Jump to content

Se̿ng-géng/Mă̤-sī-lṳ̀/1

Add links
From Wikisource

Di̿ 1 Cióng

[edit]
1 Iǎ-Sú Gí-Dŭ hīng chṳ̆ lâ̤ càng-càng-di̿ háu gâ̤ dī, ciū-sī Ciōng-Di̿ nă gṳ̀ gâ̤, o̿ gṳ̀ háu gṳ̀ gâ̤ nû-gě, iŏ̤ng dī cǒng ŏ̤ kṳe̿-kṳe̿ kṳe̿-kṳe̿ da̿u: Iǎ-Sú ciū hǎng gṳ̀ sǎ̤-chṳ̄ gâ̤ ko̤̿ dṳ́ing nă gṳ̀ nû-gě Iŏ̤-hu̿ing.
2 Iŏ̤-hu̿ing ta̿i Ciōng-Di̿ gâ̤ da̿u, iáu Iǎ-Sú Gí-Dŭ gâ̤ dī, ciū-sī gṳ̀ lǒng-cǒng chū-gi̿ng gâ̤ dī, dú ca̿ gúing-ce̿ng chṳ̆ lâ̤.
3 IOng sṳ́-di̿ gi̿-diū sáing uā hē-lǎi gâ̤ dī, mǎu-lō̤ng sū-mū nêng nāng, mǎu-lō̤ng sū-mū nêng tia̿ng-nī ǐ í-diū ko̤̿ ca̿, ciū iǔ hŭ-ki̿: éng-ṳē sî-hē tǎu da̿u.
4 Iŏ̤-hu̿ing siǎ se̿ng gṳe̿ nă da̿u Ngā-sái-ngā Ngā-sái-ngā gâ̤ chǐ-ciă ga̿u-hō: Ngṳ̄ing cù-gǔ ì-lǎi dú dō̤-di̿ hē-lǎi cì-bĭ-dā̤ dú dō̤-di̿ gâ̤ Ciōng-Di̿ ; iáu gṳ̀ cō gâ̤ ṳ̄ mīng-chîng gâ̤ chǐ-ciă Sěng;
5 Gìng ca̿ ka̿u-dă̤-diū gâ̤ guǎ-ciě, giǎng sǐ-nêng dǐ-bíng ca̿ tê cì-ciă hŭ-sáng kǐ lâ̤, ca̿ tóng si̿-gáing uǎng-di̿ gâ̤ Cṳ̌, ciū-sī Iǎ-Sú Gí-Dŭ, nà áing-hṳ̄ běng-úing nă nì-huōi-nêng.
6 Iǎ-Sú o̿ uôi-huōi-nêng, chîng-mâng nà gṳ̀ gâ̤ huăi bông-tiāu uòi mài nă cò gǔing-sŭ, nă uôi-huōi-nêng chěng ca̿ cì gŏ, ca̿ ci̿-sí hū-sū gṳ̀ gâ̤ Dá Ciōng-Di̿; ngṳ̄ing ě̤ng-iāu gṳ̌ing-ba̿ng dú gṳ́ nă gṳ̀ cì-dā̤ da̿u diǎu-diǎu dō-dō. Chěng séng sù ngṳ̄ing.
7 Iǎ-Sú ŏ̤ cō-diū ě̤ng à lâ̤; duōi-gá-nêng gâ̤ mì-ciú dú ŏ̤ chū-gi̿ng gṳ̀, nà chión dú gṳ̀ gâ̤ nêng ǐa ŏ̤ chū-gi̿ng gṳ̀; si̿-gáing gŏ̤ sia̿ng gâ̤ nêng dú ŏ̤ ta̿i gṳ̀ sióng-séng ti̿-kŭ. Iŏ̤ng dī sī ì-cài gâ̤. Chěng séng sù ngṳ̄ing.
8 Cṳ̌ Ciōng-Di̿ uā, Uòi sī kǐ-tê, uòi sī sṳē-mṳě, uòi cù-gŭ ì-lăi dú dō̤-di̿, hē-lǎi cì-bĭ-dā̤ dú dō̤-di̿, uòi sī dú iǔ-nǎing-ge̿ gâ̤ Cṳ̌.
9 Uòi Iŏ̤-hu̿ing iáu nì ca̿ hiáng-dī, câi-câi siū kǔ-nūing, câi-câi dă̤-diō̤ giǎng Iǎ-Sú-di̿ lâ̤ gâ̤ gŏ iáu něng-nāi, uòi éng-ṳē dṳ̌ing Ciōng-Di̿ gâ̤ dàu, gìng éng-ṳē ta̿i Iǎ-Sú ca̿ gâ̤ guǎ-ciě, chîng-mâng da̿u huǒi-dǒ̤, iŏ̤ng huǒi-dǒ̤ gâ̤ miâng hāng ca̿ Bă-mǒ̤.
10 Dáu Cṳ̌ gâ̤ nì-ciě ŭoi sí-cṳ̆ dă̤-diō̤ Se̿ng-Sěng, tia̿ng-nī-gi̿ng da̿u uòi bù-ciă hē-di̿ iǔ cèng duōi gâ̤ siáng-éng, su̿-siōng chṳé hāu-dông ǐ-búing.
11 Uā, Nì chū-gi̿ng gâ̤ dú niōng gi̿ da̿u sṳ́-di̿, gṳe̿ nă ŭ chĭ-ciă ga̿u-hō, ciū-sī da̿u Ì-hŭ-sǔ, Sū-mǒ-nà, Piĕ-gá-mǒ̤, Tó-ngǎ-tó-là, Să-dǐ, Hí-là-tiĕ-hí, Lǎu-dǐ-gá ŭ-di̿, gṳè-diū gâ̤.
12 Uòi chiá-dṳ̌ing-séng o̿ chū iáu uòi uā dī gâ̤ siáng-éng sī sū-mū nêng gâ̤ siáng-éng. Cì chiá-dṳ̌ing-séng ciū chū-gi̿ng chĭ-cǎing géng dáing-cǎing.
13 Iŏ̤ng géng dáing-cǎing dǐ-bíng iǔ cì-ciă su̿-siōng nêng gâ̤ Gṳ̌ing, séng-di̿ cē̤ng cèng dǒ̤ng gâ̤ í-ciông, hé̤ng-tê-di̿ gǎi-diū géng gâ̤ duo̿i-ciě.
14 Tê iáu tê-mâu dú sī bā gâ̤, su̿-siōng mîng-huá, su̿-siōng sṳĕ; mì-ciú su̿-siōng cèng diō̤ gâ̤ hǒ gâ̤ guáng;
15 Káu su̿-siōng lû-di̿ līng-gua̿ hǐ-ǒng gâ̤ dǒng; siáng-éng su̿-siōng duōi sṳ̌ gâ̤ lō̤ng.
16 Iū-siǔ nà-diū chĭ-ciă sáing-siu̿: chṳ̿-di̿ iǔ liòng ga̿i-tī lī gâ̤ dáu sṳ́ing chṳ̆ lâ̤ : mīng-māu su̿-siōng dó̤ng-de̿ gâ̤ mì-tê cèng guáng.
17 Uòi cì chū-gi̿ng gṳ̀, ciū dṳ̌ing-dàu pŭ da̿u gṳ̀ káu-bíng su̿-siōng sǐ-tiāu ǐ-búing. Gṳ̀ ciū nà iū-siǔ ga̿ da̿u uòi séng-di̿ uā, Nì ēng niōng giáng; uòi sī buo̿i-chǒ gâ̤ tê cì-ciă, uòi sī sṳē-mṳě gâ̤ mṳě-mṳě ciă.
18 Uòi sī ě̤ng-ṳ̌ing sáng dō̤-di̿ gâ̤; uòi chîng-mâng sǐ-tiāu, giâ-gíng cì-dā̤ da̿u diǎu-diǎu dō-dō dú sáng dō̤-di̿, uòi iǎ nà-diū sǐ iáu éng-gáing gâ̤ sǒ̤-ǐ.
19 Nì niōng nà chū-gi̿ng, iáu giâ-gíng iǔ gâ̤ dī, gìng hē-lǎi cǒng ŏ̤ da̿u gâ̤ dī, dú gi̿ da̿u sṳ́-di̿.


Retrieved from "https://wikisource.org/w/index.php?title=Se̿ng-géng/Mă̤-sī-lṳ̀/1&oldid=1352807"