Sen bir gúlseń (Qayıpnazarov)
Bul dúnyaǵa kórik berip,
Sen bir gúlseń turǵan dópip,
Kózlerim bánt boldı meniń,
Qáddi-qáwmetińdi kórip.
Bolsam da shıdamlı berik,
Ózimnen ketip tur erik,
Qıyalıma júrgendeymen,
Muhabbattıń gúlin terip.
Bir ózińe kewlin bólip,
Túnnen turıp izlep kelip,
Jamalıńdı jaynatadı,
Tań shuǵlası nurın sewip.
Báhár kelse kuwat darıp,
Búr ashasań búrtik jarıp,
Men shaqańa qonsam deymen,
Gúbelektey ushıp barıp.
Sonda meni qabıl alıp,
Jarılqasań saya salıp,
Mehir tolı kara kóziń,
Kúlip tursa ottay janıp.