Jump to content
Se̿ng-géng/Iŏ̤-hu̿ing Hŭ-éng/4
- 1 Cṳ̌ cì dă̤-dí Huǎ-lī-so̿ nêng tia̿ng-nī-gi̿ng gṳ̀ cù-cī siú hă-sáing ta̿i gṳ̀ sí sǎi-lǐ, piāng Iŏ̤-hu̿ing ga̿ing cāi.
- 2 Ì-cài ēng sī Iǎ-Sú cù-cī sí sǎi-lǐ, sī gṳ̀ hă-sáing sí sǎi-lǐ,
- 3 Cṳ̌ ciū chṳ̆ Iǔ-tuo̿i, ǐ ko̤̿ Gá-lī-lī.
- 4. Cǒng niōng giǎng Să-mǎ-lī-ngā-di̿ gua̿.
- 5. Ciū da̿u Să-mǎ-lī-ngā cì-ciă sêng miâng hǎng Sṳ̄-gá, gṳ̄ing Ngǎ-gǒ̤ cě̤ng-chîng nă gṳ̀ gṳ̌ing Iŏ̤-să̤ gâ̤ dī-huó̤ng.
- 6. Da̿u ŭ-di̿ iǔ Ngǎ-gǒ̤ gâ̤ cǎng. Iǎ-Sú éng-ṳē giǎng-nṳ̌ing-tiāu, ciū hā cǎng bíng-di̿ cō-diū. Iŏ̤ng sî-hē chá-bŭ-dó̤ dó̤ng-de̿.
- 7. Iǔ ciă Să-mǎ-lī-ngā gâ̤ á-niông-nêng lâ̤ bí sṳ̌. Iǎ-Sú iáu gṳ̀ uā, Sṳ̌, dé nă uòi iè.
- 8. Iŏ̤ng-cì-sî hă-sáing nì sêng ko̤̿mǎi mî-dī iè.
- 9. Să-mǎ-lī-ngā gâ̤ á-niông-nêng iáu Iǎ-Sú uā, Nì sī Iǔ-tuo̿i nêng, gōng-ciōng iáu uòi cì-ciă Să-mǎ-lī-ngā gâ̤ á-niông-nêng tǎu sṳ̌ iè nī? (Éng-ṳē Iǔ-tuo̿i nêng iáu Să-mǎ-lī-ngā nêng mǎu gáu-ì.)
- 10. Iǎ-Sú a̿ing uā, Nì lâ̤ dă̤-dí Ciōng-Di̿ bā nă nêng gâ̤, ǐ dă̤-dí iáu nì uā, Sṳ̌, dé nă uòi iè, sī sū nêng, nì sáing ciū ŏ̤ giù3 gṳ̀, gṳ̀ iǎ sáing cǒng ŏ̤ nà huă sṳ̌ nă nì.
- 11. Á-niông-nêng uā, Cṳ̌, nì mǎu bí sṳ̌ gâ̤ gá-sí, iŏ̤ng cǎng ǐ chéng; nì giǎng ni-di̿ iǔ iŏ̤ng huă sṳ̌ nī?
- 12. Uôi-huōi-nêng gâ̤ cǔ-cóng Ngǎ-gǒ̤ nà iŏ̤ng cǎng gáu nă uòi, gṳ̀ cù-cī iáu gṳ̌ing, gìng tê-sáng dú sī iè iŏ̤ng cǎng-di̿ gâ̤ sṳ̌; nì gu̿ ŏ̤ piāng gṳ̀ ga̿ing duōi?
- 13. Iǎ-Sú a̿ing uā, Nêng iè iŏ̤ng sṳ̌ ǐ ŏ̤ chu̿-diǎu.
- 14. Lâ̤ iè uòi nă gṳ̀ gâ̤ sṳ̌ ě̤ng-ṳ̌ing dú mài chu̿-diǎu, éng-ṳē uòi nă gṳ̀ gâ̤ sṳ̌ ŏ̤ dáu gṳ̀ séng-dǐ ca̿ ngṳ̂ing-tê kǐ lâ̤, cì-dā̤ lâu chṳ̆ da̿u ě̤ng-ṳ̌ing gâ̤ sáng-miāng.
- 15. Á-niông-nêng uā, Cṳ̌, nà iŏ̤ng sṳ̌ nă uòi iè, sǎng-dǎ̤ uòi chṳ̿-diǎu, uòi iǎ ēng niōng giǎng iŏ̤ng cāi diō̤ lâ̤ bí sṳ̌.
- 16. Iǎ-Sú uā, Ko̤̿ hǎng nì gâ̤ sé̤ng-é̤ng câi lâ̤.
- 17.Ann a̿ing uā, Uòi mǎu sé̤ng-é̤ng. Iǎ-Sú uā, Nì uā, Uòi mǎu sé̤ng-é̤ng sī mài cho̤̿:
- 18. Éng-ṳē nì tê-chîng iǔ ngù-ciă sé̤ng-é̤ng làu, nì giâ-gíng iǔ gâ̤ ēng sī nì gâ̤ sé̤ng-é̤ng; nì iŏ̤ng-gă̤-sĭ uā sī céng gâ̤.
- 19. Á-niông-nêng uā, Cṳ̌, uòi chū nì sī síng-dí.
- 20. Uôi-huōi-nêng gâ̤ cǔ-cóng dú sī dai iŏ̤ng súing-di̿ ba̿i Ciōng-Di̿, nì gu̿ uā, e̿ng-gái ba̿i gâ̤ sù-cài ciū-sī Iǎ-lū-să-lǎing.
- 21 Iǎ-Sú iáu gṳ̀ uā, Á-niông-nêng, nì niōng se̿ng uòi, sî-hē tǎu da̿u, nì ba̿i Dá, iǎ ēng niōng gǐ-bĭ da̿u iŏ̤ng súing, iǎ ēng niōng ǐ-bĭ da̿u Iǎ-lū-să-lǎing.
- 22 Nì ba̿i gâ̤ dú ēng dádi sī sū-mū dī; uòi ba̿i gâ̤ uòi dú dă̤-dí; éng-ṳē giù nêng gâ̤ áing-hṳ̄ sī giǎng Iǔ-tuo̿i nêng-di̿ chṳ̆ lâ̤.
- 23 Sî-hē tǎu da̿u, giâ-gíng ciū-sī, céng-cia̿ng ba̿i Dá gâ̤ nêng, cǒng ŏ̤ nà sěng lâ̤ ba̿i, ŏ̤ ǐ-séng ba̿i: éng-ṳē Dá o̿ dǎ̤ iŏ̤ng-gă̤-sĭ gâ̤ nêng ba̿i gṳ̀.
- 24 Ciōng-Di̿ sī Séng: nêng ba̿i gṳ̀, cǒng niōng nà sěng lâ̤ ba̿i, niōng ĭ-séng ba̿i gṳ̀.
- 25 Á-niông-nêng ŭa, Ŭoi dádi Mǐ-so̿-ngā hāng ca̿ Gí-Dǔ ŏ̤ lâ̤: gṳ̀ cì lâ̤, ciū běng sū-mū dī dú ŏ̤ háu uôi-huōi-nêng dă̤-dí.
- 26 Iǎ-Sú uā, Giâ-gíng ǐau nì ŭa dī gâ̤, cìusi Mǐ-so̿-ngā.
- 27 Ka̿ing-ka̿ing iŏ̤ng sīhe hāsaing da̿u-tê lâ̤, chū-gi̿ng Iǎ-Sú iáu iŏ̤ng á-niông-nêng uā dī, ciū siǒng sī cèng gǐ-ī; lâ̤-sī mǎu nêng mōng gṳ̀ uā, Ō dǎ̤ sū dī?
- 28 Iŏ̤ng á-niông-nêng ciū nà sṳ̌-tǒng b̿ng hā ŭ-di̿, nì sêng ko̤̿, iáu duōi-gá-nêng uā,
- 29 Lâ̤ chū ciă nêng, gṳ̀ nà uòi ǎing-ba̿-sî ca̿-gua̿ gâ̤ dī cǒng-bǎ dú uā chṳ̆ lâ̤: iŏ̤ng nêng ŏ̤-sī Gí-Dǔ.
- 30 Duōi-gá-nêng ciū chṳ̆ sêng ko̤̿ Iǎ-Sú ŭ-di̿.
- 31 Ŭ á-niông-nêng ko̤̿-tiāu làu, hă-sáing giǔ uā, Síng-sáing, iè.
- 32 Iǎ-Sú uā, Uòi iǔ mî-dī iè, sii nì ēng dă̤-dí gâ̤.
- 33 Hă-sáing ciū nì mōng gṳ̀, gṳ̀ mōng nì, gō̤-uā, Iǔ sū-mū nêng dé mî-dī lâ̤ nă gṳ̀ iè mǎu?
- 34 Iǎ-Sú iáu gṳ̀ uā, Í-diū hǎng uòi lâ̤ gâ̤ Dá gâ̤ séng-i̿ ko̤̿ ca̿, ca̿ chéng-chǔ gṳ̀ gâ̤ góng-hú, iŏ̤ng ciū-sī uòi iè gâ̤ mî-dī.
- 35 Nì dú sī uā, Da̿u cāi-cǎu gâ̤ sî-hē gu̿ iǔ si̿-ciă ngṳè-nì, uòi iáu nì uā, Nà mì-ciú go̤̿ kǐ lâ̤ chū, châing-di̿ gâ̤ cǎu-ciě dă̤ lò̤, ŏ̤ cāi-dă̤.
- 36 Cāi-cǎu gâ̤ nêng iǔ góg-cîng, ko̤̿ng-diū ngù-gŭ da̿u ě̤ng-ṳ̌ing gâ̤ sáng-miāng; iŏ̤ng-gă̤-sĭ cá̤-ce̤̿ng iáu cāi-cǎu gâ̤ nêng ŏ̤ câi-câi ka̿u-uòi.
- 37 Ŭ sṳ̆-ngṳ̌ gō̤-uā, Ŭ nêng cá̤-ce̤̿ng, iŏ̤ng nêng cāi-cǎu, iŏ̤ng cì gṳ̿ dī sī céng gâ̤.
- 38. Nì ēng-nǎing cá̤-ce̤̿ng kǔ-chǔ-gua̿, uòi ciū hǎng nì ko̤̿ cāi-cǎu: biē-nêng ca̿ceng kǔ-chǔ-gua̿, nì giâ-gíng bā-bā-di̿ dă̤ gṳ̀ iŏ̤ng kǔ-chǔ-gua̿ gâ̤ góng-hú.
- 39 Ŭ séng-dǐ iǔ cèng cāi Să-mǎ-lī-ngā nêng se̿ng Iǎ-Sú, éng-ṳē ŭ á-niông-nêng ca̿ gúing-ce̿ng uā, Gṳ̀ nà uòi ǎing-ba̿-sî ca̿-gua̿ gâ̤ dī cǒng-bǎ dú uā chṳ̆ lâ̤.
- 40 Gu̿-chu̿ Să-mǎ-lī-ngā nêng da̿u Iǎ-Sú ŭ-di̿, cuo̿i-sáng chiǎng gṳ̀ hā gṳ̀ ŭ-di̿ gṳè-diū: Iǎ-Sú ciū da̿u ŭ sêng-di̿ gṳè-diū liòng góng.
- 41 Sêng-di̿ gâ̤ nêng tia̿ng-nī-gi̿ng Iǎ-Sú cù-cī uā gâ̤ dī, iǔ ga̿ing cāi nêng se̿ng gṳ̀;
- 42 Ciū iáu ŭ á-niông-nêng uā, Giâ-gíng uôi-huōi-nêng se̿ng, ēng sī éng-ṳē nì uā gâ̤ dī: sī uòi cù-cī chéng-nèng tia̿ng-nī-gi̿ng, dă̤-dí iŏ̤ng nêng ì-cài sī giù si̿-gáing nêng gâ̤ Cṳ̌.
- 43. Gṳè-diū liòng góng làu, Iǎ-Sú giǎng ŭ-di̿ kǐ-séng ko̤̿ Gá-lī-lī.
- 44 Éng-ṳē Iǎ-Sú cù-cī uā-gua̿, Síng-dì dáu cù-cī gâ̤ dī-huó̤ng mài nă nêng ge̿ng-dōng.
- 45 Dáu Gá-lī-lī làu, Gá-lī-lī nêng ciū ciĕ-duòi gṳ̀, éng-ṳē gṳ̀-huōi-nêng chîng-mâng ko̤̿ gua̿-căi gâ̤ sīhe, chū-gi̿ng ǐasu dáu Iǎ-lū-să-lǎing ca̿-gua̿ gâ̤ dī.
- 46 Iǎ-Sú ǐ da̿u Gá-lī-lī gâ̤ Gá-nà, ciū-sī gṳ̀ tê-chîng nà sṳ̌ bi̿ng ca̿ ciǔ gâ̤ sù-cài. Iǔ ciă duōi gúing, gṳ̀ gâ̤ gṳ̌ing bāng da̿u Gá-bă-nǒng.
- 47 Tia̿ng-nī-gi̿ng ǐasu giǎng Iǔ-tuo̿i da̿u Gá-lī-lī, ciū ko̤̿giǔ gṳ̀ à lâ̤, í gṳ̀ gṳ̌ing gâ̤ bāng, éng-ṳē gṳ̀ gṳ̌ing tǎu sǐ.
- 48 Iǎ-Sú iáu gṳ̀ uā, Lâ̤ ēng-nǎing chū-gi̿ng sěng-tóng iáu hí-gǐ gâ̤ dī, nì cǒng ēng kǎing se̿ng.
- 49 Ŭ gúing iáu Iǎ-Sú uā, Cṳ̌ à, uòi gṳ̌ing gu̿ ēng-nǎing sǐ, giǔ nì ǐau ŭoi câi â ko̤.
- 50 Iǎ-Sú uā, Nì mǒng chio̤̿ ko̤, nì gâ̤ gṳ̌ing sáng-lò̤. Ŭ nêng se̿ng Iǎ-Sú uā gâ̤ dī, ciū ko̤̿-tiāu.
- 51 Ka̿ing-ka̿ing à ko̤̿ga sî-hē, pōng-diō̤ gṳ̀ gâ̤ nû-gě lâ̤, iáu gṳ̀ uā, Nì gaa gṳ̌ing sáng-lò̤.
- 52 Ciū mōng nû-gě, gṳ̌ing gâ̤ bāng sū-mū sî-hē hǎu mī-cie̿? Nû-gě uā, Ciā-mâng bu̿ing-de̿-làu chiáu ciū to̿-tiāu.
- 53 Gṳ̀ dá ciū dă̤-dí iŏ̤ng sî-hē ciū-sī Iǎ-Sú iáu gṳ̀ uā, Nì gṳ̌ing sáng lò̤ gâ̤ sî-hē : gu̿-chu̿ cù-cī iáu cì chio̤̿ gâ̤ nêng dú se̿ng Iǎ-Sú.
- 54 Iǎ-Sú guáng Iǔ-tuo̿i da̿u Gá-lī-lī hǐng sěng-tóng gâ̤ dī, iŏ̤ng sī di̿ nī lê̤ng.
← · Di̿ 3 Cióng · Di̿ 5 Cióng →
«Se̿ng-géng» gâ̤ mù-lṳ̀
