Se̿ng-géng/Lū-gá Hŭ-éng/1

Di̿ 1 Cióng

1 Dǐ-à-hí-lô̤ duōi-nêng; iǔ cèng-cāi nêng ca̿ sṳ́ gi̿-diū da̿u uòi dǐ-bíng gi̿ng-gua̿ làu gâ̤ dī.

2 Iŏ̤ng dī ciū-sī dṳ̌ing-dàu gâ̤ nêng buo̿i-chǒ chéng-ngǎing chū-gi̿ng-gua̿ dṳ̌ing nă uòi-huo̿i-nêng gâ̤.

3 Éng-ṳē uòi nà iŏ̤ng duói dī giǎng dĭ buo̿i-chǒ māing-māing-di̿ cǎ měng-bà̤, uòi iǎ siǒng tê-tê ĭ-nī gi̿-diū gṳe̿ nă nì.

4 O̿ nì dă̤-dí tê-chîng nêng chṳ̿-di̿ háu nì gâ̤ dī, dú sī ì-cài gâ̤.

5. Hí-lṳ̆ ca̿ Iǔ-tuo̿i uâng gâ̤ sî-hē, Ngā-bǐ-ngā ŭ cì báing iǔ ciă ci̿-sí miâng hǎng Să-gá-lī-ngā; gṳ̀ gâ̤ sē-mǎ sī Ngā-lě̤ng gâ̤ hē-dō, miâng hǎng Ì-lī-sá-bă.

6. Gṳ̀ liòng sē-mǎ cia̿u Ciōng-Di̿ chū kǐ lâ̤ sī ngī-nêng, gṳ̀ gâ̤ ǎing-gēng dú sī í-diū Cṳ̌ gáu-dō gâ̤ dī iáu lī-gṳ́, mǎu mī-ma̿u-cie̿ cho̤̿.

7. Lâ̤-sī gṳ̀ mǎu gṳ̌ing, éng-ṳē Ì-lī-sá-bă mài sáing-iǒng, liòng sē-mǎ gâ̤ nîng-gǐ ǐ sē lò̤.

8. Lê̤ng da̿u Să-gá-lī-ngā ŭ cì báing gâ̤ ci̿-sí, Să-gá-lī-ngā ciū da̿u Ciōng-Di̿ mīng-chîng ca̿ iŏ̤ng ci̿-sí gâ̤ dī.

9. Cia̿u-diū ci̿-sí gâ̤ lī-gṳ́ cuá chíng, gṳ̀ cuá-diō̤ sī niōng gṳ̀ nì Cṳ̌ gâ̤ dāing-di̿ chiáu hióng.

10. Chiáu hióng gâ̤ sî-hē bă-sia̿ng hā ngṳē-bíng-di̿ gǐ-dǎu.

11. Cṳ̌ sǎ̤-chṳ̿ gâ̤ chṳ̆-hīng nă Să-gá-lī-ngā chū, gṳè da̿u chiáu hióng gâ̤ dŏ̤ iū-bíng.

12. Să-gá-lī-ngā chū-gi̿ng Cṳ̌ sǎ̤-chṳ̿ gâ̤, ciū huáng-iě, giáng dă̤-hǎing.

13. Cṳ̌ sǎ̤-chṳ̿ gâ̤ iáu gṳ̀ uā, Să-gá-lī-ngā, nì ēng niōng giáng: éng-ṳē nì giǔ gâ̤ dī tia̿ng-nī-gi̿ng làu, nì gâ̤ sē-mǎ Ì-lī-sá-bă ŏ̤ sǎi cì-ciă gṳ̌ing, nì niōng ta̿i gṳ̀ chiǔ miâng hǎng Iŏ̤-hu̿ing.

14. Ŭ sî-hē nì ŏ̤ ka̿u-uòi lŏ̤ dă̤-hǎing; cèng cāi nêng éng-ṳē gṳ̀ chṳ̆-si̿ iǎ ŏ̤ ka̿u-uòi.

15. Cṳ̌ ŏ̤ chū gṳ̀ so̤̿ng ca̿ duōi nêng, ciáng ciǔ, làing ciǔ gṳ̀ dú ēng iè; giǎng nǎi bŭ-di̿ cì sǎi chṳ̆-si̿, ciū sí-cṳ̆ dă̤-diō̤ Se̿ng-Sěng.

16. Gṳ̀ ŏ̤ sǎ̤ cèng cāi Ì-să̤-liĕ nêng dṳ̌ing-tê hū gṳ̀ gâ̤ Cṳ̌ Ciōng-Di̿.

17. Gṳ̀ ŏ̤ dă̤-diō̤ Ì-lī-ngā gâ̤ séng-sia̿ng cǒ-nǎing, da̿u Cṳ̌ tê-chîng sáing giǎng, sǎ̤ ca̿ dá gâ̤, ŏ̤ chiŏ̤ gṳ̀ gâ̤ gṳ̌ing, sǎ̤ ngà̤ Ciōng-Di̿ gâ̤ nêng gǎi-bi̿ng ò̤ ngī-nêng gâ̤ chóng-měng; gu̿ ŏ̤ ta̿i Cṳ̌ o̿-do̿ bă-sia̿ng hū-sū gṳ̀.

18. Să-gá-lī-ngā iáu Cṳ̌ sǎ̤-chṳ̿ gâ̤ uā, Uòi nī-di̿ ŏ̤ hiǎu-dă̤ iǔ iŏ̤ng gâ̤ dī nī? uòi dú sē-tiāu làu, uòi gâ̤ sē-mǎ nîng-gǐ iǎ sē-tiāu.

19. Cṳ̌ sǎ̤-chṳ̿ gâ̤ uā, Uòi sī Gá-bă-liĕ, gṳè da̿u Ciōng-Di̿ mīng-chîng; nă Cṳ̌ hǎng lâ̤ nà iŏ̤ng hǎu gâ̤ se̿ng-sĭ ba̿u nă nì dă̤-dí.

20. Éng-ṳē nì ēng se̿ng uòi uā gâ̤ dī, nì ciū ŏ̤ bāng-ǎ mài uā dī, cì-dā̤ da̿u iŏ̤ng dī da̿u gâ̤ nì-ciě, ŭ sî-hē uòi uā gâ̤ dī cǒng ŏ̤ gi̿ng-hāu.

21. Bă-sia̿ng dō̤-di̿ dǎing Să-gá-lī-ngā, éng-ṳē gṳ̀ iŏ̤ng cāi sî da̿u dāing-di̿ dàng-gŏ̤ ciū gǐ-ī.

22. Să-gá-lī-ngā chṳ̆ lâ̤ gâ̤ sî-hē, mài iáu bă-sia̿ng uā dī: bă-sia̿ng ciū dǎ̤-dí gṳ̀ da̿u dāing-di̿ chū-gi̿ng sū dī chṳ̆-hīng: gṳ̀ cì-bĭ-dā̤ dú sī chĭ bǐ băi bǐ iáu bă-sia̿ng uā dī, ciū iǎng ǎ-ciě-tiāu.

23. Lê̤ng da̿u gṳ̀ liāu-lǐ dī gâ̤ nì-ciě mǔing làu, Să-gá-lī-ngā ciū chio̤̿ ko̤̿.

24. Hē-mṳě gṳ̀ gâ̤ sē-mǎ Ì-lī-sá-bă iǔ-séng; dṳ̌ hā chio̤̿-di̿ ngù-ciă ngṳè-nì,

25. Uā, Iŏ̤ng-cì-sî Cṳ̌ chū-gu̿ uòi, iŏ̤ng-gă̤-sĭ duòi uòi, uòi da̿u nêng dǐ-bíng gâ̤ ēng hǎu i̿-su̿ ŏ̤ ta̿i uòi sǎi-tiāu.

26. da̿u di̿ lṳ̀-ciă ngṳè-nì, Cṳ̌ sǎ̤-chṳ̄ gâ̤ Gá-bă-liĕ ĭ nă Cṳ̌ hăng ko̤̿ Gá-lī-lī cì-ciă sêng, hăng ca̿ Nà-să-là̤.

27. Da̿u cì-ciă á-niông-gṳ̌ing-ciě-di̿ iǒ̤ng á-niông-gṳ̌ing-ciě ciū-sī iáu Duōi-pǐ gâ̤ hē-dō Iǒ̤-sǎ̤ uā-chéng iăng làu: miâng hǎng Mǎ-lī-ngā.

28. Cṳ̌ sǎ̤-chṳ̄ gâ̤ di̿ ko̤̿ iáu gṳ̀ uā, Nì iǒ̤ng dǎ̤-diō̤ duōi áing-hṳ̄ gâ̤, uòi iáu nì chiǎng-úing, Cṳ̌ iáu nì câi eì-dó.

29. Mǎ-lī-ngā tia̿ng-nī-gi̿ng iǒ̤ng dī ciū cèng huáng-iě, séng-di̿ gō̤-siǒng iǒ̤ng-gǎ̤-sǐ iáu gṳ̀ chiǎng-úing sī sū-mū i̿-su̿.

30. Cṳ̌ sǎ̤-chṳ̄ gâ̤ uā, Mǎ-lī-ngā ēng niōng giáng: éng-ṳē nì dǎ̤-diō̤ Ciōng-Di̿ gâ̤ áing-hṳ̄.

31. Nì cióng-gṳ̄ing ŏ̤ iǔ-séng, sǎi gṳ̌ing, niōng ta̿i gṳ̀ chiǔ miâng hǎng Iǎ-Sú.

32. Gṳ̀ ŏ̤ ca̿ cèng duo̿i, ŏ̤ hǎng ca̿ děng duōi Ciōng-Di̿ gâ̤ Gṳ̌ing: Cṳ̌ Ciōng-Di̿ ŏ̤ nà gṳ̀ cǔ-cóng Duōi-pǐ gâ̤ ṳ̄ nă gṳ̀ cō.

33. Gṳ̀ ě̤ng-ṳ̌ing dú ŏ̤ ca̿ Ngǎ-gǒ̤ cì chio̤̿ gâ̤ uâng; gṳ̀ gâ̤ gǒ mǎu sṳē-mṳě.

34. Mǎ-lī-ngā iáu Cṳ̌ sǎ̤-chṳ̄ gâ̤ uā, Uòi gu̿ ēng-nǎing ha̿ nă nêng , gōng-ciōng iǔ iǒ̤ng gâ̤ dī nī?

35. Cṳ̌ sǎ̤-chṳ̄ gâ̤ a̿ing gṳ̀ uā, Se̿ng-Sěng ŏ̤ lâ̤ nì séng-di̿, děng-duōi Ciōng-Di̿ gâ̤ cǒ-nǎing ŏ̤ ciá-diū nì: gu̿-chu̿ nì sǎi gâ̤ gṳ̌ing ŏ̤ hǎng ca̿ se̿ng gâ̤, iǎ ŏ̤ hǎng ca̿ Ciōng-Di̿ gâ̤ Gṳ̌ing.

36. Nì gâ̤ chéng-cia̿ng Ì-lī-sá-bă, nîng-gǐ sē gâ̤ sî-hē iǎ iŭ-séng ŏ̤ sǎi diōng-mǔ-gṳ̌ing: ǎing-sî dú sī hǎng ca̿ mài sáing-iǒng gâ̤, giâ-gíng iǔ-séng lṳ̀-ciă ngṳè-nì lò̤.

37. Éng-ṳē Ciōng-Di̿ uā gâ̤ dī mǎu cì gṳ̿ kóng gâ̤, dú iǔ gi̿ng-ha̿u.

38. Mǎ-lī-ngā uā, Uòi sī Cṳ̌ gâ̤ nǎi-bǒ̤; gó̤ng-ngṳ̄ing nì uā gâ̤ dī da̿u uòi séng-di̿ gi̿ng-hāu. Cṳ̌ sǎ̤-chṳ̄ gâ̤ ciū piĕ-tiāu gṳ̀ ko̤̿-tiāu.

39. Ǔ-cì-sî Mǎ-lī-ngā kǐ-séng kṳe̿-kṳe̿ ko̤ súing-di̿ gâ̤ dī-huó̤ng, da̿u Iǔ-tuo̿i cì-ciă sêng:

40. Nì Sǎ-gá-lī-ngā gâ̤ chio̤̿, iáu Ì-lī-sá-bǎ chiǎng-úing.

41. Ì-lī-sá-bǎ cì tia̿ng-nī-gi̿ng Mǎ-lī-ngā chiǎng-úing, gṳ̀ bŭ-di̿ iǔ gâ̤ tó, ciū dòng kǐ lâ̤, Ì-lī-sá-bǎ séng-di̿ ciū sí-cṳ̌ dǎ̤-diō̤ Se̿ng-sěng̀.

42. Gṳ̀ ciū duōi siáng uā, Nì da̿u á-niông-nêng dǐ-bíng sī iǔ hǔ-ki̿, nì bŭ-di̿ iǔ gâ̤ tó iǎ sī iǔ hǔ-ki̿.

43. Uòi Cṳ̌ gâ̤ nǎi hā uòi-di̿ lâ̤, iǒ̤ng sī giǎng nī-di̿ dǎ̤ lâ̤ gâ̤?

44. Éng-ṳē nì chiǎng-úing gâ̤ siáng-éng cì da̿u uòi nèng-ciě, uòi bŭ-di̿ iǔ gâ̤ tó cěng ka̿u-uòi dòng kǐ lâ̤.

45. Ǔ ciă se̿ng Cṳ̌ uā gâ̤ dī ciū-sī iǔ hǔ-ki̿; éng-ṳē Cṳ̌ iáu gṳ̀ uā gâ̤ dī dú ŏ̤ gîng-hāu.

46. Mǎ-lī-ngā uā, Uòi gâ̤ séng có̤ng Cṳ̌ ca̿ duōi.

47. Uòi gâ̤ sěng éng-ṳē giù uòi gâ̤ Cṳ̌ Ciōng-Di̿ ciū cèng ka̿u-uòi.

48. Gṳ̀ nǎi-bǒ̤ sī à-cìng gâ̤ nêng, Cṳ̌ ciū chū-gu̿ gṳ̀ : giâ-gíng à ko̤̿ cì-dō cì-dō dú ŏ̤ uā uòi sī iǔ hǔ-ki̿.

49. Éng-ṳē iǔ duōi cǒ-nǎing gâ̤ Cṳ̌ tâi uòi ca̿ cèng duōi gâ̤ dī; gṳ̀ gâ̤ miâng sī děng-se̿ng gâ̤.

50. Ge̿ng gṳ̀ gâ̤ nêng, Cṳ̌ cì-bĭ-dā̤ da̿u gṳ̀ gâ̤ gṳ̌ing-gṳ̌ing só̤ng-só̤ng kǒ̤-lǐng gṳ̀.

51. Cṳ̌ gâ̤ siǔ hīng chṳ̌ duōi kṳe̿-lì; ǔ giáu-ngāu séng-dǐ siǒng cèng cāi dī gâ̤ nêng, Cṳ̌ nà gṳ̀ dú dāi su̿ing-tiāu.

52. Cǎ uâng gâ̤ nêng, Cṳ̌ ciū hǎng gṳ̀ giǎng ǔū-di̿ à lâ̤ à-dǎing gâ̤ nêng, ciū nà gṳ̀ gáu-séng kǐ lâ̤.

53. Bŭ-gṳě gâ̤ nêng, Cṳ̌ ciū nà cèng hǎu gâ̤ mî-dī nă gṳ̀ iè bǎu; cuòi-cṳ̌ gâ̤ nêng, ciū hǎng gṳ̀ kóng-bŭ chio̤̿ ko̤̿.

54. Cṳ̌ káing-diū gṳ̀ nû-gě Ì-să̤-liĕ.

55. Iǒ̤ng ciū-sī niōng ě̤ng-ṳ̌ing gi̿-dǎ̤ kǒ̤-lǐng Ngā-bǎ-là-hǎng hǎng iáu gṳ̀ gâ̤ gṳ̌ing-só̤ng; su̿-siōng Cṳ̌ tê-chîng iáu uòi cŭ-cóng uā-gua̿ gâ̤ dī ǐ-búing.

56. Mǎ-lī-ngā iáu Ì-lī-sá-bǎ câi gṳè-diū sáng-ciǎ ngṳè-nì, ciū chio̤̿ ko̤̿.

57. Ì-lī-sá-bǎ sē̤ng-ngṳè ciū sǎi cì-ciă gṳ̌ing.

58. Chio̤̿-bíg-síng chéng-cia̿ng tia̿ng-nī-gi̿ng Cṳ̌ iǒ̤ng-gǎ̤-sǐ duōi kǒ̤-lǐng gṳ̀; ciū iáu gṳ̀ câi ka̿u-uòi.

59. Da̿u di̿ băi góng, gṳ̀-huōi-nêng dú lâ̤ ta̿i gṳ̌ing-ciě cia̿u-diū lī-gṳ́ uǎi-tiāu pṳê; o̿ dāi gṳ̀ dá gâ̤ miâng-cī ta̿i gṳ̀ chiǔ miâng hǎng ca̿ Sǎ-gá-lī-ngā.

60. Gṳ̀ nǎi uā, Ēng gǒ̤ng; niōng hǎng gṳ̀ ca̿ Iǒ̤-hu̿ing.

61. Duōi-gá-nêng iáu gṳ̀ uā, Nì chéng-ciâng cī-chii̤̿ dú mǎu cì-ciă hǎng iǒ̤ng miâng-cī.

62. Duōi-gá-nêng ciū chĭ bǐ băi bǐ mōng gṳ̀ dá, o̿ hǎng gṳ̀ sū-mū miâng.

63. Gṳ̀ dá tǎu cì-tī siǎ-cī gâ̤ huǒ̤ng-bǎi, ciū siǎ hā ciōng-bíng uā, Gṳ̀ gâ̤ miâng ciū-sī Iǒ̤-hu̿ing. Duōi-gá-nêng siǒng cèng gǐ-ī.

64. Dāi-diū Sǎ-gá-lī-ngā gâ̤ chṳ̄ ciū kṳé-kṳé, ṳè iǎ ŏ̤ dṳ̌ing, gṳ̀ ciū kṳé-siáng cu̿ing-mǐ Ciōng-Di̿.

65. Chio̤̿-bíng-síng dú giáng kǐ lâ̤; iǒ̤ng dīī ciū dúǔing dáu Iǔ-tuo̿i gâ̤ súing-di̿ mǔing-si̿-tī gâ̤ dī-huó̤ng.

66. Tia̿ng-nī-gi̿ng gâ̤ nêng nà iǒ̤ng dī gi̿ da̿u séng-dǐ, ǔa, Ēng hiǎu-dǎ̤ iǒ̤ng gṳ̌ing-ciě hē-lǎi sū-mū gǎ̤-sǐ; Cṳ̌ gâ̤ ciǔ káing-diū gṳ̀.

67. Gṳ̀ dá Sǎ-gá-lī-ngā séng-di̿ sí-cṳ̌ dǎ̤-diō̤ Se̿ng-sěng̀ ciū sáing uā ēng-nǎing lâ̤ gâ̤ dī.

68. Uā, Niōng cu̿ing-mǐ Cṳ̌ Ì-să̤-liĕ gâ̤ Ciōng-Di̿; ṳē gṳ̀ chū-gū gṳ̀ gâ̤ bă-sia̿ng, nà gṳ̀ chiǔ da̿u-tê.

69. Giâ-gíng da̿u gṳ̀ nû-gě Duōi-pǐ chio̤̿-di̿ ta̿i uòi cì-ciă giù uôi-huōi-nêng gâ̤ gŭ.

70. Su̿-siōng Cṳ̌ giǎng kṳé-tíng bī-dī gâ̤ sî-hē ciŏ̤ gṳ̀ ŭ duói se̿ng síng-dí gâ̤ chṳ̿ uā-guā gâ̤ dī.

71. Niōng giù uòi pī-tiāu do̿-tê. iáu ŭ duói hāing uòi gâ̤ nêng siǔ-di̿.

72. Kǒ̤-lǐng ǔoi cǔ-cóng, gu̿ niōng gi̿-dǎ̤ gṳ̀ iŏ̤-diāng se̿ng gâ̤ dī.

73. Ciū-sī gṳ̀ iáu uòi cǔ-cóng Ngā-bǎ-là-hǎng ciu̿-hua̿-chṳ̿ gâ̤ dī,

74. Uā, sáing ŏ̤ nà uòi giǎng do̿-tê gâ̤ siǔ-di̿ giù chṳ̆ lâ̤.

75. Ciū ŏ̤ cě̤ng uòi cì sáing-si̿ séng-di̿ hio̿ng-diū Cṳ̌, ŏ̤ chéng-giĕ góng-ngī hū-sū Cṳ̌, mǎu dī1 giáng-pa̿.

76. Nì iǒ̤ng gṳ̌ing-ciě iǎ ŏ̤ hǎng ca̿ děng duōi Ciōng-Di̿ gâ̤ síng-dí: éng-ṳē nì ŏ̤ da̿u Cṳ̌ tê-chîng sáing giǎng kṳé gṳ̀ gâ̤ diō̤.

77. Háu gṳ̀ gâ̤ bă-sia̿ng dǎ̤-dí Cṳ̌ giù nêng gâ̤ áing-hṳ̄, ciū-sī ŏ̤ ta̿i gṳ̀ sia̿-cò.

78. Éng-ṳē Ciōng-Di̿ iǔ kǒ̤-lǐng uôi-huōi-nêng gâ̤ sěng, gṳ̀ ciū ŏ̤ sǎ̤ cṳĕ-cǎu gâ̤ mì-tê guáng giǎng tíng ciōng da̿u uòi iǒ̤ng-di̿.

79. Cia̿u-diū ǔ duói diū da̿u ú-o̤̿ng gā-lā-ú sǐ gâ̤ sù-cài gâ̤ nêng; gu̿ niōng háu uôi-huōi-nêng gâ̤ káu giǎng běng-úing gâ̤ diō̤.

80. Ǔ gṳ̌ing-ciě māing-māingdi̿ duōi kǐ lâ̤, céng-sěng cṳ̆ dă̤-hǎing, da̿u ko̤̿ng-iǎ-di̿ gṳè-diū cì-dā̤ diū da̿u hīng chṳ̆ lâ̤ nă Ì-să̤-liĕ nêng chū gâ̤ nì-ciě.

Di̿ 2 Cióng →

«Se̿ng-géng» gâ̤ mù-lṳ̀