Se̿ng-géng/Lū-gá Hŭ-éng/7
Di̿ 7 Cióng
[edit]- 1. Iǎ-Sú iáu bă-sia̿ng uā làu iŏ̤ng duói dī, ciū nì Gá-bă-nǒng.
- 2. Iǔ ciă bǎ-cǒng děng dă̤-o̿ gâ̤ nû-gě, bāng tǎu sǐ.
- 3. Bǎ-cǒng tia̿ng-nī-gi̿ng nêng uā Iǎ-Sú ca̿ gâ̤ dī, ciū tŏ gǐ-ciǎ Iǔ-tuo̿i gâ̤ chîng-bo̿ ko̤̿, giǔ Iǎ-Sú lâ̤ í gṳ̀ gâ̤ nû-gě.
- 4. Ŭ duói chîng-bo̿ da̿u Iǎ-Sú di̿, chiě-chiě-di̿ giǔ gṳ̀, uā, Nì ta̿i gṳ̀ ca̿ iŏ̤ng dī, iŏ̤ng áing sī gug e̿ng-gái dă̤ gâ̤.
- 5. Éng-ṳē gṳ̀ o̿ uòi cì gŏ gâ̤ bă-sia̿ng, uòi gâ̤ lǐ-ba̿i-dǒ̤ng sī gṳ̀ kṳé gâ̤.
- 6. Iǎ-Sú cìu iáu chîng-bo̿ câi ko̤̿. Tǎu da̿u ŭ bǎ-cǒng gâ̤ chio̤̿, bǎ-cǒng ǐ tǒ̤ bǎing-iǔ-huǎ ko̤̿ Iǎ-Sú uā, Cṳ̌ à, ēng niōng lǎ-sěng: éng-ṳē nì da̿u uòi chio̤̿-di̿, uòi ēng gǒ̤ng dó̤ng.
- 7. Uòi iǎ chū cù-cī ēng gǒ̤ng ko̤̿ gi̿ng nì: lâ̤ giǔ nu uā cì gṳ̿ dī, uòi gâ̤ nû-gě ciū ŏ̤ hǎu-tiāu.
- 8. Éng-ṳē uòi iǎ sī hū nêng gǔing, uòi miâng à gōng uiu béng-dáing hū uòi gǔing: uòi hǎng iŏ̤ng cì-ciă, Ko̤̿, gṳ̀ ciū ko̤̿; hǎng ŭ cì-ciă, Lâ̤, gṳ̀ ciū lâ̤; iáu uòi gâ̤ nû-gě uā, Ca iŏ̤ng dī, gṳ̀ ciū ko̤̿ ca̿.
- 9. Iǎ-Sú tia̿ng-nī-gi̿ng iŏ̤ng-dī, chū iŏ̤ng nêng cèng gí-ī, chiá-dṳ̌ing-séng iáu ŭ cèng cāi gáing gṳ̀ gâ̤ nêng uā, Uòi iáu nì uā, Iŏ̤ng-gă̤-sĭ chéng-sa̿ng gâ̤, ciū-sī Ì-să̤-liĕ nêng dǐ-bíng, uòi sb dǐ-bíng, uòi iǎ ēng-nǎing gi̿ng-diō̤.
- 10 Ŭ tŏ̤ lâ̤ gâ̤ nêng, da̿u-tê ko̤̿ bǎ-cǒng chio̤̿-di̿, chū-gi̿ng nû-gě hǎu-tiāu làu.
- 11. Cuo̿i gua̿ mǎu gǐ sî, Iǎ-Sú nì cì-ciă sêng miâng hǎng Nà-éng; gṳ̀ gâ̤ hă-sáing, ǐau cèng cāi biē nêng ǐau gṳ̀ ca̿i giǎng.
- 12. Iǎ-Sú tǎu da̿u sêng-mô̤ng, iǔ nêng gó̤ng-diū sǐ-nêng chṳ̆ sêng, ŭ sǐ-nêng gâ̤ nǎi sī guǎ-hū, cǒng-lâ̤ sǎi iŏ̤ng cì-ciă gṳ̌ing: sêng-dǐ iǔ cèng cāi nêng iáu gṳ̀ câi so̿ng-co̤̿ng.
- 13. Cṳ̌ chū-gi̿ng ŭ cìa guǎ-hū, cìu kǒ̤-lǐng gṳ̀, iáu gṳ̀ uā, Ēng niōng tî.
- 14. Ciū giǎng-ce̿ng mó̤ gúing-mù go̤̿ng: gó̤ng gâ̤ nêng ciū děng-káu. Iǎ-Sú uā, Hē-sáng nêng, uòi hǎng nì kǐ lâ̤.
- 15. Ŭ sǐ-tiāu gâ̤ nêng ciū cō kǐ lâ̤, kṳé-siáng uā dī. Iǎ-Sú nà gṳ̀ gáu nă gṳ̀ nǎi.
- 16. Duōi-gá-nêng dú giáng kǐ lâ̤: gṳ̀ ě̤ng-iāu nă Ciōng-Di̿, uā, Iǔ-tuo̿i gâ̤ síng-dí da̿u uôi-huōi-nêng dǐ-bíng chṳ̆ lâ̤: ǐ uā Ciōng-Di̿ chū-gu̿ gṳ̀ gâ̤ bă-sia̿ng.
- 17 Iǎ-Sú gâ̤ miâng-siáng ciū dṳ̌ing da̿u tóng Iǔ-tuo̿i, iáu mǔing-si̿-tī gâ̤ sù-cài.
- 18. Iŏ̤-hu̿ing gâ̤ hă-sáing nà iŏ̤ng duói dī dú iáu Iŏ̤-hu̿ing uā.
- 19. Iŏ̤-hu̿ing ciū hǎng liòng-ciǎ hă-sáing lâ̤ sǎ̤ gṳ̀ ko̤̿ gi̿ng Iǎ-Sú, uā, Ŏ̤ lâ̤ gâ̤ sī nì à, gu̿ sī niōng uòi dǎing biē-nêng nī?
- 20. Ŭ liōng nêng da̿u Iǎ-Sú ŭ-di̿ ciū uā, Sí sǎi-lǐ gâ̤ Iŏ̤-hu̿ing hǎng uòi lâ̤ gi̿ng nì, uā, Ŏ̤ lâ̤ gâ̤ sī nì à, gu̿ sī niōng uòi dǎing biē-nêng nī?
- 21 Ŭ-cì-sî Iǎ-Sú í hǎu cèng cāi iōng bāng gâ̤ nêng, iáu nă gṳ̆ mî-diū gâ̤ nêng; ǐ nă cèng cāi hǎi-ciě ŏ̤ chū-dă̤-gi̿ng.
- 22 Iǎ-Sú a̿ing ŭ liōng nêng uā, Nì mǒng ko̤̿ nà iŏ̤ng ka̿ing chū-gi̿ng gâ̤, ka̿ing tia̿ng-nī-gi̿ng gâ̤ dī dú iáu Iŏ̤-hu̿ing uā; ciū-sī hǎi-ciě giâ-gíng ŏ̤ chū-gi̿ng, gio̤̿-káu giâ-gíng ŏ̤ giǎng diō̤, bāng-tuǒi giâ-gíng ŏ̤ lâi-lī, sông nèng giâ-gíng ŏ̤ tia̿ng-nī-gi̿ng, sì tiāu gâ̤ nêng giâ-gíng hia̿u gṳ̀ sáng kǐ lâ̤, gê̤ng-mǎu gâ̤ nêng iǎ iǔ ŭ hǎu gâ̤ se̿ng-sǐ gǒ̤ng nǎ gṳ̀ tia̿ng-nī.
- 23. Mǎu-lō̤ng sū-mū nêng ēng uā uòi sī huōi gṳ̀ iǔ gua̿-ngāi gâ̤ dī, iŏ̤ng nêng ciū iǔ hŭ-ki̿.
- 24 Iŏ̤-hu̿ing sǎ̤ lâ̤ gâ̤ nêng ko̤̿-tiāu làu, Iǎ-Sú iáu gṳ̀ ŭ-di̿ gâ̤ cèng cāi nêng uā Iŏ̤-hu̿ing gâ̤ dī, gō̤-uā, Nì chîng-mâng ko̤̿ ko̿ng-iǎ o̿ chū sū-mū dī nī? sī o̿ chū nă hóng chṳé-dòng gâ̤ mô̤ng-sáng ēng sī?
- 25 Nì da̿u-dǎi chṳ̆ ko̤̿ chū sū-mū dī nī? sī o̿ chū cē̤ng ngǎ-sĭ í-ciông gâ̤ nêng ēng sī? Ŭ cē̤ng-dă̤ bǎi-diǒng, iè-dă̤ ciáng gâ̤ nêng, dú da̿u uǎng-di̿ gé̤ng-dǐ.
- 26 Nì ì-cài chṳ̆ ko̤̿ o̿ chū sū-mū dī? sī o̿ chū síng-dí, ēng sī? Uòi iáu nì uā, Gṳ̀ ì-cài sī síng-dí, ǐ piāng síng-dí ga̿ing duōi dă̤-cāi.
- 27. Iŏ̤ng nêng ciū-sī se̿ng-géng gi̿-diū uā gâ̤, Giâ-gíng uòi hǎng sǎ̤-chṳ̄ gâ̤ nêng da̿u nì tê-chîng kṳé nì gâ̤ diō̤.
- 28 Uòi iáu nì uā, Á-niông-nêng sǎi gâ̤ mǎu cì-ciă piāng Iŏ̤-hu̿ing ga̿ing duōi: lâ̤-sī Ciōng-Di̿ gŏ-di̿ so̤̿ng ca̿ siǎu gâ̤ piāng Iŏ̤-hu̿ing gāing duōi.
- 29 Ŭ duói bă-sia̿ng iáu siú-sṳe̿ gâ̤ nêng éng-ṳē tê-chîng siū-gu̿ Iŏ̤-hu̿ing gâ̤ sǎi-lǐ, cì tia̿ng-nī-gi̿ng iŏ̤ng dī, ciū uā Ciōng-Di̿ sī góng-biâng.
- 30 Cǒng-lâ̤ Huǎ-lī-so̿ nêng ǐasu hāu lṳ̆-huă gâ̤ síng-sáing ēng-nǎing Iŏ̤-hu̿ing gâ̤ sǎi-lǐ, ēng dǎ̤ Ciōng-Di̿ ta̿i gṳ̀ uǎ-so̤̿ng gâ̤ dī.
- 31 Iǎ-Sú ǐ uā, Uòi nà sū dī bǐ-piāng iŏ̤ng cì-si̿ gâ̤ nêng gṳ̀ su̿-siōng sū-mū dī nī?
- 32 Ciū su̿-siōng gṳ̌ing-ciě cō hā gái-diō̤-di̿, nì hǎng gṳ̀, gṳ̀ hǎng nì, gō̤-uā, Uòi chṳé-siáu nă nì tia̿ng-nī, nì dú ēng diǎu-káu; uòi chio̿ng sái-uâng-kṳ̆, nì dú ēng tî.
- 33 Sí sǎi-lǐ gâ̤ Iŏ̤-hu̿ing lâ̤, ēng iè biǎng ǐ ēng iè ciǔ; nì ciū uā, Gṳ̀ sī nă gṳ̌ mî-diū.
- 34 Nêng gâ̤ Gṳ̌ing lâ̤, ǐ iè ǐ chṳĕl nì ciū uā, Gṳ̀ sī táng-iè su̿-ha̿u ciǔ gâ̤ nêng, sī siú-sṳe̿ iáu cò-nêng gâ̤ bǎing-iǔ-huǎ!
- 35 Lâ̤ iǔ chóng-měng gâ̤ nêng dú ŏ̤ uā chóng-měng gâ̤ dàu-lǐ sī mǎu cho̤̿.
- 36. Iǔ ciă Huǎ-lī-so̿ nêng chiǎng Iǎ-Sú iáu gṳ̀ câi iè, Iǎ-Sú ciū nì ŭ ciă Huǎ-lī-so̿ nêng chio̤̿-di̿ cō dŏ̤.
- 37 Ŭ sêng-di̿ iǔ ciă á-niông-nêng, sī iǔ cò gâ̤; gṳ̀ cì dă̤-dí Iǎ-Sú da̿u Huǎ-lī-so̿ nêng chio̤̿-di̿ cō dŏ̤, ciū dé̤-diū cì ngṳ̀ hō̤-ciě gâ̤ hióng-iû.
- 38. Gṳè da̿u Iǎ-Sú bù-ciă hē-di̿ tî, nà mù-cà̤ lâu chiĕ-tiāu gṳ̀ gâ̤ káu, nà cù-cī gâ̤ tê-mâu ko̤̿ siĕ-diǎu, ǐ sǎ̤ chṳ̿ mĭ gṳ̀ gâ̤ káu, nà hióng-iû muŏi gṳ̀ gâ̤ káu.
- 39 Chiǎng Iǎ-Sú ko̤̿ iè gâ̤ Huǎ-lī-so̿ nêng ch iŏ̤ng dī, bŭ-di̿ gō̤-uā, Iŏ̤ng nêng lâ̤-sī síng-dí, ciū ŏ̤ dă̤-dí mó̤ gṳ̀ gâ̤ sī sū-nêng, sī sū-mū gǎ̤-sǐ gâ̤ á-niông-nêng, éng-ṳē gṳ̀ sī làing gâ̤ á-niông-nêng.
- 40 Iǎ-Sú a̿ing gṳ̀ uā, Sái-mô̤ng, uòi iǔ cì gṳ̿ dī iáu nì uā, Sái-mô̤ng uā, Síng-Sáing, mǒng uā.
- 41 Iǎ-Sú uā, Iǔ ciă bo̿ng-dio̿ng gâ̤ nêng, iǔ liōng nêng ki̿ng gṳ̀ gâ̤ dio̿ng : cì-ciă ki̿ng ngù-sī liǒng ngê̤ng, cì-ciă ki̿ng ngù liǒng ngê̤ng.
- 42 Éng-ṳē ŭ liōng nêng dú mǎu-bǒ̤ng-dū hi̿ng, bo̿ng-dio̿ng gâ̤ nêng ciū ēng niōng gṳ̀ hi̿ng. Iŏ̤ng-gă̤-sĭ ŭ liōng nêng, nī cì-ciă ga̿ing ŏ̤ o̿ ŭ ciă bo̿ng-dio̿ng gâ̤ nêng?
- 43 Sái-mô̤ng a̿ing uā, Í uòi siǒng, sī ŭ ciă ēng niōng gṳ̀ hi̿ng dǎ̤-cāi gâ̤ nêng. Iǎ-Sú uā, Nì siǒng gâ̤ mài cho̤̿.
- 44 Ciū chiá-dṳ̌ing-tê chū ŭ ciă á-niông-nêng, iáu Sái-mô̤ng uā, Nì chṳ̆ iŏ̤ng á-niông-nêng, uòi da̿u nì chio̤̿-di̿, nì ēng-nǎing nà sṳ̌ nă uòi sǎi káu: iŏ̤ng á-niông-nêng da̿u nà gṳ̀ gâ̤ mù-cà̤ lâu chiĕ-tiāu uòi gâ̤ káu, ǐ nà tê-mâu siĕ-diǎu.
- 45 Nì ēng-nǎing iáu uòi mǐ-cṳ̆: iŏ̤ng á-niông-nêng iang uòi nì lâ̤ gâ̤ sî-hē, da̿u sǎ̤ chṳ̿ mǐ uòi gâ̤ káu, dú ēng kǎing hṳĕ.
- 46 Nì ēng-nǎing nà gāng-lǎng-iû muŏi uòi gâ̤ tê: iŏ̤ng á-niông-nêng da̿u nà hiǒng-iû muŏi uòi gâ̤ káu.
- 47 Uòi iáu nì uā, Gṳ̀ cèng cāi gâ̤ cò, dú sia̿-tiāu, éng-ṳē gṳ̀ o̿ gâ̤ iǎ cāi: mǎu-lō̤ng sū-mū nêng sia̿-tiāu gâ̤ siǎu, gṳ̀ o̿ gâ̤ iǎ siǎu.
- 48 Iǎ-Sú ciū iáu ŭ á-niông-nêng uā, Nì gâ̤ cò sia̿-tiāu.
- 49 Iáu Iǎ-Sú gōng dŏ̤ gâ̤ nêng bŭ-di̿ gō̤-uā, Iŏ̤ng sī sū-mū nêng iǎ ŏ̤ sia̿ nêng gâ̤ cò?
- 50 Iǎ-Sú iáu ŭ á-niông-nêng uā, Nì gâ̤ se̿ng-séng giù nì làu, nì mǒng běng-b̆ěng úing-úing-di̿ chio̤̿ ko̤̿.
← · Di̿ 6 Cióng ·Di̿ 8 Cióng →