Jump to content
Se̿ng-géng/Sǎ̤-dǔ Ǎing-dṳ̄ing/1
- 1 Dǐ-à-hí-lô̤ à, uòi chîng-mâng nà Iǎ-Sú kǐ-tê ca̿ gâ̤ dī, háu gâ̤ dàu-lǐ cì-dā̤ da̿u gṳ̀ nă Ciōng-Di̿ ciĕ iòng tíng gâ̤ nì-ciě, ca̿-hā dú gi̿ da̿u chîng sṳ́-di̿.
- 2 Iǎ-Sú tǎu iòng tíng gâ̤ sî-hē, ka̿u-diū Se̿ng-Sěng sáing gáu-dō gṳ̀ tĭ chṳ̆ lâ̤ gâ̤ sǎ̤-dǔ gâ̤ dī.
- 3 Gṳ̀ siū kǔ sǐ-tiāu làu, ǐ nà cèng cāi gâ̤ běng-gṳ̀ nă hă-sáing chū gṳ̀ sī hŭ-sáng kǐ lâ̤, sī-sī góng-dǐ nà cù-cī chṳ̆-hīng nă gṳ̀-huōi-nêng chū, iáu gṳ̀ uā Ciōng-Di̿ gǒ gâ̤ dī:
- 4 Iǔ cì lê̤ng iáu sǎ̤-dǔ cṳ̀ cì-dó gâ̤ sî-hē, Iǎ-Sú gáu-dō gṳ̀ ēng niōng chṳ̆ Iǎ-lū-să-lǎing gâ̤ sêng, niōng dǎing Dá hṳ̌ nì gâ̤ lâ̤, ciū-sī nì chîng-mâng tia̿ng-nī-gi̿ng uòi nā gâ̤.
- 5. Iŏ̤-hu̿ing ì-cài sī sǎ̤ sṳ̌ ta̿i nêng sí sǎi-lǐ; ēng-nǎing gua̿ gǐ góng nì ŏ̤ siū Se̿ng-Sěng gâ̤ sǎi-lǐ.
- 6 Sǎ̤-dǔ cṳ̀ giǎng-ce̿ng gâ̤ sî-hē, ciū mōng Iǎ-Sú, uā, Cṳ̌, nì da̿u iŏ̤ng sî-hē ŏ̤ nà Ì-să̤-liĕ gâ̤ gǒ hŭ da̿u-tê mài?
- 7 Iǎ-Sú iáu gṳ̀ uā, Sî-hē nìcie ēng sī nì ŏ̤ dă̤-dí, iŏ̤ng sī Dá cù-cī gâ̤ gṳ̌ing-ba̿ng diāng gâ̤.
- 8 Lâ̤ niōng dǎing Se̿ng-Sěng hū da̿u nì séng-di̿, nì ciū ŏ̤ dă̤-diō̤ cǒ-nǎing, ŏ̤ da̿u Iǎ-lū-să-lǎing, tóng Iǔ-tuo̿i, Să-mǎ-lī-ngā, cì-dā̤ da̿u si̿-gáing děng dàu gâ̤ sù-cài, dú ta̿i uòi ca̿ gúing-ce̿ng.
- 9 Iǎ-Sú uā làu iŏ̤ng dī, ciū nă Ciōng-Di̿ ciĕ iòng tíng ko̤̿; hă-sáing dō̤-di̿ chū iǔ cì dǒ̤ ě̤ng ciĕ gṳ̀, hă-sáing ciū chū gṳ̀ ēng gi̿ng.
- 10 Iǎ-Sú iòng ko̤̿ gâ̤ sî-hē sǎ̤-dǔ géng-géng lū-lū-di̿ chū-diū tíng, sáng-bǔ-lěng-děng iǔ liòng-ciǎ nêng cē̤ng bā í-ciông gṳè hā bíng-ha̿ing-di̿;
- 11 Uā, Gá-lī-lī gâ̤ nêng, nì ca̿-sū-dī gṳè hā iŏ̤ng di̿ chū-diū tíng? giǎng nì iŏ̤ng-di̿ ciĕ iòng tíng gâ̤ Iǎ-Sú, nì ka̿ing chū-gi̿ng gṳ̀ gō̤-iŏ̤ng-iōng-iòng tíng, hē-lǎi gṳ̀ iǎ ŏ̤ gō̤-iŏ̤ng-iōng-iòng cuo̿i lâ̤.
- 12 Sǎ̤-dǔ ciū giǎng Gāng-lǎng súing da̿u-tê ko̤̿ Iǎ-lū-să-lǎing, iŏ̤ng súing ko̤̿ Iǎ-lū-să-lǎing chá-bŭ-dó̤ iǔ úing-sǐ-nì gǒ̤ng giǎng gâ̤ diō̤.
- 13 Nì sêng làu, ciū iòng ŭ ciă lê, iŏ̤ng-cì-sî Bǐ-dǎ̤ Iŏ̤-hu̿ing, Ngā-là̤-hǐ gâ̤ gṳ̌ing Ngǎ-gǒ̤, hǎng ca̿ Chiĕ-Séng gâ̤ Sái-mô̤ng, iáu Ngǎ-gǒ̤ gâ̤ gṳ̌ing Iǔ-duōi, dú hā ŭ lê-di̿ gṳè-diū.
- 14 Iŏ̤ng duói nêng iáu gǐ-ciǎ á-niông-nêng, Iǎ-Sú gâ̤ Mǎ-lī-ngā, Iǎ-Sú gâ̤ hiáng-dī, dú gōng séng gōng i̿ sî-sî kǎ̤-kǎ̤ gǐ-dǎu.
- 15 Iŏ̤ng-cì-sî Bǐ-dǎ̤ dai hiáng-dī dô̤ng-ó̤ng-séng-di̿ gṳè kǐ lâ̤, gu̿ ǐu cèng ca̿1i nêng cṳ̀ cì dó, chá-bŭ-dó̤ ǐu bă-nī nêng.
- 16 Ciū uā, Duōi-gá hiáng-dī, Se̿ng-Sěng ciŏ̤ Duōi-pǐ gâ̤ chṳ̿ sáing uā Iǔ-duōi gâ̤ dī, ŭ se̿ng-géng chîng-mâng bŭ-dă̤-bŭ-ǐ cǒng niōng gi̿ng-hāu, iŏ̤ng Iǔ-duōi ciū-sī duo̿i ŭ duói nêng ko̤̿nà Iǎ-Sú.
- 17: Éng-ṳē gṳ̀ iáu uôi-huōi-nêng ca̿ cì-bó̤ng, liāu-lǐ iŏ̤ng dṳ̌ing-dâu gâ̤ dī gṳ̀ iǎ iǔ hō̤ng.
- 18 Iŏ̤ng nêng dă̤-diō̤ cì-dō̤ng châingdi̿ mō̤ da̿u-tê dǔing à ko̤, bŭ biě-kṳé, cō̤ng dú lâu chṳ̆ lâ̤.
- 19 Hē-mṳě diū dáu Iǎ-lū-să-lǎing gâ̤ nêng dú dă̤-dí iŏ̤ng dī; ciū cia̿u-diū gṳ̀ gâ̤ tǔ-kióng ŭ châing hǎng ca̿ Ngā-gă̤-duōi-mǎ, ciū-sī huăi châing gâ̤ i̿-su̿.
- 20 Éng-ṳē Sí-píng gi̿-diū uā, Ngṳ̄ing gṳ̀ gâ̤ chio̤̿ bi̿ng ca̿ huáng-biâng, mǎu nêng gṳè-diū: ǐ uā, Ngṳ̄ing gṳ̀ liāu-lǐ gâ̤ dī nă biē-nêng dǎ̤ ko̤̿.
- 21 Iŏ̤ng-gă̤-sĭ Cṳ̌ Iǎ-Sú da̿u uôi-huōi-nêng iǒ̤ng-di̿ chṳ̆-chṳ̆ nì-nì gâ̤ sî-hē, giǎng Iŏ̤-hu̿ing sí sǎi-lǐ-di̿ kǐ, cì-dā̤ da̿u Iǎ-Sú giǎng uôi-huōi-nêng iǒ̤ng-di̿ ciĕ iòng ko̤̿ gâ̤ nì-ciě cǐ.
- 22 Ŭ duói sî iáu uôi-huōi-nêng ca̿ cì-bó̤ng gâ̤, dǐ-bíng cǒng niōng cì-ciă nêng iáu uòi câi ca̿ Iǎ-Sú hŭ-sáng kǐ lâ̤ gâ̤ gúing-ce̿ng.
- 23 Iŏ̤ng-gă̤-sĭ ciū ci̿ng liòng-ciǎ nêng, cì-ciă miâng hǎng Iŏ̤-să̤, ǐ hǎng ca̿ Bǎ-să-bǎ, ǐ hǎng ca̿ Iǔ-sū-dú, cì-ciă miâng hǎng Mǎ-dǐ-ngā.
- 24 Duōi-gá-nêng gǐ-dǎu, uā, Cṳ̌, běng sū-mū nêng gâ̤ séng nì dú dă̤-dí, giǔ nì háu uòi iŏ̤ng liōng nêng dǐ-bíng, nī cì-ciă sī nì tĭ gâ̤,
- 25 Ciĕ-diū Iǔ-duōi liāu-lǐ iŏ̤ng dṳ̌ing-dàu gâ̤ dī ca̿ sǎ̤-dǔ, éng-ṳē Iǔ-duōi chîng-mâng ko̿ng-tiāu iŏ̤ng dī ko̤̿cuci gâ̤ sù-cài.
- 26 Gṳ̀-huōi-nêng ciū tiú-gé; tiú-diō̤ Mǎ-dǐ-ngā; gṳ̀ ciū iáu sí-ǐ-ciă sǎ̤-dǔ ca̿ cì-bó̤ng.
← · Di̿ 21 Cióng · Di̿ 2 Cióng →
«Se̿ng-géng» gâ̤ mù-lṳ̀
