Jump to content
Se̿ng-géng/Lū-gá Hŭ-éng/4
- 1 Iǎ-Sú séng-di̿ sí-cṳ̆ dă̤-diō̤ Se̿ng-Sěng, giǎng Iŏ̤-dàng kái da̿u-tê lâ̤, Se̿ng-Sěng duo̿i gṳ̀ ko̤̿ ko̿ng-iǎ-di̿ ko̤̿.
- 2 Si̿-sī góng nă mǒ̤-gṳ̌ chi̿ gṳ̀. Ŭ duói sî Iǎ-Sú dú ēng-nǎing iè mî-dī: hē-mṳě ciū bŭ-gṳě.
- 3 Mǒ̤-gṳ̌ iáu gṳ̀ uā, Nì lâ̤-sī Ciōng-Di̿ gâ̤ Gṳ̌ing, ciū gáu-dō iŏ̤ng ciō̤ bi̿ng ca̿ biǎng.
- 4 Iǎ-Sú uā, Se̿ng-géng gi̿-diū uā, Nêng ēng sī cēng-cēng ka̿u-diū iè gâ̤ mî-dī ŏ̤ sáng.
- 5 Mǒ̤-gṳ̌ ǐ duo̿i gṳ̀ iòng ǎu súing-di̿ ko̤̿, chiá ciă mì-ciú gâ̤ sî-hē, ciū uā tíng-à gâ̤ gŏ dú háu gṳ̀ chū,
- 6 Uā, Iŏ̤ng duói gṳ̌ing-ba̿ng, iáu iŏ̤ng duói ě̤ng-iāu, ŭoi dú ŏ̤ nă nì: éng-ṳē iŏ̤ng gṳ̌ing-ba̿ng dú gáu nă uòi làu; běng uòi o̿ nă sū-mū nêng, ciū nă sū-mū nêng.
- 7 Nì lâ̤ kǎing ba̿i uòi, tóng dú sī nì gâ̤.
- 8 Iǎ-Sú a̿ing uā , Se̿ng-géng gi̿-diū uā, Niōng ba̿i Cṳ̌ nì gâ̤ Ciōng-Di̿ , cǒng-lâ̤ niōng hū-sū gṳ̀.
- 9 Mǒ̤-gṳ̌ ǐ duo̿i Iǎ-Sú da̿u Iǎ-lū-să-lǎing-di̿ ko̤̿, hǎng gṳ̀ gṳè hā dāing gâ̤ dǎing-dǎing-ciě. iǎ gṳ̀ uā, Nì lâ̤-sī Ciōng-Di̿ gâ̤ Gṳ̌ing, ciū diǎu à ko̤̿,
- 10 Éng-ṳē se̿ng-géng gi̿-diū uā, Cṳ̌ ŏ̤ gáu-dō gṳ̀ sǎ̤-chṳ̄ gâ̤, bǎu-hū nì:
- 11 Gṳ̀ ŏ̤ sǎ̤ siǔ tŏ̤-diū nì, sǎng-dă̤ nì gâ̤ káu chē̤ng hā ciō̤-di̿.
- 12 Iǎ-Sú a̿ing uā, Se̿ng-géng gi̿-diū uā, Ēng gǒ̤ng chi̿ Cṳ̌ nì gâ̤ Ciōng-Di̿.
- 13 Mǒ̤-gṳ̌ cì-iōng cì-iōng dú chī làu, ciū piĕ-tiāu Iǎ-Sú ko̤̿-tiāu, dǎing iǔ hō̤-sĭ cuo̿i lâ̤ chi̿ gṳ̀.
- 14 Iǎ-Sú dă̤-diō̤ Se̿ng-Sěng gâ̤ duōi cǒ-nǎing da̿u-tê ko̤̿ Gá-lī-lī : da̿u mǔing-si̿-tī cèng iông-miâng.
- 15 Iǎ-Sú da̿u gŏ̤ sù-cài gâ̤ lǐ-ba̿i-d̆ǒ̤ng háu nêng, duōi-gá-nêng dú gṳ̀ ě̤ng-iāu nă gṳ̀.
- 16 Iǎ-Sú hē-mṳě da̿u Nà-să-là̤, ciū-sī liàng gṳ̀ dúōi gâ̤ sù-cài, da̿u úing-sǐ-nì cia̿u-diū ǎing-sî gâ̤ gǎ̤-sǐ nì lǐ-ba̿i-d̆ǒ̤ng, gṳè kǐ lâ̤ o̿ nāng se̿ng-géng.
- 17 Iǔ nêng nà síng-dí Ì-so̿-ngā gâ̤ sṳ́ dé nă gṳ̀. Iǎ-Sú mà-kṳé, lāu0diō̤ ŭ cì píng gi̿-diū uā,
- 18 Cṳ̌ gâ̤ Se̿ng-Sěng hū da̿u uòi séng-di̿. Cṳ̌ nà hióng-iû muŏi uòi, niōng uòi ko̤̿ gǒ̤ng ŭ hǎu gâ̤ se̿ng-sǐ nă gê̤ng-mǎu gâ̤ nêng tia̿ng-nī.
- 19 Iáu chiǒng ko̤̿ gâ̤ nêng uā giâ-gíng ŏ̤ bo̿ng-tiāu, iáu hăi mì-ciú gâ̤ nêng giâ-gíng ŏ̤ chū-gi̿ng, nà ŭ duói nă nêng gǔing-sŭ, siū sióng gâ̤ nêng bo̿ng-tiāu, nă gṳ̀ gǒ̤ng cù-cī cṳ̌-ǐ dṳ̌ing Ciōng-Di̿ tĭ chṳ̆ lâ̤ ŭ ka̿u-uòi gâ̤ nîng-sěng.
- 20 Iǎ-Sú nà sṳ́ bū-lū kǐ lâ̤, dé-hi̿ng liāu-lǐ dī gâ̤ nêng, ciū cō-diū: ŭ duói hā lǐ-ba̿i-dǒ̤ng-di̿ gâ̤ nêng mì-ciú dú géng-ǵng lū-lū-di̿ chū gṳ̀.
- 21 Iǎ-Sú iáu gṳ̀ uā, Nì ka̿ing tia̿ng-nī-gi̿ng gâ̤ se̿ng-géng, géng-diáu iǔ gi̿ng-hāu lò̤.
- 22 Duōi-gá-nêng dú ca̿ gúing-ce̿ng uā gṳ̀ hǎu, tia̿ng-nī-gi̿ng gṳ̀ chṳ̿-di̿ uā chṳ̌ iŏ̤ng hǎu gâ̤ dī ciū cèng hí-gǐ, uā, Iŏ̤ng cia̿ng-sī Iŏ̤-să̤ gâ̤ gṳ̌ing.
- 23 Iǎ-Sú uā, Nì cǒng ŏ̤ nà iŏ̤ng sṳ̆-ngṳ̌ iáu uòi uā, Í-sáing nì niōng í hǎu cù-cī: uòi tia̿ng-nī-gi̿ng nì chîng-mâng da̿u Gá-bă-nǒng ca̿-gua̿ gâ̤ dī, giâ-gíng da̿u cù-cī bǒ̤ng dīhuong ǐa niōng ca̿.
- 24 Iǎ-Sú ǐ uā, Uòi ì-cài iáu nì uā, mǎu ciă síng-dí dáu bǒ̤ng dī-huó̤ng ŏ̤ nă nêng ka̿u-uòi.
- 25 Uòi do̤̿ng céng iáu nì uā, Tê-chîng Ì-lī-ngǎ gâ̤ sî-hē tíng bi̿-diū, sáng nîng būing mǎu hṳ̄, mǔing-si̿-tī duōi gí-huáng; ŭ-cì-sî Ì-să̤-liĕ nêng dǐ-bíng iǔ cèng-cāi huǎ-hū;
- 26 Lâ̤-sī Cṳ̌ ēng-nǎing hǎng Ì-lī-ngǎ ko̤̿ ŭ huǎ-hū dǐ-bíng cì-ciă ŭ-di̿ ko̤̿, cǒng-lâ̤ hǎng gṳ̀ ko̤̿ Sái-dō̤ng gâ̤ Să-là̤-duōi gâ̤ cì-ciă huǎ-hū-di̿ ko̤̿.
- 27 Síng-dí Ì-lī-sá gâ̤ sî-hē; Ì-să̤-liĕ nêng dǐ-bíng iǔ cèng cāi bāng-tuǒi gâ̤; dǐ-bíng mǎu cì-ciă í hǎu-tiāu, cǒng-lâ̤ iǔ Sṳ̄-lī-ngā gŏ gâ̤ Nǎi-māing í hǎu-tiāu.
- 28 Da̿u lǐ-ba̿i-dǒ̤ng gâ̤ nêng tia̿ng-nī-gi̿ng iŏ̤ng dī, dú cèng hǒ-lă.
- 29 Ciū kǐ lâ̤, nà Iǎ-Sú dái chṳ̆ sêng, ŭ sêng kṳé dáu súing ciōng; ŭ duói nêng nà Iǎ-Sú tuói ko̤̿ súing-ko̤̿ng, o̿ dàing gṳ̀ à ko̤̿.
- 30 Iǎ-Sú giǎng duōi-gá-nêng dǐ-bíng géng-gua̿, cìu ko̤̿-tiāu.
- 31 Hē-mṳě dáu Gá-lī-lī cìcia sêng hāng ca̿ Gá-bă-nǒng, dáu úing-sǐ-nì háu duōi-gá-nêng.
- 32 Duōi-gá-nêng sīǒng gṳ̀ háu gâ̤ dī cèng gǐ-guo̿i; éng-ṳē gṳ̀ uā gâ̤ dī iǔ duōi gṳ̌ing-ba̿ng.
- 33 Da̿u lǐ-ba̿i-dǒ̤ng-di̿ iǔ ciă nêng, nă ciǎ-gṳ̌ mî-diū; duōi-siáng hǎng kǐ lâ̤ uā,
- 34 Hài-ià! Nà-sǎ-là̤ nêng Iǎ-Sú, uôi-huōi-nêng iáu nì sū-mū gúing-niǎ? nì lâ̤ miè-tiāu uòi ēng sī? uòi dă̤-dí nì sū-nêng, nì sī Ciōng-Di̿ chéng-giĕ gâ̤ Gṳ̌ing.
- 35 Iǎ-Sú hǎng-diū gṳ̀ uā, Mo̿ ca̿ siáng, niōng guáng iŏ̤ng ciă nêng séng-di̿ chṳ̆ lâ̤. Gṳ̀ nà ŭ ciă nêng dàing-dǎu hā duōi-gá-nêng dǐ-bíng, ciū guáng gṳ̀ séng-di̿ chṳ̆ lâ̤, iǎ ēng-nǎing sióng-diō̤ gṳ̀.
- 36 Duōi-gá-nêng dú ngò̤-ngò̤-di̿, nì mōng gṳ̀, gṳ̀ mōng nì uā, Iŏ̤ng sī sū-mū dàu-lǐ? éng-ṳē gṳ̀ iǔ gṳ̌ing-ba̿ng cǒ-nǎing gáu-dō ciǎ-gṳ̌ gṳ̌ ciū chṳ̆ lâ̤.
- 37 Iŏ̤ng-gă̤-sĭ Iǎ-Sú da̿u mǔing-si̿-tī gâ̤ sù-cài cèng iông-miâng.
- 38 Iǎ-Sú chṳ̆ lǐ-ba̿i-dǒ̤ng nì Sái-mô̤ng chio̤̿-di̿. Sái-mô̤ng gâ̤ diōng-mǔ cŏ̤-chiáu gâ̤ bāng, cèng dōng; iǔ nêng ta̿i gṳ̀ giǔ Iǎ-Sú.
- 39 Iǎ-Sú giǎng-ce̿ng gṳè bāng-nêng séng-bíng, hǎng-diū chiáu-bāng, chiáu ciū to̿-tiāu: á-niông-nêng dāi-diū kǐ lâ̤ te̿-hē gṳ̀ duōi-gá-nêng.
- 40 Mì-tê lò̤-súing gâ̤ sî-hē, iǔ nêng nà gŏ̤ iōng bāng gâ̤ nêng dú ǐau hā Iǎ-Sú-di̿ lâ̤; cì-ciă cì-ciă Iǎ-Sú dú ga̿ siǔ hā gṳ̀ séng-di̿, ta̿i gṳ̀ í hǎu.
- 41 Gu̿ iǔ gṳ̌ giǎng cèng cāi nêng séng-di̿ chṳ̆ lâ̤, hǎng kǐ lâ̤ uā, Nì sī Ciōng-Di̿ gâ̤ Gṳ̌ing. Iǎ-Sú hǎng-diū gṳ̌ mǎu-dă̤-nă gṳ̀ uā dī, éng-ṳē gṳ̌ dă̤-dí Iǎ-Sú sī Gí-Dǔ.
- 42 Tíng-guáng gâ̤ sî-hē, Iǎ-Sú chṳ̆ sêng ko̤̿ ko̿ng-iǎ-di̿ ko̤̿: cèng cāi nêng ko̤̿ lāu gṳ̀, da̿u gṳ̀ ŭ-di̿ o̿ sê-diū gṳ̀, ēng o̿ Iǎ-Sú piĕ-tiāu gṳ̀-huōi-nêng ko̤̿-tiāu.
- 43 Iǎ-Sú uā, Uòi iǎ niōng ko̤̿ biē sêng-di̿ ko̤̿ gǒ̤ng Ciōng-Di̿ gŏ gâ̤ se̿ng-sǐ: uòi sī éng-ṳē iŏ̤ng cì-iōng dī hǎng lâ̤ gâ̤.
- 44 Iǎ-Sú da̿u Gá-lī-lī ŭ duói lǐ-ba̿i-dǒ̤ng-di̿ gǒ̤ng-dàu.
← · Di̿ 3 Cióng ·Di̿ 5 Cióng →
«Se̿ng-géng» gâ̤ mù-lṳ̀
