Jump to content
Se̿ng-géng/Iŏ̤-hu̿ing Hŭ-éng/3
- 1 Iǔ ciă Huă-lī-so̿ nêng, miâng hǎng Nǐ-gó̤-dǐ-mǔ sī ca̿ Iǔ-tuo̿i nêng gâ̤ gúing.
- 2 Iŏ̤ng nêng o̤̿ng-mâng lâ̤ gi̿ng Iǎ-Sú, uā, Síng-Sáing, uòi-huo̿i-nêng dă̤-dí nì sī giǎng Ciōng-Di̿ ŭ-di̿ lâ̤ ca̿ síng-sáing gâ̤: éng-ṳē nì hǐng gâ̤ sěng-tóng, lâ̤-ēng-sī Ciōng-Di̿ iáu nêng câi cì-dó, iŏ̤ng sěng-tóng mǎu ciă nêng ŏ̤ hǐng.
- 3 Iǎ-Sú a̿ing uā, Uòi ì-cài iáu nì uā, Nêng lâ̤ ēng-nǎing cuo̿i sǎi chṳ̆-si̿, ciū mài gi̿ng-dă̤ Ciōng-Di̿ gâ̤ gŏ.
- 4 Nǐ-gó̤-dǐ-mǔ uā, Nêng sē-tiāu làu, nī-di̿ ŏ̤ cuo̿i sǎi chṳ̆-si̿ nī? gu̿ ŏ̤ cuōi nì nǎi gâ̤ bŭ-di̿ sǎi chṳ̆ lâ̤?
- 5 Iǎ-Sú a̿ing uā, Uòi ì-cài iáu nì uā, Nêng lâ̤-ēng-sī giǎng sṳ̌ iáu Se̿ng-Sěng sǎi gâ̤, ciū mǎu-nǎing-ge̿ nì Ciōng-Di̿ gâ̤ gǒ.
- 6 Giǎng nṳ̀-séng sǎi gâ̤ ciū-sī nṳ̀-séng; giǎng Se̿ng-Sěng sǎi gâ̤ ciū-sī sěng.
- 7 Uòi uā, Nì cǒng niōng cuo̿i sǎi chṳ̌-si̿, nì ēng niōng siǒng iŏ̤ng sī gǐ-ī gâ̤ dī.
- 8 Hóng běng-cie̿ cù-cī gâ̤ i̿-su̿ chṳé lâ̤ chṳé ko̤̿, nì tia̿ng-nī hóng siáng-éng, dú ēng dă̤-dí sī giǎng nī-di̿ lâ̤, ko̤̿ nī-di̿ ko̤̿: giǎng Se̿ng-sěng sǎi gâ̤ nêng dú sī iŏ̤ng-gǎ̤-sǐ.
- 9 Nǐ-gó̤-dǐ-mǔ a̿ing uā, Nī-di̿ iǔ iŏ̤ng gâ̤ dī nī?
- 10 Iǎ-Sú a̿ing uā, Nì ca̿ Ì-să̤-liĕ nêng gâ̤ síng-sáing, gṳ̀ ēng měng-bà̤ iǒ̤ng dī?
- 11 Uòi ì-cài iáu nì uā, Uòi uā gâ̤ sī uòi dǎ̤-dí gâ̤, uòi ca̿ gâ̤ gúing-ce̿ng sī uòi chū-gi̿ng-guā gâ̤; nì-huo̿i-nêng ǐ ēng se̿ng uòi ca̿ gâ̤ gúing-ce̿ng.
- 12 Uòi iáu nì uā-guā si̿-gáing gâ̤ dī, nì gu̿ sī ēng se̿ng, lâ̤ iáu nì uā tíng ciōng gâ̤ dī, nì nì1-dī ŏ̤ se̿ng nī?
- 13 Lâ̤-ēng-sī ǔ ciǎ giǎng tíng-di̿ à lâ̤, cuo̿i mǎu biē-nêng iòng-diō̤ tíng, giǎng tíng-di̿ à lâ̤ gâ̤, ciū-sī nêng gâ̤ Gṳ̌ing, géng-giâ gu̿ da̿u tíng-di̿.
- 14 Cě̤ng-chîng Mǒ̤-sái da̿u ko̿ng-iǎ nà ṳê gua̿ kǐ lâ̤, nêng gâ̤ Gṳ̌ing gōng niōng iŏ̤ng-gǎ̤-sǐ nǎ nêng gua̿ kǐ lâ̤ :
- 15 O̿ mǎu-lō̤ng sū nêng se̿ng, ciū da̿u nêng gâ̤ Gṳ̌ing dǐ-bíng ŏ̤ dă̤-diō̤ ě̤ng-ṳ̌ing gâ̤ sáing-miāng.
- 16 Éng-ṳē Ciōng-Di̿ cèng o̿ si̿-gáing gâ̤ nêng, nà gṳ̀ cǒng-lâ̤ sǎi gâ̤ cì-ciă Gṳ̌ing lâ̤ si̿-gáing, o̿ mǎu-lō̤ng sū-nêng se̿ng gṳ̀, ciū mài miè-tiāu, cǒng ŏ̤ dă̤-diō̤ ě̤ng-ṳ̌ing gâ̤ sáng-miāng.
- 17 Ciōng-Di̿ hǎng gṳ̀ gâ̤ Gṳ̌ing lâ̤ si̿-gáing, ēng sī niōng gṳ̀ diāng si̿-gáing nêng gâ̤ cò; sī o̿ si̿-gáing nêng ka̿u-diū gṳ̀ ŏ̤ dá giù.
- 18 Se̿ng gṳ̀ gâ̤ nêng Ciōng-Di̿ ciū ēng diāng gṳ̀ gâ̤ cò: ēng se̿ng gṳ̀ gâ̤ nêng gṳ̀ gâ̤ cò ciū diāng làu, éng-ṳē ēng se̿ng Ciōng-Di̿ cǒng-lâ̤ sǎi gâ̤ cì-ciă Gṳ̌ing gâ̤ miâng.
- 19 Guáng da̿u si̿-gáing làu, si̿-gáing gâ̤ nêng éng-ṳē ca̿ gâ̤ dī cènng làing ēng o̿ guángm ga̿ing o̿ ú-o̤̿ng; diāng gṳ̀ gâ̤ cò ciū-sī éng-ṳē iŏ̤ng gâ̤ dī.
- 20 Mǎu-lō̤ng sū-nêng ca̿-ŏ̤ dú hāing iŏ̤ng guáng, ēng hā iŏ̤ng guáng-di̿ lâ̤, giáng-pa̿ uā gṳ̀ gâ̤ dī ēng hǎu.
- 21 Cǒng-lâ̤ í-diū céng dàu-lǐ ko̤̿ ca̿ gâ̤, iŏ̤ng nêng ciū hā iŏ̤ng guáng-di̿ lâ̤, o̿ biǎu-měng gṳ̀ ca̿ gâ̤ dī dú sī ka̿u-diū Ciōng-Di̿ ca̿ gâ̤.
- 22 Iŏ̤ng dī làu Iǎ-Sú iáu hă-sáing ciū lâ̤ Iǔ-tuo̿i dī-huó̤ng, câi-câi gṳè-diū da̿u ŭ-di̿, ta̿i nêng sí sǎi-lǐ.
- 23 Iŏ̤-hu̿ing da̿u Uói-nō̤ng, ciū-sī gṳ̄ing Să-lǎing gâ̤ dī-huó̤ng, iǎ ta̿i nêng sí sǎi-lǐ, éng-ṳē ŭ-di̿ gâ̤ sṳ̌ cèng cāi; nêng ciū lâ̤ siū sǎi-lǐ.
- 24 Iŏ̤ng-cì-sî Iŏ̤-hu̿ing gu̿ ēng-nǎing sū da̿u lâu-di̿.
- 25 Iŏ̤-hu̿ing gâ̤ hă-sáing iáu Iǔ-tuo̿i nêng bûing-bŏ̤ ŭ lōng lâi-lī gâ̤ lī-gṳ́.
- 26 Ciū hā Iŏ̤-hu̿ing-di̿ lâ̤, uā, Síng-Sáing chîng-mâng iáu nì câi-câi da̿u Iŏ̤-dàng ŭ-bíng kái-di̿, ciū-sī nì ta̿i gṳ̀ ca̿ gúing-ce̿ng gâ̤, ŭ ciă nêng giâ-gíng iǎ ta̿i nêng sí sǎi-lǐ, duōi-gá-nêng dú ko̤̿ gṳ̀ ŭ-di̿.
- 27 Iŏ̤-hu̿ing a̿ing uā, Lâ̤-ēng-sī giǎng tíng ciō̤ng nă nêng lâ̤u, nêng dú mǎu mî-dī dă̤.
- 28 Nì cù-cī ŏ̤ ta̿i uòi ca̿ gúing-ce̿ng uòi chîng-mâng uā-gua̿, Uòi ēng sī Gí-Dǔ, lâ̤-sī da̿u gṳ̀ tê-chîng sáing hǎng lâ̤ gâ̤.
- 29. Tǎu séng-niông gâ̤, ciū-sī séng-lô̤ng, séng-lô̤ng gâ̤ bǎing-iǔ, gṳè-diū tia̿ng-nī, tia̿ng-nī-gi̿ng séng-lô̤ng gâ̤ siáng-éng ciū cèng ka̿u-uòi: giâ-gíng uòi sí-cṳ̆ iǔ iŏ̤ng-gǎ̤-sǐ gâ̤ ka̿u-uòi.
- 30 Gṳ̀ cǒng niōng héng-uō̤ng kǐ lâ̤, uòi cǒng niōng lò̤-bāi à lâ̤.
- 31 Giǎng tíng ciōng à lâ̤ gâ̤ nêng sī děng duōi gâ̤: giǎng si̿-gáing-di̿ lâ̤ gâ̤ nêng sī hū si̿-gáing gṳ̌ing, uā gâ̤ dī iǎ sī si̿-gáing gâ̤ dī; giǎng tíng-di̿ lâ̤ gâ̤ nêng sī děng duōi gâ̤.
- 32 Gṳ̀ ca̿ gâ̤ gúing-ce̿ng dú sī gṳ̀ tê-chîng chū-gi̿ng-gua̿, tia̿ng-nī-gi̿ng-gua̿ gâ̤ dī, ǐ mǎu nêng se̿ng gṳ̀ ca̿ gâ̤ gúing-ce̿ng.
- 33 Se̿ng gṳ̀ ca̿ gâ̤ gúing-ce̿ng ì-cài dă̤-dí Ciōng-Di̿ sī céng gâ̤, iŏ̤ng nêng su̿-siōng mà cì kuá e̿ng ca̿ běng-gṳ̀.
- 34 Ciōng-Di̿ hǎng lâ̤ gâ̤ nêng uā Ciōng-Di̿ gâ̤ dī; éng-ṳē Ciōng-Di̿ nà Se̿ng-sěng nă gṳ̀ cèng cāi, mài uā-dă̤ cèng.
- 35 Dá o̿ Gṳ̌ing, běng sū-mū dī dú gáu nă gṳ̀ siǔ-di̿.
- 36 Se̿ng Gṳ̌ing gâ̤ nêng iǔ ě̤ng-ṳ̌ing gâ̤ sáng-miāng, ēng í Gṳ̌ing gâ̤ nêng mài gi̿ng-diō̤ sáng-miāng; Ciōng-Di̿ gâ̤ nū-ki̿ sî-sî kǎ̤-kǎ̤ da̿u gṳ̀ séng ciōng.
← · Di̿ 2 Cióng · Di̿ 4 Cióng →
«Se̿ng-géng» gâ̤ mù-lṳ̀
