Se̿ng-géng/Lū-gá Hŭ-éng/2
Di̿ 2 Cióng
[edit]- 1 Ǔ-cì-sî Gái-sǎ Ngā-gǔ-sī-dŭ huăi se̿ng-oĭ à lâ̤, hǎng tíng-à gâ̤ nêng dú niōng ca̿ nêng-dáing-chă.
- 2 Gṳ́-lǐ-niǔ ca̿ Sṳ̄-lī-ngā cǒng-dŭ gâ̤ sî-hē; iŏ̤ng ciū-sī tê cì-lê̤ng ca̿ nêng-dáing-chă.
- 3 Gŏ̤ nêng dú niōng ko̤̿ gŏ̤ nêng chṳ̆-si̿ gâ̤ sêng ko̤̿, ba̿u-miâng iòng nêng-dáing-chă.
- 4 Iǒ̤-să̤ sī Duōi-pǐ gâ̤ hē-dō, gu̿-chu̿ iǎ giǎng Gá-lī-lī gâ̤ Nà-sǎ-là̤ sêng-dǐ ko̤̿ Iǔ-tuo̿i-di̿ ko̤, da̿u Duōi-pǐ gâ̤ sêng hǎng ca̿ Bă-lī-ǎing.
- 5 Niōng iáu gṳ̀ uā-iǎng gâ̤ sē-mǎ Mǎ-lī-ngā câi-câi ba̿u-miâng iòng nêng-dáing-chă. Iŏ̤ng-cì-sî Mǎ-lī-ngā iǔ-séng, tǎu sǎi gṳ̌ing.
- 6 Iǒ̤-să̤ iáu Mǎ-lī-ngā da̿u Bă-lī-ǎing gâ̤ sî-hē, Mǎ-lī-ngā sē̤ng ngṳè.
- 7 Ciū sǎi diǒng-tê gâ̤ gṳ̌ing; nà bio̤̿ báu-láu-diū gṳ̀, ga̿ hā mǎ-câu-di̿, éng-ṳē kă-da̿ng-di̿ mǎu ko̿ng gâ̤ sù-cài.
- 8 Iŏ̤ng dī-huó̤ng iǔ ia̿ng-iông gâ̤ nêng, da̿u ko̿ng-iǎ o̤̿ng-mâng ia̿ng gṳ̀ gâ̤ iông.
- 9 Cṳ̌ sǎ̤-chṳ̄ gâ̤ à lâ̤ gṳè hā gṳ̀ séng-bíng-di̿, Cṳ̌ ě̤ng-iāu gâ̤ guáng gǒ̤ng-lǒ̤ng-kṳ́ing cia̿u gṳ̀: ia̿ng-iông gâ̤ nêng giáng dǎ̤-hǎing.
- 10 Cṳ̌ sǎ̤-chṳ̄ gâ̤ iáu gṳ̀ uā, Nì ēng niōng giáng; uòi sī nà děng ka̿u-uòi gâ̤ se̿ng-sǐ ba̿u nǎ nì dǎ̤-dí; tíng-à gâ̤ bă-sia̿ng dú iǔ huō̤ng.
- 11 Géng-diáu da̿u Duōi-pǐ gâ̤ sêng-dǐ ta̿i nì sǎi ciă giù nêng gâ̤ Cṳ̌ cìusi Cṳ̌ Gí-Dǔ.
- 12 Nì ŏ̤ chū-gi̿ng cì-ciă gṳ̌ing-ciě báu-láu da̿u bio̤̿-di̿, dǎu hā mǎ-câu-di̿; iŏ̤ng dī ciū-sī gi̿-nêng.
- 13 Sáng-bǔ-lěng-děng iǔ cèng cāi tíng-béng iáu Cṳ̌ sǎ̤-chṳ̄ gâ̤ câi da̿u ŭ-di̿ cu̿ing-mǐ Ciōng-Di̿, uā,
- 14 Da̿u tíng ciōng děng ǎu gâ̤ sù-cài iǔ ě̤ng-iāu nă Ciōng-Di̿, dáu si̿-gáing de̤̿ng Ciōng-Di̿ i̿ gâ̤ nêng dǐ-bíng, iǔ běng-úing.
- 15 Cṳ̌ sǎ̤-chṳ̄ gâ̤ dú piĕ-tiāu gṳ̀ iòng tíng làu, ia̿ng-iông gâ̤ nêng ciū nì iáu gṳ̀, gṳ̀ iáu nì uā, Uôi-huōi-nêng giâ-gíng mǒng ko̤̿ Bă-lī-ǎing, chū iŏ̤ng ka̿ing iǔ gâ̤ dī ciū-sī Cṳ̌ ba̿u nă dă̤-dí gâ̤.
- 16 Ciū kṳe̿-kṳe̿-di̿ ko̤̿, chū-gi̿ng Mǎ-lī-ngā iáu Iǒ̤-să̤, ǐ chū-gi̿ng gṳ̌ing-ciě dǎu hā mǎ-câu-di̿.
- 17 Chū-gi̿ng làu, ciū nà Cṳ̌ sǎ̤-chṳ̄ gâ̤ iáu gṳ̀ uā iŏ̤ng gṳ̌ing-ciě gâ̤ dī iông chṳ̆ ko̤̿.
- 18. Nêng tia̿ng-nī-gi̿ng ia̿ng-iông nêng uā gâ̤ dī, dú sī cèng hí-gǐ.
- 19 Mǎ-lī-ngā nà iŏ̤ng duói dī dú gi̿ hā séng-di̿, māing-māing-di̿ ko̤̿siǒng.
- 20 Ia̿ng-iông gâ̤ nêng da̿u-tê ko̤̿, éng-ṳē cia̿u-diū Cṳ̌ sǎ̤-chṳ̄ gâ̤ iáu gṳ̀ uā gâ̤ dī, dú chū-gi̿ng tia̿ng-nī-gi̿ng làu, ciū cu̿ing-mǐ Ciōng-Di̿ gṳ́ ě̤ng-iāu nă Ciōng-Di̿.
- 21 Da̿u di̿ băi góng ciū-sī niōng iáu gṳ̌ing-ciě cia̿u lī-gṳ́ uǎi-tiāu pṳê, ciū hǎng gṳ̀ gâ̤ miâng Iǎ-Sú. Iŏ̤ng miâng ciū-sī Mǎ-lī-ngā ēng-nǎing iǔ-séng Cṳ̌ sǎ̤-chṳ̄ gâ̤ sáing iáu gṳ̀ chiǔ gâ̤.
- 22 Cia̿u-diū Mǒ̤-sái gâ̤ lṳ̆-huă séng-tǐ lōng lâi-lī gâ̤ nì-ciě mǔing lò̤, IOsa iáu Mǎ-lī-ngā ciū pāu gṳ̌ing-ciě iòng Iǎ-lū-să-lǎing-di̿ ko̤̿, niōng nà gṳ̀ hṳ̿ing nǎ Cṳ̌.
- 23 Su̿-siōng Cṳ̌ gâ̤ lṳ̆-huă gi̿-diū uā, Diǒng-tê gâ̤ diōng-mǔ-gṳ̌ing dú niōng hǎng ca̿ se̿ng, gṳ́ nă Cṳ̌.
- 24 Gu̿ niōng nà liòng-tê báing-gé, ā̤-ma̤̿ nà liòng-tê nō̤ng-gŏ̤ hṳ̿ing-ci̿, iǎ sī cia̿u-diū Cṳ̌ lṳ̆-huă gi̿-diū gâ̤ dī.
- 25 Da̿u Iǎ-lū-să-lǎing iǔ ciă nêng miâng hǎng Sái-mīng; iŏ̤ng nêng ǐ ngī ǐ ge̿ng-séng, nì-nì dǎing ŭ ciă kúing Ì-să̤-liĕ bă-sia̿ng séng gâ̤ Cṳ̌ lâ̤: Se̿ng-sěng iǎ hū da̿u gṳ̀ séng-di̿.
- 26 Iŏ̤ng nêng dă̤-diō̤ Se̿ng-sěng càng-càng-di̿ háu gṳ̀ dă̤-dí, ēng-nǎing sǐ, sáing cǒng ŏ̤ chū-gi̿ng Cṳ̌ gâ̤ Gí-Dǔ.
- 27 Iŏ̤ng-cì-sî Sái-mīng dă̤-diō̤ Se̿ng-sěng háu gṳ̀ nì dāing: ŭ gṳ̌ing-ciě Iǎ-Sú gâ̤ dá-nǎi ciū pāu-diū gṳ̀ di̿ lâ̤, niōng ta̿i gṳ̀ í-diū lṳ̆-huă gâ̤ lī-gṳ́ ko̤̿ ca̿.
- 28 Sái-mīng ciū nà gṳ̌ing-ciě pāu gua̿ lâ̤, cu̿ing-mǐ Ciōng-Di̿, uā,
- 29 Cṳ̌ à, cia̿u-diū nì tê-chîng uā gâ̤ dī, giâ-gíng bo̿ng-tiāu nì gâ̤ nû-gě běng-b̆ěng úing-úing-di̿ gua̿-si̿.
- 30 Éng-ṳē uòi mì-ciú chū-gi̿ng nì giù nêng gâ̤ áing-hṳ̄ làu.
- 31 Iŏ̤ng áing-hṳ̄ ciū-sī nì da̿u tóng-tíng-à bă-sia̿ng mīng-chîng o̿-do̿ làu gâ̤.
- 32 Ca̿ guáng háu biĕ-gŏ-nêng dă̤-dí, ǐ ca̿ nì Ì-să̤-liĕ bă-sia̿ng gâ̤ ě̤ng-iāu.
- 33 Iǎ-Sú gâ̤ dá-nǎi tia̿ng-nī-gi̿ng uā gṳ̌ing-ciě iŏ̤ng gâ̤ dī, séng-di̿ siǒng sī cèng gǐ-ī.
- 34 Sái-mīng ta̿i gṳ̀ giǔ hŭ-ki̿, ǐ iáu nǎi Mǎ-lī-ngā uā, Iŏ̤ng gṳ̌ing-ciě nă Cṳ̌ lì kǐ lâ̤, sī niōng Ì-să̤-liĕ cèng cāi gâ̤ nêng iǎ ŏ̤ lò̤-bāi-tiāu, iǎ ŏ̤ héng kǐ lâ̤; gu̿ niōng ce̤̿ng dī nă nêng uā ēng hǎu;
- 35 Niōng cèng cāi nêng séng-di̿ siǒng gâ̤ dī dú ŏ̤ lū chṳ̆ lâ̤; nì cù-cī gâ̤ séng iǎ ŏ̤ nă dáu tŭ tóng-tê-tiāu.
- 36 Iǔ ciă síng-dí, miâng hǎng Ngā-nà, sī Ngā-siă ŭ: cì bǒng huăi à lâ̤ gâ̤, Huă-nō-lì gâ̤ á-niông-gṳ̌ing, iŏ̤ng-cì-sî nîng-gǐ cèng sē lò̤, gṳ̀ ca̿ séng-niông kǐ iáu sé̤ng-é̤ng câi diū chǐ nîng.
- 37 Hē-mṳě siǔ-guǎ băi-sī-si̿ nîng, mâng-nì hū-sū Ciōng-Di̿, ge̿ng-diū ēng iè gǐ-dǎu; iŏ̤ng-cì-sî dú ēng chṳ̆ dāing.
- 38 Ka̿ing-ka̿ing iŏ̤ng-cì-dēng gṳ̀ giǎng-ce̿ng lâ̤ iǎ do̿-ciā Ciōng-Di̿, ǐ nà iŏ̤ng gṳ̌ing-ciě gâ̤ dī iáu ŭ duói dǎing Iǎ-lū-să-lǎing gâ̤ sêng nă Cṳ̌ chiǔ da̿u-tê gâ̤ nêng uā.
- 39 Iǒ̤-să̤, Mǎ-lī-ngā cia̿u-diū Cṳ̌ gâ̤ lṳ̆-huă ěng sū-mū dī dú ca̿ làu, ciū da̿u-tê ko̤̿ Gá-lī-lī gâ̤ Nà-sǎ-là̤, cù-cī gâ̤ hióng-lǐ-di̿ ko̤̿.
- 40 Iŏ̤ng gṳ̌ing-ciě māing-māing-di̿ duōi kǐ lâ̤, séng-tǐ ngāing-că dă̤-diō̤ sí̤-cṳ̆ gâ̤ chóng-měng, Ciōng-Di̿ gâ̤ áing-hṳ̄ cia̿u-gu̿ gṳ̀.
- 41 Da̿u gua̤̿-mô̤ng-tê căi gâ̤ sî-hē, gṳ̀ gâ̤ dá-nǎi nîng-nîng dú iòng Iǎ-lū-să-lǎing-di̿ ko̤̿.
- 42 Iǎ-Sú sí-nī hṳe̿ gâ̤ sî-hē, cia̿u-diū căi-ki̿ gâ̤ lī-gṳ́ iáu gṳ̀-huōi-nêng câi iòng Iǎ-lū-să-lǎing.
- 43 Gua̿-căi làu, ciū kǐ-séng chio̤̿ ko̤̿, ŭ gṳ̌ing-ciě Iǎ-Sú gu̿ da̿u Iǎ-lū-să-lǎing; gṳ̀ gâ̤ dá-nǎi dú ēng hiǎu-dǎ̤.
- 44 SIǒng gṳ̀ sī iáu gōng bó̤ng gâ̤ nêng câi giǎng, giǎng cì góng gâ̤ diō̤ làu, ciū da̿u chéng-cia̿ng bǎing-iǔ dǐ-bíng ko̤̿ lāu gṳ̀.
- 45 Lāu ēng diō̤, ǐ da̿u-tê Iǎ-lū-să-lǎing ko̤̿ lāu gṳ̀.
- 46 Gua̿-tiāu sáng góng, ciū da̿u dāing-di̿ lāu-diō̤ gṳ̀ iáu síng-sáing ca̿i cì-dó cò, cì-bíng tia̿ng-nī, cì-bíng mōng gṳ̀ gâ̤ dī.
- 47 Tia̿ng-nī-gi̿ng gâ̤ nêng dú hí-gǐ, éng-ṳē gṳ̀ gâ̤ chóng-měng iáu gṳ̀ gă-a̿ing gâ̤ dī dú ngò̤-ngò̤-di̿.
- 48 Iǎ-Sú gâ̤ dá-nǎi chū-gi̿ng gṳ̀ gâ̤ sî-hē cèng gǐ-guo̿i: gṳ̀ nǎi ciū iáu gṳ̀ uā, Uòi gâ̤ gṳ̌ing, nì ca̿-sū-dī iáu uôi-huōi-nêng iŏ̤ng-gă̤-sĭ ca̿? nì dá iáu uòi sióng-séng-séng-di̿ lâ̤ lāu nì.
- 49. Iǎ-Sú iáu gṳ̀ uā, Nì ṳe-sū-dī lâ̤ lāu uòi? nì gu̿ ēng dă̤-dí uòi cǒng niōng da̿u uòi Dá chio̤̿-di̿?
- 50 Gṳ̀ dá-nǎi dú ēng měng-bà̤ gṳ̀ uā gâ̤ dī.
- 51 Iǎ-Sú iáu dá-nǎi câi kǐ-séng da̿u-tê lâ̤ Nà-sǎ-là̤, ha̿u-sē̤ng gṳ̀: gṳ̀ nǎi nà iŏ̤ng duói dī dú gi̿ hā séng-di̿.
- 52 Iǎ-Sú gâ̤ chóng-měng iáu hṳe̿-su̿ cì góng cāi su̿ cì góng, Ciōng-Di̿ iáu si̿-gáing gâ̤ nêng ga̿ing o̿ gṳ̀.
← · Di̿ 1 Cióng ·Di̿ 3 Cióng →