Se̿ng-géng/Iŏ̤-hu̿ing Hŭ-éng/6
Di̿ 6 Cióng
[edit]- 1 Iŏ̤ng dī làu Iǎ-Sú gua̿ Gá-lī-lī huǒi da̿u ŭ-bíng ŭ-bíng ngāing, iŏ̤ng huǒi ciū-sī Dǐ-bǐ-lǐ-ngā huǒi.
- 2 Iǔ cèng cāi nêng éng-ṳē chū-gi̿ng Iǎ-Sú da̿u bāng-nêng séng-di̿ hǐng sěng-tóng gâ̤ dī, ciū gáing-diū gṳ̀ ko̤̿.
- 3 Iǎ-Sú iòng súing iáu hă-sáing câi cō da̿u ŭ-di̿.
- 4 Ŭ-cì-sî Iǔ-tuo̿i nêng gua̿-mô̤ng-tê gâ̤ căi-ki̿ tǎu da̿u.
- 5 Iǎ-Sú mì-ciú go̤̿ kǐ lâ̤ chū-gi̿ng cèng cāi nêng hā gṳ̀-di̿ lâ̤, ciū iáu Hí-lṳ̆ uā, Uôi-huōi-nêng ko̤̿ nī-di̿ mǎi biǎng, nă iŏ̤ng duói nêng iè nī?
- 6 Iǎ-Sú uā iŏ̤ng dī sī o̿ chi̿ Hǐ-lì: éng-ṳē gṳ̀ cù-cī dă̤-dí niōng gōng-ciōng ca̿.
- 7 Hǐ-lì a̿ing uā, Mǎi nī-sī liǒng ngê̤ng gâ̤ biǎng, gŏ̤ nêng bṳ́ing mī-ma̿u-cie̿, iǎ mǎu kāu-lāu.
- 8 Iǔ ciă hă-sáing, ciū-sī Sái-mô̤ng Bǐ-dǎ̤ gâ̤ hiáng-dī, Úing-dă̤-liĕ, iáu Iǎ-Sú uā,
- 9 Iŏ̤ng-di̿ iǔ ciă gṳ̌ing-ciě, gṳ̀ iǔ ngù-yī duōi mà-ciě gâ̤ biǎng, liòng-tê ngṳ̂: lâ̤ iŏ̤ng mī-cie̿ nī-di̿ iǔ kāu-kāu bṳ́ing iŏ̤ng cèng cāi nêng nī?
- 10 Iǎ-Sú uā, Hǎng duōi-gá-nêng cō-diū. Ŭ sù-cài iǔ cèng cāi chǎu. Duōi-gá-nêng ciū cō hā chǎu-di̿, chá-bŭ-dó̤ dó̤ iǔ ngù-cháing nêng.
- 11 Iǎ-Sú dé-diū biǎng; uā do̿-ciā làu, ciū bṳ́ing nǎ cō-diū gâ̤ nêng; ngṳ̂ iǎ iŏ̤ng-gă̤-sĭ, běng gṳ̀ gŏ̤ nêng o̿ iè gǐ-duói.
- 12 Duōi-gá-nêng iè bǎu làu, Iǎ-Sú iáu hă-sáing uā, Nà la̿ing-cho̿ diōng-diū gâ̤ dú chéng kǐ lâ̤, sǎng-dă̤ kǒ̤-sǐ-tiāu.
- 13 Hă-sáing ciū nà duōi-gá-nêng iè diōng gâ̤ ngù-tī duōi mà-ciě biǎng gâ̤ cho̿, dú chéng kǐ lâ̤, dó̤ng-mǔing sí-nī-ciă sâng-ciě.
- 14 Duōi-gá-nêng chū-gi̿ng Iǎ-Sú hǐng iŏ̤ng sěng-tóng gâ̤ dī, ciū uā, Iŏ̤ng ì-cài sī ŭ ciă ŏ̤ lâ̤ si̿-gáing gâ̤ síng-dí.
- 15 Iǎ-Sú dă̤-dí duōi-gá-nêng tǎu lâ̤ gáng gṳ̀ ca̿ uâng, ciū cù-cī ciă nêng pī hā súing-di̿ ko̤̿.
- 16 Da̿u o̤̿ng-bíng-ciě hă-sáing à súing ko̤̿ huǒi-bíng.
- 17 Iòng ṳ̌ing dǎ gua̿ huǒi ko̤̿ Gá-bă-nǒng. Tíng o̤̿ng lò̤, Iǎ-Sú gu̿ ēng-nǎing lâ̤.
- 18 Éng-ṳē kǐ cèng duōi gâ̤ hóng, huǒi-sṳ̌ cìu gǒ̤ng-lǒ̤ng kǐ lâ̤.
- 19 Hă-sáing tǒng-ciǒng chá-bŭ-dó̤ giǎng sí lâing lǐ diō̤, chū-gi̿ng Iǎ-Sú da̿u huǒi-sṳ̌-mīng ciōng-di̿ giǎng lâ̤, tǎu da̿u ṳ̌ing: hă-sáing coi giáng kǐ lâ̤.
- 20 Iǎ-Sú iáu gṳ̀ uā, Sī uòi, nì ēng niōng giáng.
- 21 Hă-sáing ciū kǎing ciĕ gṳ̀ iòng ṳ̌ing; ṳ̌ing cì-kă̤ ciū da̿u gṳ̀ niōng ko̤̿ gâ̤ sù-cài.
- 22 Di̿ nī góng ŭ cèng cāi nêng gṳè da̿u huǒi ŭ-bíng ngāing-di̿, chū-gi̿ng cǒng-lâ̤ hă-sáing cō gâ̤ ŭ diâu ṳ̌ing, mǎu biē ṳ̌ing dáu ŭ-di̿, ǐ dă̤-dí Iǎ-Sú ēng-nǎing iáu hă-sáing câi iòng ṳ̌ing ko̤̿, sī hă-sáing cù-cī ko̤̿,
- 23 (Ka̿ing-ka̿ing hō̤-sĭ iǔ biē ṳ̌ing giǎng Dǐ-bǐ-lǐ-ngā-di̿ lâ̤, bō̤ da̿u gṳ̄ing Cṳ̌ uā do̿-ciā làu, duōi-gá-nêng iè biǎng gâ̤ sù-cài):
- 24 Duōi-gá-nêng chū-gi̿ng Iǎ-Sú iáu hă-sáing dú ēng-nǎing da̿u ŭ-di̿, iǎ iòng ṳ̌ing ko̤̿ Gá-bă-nǒng lāu Iǎ-Sú.
- 25 Da̿u huǒi iŏ̤ng-bíng lāu-diō̤ gṳ̀, ciū iáu gṳ̀ uā, Síng-Sáing, nì sū-mū sî-hē hā iŏ̤ng-di̿ lâ̤?
- 26 Iǎ-Sú a̿ing uā, Uòi ì-cài iáu nì uā, nì-huōi-nêng lāu uòi, ēng sī éng-ṳē chū-gi̿ng sěng-tóng gâ̤ dī, sī éng-ṳē biǎng iè-dă̤ bǎu.
- 27 Ēng niōng éng-ṳē ŭ ciă ŏ̤ huōi-tiāu gâ̤ liông-chǎu ca̿ dī, niōng éng-ṳē ŭ ciă da̿u ě̤ng-ṳ̌ing gâ̤ sáng-miāng dú dō̤-di̿ gâ̤ liông-chǎu ca̿ dī, iŏ̤ng liông-chǎu sī nêng gâ̤ Gṳ̌ing ŏ̤ nă nì gâ̤: éng-ṳē Dá, Ciōng-Di̿, ta̿i gṳ̀ ca̿ gúing-ce̿ng, mà cì kuá êng ca̿ běng-gṳ̀.
- 28 Duōi-gá-nêng mōng gṳ̀ ŭa, Uôi-huōi-nêng niōng gōng-ciōng ca̿, cìu ca̿-dă̤ Ciōng-Di̿ gâ̤ dī?
- 29 Iǎ-Sú a̿ing uā, Se̿ng gṳ̀ hǎng lâ̤ gâ̤ nêng, iŏ̤ng ciū-sī ca̿ Ciōng-Di̿ gâ̤ dī.
- 30 Duōi-gá-nêng ǐ uā, Iŏ̤ng-gă̤-sĭ nì hǐng sū-mū sěng-tóng nă uòi chū-gi̿ng, ciū ŏ̤ se̿ng nì? nì da̿u-dǎi ca̿ sū-mū dī nī?
- 31 Uôi-huōi-nêng gâ̤ cǔ-cóng da̿u ko̿ng-iǎ iè mǎ-nă; su̿-siōng se̿ng-géng gi̿-diū uā, Gṳ̀ giǎng tíng-di̿ nà biǎng nă gṳ̀ iè.
- 32 Iǎ-Sú uā, Uòi ì-cài iáu nì uā, Ēng sī Mǒ̤-sái giǎng tíng-di̿ nà biǎng nă nì; sī uòi Dá giong tíng-di̿ nà céng gâ̤ biǎng nă nì.
- 33 Éng-ṳē Ciōng-Di̿ gâ̤ biǎng, ciū-sī giǎng tíng-di̿ à lâ̤ gâ̤, nà sáng-miāng nă si̿-gáing nêng.
- 34 Duōi-gá-nêng ciū uā, Cṳ̌, giǔ nì cì-bĭ-dā̤ nà iŏ̤ng biǎng nă uòi.
- 35 Iǎ-Sú uā, Uòi ciū-sī sáng-miāng gâ̤ biǎng: nêng hā uòi-di̿ lâ̤, cǒng mài bŭ-gṳě, se̿ng uòi gâ̤, ě̤ng-ṳ̌ing cǒng mǎu chṳ̿-diǎu.
- 36 Lâ̤-sī uòi iáu nì uā-gua̿, Nì chū-gi̿ng uòi làu, gu̿ ēng se̿ng.
- 37 Uòi Dá nă uòi gâ̤ nêng dú ŏ̤ hā uòi-di̿ lâ̤; hā uòi-di̿ lâ̤ gâ̤, upi cǒng mài diú-tiāu gṳ̀.
- 38 Éng-ṳē uòi giǎng tíng-di̿ à lâ̤, ēng sī í-diū cù-cī gâ̤ séng-i̿ ca̿, sī í-diū hǎng uòi lâ̤ gâ̤ Dá gâ̤ séng-i̿ ca̿.
- 39 Uòi Dá nă uòi gâ̤ nêng, gṳ̀ ēng kǎing uòi mǎu-tiāu cì-ciă, niōng uòi da̿u sṳē-mṳě gâ̤ nì-ciě dú hia̿u gṳ̀ sáng kǐ lâ̤; iŏ̤ng ciū-sī hǎng uòi lâ̤ gâ̤ Dá gâ̤ séng-i̿.
- 40 Éng-ṳē uòi Dá gâ̤ séng-i̿ ciū-sī iŏ̤ng-gă̤-sĭ, o̿ mǎu-lō̤ng sū-mū-nêng chū-gi̿ng Gṳ̌ing, ǐ se̿ng gṳ̀, dú ŏ̤ dă̤-diō̤ ě̤ng-ṳ̌ing gâ̤ sáng-miāng ; da̿u sáng-miāng gâ̤ nì-ciě uòi iǎ ŏ̤ hia̿u gṳ̀ sáng kǐ lâ̤.
- 41 Iǔ-tuo̿i nêng éng-ṳē Iǎ-Sú uā, Uòi sī giǎng tíng-di̿ à lâ̤ gâ̤ biǎng, ciū càng-càng-di̿ uā gṳ̀ gâ̤ ǎing dī,
- 42 Gō̤-uā, Iŏ̤ng nêng cia̿ng-sī Iŏ̤-să̤ gâ̤ gṳ̌ing, Iǎ-Sú; gṳ̀ gâ̤ dá-nǎi uôi-huōi-nêng dú dă̤-dí, gṳ̀ gōng-ciōng uā, Uòi sī giǎng tíng-di̿ à lâ̤ gâ̤ nī?
- 43 Iǎ-Sú a̿ing gṳ̀ uā, Nì iáu gṳ̀ ēng niōng càng-càng-di̿ uā ǎing di.
- 44 Hǎng uòi lâ̤ gâ̤ Dá lâ̤ ēng iáu nêng lâ̤, ciū mǎu ciă nêng ŏ̤ hā uòi-di̿ lâ̤; hā uòi-di̿ lâ̤ gâ̤ nêng da̿u sṳē-mṳě gâ̤ nì-ciě uòi ŏ̤ hia̿u gṳ̀ sáng kǐ lâ̤.
- 45 Síng-dí gâ̤ sṳ́ gi̿-diū uā, Si̿-gáingn dú ŏ̤ dă̤-diō̤ Ciōng-Di̿ háu gṳ̀. Gu̿-chu̿ mǎu-lō̤ng sū-mū nêng tia̿ng-nī-gi̿ng Dá háu, ǐ ò̤ lâ̤, dú hā uòi-di̿ lâ̤.
- 46 Iŏ̤ng ēng sī uā iǔ nêng chū-gi̿ng-gua̿ Dá, cǒng-lâ̤ ŭ ciă giǎng Ciōng-Di̿-di̿ lâ̤ gâ̤, gṳ̀ chū-gi̿ng-gua̿ Dá.
- 47 Uòi ì-cài iáu nì uā, Se̿ng uòi gâ̤ nêng iǔ ě̤ng-ṳ̌ing gâ̤ sáng-miāng.
- 48 Uòi sī sáng-miāng gâ̤ biǎng.
- 49 Nì cǔ-cóng da̿u ko̿ng-iǎ iè mǎ-nă, hē-mṳě sǐ-tiāu.
- 50 Iŏ̤ng ciū-sī giǎng tíng-di̿ à lâ̤ gâ̤ biǎng, nă nêng iè, ciū mài sǐ.
- 51 Uòi sī giǎng tíng-di̿ à lâ̤ iǔ sáng-miāng gâ̤ biǎng: nêng lâ̤ iè iŏ̤ng biǎng ,ciu ě̤ng-ṳ̌ing dú ŏ̤ sáng: uòi ŏ̤ nă nêng gâ̤ biǎng ciū-sī uòi gâ̤ nṳ̀, dō si̿-gáing nêng gâ̤ sáng-miāng.
- 55 Éng-ṳē uòi gâ̤ nṳ̀ ì-cài sī liông-chǎu, uòi gâ̤ huăi ì-cài sī tó̤ng-sṳ̌.
- 56 Nêng lâ̤ iè uòi gâ̤ nṳ̀, chṳĕ uòi gâ̤ huăi, gṳ̀ sî-sî kă̤-kă̤ iáu uòi hō̤ ca̿ ǐ tǐ, uòi iǎ sî-sî kă̤-kă̤ iáu gṳ̀ hō̤ ca̿ ǐ tǐ.
- 57 Su̿-siōng iǔ sáng-miāng gâ̤ Dá hǎng uòi lâ̤, uòi éng-ṳē Dá ciū ŏ̤ sáng; iŏ̤ng-gă̤-sĭ iè uòi gâ̤ nêng, éng-ṳē uòi iǎ ŏ̤ sáng:
- 58 Iŏ̤ng ciū-sī giǎng tíng-di̿ à lâ̤ gâ̤ biǎng; ēng sī su̿-siōng cǔ-cóng iè mǎ-nă hē-mṳě sǐ-tiāu, nêng iè iŏ̤ng biǎng ě̤ng-ṳ̌ing dú ŏ̤ sáng.
- 59 Iǎ-Sú da̿u Gá-bă-nǒng lǐ-ba̿i-dǒ̤ng-di̿ háu nû-gě sî-hē, uā iŏ̤ng dī.
- 60 Hă-sáing dǐ-bíng cèng cāi nêng tia̿ng-nī-gi̿ng ciū uā, Iŏ̤ng dī cèng ēng hǎu tia̿ng-nī, sū nêng tia̿ng-nī dă̤ diū.
- 61 Iǎ-Sú séng-di̿ dă̤-dí hă-sáing ēng hū iŏ̤ng dī, càng-càng-di̿ uā ǎing dī, ciū iáu gṳ̀ uā, Iŏ̤ng dī ŏ̤ huōi nì iǔ gua̿-ngāi?
- 62 Nì lâ̤ chū-gi̿ng nêng gâ̤ Gṳ̌ing ko̤̿ aīng-làu gâ̤ sù-cài, nì ciū gōng-ciōng-iōng nī?
- 63 Nà sū-mūi nă nêng ciū-sī sěng, nṳ̀-séng sī ǔ ĭ gâ̤l uòi iáu nì uā gâ̤ dī, ciū-sī sěng ǐ sī sáng-miāng.
- 64 Lâ̤-sī nì dǐ-bíng iǔ nêng ēng se̿ng. Éng-ṳē Iǎ-Sú giǎng buo̿i-chǒ ciū dă̤-dí ēng se̿ng gâ̤ sī sū nêng, ŏ̤ māi gṳ̀ gâ̤ sī nī cì-ciă.
- 65 Iǎ-Sú ǐ uā, Uòi éng-ṳē iŏ̤ng dī iáu nì uā làu, Lâ̤-ēng-sī uòi Dá sáing nă gṳ̀ iǔ lì-liōng, ciū mǎu ciă nêng ŏ̤ hā uòi-di̿ lâ̤.
- 66 Iŏ̤ng sî-hē cèng cāi hă-sáing bi̿ng-séng-tiāu, ēng cuo̿i gáing Iǎ-Sú.
- 67 Gu̿-chu̿ Iǎ-Sú iáu sí-nī-ciă hă-sáing uā, Nì iǎ o̿ ko̤̿, ēng sī?
- 68 Sái-mô̤ng Bǐ-dǎ̤ a̿ing uā, Cṳ̌, nì iǔ ě̤ng-ṳ̌ing sáng-miāng gâ̤ dàu-lǐ, uôi-huōi-nêng gu̿ ko̤̿ gáing sū nêng nī?
- 69 Uôi-huōi-nêng se̿ng làu, ǐ dă̤-dí nì sī Ciōng-Di̿ chéng-giĕ gâ̤ Gṳ̌ing.
- 70 Iǎ-Sú a̿ing gṳ̀ uā, Nì sí-niē nêng dú sī uòi tĭ chṳ̆ lâ̤ gâ̤, lâ̤-sī nì dǐ-bíng cì-ciă sī mǒ̤-gṳ̌.
- 71 Iǎ-Sú iŏ̤ng dī sī uā Sái-mô̤ng gâ̤ gṳ̌ing Gá-liŏ̤ nêng Iǔ-duōi, gṳ̀ sī iáu sí-nī-ciă hă-sáing câi cì-bó̤ng gâ; hē-mṳě ŏ̤ māi Iǎ-Sú.
← · Di̿ 5 Cióng · Di̿ 7 Cióng →