Se̿ng-géng/Lū-gá Hŭ-éng/24
Di̿ 24 Cióng
[edit]- 1 Chĭ góng gâ̤ tê cì-góng, tíng châng-châng guáng gâ̤ sî-hē, ŭ duói á-niông-nêng duo̿i-diū gṳ̀ o̿-do̿ gâ̤ hióng-liāu-muòi hā dě̤ng-di̿ lâ̤.
- 2 Chū-gi̿ng cě̤ng-mô̤ng ciō̤ chiá-kṳé làu.
- 3 Ciū dī ko̤̿, ēng-nǎing chū-gi̿ng Cṳ̌ Iǎ-Sú gâ̤ séng-chí.
- 4 Dō̤-di̿ ngǐ-séng mǎu cṳ̌-i̿ gâ̤ sî-hē, sīu ǐu liōng nêng gṳ̀e dáu gṳ̀ bíng-ha̿ing, í-ciông kǐ ǎu guáng.
- 5 Ŭ á-niông-nêng cèng giáng, mīng-gǎi pŭ hā diá-di̿, ŭ liōng nêng iáu gṳ̀ uā, Ca̿-sū-dī da̿u sǐ-nêng dǐ-bíng lāu sáng gâ̤ nêng nī?
- 6 Gṳ̀ ēng-nǎing da̿u iŏ̤ng-di̿, giâ-gíng hŭ-sáng kǐ lâ̤ làu; nì niōng gi̿-dǎ̤ gṳ̀ da̿u Gá-lī-lī gâ̤ sî-hē iáu nì uā-gua̿ gâ̤ dī,
- 7 Uā, Nêng gâ̤ Gṳ̌ing cǒng niōng gáu nă cò-nêng diǔ-di̿ da̿ing da̿u sí-cī-ga̿, di̿ sáng góng gṳ̀ ŏ̤ hŭ-sáng kǐ lâ̤.
- 8 Á-niông-nêng ciū gi̿ kǐ lâ̤ Iǎ-Sú uā-gua̿ gâ̤ dī.
- 9 Giǎng dě̤ng-di̿ da̿u-tê ko̤̿, nà iŏ̤ng dī iáu sí-ĭ-ciă hă-sáing, gìng ŭ biē gâ̤ nêng uā.
- 10 Lâ̤ iáu sǎ̤-dǔ ba̿u-se̿ng gâ̤ nêng ciū-sī Muŏi-duōi-là gâ̤ Mǎ-lī-ngā, Iŏ̤-ngā-nà, Ngǎ-gŏ̤ nǎi Mǎ-lī-ngā : gu̿ iǔ iáu gṳ̀ câi cì-dó gâ̤ biē á-niông-nêng.
- 11 Sǎ̤-dǔ siǒng gṳ̀ uā gâ̤ dī sī pô̤ng dī ; ēng se̿ng gṳ̀.
- 13 Gōng ŭ cì góng iǔ liòng-ciă hă-sáing ko̤̿ cì-ciă hióng-lǐ miâng hǎng Ì-mǎ-ngù-sú, lī Iǎ-lū-să-lǎing chá-bŭ-dó̤ iǔ nī-sī lǐ diō̤.
- 14 Liōng nêng câi-câi gǒ̤ng iŏ̤ng cài-chiă pōng-diō̤ gâ̤ dī.
- 15 Gṳ̀ dō̤-di̿ ĭ-bíng gǒ̤ng, ĭ-bíng bûing-bŏ̤ gâ̤ sî-hē, Iǎ-Sú giǎng-ce̿ng iáu gṳ̀ câi giǎng.
- 16 Liòng-ciă hă-sáing gâ̤ mì-ciú su̿-siōng hăi-tiāu ǐ-búing, dú mài nēng-dă̤ gṳ̀ diō̤.
- 17 Iǎ-Sú uā, Nì giǎng diō̤ câi-câi gǒ̤ng sū-mū dī? Ŭ liōng nêng ciū děng-káu, iǔ cèng ki̿ gâ̤ mīng-să̤.
- 18 Liōng nêng dǐ-bíng ŭ ciă miâng hǎng Gă̤-liǔ-bǎ gâ̤, a̿ing uā, Nì da̿u Iǎ-lū-să-lǎing sī gú-séng ciă nêng ca̿ kă, gu̿ ēng dă̤-dí Iǎ-lū-să-lǎing cài-chiă iǔ gâ̤ dī.
- 19 Iǎ-Sú uā, sū-mū dī? Gṳ̀ uā, Ciū-sī Nà-sǎ-là̤ nêng Iǎ-Sú gâ̤ dī, gṳ̀ sī síng-dí, da̿u Ciōng-Di̿ iáu bă-sia̿ng mīng-chîng, uā dī ca̿ dī, dú iǔ duōi cǒ-nǎing.
- 20 Lâ̤-sī uòi gâ̤ duōi ci̿-sí iáu gúing-hǔ nà gṳ̀ gáu ko̤̿ dāing sǐ-cò, da̿ing gṳ̀ da̿u sí-cī-ga.
- 21 Uôi-huōi-nêng ǎing-sî dú siǒng ciū-sī iŏ̤ng nêng ŏ̤ nà Ì-să̤-liĕ bă-sia̿ng chiǔ da̿u-tê. Ēng-ò̤-cǐ iŏ̤ng-gă̤-sĭ, iŏ̤ng dī gua̿-tiāu làu giâ-gíng iǔ sáng góng.
- 22 Uòi cì-bó̤ng gâ̤ nêng iǎ iǔ gǐ-ciă á-niông-nêng lōng uòi cèng giáng, éng-ṳē tíng châng-châng guáng gâ̤ sî-hē gṳ̀ ciū ko̤̿ dě̤ng-di̿ ko̤̿.
- 23 Ēng-nǎing gi̿ng gṳ̀ gâ̤ séng-chí, ciū lâ̤, uā, gṳ̀ chū-gi̿ng Cṳ̌ sǎ̤-chṳ̄ gâ̤ chṳ̆-hīng, uā Iǎ-Sú hŭ-sáng kǐ lâ̤ làu.
- 24 Iáu uòi ca̿ cì-dó iǔ giē nêng ko̤̿ dě̤ng ŭ-di̿, chū-gi̿ng gâ̤ do̤̿ng-céng iáu á-niông-nêng uā gâ̤ ǐ-búing: lâ̤-sī ēng-nǎing chū-gi̿ng Iǎ-Sú.
- 25 Iǎ-Sú uā, Nì iŏ̤ng háng gâ̤ nêng, séng-dǐ iǎ cà̤-cō̤ng, ēng se̿ng ŭ duói síng-dí uā-gua̿ gâ̤ dī!
- 26 Gí-Dŭ siū iŏ̤ng-gă̤-sĭ gâ̤ kǔ, cuo̿i dă̤-diō̤ gṳ̀ gâ̤ ě̤ng-iāu, iŏ̤ng sī e̿ng-gái gâ̤.
- 27 Iǎ-Sú ciū nà tóng se̿ng-géng gi̿-diū cù-cī gâ̤ dī, giǎng Mǒ̤-sái-di̿, da̿u ŭ duói síng-dí gṳè-diū, dú iáu gṳ̀ liōng nêng gǎi-tiă měng-bà̤.
- 28 Tǎu da̿u gṳ̀ ko̤̿ gâ̤ hióng-lǐ, Iǎ-Sú su̿-siōng gu̿ niōng ko̤̿ ǐ-búing.
- 29 Liōng nêng gā-lā-māing sè-diū gṳ̀ uā, Tíng tǎu o̤̿ng, mì-tê dú lò̤ súing: hā uòi iŏ̤ng-di̿ gṳè-diū. Iǎ-Sú ciū di̿ ko̤̿ hā gṳ̀ ŭdi gṳè-diū.
- 30 IOng dŏ̤ iè gâ̤ sî-hē, Iǎ-Sú nà-diū biǎng, uā do̿-ciā làu, ciū iĕ-kṳé nă gṳ̀.
- 31 Liōng nêng gâ̤ mì-ciú guáng kǐ lâ̤, nēng-dă̤ gṳ̀ diō̤; ēng gi̿ng.
- 32 Ciū nì iáu gṳ̀, gṳ̀ iáu nì uā, Gṳ̀ da̿u diō̤-di̿ iáu uòi uā dī, gǎi-tiă se̿ng-géng gâ̤ sî-hē, uòi gâ̤ se̿ng cèng iě su̿-siōng hǒ ǐ-búing.
- 33 Ŭ liōng nêng dāi-diū ciū kǐ-séng da̿u-tê ko̤̿ Iǎ-lū-să-lǎing, chū-gi̿ng sí-ǐ-ciă hă-sáing, gu̿ iǔ biē-nêng iáu gṳ̀ câi cì-dó.
- 34 Ka̿ing-ka̿ing dō̤-di̿, Cṳ̌ do̤̿ng-céng hŭ-sáng kǐ lâ̤, chṳ̆-hīng nă Sái-mô̤ng chū.
- 35 Ŭ liōng nêng iǎ nà diō̤-di̿ pōng-diō̤ gâ̤, iáu Iǎ-Sú iĕ biǎng gâ̤ sî-hē ciū nēng-dă̤ gṳ̀ diō̤ gâ̤ dī, dú gǒ̤ng nă duōi-gá-nêng tia̿ng-nī.
- 36 Dō̤-di̿ uā iŏ̤ng-di̿ gâ̤ sî-hē, Iǎ-Sú gṳè da̿u duōi-gá-nêng dô̤ng-ó̤ng-séng-di̿, iáu gṳ̀ uā, Ngṳ̄ing nì běng-úing.
- 37 Duōi-gá-nêng huáng kǐ lâ̤ cèng giáng, séng-di̿ gō̤-siǒng chū-gi̿ng gâ̤ sī sěng.
- 38 Iǎ-Sú uā, Nì ca̿-sū-dī gō̤ ki̿? séng-dǐ ǐ ngǐ-lâ̤ ngǐ-ko̤̿ nī?
- 39 Chū uòi gâ̤ káu, chū uòi gâ̤ siǔ, ciū dă̤-dí sī uòi: nì mó̤-mó̤ uòi chū hā; sěng sī mǎu gŏ mǎu nṳ̀ gâ̤, nì chū uòi dú iǔ.
- 40 Iǎ-Sú uā làu iŏ̤ng dī, ciū nà káu-siǔ nă gṳ̀ chū.
- 41 Hă-sáing tuŏi ka̿u-uòi-tiāu, ciū mài se̿ng-dă̤-gua̿, séng-di̿ siǒng sī cèng hí-gǐ. Iǎ-Sú uā, Nì iŏ̤ng-di̿ iǔ mî-dī mǎu?
- 42 Duōi-gá-nêng ciū nà cì-tê chiáu-ngṳ̂ nă gṳ̀.
- 43 Iǎ-Sú ciĕ gua̿ lâ̤, hā gṳ̀-huōi-nêng mīng-chîng-di̿ iè.
- 44 Iáu gṳ̀ uā, Uòi tê-chîng iáu nì câi cì-dó gâ̤ sî-hē, iáu nì uā-gua̿ Mǒ̤-sái gâ̤ lṳ̆-huă, Síng-dí gâ̤ sṳ́, iáu Sí-píng gi̿-diū uòi gâ̤ dī, cǒng niōng gi̿ng-hāu, iŏ̤ng dī giâ-gíng dú gi̿ng-hāu.
- 45 Iǎ-Sú ciū kṳé gṳ̀ chóng-měng gâ̤ kia̿u, o̿ gṳ̀ měng-bà̤ se̿ng-géng.
- 46 Iáu gṳ̀ uā, Se̿ng-géng gi̿-diū làu, ŭa, Gí-Dŭ e̿ng-gái ǐgs sīu kǔ, giǎng sǐ-nêng dǐ-bíng hŭ-sáng kǐ lâ̤.
- 47 Niōng nêng ka̿u gṳ̀ gâ̤ miâng dṳ̌ing gǎi-ŏ̤ cě̤ng-sīng gâ̤ dàu-lǐ, giǎng Iǎ-lū-să-lǎing-di̿ kǐ, cì-dā̤ dṳ̌ing da̿u tóng-tíng-à gâ̤ gŏ.
- 48 Nì-huōi-nêng sī ta̿i iŏ̤ng-di̿ ca̿ gúing-ce̿ng.
- 49 Uòi Dá hṳ̌ nì gâ̤, uòi ŏ̤ hǎng gṳ̀ hū dai nì séng-di̿; nì niōng diū da̿u Iǎ-lū-să-lǎing sêng-di̿ dǎing Ciōng-Di̿ giǎng tíng-di̿ nă4 duōi cǒ-nǎing nă nì.
- 50 Iǎ-Sú iáu gṳ̀ chṳ̆ sêng da̿u Bă-duōi-nǐ gâ̤ do̤̿ng-mô̤ng: nà siǔ dǒ̤ kǐ lâ̤, ta̿i gṳ̀ giǔ hŭ-ki̿.
- 51 Dō̤-di̿ ta̿i gṳ̀ giǔ hŭ-ki̿ gâ̤ sî-hē, ciū piĕ-tiāu gṳ̀, nă Ciōng-Di̿ ciĕ iòng tíng ko̤̿.
- 52 Duōi-gá-nêng ciū ba̿i Iǎ-Sú, cèng ka̿u-uòi-uòi-di̿ da̿u-tê ko̤̿ Iǎ-lū-să-lǎing:
- 53 Sî-sî kă̤-kă̤ da̿u dāing-di̿ cu̿ing-mǐ Ciōng-Di̿.