤ léng I hiaⁿ-dī kiō̤ deó guā-li̍, a̍i-dí gah I gô̤ng-uā.
12:47 Ū náng gah I gô̤ng, Dṳ̂ ná̤u-lâ̤ léng hiaⁿ-dī kiō̤ deó guā-li̍, a̍i-dí gah Dṳ̂ gô̤ng-uā.
12:48 Á̤-so gah I gô̤ng ē náng gô̤ng, Hn’g-náng sī Guâ ná̤u-lâ̤? hn’g-náng sī Guâ hiaⁿ-dī lē?
12:49 Chiû cuh cheong chōi, gî meóng-seng gô̤ng, Kua̍ⁿ Guâ ná̤u-lâ̤ léng Guâ hiaⁿ-dī.
12:50 Háng bíng Guâ Teng-Hū cî-i̍ ē náng, cuh sī Guâ hiaⁿ-dī, cî-mo̍i léng ná̤u-lâ̤.