Se̿ng-géng/Iŏ̤-hu̿ing Hŭ-éng/1
Di̿ 1 Cióng
[edit]- 1 Dĭ buo̿i-chǒ iǔ Dàu, Dàu iáu Ciōng-Di̿ câi cì-dó, Dàu ciū-sī Ciōng-Di̿ ĭ-búing.
- 2 Iŏ̤ng Dàu dĭ buo̿i-chǒ iáu Ciōng-Di̿ câi cì-dó.
- 3 Běng sū-mū dī buo̿i-chǒ dú sī ka̿u-diū iŏ̤ng Dàu ca̿ gâ̤, ca̿ làu gâ̤ dī, dú mǎu cì-iōng ēng sī ka̿u-diū iŏ̤ng Dàu ca̿ gâ̤.
- 4 Dàu dǐ-bíng iǔ sáng-miāng; iŏ̤ng sáng-miāng ciū-sī ca̿ nêng gâ̤ guáng.
- 5 Iŏ̤ng guáng géng-giâ cia̿u da̿u ú-o̤̿ng dǐ-bíng; ú-o̤̿ng ǐ ēng-nǎing dă̤-diō̤ iŏ̤ng guáng.
- 6 Iǔ ciă nêng sī Ciōng-Di̿ hǎng lâ̤ gâ̤, miâng hǎng Iŏ̤-hu̿ing.
- 7 Iŏ̤ng nêng lâ̤ ca̿ gúing-ce̿ng, ciū-sī ta̿i iŏ̤ng guáng ca̿ gúing-ce̿ng, o̿ si̿-gáing nêng éng-ṳē gṳ̀ dú ŏ̤ se̿ng.
- 8 Iǒ̤-hu̿ing ēng sī iŏ̤ng guáng, sī lâ̤ ta̿i iŏ̤ng guáng ca̿ gúing-ce̿ng.
- 9 Iŏ̤ng céng gâ̤ guáng lâ̤ si̿-gáing cia̿u tóng-tíng-à gâ̤ nêng.
- 10 Iŏ̤ng guáng da̿u si̿-gáing, si̿-gáing buo̿i-chǒ sī ka̿u-diū gṳ̀ ca̿ gâ̤, si̿-gáing gâ̤ nêng ǐ ēng dă̤-dí gṳ̀.
- 11 Gṳ̀ lâ̤ cù-cī gâ̤ dī-huó̤ng, cù-cī gâ̤ nêng ǐ ēng kǎing ciĕ-duòi gṳ̀.
- 12 Kǎing ciĕ-duòi gṳ̀ gâ̤, ciū-si se̿ng gṳ̀ miâng gâ̤
- 13 Iǒ̤ng-gǎ̤-sǐ gâ̤ nêng, ēng sī giăng huăi-ki̿ săi gâ̤, iǎ ēng sī giăng nṳ̀-séng gâ̤ i̿-su̿ săi gâ̤, ĭ ēng sī giăng nêng gâ̤ i̿-su̿ săi gâ̤, sī giăng Ciōng-Di̿ ǔ-di̿ săi gâ̤.
- 14 Iǒ̤ng Dàu chĕng ca̿ nêng kǐ lâ̤, iáu uòi si̿-gáing nêng câi gṳè-diū, iǔ sí-cṳ̆ gâ̤ áing-hṳ̄ iáu céng gâ̤ dàu-lǐ (uôi-huōi-nêng iǎ chū-gi̿ng-gua̿ gṳ̀ gâ̤ ĕ̤ng-iāu, ciū-sī giăng Dá ǔ-di̿ cŏng-lâ̤ săi gâ̤ ciă Gṳ̌ing gâ̤ ě̤ng-iāu).
- 15 Iǒ̤-hu̿ing ta̿i gṳ̀ ca̿ gúing-ce̿ng, duōi siáng uā, Iǒ̤ng nêng ci̿-sí uòi chîng-mâng uā-gua̿, Ŭ ciă piāng uòi hē lâ̤ gâ̤, giâ-gíng bĭ uòi ga̿ing duōi kǐ lâ̤; éng-ṳē gṳ̀ bŏ̤ng-lăi piāng uòi sáing.
- 16 Uôi-huōi-nêng giăng gṳ̀ iǒ̤ng sí-chṳ̆ gâ̤ áing-hṳ̄ dú dǎ̤-diō̤ làul iŭ áing-hṳ̄, ĭ dă̤ áing-hṳ̄.
- 17 Lṳ̄-huǎ sī kāu-diū Mǒ̤-sái dṳ̆ing à lâ̤; áing-hṳ̄ iáu céng gâ̤ dàu-lǐ, sī ka̿u-diū Iǎ-Sú Gí-Dǔ lâ̤ gâ̤.
- 18 Cù-cĕ̤ng mău nêng chū-gi̿ng-diiō̤ CIongdi; ŭ ciă da̿u Dá séng-bíng gâ̤, ciū-sī Dá cŏng-lâ̤ săi gâ̤ cì-ciă Gṳ̌ing, gṳ̀ háu nêng dǎ̤-dí Ciōng-Di̿.
- 19 Iǒ̤-hu̿ing ca̿ gâ̤ gúing-ce̿ng sī iǒ̤ng-gǎ̤-sǐ. Ŭ-cì-sî Iǔ-tuo̿i nêng giăng Iǎ-lū-sǎ-lǎing hǎng ci̿-sí iáu Lī-mī nêng ko̤̿ Iǒ̤-hu̿ing ǔ-di̿, mōng gṳ̀ uā, Nì sī sū nêng?
- 20 Iǒ̤-hu̿ing ciū nēng-dio̿ng, dú ēng muing, mĕng-da̿-mĕng uā, Uòi ēng sī Gí-Dǔ.
- 21 Ǐ mōng gṳ̀ uā, Iǒ̤ng-gǎ̤-sǐ nì sī sū-nêng? Sī Ì-lī-ngǎ , ēng sī? Gṳ̀ uā, Ēng sī. Ǐ mōng, Nì sī ŭ ciă sīng-dí, ēng sī? Gṳ̀ uā, Ēng sī.
- 22. Cuōi mōng gṳ̀ uā, Nì da̿u-dǎi sī sū-nêng, nì mōng uā, nă uòi hǎu hô-se̿ng hǎng uòi lâ̤ gâ̤ nêng. Nì ǔa nì cù-cī sī sū nêng?
- 23. Iǒ̤-hu̿ing uā, Uòi ciū-sī nêng gâ̤ siáng-éng da̿u ko̿ng-iǎ hǎng kǐ lâ̤ uā, Chi-daa Cṳ̌ gâ̤ diō̤, su̿-siōng síng-dí Ì-so̿-ngā uā-gua̿ gâ̤ dī ǐ-búing.
- 24. Ǔ duói nêng sī Huǎ-lī-so̿ nêng hǎng lâ̤ gâ̤.
- 25 Gṳ̀ ǐ mōng Iǒ̤-hu̿ing uā, Nì ǐ ēng sī sī Gí-Dǔ, iǎ ēng sī Ì-lī-ngǎ, is ēng sī ŭ ciă ŭ síng-dí, ca̿-sū-dī sī sǎi-lǐ nī?
- 26 Iǒ̤-hu̿ing a̿ing uā, Uòi sǎ̤ sṳ̌ sī sǎi-lǐ, da̿u nì dô̤ng-ó̤ng-séng-di̿ iǔ ciă nêng gṳè-diū, nì iǎ ēng dǎ̤-dí gṳ̀.
- 27 Ciū-sī ŭ ciă piāng uòi hē lâ̤ gâ̤, uòi iáu gṳ̀ tiă ǎi-duo̿i, iǎ sī ēng de̤̿ng-ē̤ng.
- 28 Iŏ̤ng duói dī sī da̿u Iŏ̤-dàng ŭ-bíng kái Bă-duōi-nǐ gâ̤ dī-huó̤ng uā gâ̤, Iŏ̤-hu̿ing ka̿ing-ka̿ing da̿u ŭ-di̿ sí sǎi-lǐ.
- 29. Di̿ nī góng Iŏ̤-hu̿ing chū-gi̿ng Iǎ-Sú hā gṳ̀-di̿ lâ̤, ciū uā, Chū Ciōng-Di̿ gâ̤ Iông-ciĕ, sī guòi ko̤̿ si̿-gáing nêng gâ̤ cò.
- 30 Iǒ̤ng ciă nêng sī uòi chîng-mâng uā-gua̿, Iǔ ciă nêng piāng uòi hē lâ̤, giâ-gíng bǐ uòi ga̿ing duōi kǐ lâ̤: éng-ṳē gṳ̀ bǒ̤ng-lǎi piāng uòi sáing.
- 31 Uòi sáing ǐa ēng dádi gṳ̀; éng-ṳē cǒng niōng gṳ̀ hīng nă Ì-să̤-liĕ nêng chū, uòi ciū lâ̤ sǎ̤ sṳ̌ sí sǎi-lǐ.
- 32. Iŏ̤-hu̿ing ca̿ gúing-ce̿ng uā, Uòi chū-gi̿ng Se̿ng-séng su̿-siōng bà-gŏ̤ giǎng tíng ciōng à lâ̤; gṳè da̿u gṳ̀ ciōng-bíng-di̿.
- 33. Uòi iǎ ēng dǎ̤-dí gṳ̀: lâ̤-sī ciă hǎng uòi lâ̤ sǎ̤ sṳ̌ sí sǎi-lǐ, gṳ̀ iáu uòi uā, Nì chū-gi̿ng Se̿ng-sěng̀ à lâ̤ gṳè da̿u sū-nêng ciōng-bíng, ciū-sī iǒ̤ng nêng sǎ̤ Se̿ng-sěng̀ sí sǎi-lǐ.
- 34 Uòi chū-gi̿ng-gua̿ iǎ ca̿-gua̿ gúing-ce̿ng, ŭa iǒ̤ng nêng ciūsi Ciōng-Di̿ gâ̤ Gṳ̌ing.
- 35 Di̿ nī góng Iŏ̤-hu̿ing ǐau liòng-ciǎ hă-sáing, ǐ câi-câi gṳè cì-dó.
- 36. Iŏ̤-hu̿ing chū-gi̿ng Iǎ-Sú dō̤-di̿ giǎng, ciū uā, Chū Ciōng-Di̿ gâ̤ Iông-ciě.
- 37 Iŏ̤-hu̿ing liòng-ciǎ hă-sáing tia̿ng-nī gṳ̀ ŭa iŏ̤ng dī, ciū gáing Iǎ-Sú ko̤̿.
- 38. Iǎ-Sú chiá-dṳ̌ing-tê, chū gṳ̀ dō̤-di̿ gáing, ciū iáu gṳ̀ uā, Nì o̿ dǎ̤ sū dī? Ǔ liōng nêng uā, Là-bǐ, nì da̿u nī-dī diū? (Là-bǐ gâ̤ i̿-su̿ ciū-sī Síng-sáing.)
- 39 Iǎ-Sú uā, Nì lâ̤, ciū chū-dă̤-gi̿ng. Ŭ liōng nêng ko̤̿ chū gṳ̀ gṳè-diū gâ̤ sù-cài; iŏ̤ng cì góng ciū hā gṳ̀-di̿ gṳè-diū; ŭ sî-hē ciū-sī bu̿ing-de̿ làu.
- 40 Tia̿ng-nī Iŏ̤-hu̿ing uā gâ̤ dī, ciū gáing Iǎ-Sú ko̤̿ga ŭ liōng nêng, cì-ciă sī Sái-mô̤ng Bǐ-dǎ̤ gâ̤ hiáng-dī, Úing-dă̤-liĕ.
- 41 Úing-dă̤-liĕ sáing lāu-diō̤ gṳ̀ gó̤-ciě Sái-mô̤ng, iáu gṳ̀ uā, Uôi-huōi-nêng lāu-diō̤ Mǐ-so̿-ngā (Mǐ-so̿-ngā gâ̤ i̿-su̿ ciū-sī Gí-Dǔ.)
- 42 Úing-dă̤-liĕ ciū iáu gṳ̀ hā Iǎ-Sú-di̿ lâ̤. Iǎ-Sú chū-diū gṳ̀, uā, Nì sī Iǒ̤-nà gâ̤ gṳ̌ing Sái-mô̤ng: iǎ ŏ̤ hǎng ca̿ Gí-huă (Gí-huă gâ̤ i̿-su̿ ciū-sī Ciō̤-ngâng.)
- 43 Dī nī góng Iǎ-Sú o̿ ko̤̿ Gá-lī-lī, lāu-diō̤ Hǐ-lì: ciū iáu gṳ̀ uā, Nì lâ̤ gáing uòi.
- 44. Iŏ̤ng Hǐ-lì sī Bǎ-so̿-duōi gâ̤ nêng, iáu Úing-dă̤-liĕ Bǐ-dǎ̤ gōng hióng-lǐ.
- 45 Hǐ-lì lāu-diō̤ Nà-dàng-ngiè, iáu gṳ̀ uā, Mǒ̤-sái gâ̤ lṳ̄-huǎ, iáu síng-dí gâ̤ sṳ́ gi̿-diū uā ŭ ciă nêng gâ̤ dī, giâ-gíng uòi lāu-diō̤ gṳ̀ làu, ciū-sī Nà-sǎ-là̤ nêng, Iǒ̤-să̤ gâ̤ gṳ̌ing, Iǎ-Sú.
- 46 Nà-dàng-ngiè iáu gṳ̀ uā, Nà-sǎ-là̤ iǔ sū-mū hǎu gâ̤ dī chṳ̆ nī? Hǐ-lì uā, Nì lâ̤ chū.
- 47 Iǎ-Sú chū-gi̿ng Nà-dàng-ngiè hā gṳ̀-di̿ lâ̤, ciū uā, Nì chū iŏ̤ng nêng, gṳ̀ do̤̿ng-céng sī Ì-să̤-liĕ nêng, gṳ̀ séng-dǐ dú mài gáing-kiǎu.
- 48 Nà-dàng-ngiè iáu gṳ̀ uā, Nì gōng-ciōng ŏ̤ dǎ̤-dí uòi nī? Iǎ-Sú a̿ing uā, Hǐ-lì gu̿ ēng-nǎing hǎng nì, nì da̿u mǎu-huá-guǎ chiū à, uòi sáing chū-gi̿ng nì làu.
- 49 Nà-dàng-ngiè a̿ing uā, Síng-sáing, nì sī Ciōng-Di̿ gâ̤ Gṳ̌ing, sī Ì-să̤-liĕ nêng gâ̤ uâng.
- 50 Iǎ-Sú a̿ing gṳ̀ uā, Éng-ṳē uòi iáu nì uā, Uòi da̿u mǎu-huá-guǎ chiū à chū-gi̿ng nì, nì ciū se̿ng; nì hē-lǎi ŏ̤ chū-gi̿ng piāng iŏ̤ng ga̿ing duōi gâ̤ dī.
- 51 Ǐ uā, Uòi ì-cài iáu nì uā, Nì hē-lǎi ŏ̤ chū-gi̿ng tíng kṳé-kṳé, iáu Ciōng-Di̿ sǎ̤-chṳ̄ ha iòng ko̤̿, à lâ̤, da̿u nêng gâ̤ ciōng-bíng.