Se̿ng-géng/Iŏ̤-hu̿ing Hŭ-éng/11
Di̿ 11 Cióng
[edit]- 1 Iǔ ciă nêng bāng kǐ lâ̤, miâng hǎng Là-să-lū, diū da̿u Bă-duōi-nǐ, ciū-sī Mǎ-lī-ngā, Mǎ-duōi, liòng ci̿-mṳē diū gâ̤ hióng-lǐ.
- 2 Iŏ̤ng Mǎ-lī-ngā ciū-sī tê-chîng nà hióng iû muŏi Cṳ̌, ǐ nà tê-mâu siĕ gṳ̀ gâ̤ káu, ŭ ciă á-niông-nêng. Iǔ bāng gâ̤ Là-să-lū ciū-sī gṳ̀ gâ̤ hiáng-dī.
- 3 Mǎ-duōi, Mǎ-lī-ngā, liòng ci̿-mṳē hǎng nêng ko̤̿ gi̿ng Iǎ-Sú, uā, Cṳ̌ à, nì o̿ gâ̤ nêng bāng kǐ lâ̤.
- 4 Iǎ-Sú tia̿ng-nī-gi̿ng, ciū uā, Gṳ̀ iŏ̤ng bāng ēng sī éng-ṳē niōng gṳ̀ sǐ, sī éng-ṳē niōng Ciōng-Di̿ gâ̤ ě̤ng-iāu hīng chṳ̆ lâ̤, gu̿ niōng Ciōng-Di̿ gâ̤ Gṳ̌ing éng-ṳē iŏ̤ng bāng ŏ̤ dă̤-dí ě̤ng-iāu.
- 5 Mǎ-duōi liòng ci̿-mṳē, iáu Là-să-lū, dú sī Iǎ-Sú cèng o̿ gâ̤.
- 6 Iǎ-Sú tia̿ng-nī-gi̿ng Là-să-lū bāng kǐ lâ̤, da̿u gṳ̀ ŭ cì sî gṳè-diū gâ̤ sù-cài gu̿ gṳè-diū liòng góng.
- 7 Hē-mṳě hă-sáing uā, Nì cuo̿i iáu uòi câi ko̤̿ Iǔ-tuo̿i.
- 8 Hă-sáing uā, Síng-Sáing, Iǔ-tuo̿i nêng ka̿ing chîng-mâng nà ciō̤ o̿ ià nì, nì gu̿ cuo̿i ko̤̿ ŭ-di̿ ko̤̿?
- 9 Iǎ-Sú a̿ing uā, Nì-sî iǔ lṳ̀-ciă sî-sěng, ēng sī? Nêng da̿u nì-sî giǎng diō̤, ciū mài gé-káu-ǐ, éng-ṳē chū-dă̤-gi̿ng iŏ̤ng si̿-gáing gâ̤ guáng.
- 10 Nêng lâ̤ o̤̿ng-mâng giǎng diō̤, ciū ŏ̤ gé-káu-ǐ, éng-ṳē guáng ēng-nǎing da̿u gṳ̀ séng-dǐ.
- 11 Iǎ-Sú uā làu iŏ̤ng dī: ǐ iáu hă-sáing uā, Uôi-huōi-nêng gâ̤ bǎing-iǔ Là-să-lū mì-chĭ-diō̤; giâ-gíng uòi ko̤̿ hǎng gṳ̀ chíng-chǎng.
- 12 Hă-sáing uā, Cṳ̌ à, gṳ̀ lâ̤ mì-chĭ-diō̤, bāng ciū ŏ̤ hǎu-tiāu.
- 13 Iǎ-Sú iŏ̤ng dī sī uā gṳ̀ sǐ-tiāu: hă-sáing da̿u siǒng Iǎ-Sú sī uā gṳ̀ ciáng-ciáng-di̿ mì-chĭ.
- 14 Gu̿-chu̿ Iǎ-Sú měng-da̿-měng iáu gṳ̀ uā, Là-să-lū sǐ-tiāu làu.
- 15 Uòi sáing ēng-nǎing da̿u gṳ̀ ŭ-di̿ ŭoi ta̿i nì ka̿u-uòi, sṳ̌ o̿ nì ŏ̤ se̿ng; giâ-gíng nì iáu câi ko̤̿ gṳ̀ ŭ-di̿.
- 16 Dó̤-mǎ ǐ hǎng ca̿ Dǐ-tǔ-mǎ iáu gōng bó̤ng gâ̤ hă-sáing uā, Uôi-huōi-nêng mǒng câi ko̤̿ iáu Cṳ̌ bia̿ng-bia̿ng sǐ.
- 17 Iǎ-Sú da̿u ŭ-di̿ làu, tia̿ng-nī-gi̿ng Là-să-lū co̤̿ng da̿u dě̤ng-di̿ iǔ si̿ góng làu.
- 18 Bă-duōi-nǐ gṳ̄ing Iǎ-lū-să-lǎing, chá-bŭ-dó̤ lṳ̀ lǐ diō̤.
- 19 Iǔ cèng cāi Iǔ-tuo̿i nêng da̿u Mǎ-duōi, Mǎ-lī-ngā chio̤̿-di̿, éng-ṳē gṳ̀ hiáng-dī sǐ-tiāu, gṳ̀ ciū lâ̤ kúing gṳ̀ gâ̤ séng.
- 20 Mǎ-duōi tia̿ng-nī-gi̿ng Iǎ-Sú dō̤-di̿ lâ̤, ciū ko̤̿ciĕ gṳ̀; Mǎ-lī-ngā gu̿ cō da̿u chio̤̿-di̿.
- 21 Mǎ-duōi iáu Iǎ-Sú uā, Nì chîng-mâng lâ̤-sī da̿u iŏ̤ng-di̿, uòi hiáng-dī ciū mài sǐ.
- 22 Mǒng sī iŏ̤ng-gă̤-sĭ, uòi dă̤-dí nì mǎu-lō̤ng iáu Ciōng-Di̿ giǔ sū-mū dī, gṳ̀ dú ŏ̤ nă nì.
- 23 Iǎ-Sú iáu gṳ̀ uā, Nì gâ̤ hiáng-dī cǒng ŏ̤ hŭ-sáng kǐ lâ̤.
- 24 Mǎ-duōi uā, uòi dă̤-dí da̿u sṳē-mṳě gâ̤ nì-ciě, sǐ-tiāu gâ̤ nêng hŭ-sáng kǐ lâ̤ gâ̤ sî-hē, gṳ̀ iǎ ŏ̤ hŭ-sáng kǐ lâ̤.
- 25 Iǎ-Sú iáu gṳ̀ uā, Hŭ-sáng ciū-sī uòi, sáng-miāng iǎ sī uòi: Se̿ng uòi gâ̤ nêng, ciū-sī sǐ-tiāu làu, iǎ ŏ̤ hŭ-sáng kǐ lâ̤.
- 26 Mǎu-lō̤ng sū-mū nêng sáng dō̤-di̿ se̿ng uòi, ě̤ng-ṳ̌ing dú mài sǐ. IOng dī nì se̿ng, ēng se̿ng?
- 27 Mǎ-duōi uā, Cṳ̌ à, cia̿ng-sī. Uòi se̿ng nì sī Ciōng-Di̿ gâ̤ Gṳ̌ing Gí-Dŭ, ciū-sī ŭ ciă ŏ̤ lâ̤ si̿-gáing gâ̤.
- 28 Mǎ-duōi uā làu iŏ̤ng dī, ciū chio̤̿ ko̤̿, càng-càng-di̿ hǎng gṳ̀ gâ̤ mṳē-ciě Mǎ-lī-ngā uā, Síng-Sáing lâ̤ lò̤, hǎng nì.
- 29 Mǎ-lī-ngā tia̿ng-nī-gi̿ng iŏ̤ng dī, ciū kṳe̿-kṳe̿-di̿ kǐ lâ̤ ko̤̿ gi̿ng Iǎ-Sú.
- 30 Iŏ̤ng sî-hē ǐs gṳ̀u ēng-nǎing nì hióng-lǐ, gṳ̀u dáu Mǎ-duōi cìĕ gṳ̀ gâ̤ sù-cài.
- 31 Iáu Mǎ-lī-ngā câi-câi da̿u chio̤̿-di̿ kúing gṳ̀ gâ̤ séng gâ̤ Iǔ-tuo̿i nêng, chū-gi̿ng Mǎ-lī-ngā kṳe̿-kṳe̿-di̿ kǐ-séng chṳ̆ ko̤̿, ciū gáing-diū gṳ̀ ko̤, uā gṳ̀ sī ko̤̿ dě̤ng-di̿ tî.
- 32 Mǎ-lī-ngā da̿u Iǎ-Sú ŭ-di̿ chū-gi̿ng gṳ̀, ciū pŭ hā gṳ̀ káu-bíng, uā, Cṳ̌ à, nì chîng-mâng lâ̤-sī da̿u iŏ̤ng-di̿, uòi hiáng-dī ciū mài sǐ.
- 33 Iǎ-Sú chū-gi̿ng Mǎ-lī-ngā tî, ǐ chū-gi̿ng câi lâ̤ gâ̤ Iǔ-tuo̿i nêng dú tî, ciū ki̿ dă̤-hǎing, cèng sióng-séng,
- 34 Uā, No co̤̿ng gṳ̀ dai nī-di̿? Duōi-gá-nêng uā, Cṳ̌, lâ̤ chū.
- 35 Iǎ-Sú tî kǐ lâ̤.
- 36 Iǔ-tuo̿i nêng uā, Nì chū gṳ̀ cèng o̿ iŏ̤ng ciă nêng.
- 37 Iǎ iǔ nêng uā, Gṳ̀ chîng-mâng nà hǎi-ciě gâ̤ mì-ciú í guáng kǐ lâ̤, gṳ̀ cǒng iǔ nǎing-ge̿ giù iŏ̤ng nêng iǎ mài sǐ.
- 38 Iǎ-Sú ǐ ki̿ dă̤-hǎing da̿u dě̤ng-di. Iŏ̤ng dě̤ng sī cì-ciă dōng, dōng-kě iǔ ciō̤ cà̤-diū.
- 39 Iǎ-Sú uā, Cṳ̌, giâ-gíng gṳ̀ dú che̿-tiāu : éng-ṳē gṳ̀ sǐ-tiāu iǔ si̿ góng làu.
- 40 Iǎ-Sú uā, Uòi iáu nì uā-gua̿, nì lâ̤ se̿ng, ciū ŏ̤ chū-gi̿ng Ciōng-Di̿ gâ̤ ě̤ng-iāu.
- 41 Duōi-gá-nêng ciū nà ciō̤ búing-kṳé, Iǎ-Sú mì-ciú go̤̿ kǐ lâ̤ chū tíng, uā, Dá, nì tia̿ng-nī-gi̿ng uòi làu, uòi do̿-ciā nì.
- 42 Uòi iǎ dă̤-dí nì sî-sî kă̤-kă̤ dú tia̿ng-nī uòi ; lâ̤-sī uòi uā iŏ̤ng dī sī o̿ iŏ̤ng gǒ̤ng-lǒ̤ng-kṳ́ing gṳè-diū gâ̤ cèng cāi nêng dú ŏ̤ se̿ng uòi sī nì hǎng lâ̤ gâ̤.
- 43 Iǎ-Sú uā làu iŏ̤ng dī, ciū duōi siáng hǎng kǐ lâ̤, uā, Là-să-lū chṳ̆ lâ̤.
- 44 Ŭ ciă sǐ-nêng ciū chṳ̆ lâ̤, káu siǔ iǔ bio̤̿ gǎi-diū ; mīng-gǎi iǔ pa̿-ciě báu-diū. Iǎ-Sú uā, Tiă-kṳé, nă gṳ̀ ko̤̿.
- 45 Gaíng Mǎ-lī-ngā lâ̤ gâ̤ Iǔ-tuo̿i nêng chū-gi̿ng Iǎ-Sú ca̿ gâ̤ dī, ciū iǔ cèng cāi nêng se̿ng gṳ̀.
- 46 Dǐ-bíng iǎ iǔ nêng nà Iǎ-Sú ca̿ gâ̤ dī ko̤̿ iáu Huǎ-lī-so̿ nêng ŭa.
- 47 Gu̿-chu̿ duōi ci̿-sí iáu Huǎ-lī-so̿ nêng cṳ̀ cì-dó sióng-liông uā, IOng nêng hǐng cèng cāi sěng-tóng gâ̤ dī, uôi-huōi-nêng niōng gōng-ciōng lōng nī?
- 48 Lâ̤ běng gṳ̀ iŏ̤ng-gă̤-sĭ ca̿, duōi-gá-nêng dú ŏ̤ se̿ng gṳ̀; Lô̤-mǎ gŏ gâ̤ nêng iǎ ŏ̤ lâ̤ chiǒng uòi gâ̤ dī-huó̤ng, iáu uòi gâ̤ bă-sia̿ng.
- 49 Dǐ-bíng iǔ ciă nêng miâng hǎng Gái-ngā-huă, iŏ̤ng cì nîng ca̿ děng duōi ci̿-sí, gṳ̀ ciū iáu duōi-gá-nêng ŭa, Nì-huōi-nêng dú ēng hiǎu-dǎ̤,
- 50 Iǎ ēng siǒng cì-ciă nêng ta̿i bă-sia̿ng sǐ, sǎng-dă̤ tóng gŏ miè-tiāu, iŏ̤ng sī iǔ ǐ uòi.
- 51 Gái-ngā-huă uā iŏ̤ng dī, ēng sī cù-cī cṳ̌-i̿ uā gâ̤: sī éng-ṳē gṳ̀ iŏ̤ng cì nîng ca̿ děng duōi ci̿-sí, ciū sáing uā Iǎ-Sú ŏ̤ ta̿i bă-sia̿ng sǐ.
- 52 Iǎ-Sú ēng-ò̤-cǐ ta̿i iŏ̤ng cì gŏ gâ̤ bă-sia̿ng, ciū-sī Ciōng-Di̿ gâ̤ bă-sia̿ng su̿ing-kṳé da̿u tóng-tíng-à, Iǎ-Sú iǎ niōng nà gṳ̀ iáu cì-dó lâ̤.
- 53 Giǎng iŏ̤ng cì góng kǐ, duōi ci̿-sí iáu Huǎ-lī-so̿ nêng ciū sióng-liông huōi-sǐ Iǎ-Sú.
- 54 Gu̿-chu̿ Iǎ-Sú ēng cuo̿i dó̤ng-nêng-si̿-ce̤̿ng da̿u Iǔ-tuo̿i nêng gâ̤ sù-cài, da̿u cì-ciă sêng miâng hǎng Ì-huă-lâing; ciū iáu hă-sáing câi hā ŭ-di̿ gṳè-diū.
- 55 Iǔ-tuo̿i nêng gua̿-mô̤ng-tê gâ̤ căi-ki̿ tǎu da̿u. Căi-ki̿ gu̿ ēng-nǎing da̿u, cèng cāi nêng giǎng hióng-à sáing iòng Iǎ-lū-să-lǎing ko̤̿, o̿ lâi-lī cù-cī gâ̤ séng-tǐ.
- 56 Iŏ̤ng duói nêng ciū lāu Iǎ-Sú, gṳè hā dāing-di̿ gâ̤ sî-hē, nì mōng gṳ̀, gṳ̀ mōng nì, gō̤ uā, Nì gōng-ciōng uā? Gṳ̀ ŏ̤-sī ēng lâ̤ gua̿-căi.
- 57 Duōi ci̿-sí iáu Huǎ-lī-so̿ nêng tê-chîng gáu-dō duōi-gá-nêng, uā, lâ̤ iǔ nêng dă̤-dí Iǎ-Sú da̿u nī-di̿, niōng lâ̤ ba̿u-se̿ng, ciū hǎu ko̤̿ nà gṳ̀.
← · Di̿ 10 Cióng · Di̿ 12 Cióng →