Se̿ng-géng/Lū-gá Hŭ-éng/15
Di̿ 15 Cióng
[edit]- 1 Ŭ-cì-sî iǔ cèng cāi siú-sṳe̿ iáu cò-nêng giǎng-ce̿ng tia̿ng-nī Iǎ-Sú uā gâ̤ dī.
- 2 Huǎ-lī-so̿ nêng iáu nāng-sṳ́ nêng câi-câi uā Iǎ-Sú gâ̤ ǎing dī, gō̤-uā, Iŏ̤ng nêng ciĕ-duòi cò-nêng, iáu gṳ̀ câi cì-dó.
- 3 Iǎ-Sú ciū nà iŏ̤ng bǐ-piāng gâ̤ dī, iáu gṳ̀ uā,
- 4 Nì dǐ-bíng mǎu-lō̤ng sū-mū nêng iǔ cì-bă-tê iông, mǎu-tiāu cì-tê, cǒng ŏ̤ běng-ca̿ iŏ̤ng giǔ-sī giǔ-tê iông hā ko̿ng-iǎ-di̿, ko̤̿ lāu ŭ mǎu-tiāu gâ̤ iông, cì-dā̤ da̿u lāu-diō̤ gâ̤ sî-hē.
- 5 Lāu-diō̤, ciū ka̿u-uòi, nà ŭ cì-tê iông dǒ̤ hā gáng-mâng-tê-di̿.
- 6 Da̿u chio̤̿-di̿ ciū chiǎng bǎing-iǔ-huǎ chio̤̿-bíng-síng lâ̤ ŭa, Uòi mǎu-tiāu gâ̤ iông giâ-gíng lāu-diō̤, nì niōng iáu uòi câi-câi ka̿u-uòi.
- 7 Uòi iáu nì uā, Lâ̤ iǔ ciă cò-nêng gǎi-ŏ̤ cě̤ng-sīng, da̿u tíng ciōng iǎ sī iŏ̤ng-gă̤-sĭ ta̿i gṳ̀ ka̿u-uòi, piāng ta̿i ŭ giǔ-sī giǔ-ciă ēng niōng gǎi-ŏ̤ cě̤ng-sīng gâ̤ ngī-nêng, ga̿ing ka̿u-uòi.
- 8 Ā̤-ma̤̿, mǎu-lō̤ng sū-mū á-niông-nêng iǔ sí-tī huáng-cîng, lâ̤ dō̤ng-tiāu cì-tī, cǒng ŏ̤ bo̿ng dáing, se̿ chio̤̿, māing-māing-di̿ lāu, cì-dā̤ da̿u lāu-diō̤ gâ̤ sî-hē.
- 9 Lāu-diō̤ làu, ciū chiǎng á-niông-huǎ chio̤̿-bíng-síng lâ̤, iáu gṳ̀ uā, Dō̤ng-tiāu gâ̤ huáing-cîng giâ-gíng lāu-diō̤, nì niōng iáu uòi câi-câi ka̿u-uòi.
- 10 Uòi iáu nì uā, Lâ̤ iǔ cì-ciă cò-nêng gǎi-ŏ̤ cě̤ng-sīng, Ciōng-Di̿ sǎ̤-chṳ̄ gâ̤ iǎ sī iŏ̤ng-gă̤-sĭ ta̿i gṳ̀ ka̿u-uòi.
- 11 Iǎ-Sú ǐ uā, Cì-ciă nêng iǔ liòng-ciă gṳ̌ing.
- 12 Siǎu gṳ̌ing iáu dá uā, Dá, nà uòi e̿ng-gái dă̤ gâ̤ gá-do̤̿ng bṳ́ing nă uòi. Gṳ̀ dá ciū nà gă̤-sǐ bṳ́ing-kṳé.
- 13 Ēng-nǎing gua̿ gǐ góng siău gṳ̌ing nà gṳ̀ lǒng-cǒng iǔ gâ̤ mî-dī dú chéng kǐ lâ̤, ko̤̿dàu-dàu gâ̤ dī-huó̤ng ; da̿u ŭ-di̿ ǔ-iǔ lō̤ng-dō̤ng po̤̿-tiāu gá-do̤̿ng.
- 14 Gṳ̀ iǔ gâ̤ mî-dī dú sǎ̤ lâi-lī, ka̿ing-ka̿ing pōng-diō̤ ŭ sù-cài duōi mà gí-huáng; ciū cèng kǔ.
- 15 Ciū hā ŭ sù-cài cì-ciă nêng-di̿ bó̤ng-cha̿ing ; ŭ ciă nêng hǎng gṳ̀ ko̤̿ súing-di̿ sī kṳ̌.
- 16 Mǎu ciă nêng nà mî-dī nă gṳ̀ iè: gṳ̀ hāing-bŭ-dă̤ nà kṳ̌ iè gâ̤ dē-kŭ lâ̤ cǐ-gí.
- 17 Gṳ̀ séng-di̿ céng-lěng kǐ lâ̤, ciū uā, Uòi dá iǔ cèng cāi gâ̤ ca̿-dī nêng, iè gâ̤ gu̿ iǔ diōng, uòi hā iŏ̤ng-di̿ ngō̤-sǐ-tiāu!
- 18 Uòi niōng kǐ-séng ko̤̿ uòi dá ŭ-di̿, iáu gṳ̀ uā, Dá à, uòi dǎ̤-cò tíng, ǐ dǎ̤-cò nì.
- 19 Giâ-gíng uòi cuo̿i ēng gǒ̤ng uā sī nì gâ̤ gṳ̌ing: nì niōng nà uòi ce̤̿ng cì-ciă ca̿-di̿ gâ̤ nêng chū.
- 20 Gṳ̀ ciū kǐ-séng ko̤̿ gṳ̀ dá ŭ-di̿. Gu̿ cáing-dă̤ dàu, gṳ̀ dá chū-gi̿ng, ciū ta̿i gṳ̀ kǒ̤-lǐng, bǎu giǎng-ce̿ng lâ̤ pāu-diū gṳ̀ gâ̤ dē̤ng-dē̤ng, iáu gṳ̀ mĭ-cṳ̌.
- 21 Gṳ̌ing iáu dá uā, Dá à, uòi dǎ̤-cò tíng, ǐ dǎ̤-cò nì, giâ-gíng uòi ēng gǒ̤ng uā sī nì gâ̤ gṳ̌ing.
- 22 Dá ciū iáu nû-gě uā, Nà děng hǎu gâ̤ í-ciông iáu gṳ̀ cē̤ng-diū, nà ga̿i-ǐ iáu gṳ̀ duǒi hā siǔ-ǐ-cǐe-di̿, nà ǎi iáu gṳ̀ cē̤ng hā káu-di̿.
- 23 Ŭ cì-tê bṳ̂-bṳ̂ gâ̤ niû-ciě iǎ niōng káing lâ̤, ti̿-tiāu, uôi-huōi-nêng niōng ca̿ ciă ka̿u-uòi do̤̿ng:
- 24 Éng-ṳē uòi iŏ̤ng ciă gṳ̌ing sáing sī sǐ-tiāu, giâ-gíng ǐ sáng kǐ lâ̤; sáing sī mǎu-tiāu, giâ-gíng ǐ lāu-diō̤. Duōi-gá-nêng ciū luo̿i-lŏ̤ kǐ lâ̤.
- 25 Ŭ-cì-sî duōi gṳ̌ing da̿u châing-di̿ : ka̿ing-ka̿ing chio̤̿ lâ̤ tǎu da̿u chio̤̿, ciū tia̿ng-nī-gi̿ng chṳé mà dǔing chio̿ng chṳ́ing-lâ̤ chṳ́ing-lo̤̿ ŭ gâ̤ siáng-éng.
- 26 Ciū hǎng cì-ciă nû-gě lâ̤ mōng sī ca̿ su̿ dī.
- 27 Nû-gě uā, Nì dí-ciě lâ̤ lò̤; nì dá éng-ṳē dă̤-diō̤ gṳ̀ mǎu bāng mǎu kǔ-di̿ chio̤̿ lâ̤, ciū nà ŭ cì-tê bṳ̂-bṳ̂ gâ̤ niû-ciě ti̿-tiāu.
- 28 Duōi gṳ̌ing ciū hǒ-lă, ēng kǎing di̿ ko̤̿: gṳ̀ dá chṳ̆ lâ̤ kṳ̄ing gṳ̀.
- 29 Duōi gṳ̌ing iáu gṳ̀ dá uā, Uòi su̿-hē nì iŏ̤ng cǎi nîng, cù-cě̤ng mǎu cì-lê̤ng ngà̤ nì gáu-dō uòi gâ̤ dī: nì gu̿ ēng-nǎing nà cì-tê súing-iông-ciě nă uòi, iáu bǎing-iǔ-huǎ ca̿ ka̿u-uòi.
- 30 Nì iŏ̤ng ciă siǎu gṳ̌ing hí gī-mâ po̤̿-tiāu nì gâ̤ gá-do̤̿ng, gṳ̀ chio̤̿ lâ̤, nì da̿u ta̿i gṳ̀ ti̿-tiāu ŭ cì-tê bṳ̂-bṳ̂ gâ̤ niû-ciě.
- 31 Dá ciū iáu gṳ̀ uā, Uòi gâ̤ gṳ̌ing nì dú sī iáu uòi câi cì-dó, uòi iǔ gâ̤ mî-dī tóng dú sī nì gâ̤.
- 32 Nì iŏ̤ng ciă dí-ciě sáing sī sǐ-tiāu, giâ-gíng ǐ sáng kǐ lâ̤; sáing sī mǎu-tiāu, giâ-gíng ǐ lāu-diō̤ ; uôi-huōi-nêng e̿ng-gái ca̿ ka̿u-uòi kuo̿i-lŏ̤.