Jump to content
Se̿ng-géng/Cho̤̿ng Si̿ Gi̿/2
- 1 Tíng dī, gìng tíng dī dǐ-bíng cháing cháing uāing uāing gâ̤ mî-dī, dú ca̿ chéng-chǔ làu.
- 2 Da̿u di̿ chĭ góng Ciōng-Di̿ ca̿ gâ̤ góng-hú dú ca̿ ǐ-nī; iŏ̤ng duói gâ̤ góng-hú ca̿ chéng-chǔ, da̿u di̿ chĭ góng ciū hṳĕ góng.
- 3. Éng-ṳē iŏ̤ng cì góng Ciōng-Di̿ iŏ̤ng duói gâ̤ góng-hú dú ca̿ ĭ-nī hṳĕ góng, ciū uā iŏ̤ng nì-ciě iǔ hǔ-ki̿, huó̤ng-piĕ ca̿ se̿ng gâ̤ nì-ciě.
- 4. Kṳé tíng bī dī gâ̤ lǎi-lǐ sī iǒ̤ng-gǎ̤-sǐ, Iǎ-uǎ-uǎ Ciōng-Di̿ kṳé tíng bī dī gâ̤ nì-ciě.
- 5 Ŭ cì sî diá-dī gū ēng-nǎing sáng cháng chǎu, hṳ̂ing-di̿ ēng-nǎing sáng cháng cha̤̿: éng-ṳē Iǎ-uǎ-uǎ Ciōng-Di̿ gu̿ ēng-nǎing sǎ̤ hṳ̄ lò̤ da̿u si̿-gáing; iǎ mǎu nêng dǎ châing.
- 6 Bŭ-gua̿ iǔ ū giǎng diá-di̿ chṳ̆ lâ̤, ê̤ng lǒng-cǒng gâ̤ dī tǔ.
- 7 Iǎ-uǎ-uǎ Ciōng-Di̿ sǎ̤ diá-di̿ gâ̤ nâi ca̿ cì-ciă nêng, nà sáng ki̿ chṳé da̿u gṳ̀ pī-chṳ́ing-di̿ ko̤̿; ŭ-ciă nêng ciū chěng ca̿ iǔ sáng-miāng gâ̤ lěng-ô̤ng gâ̤.
- 8 Da̿u Ái-dǐng dóng-bíng Iǎ-uǎ-uǎ Ciōng-Di̿ kṳé cì-ciă hṳ̂ing; nà kāing ca̿ gâ̤ nêng bo̿ng da̿u hṳ̂ing dǐ-bíng.
- 9 Iǎ-uǎ-uǎ Ciōng-Di̿ sǎ̤ gŏ̤ iōng gâ̤ chiū giǎng diá-di̿ sáng chṳ̆ lâ̤, ǐ hǎu chū, ǐ sáng hǎu iè gâ̤ guǎ-ciě; hṳ̂ing dô̤ng-ó̤ng-séng iǔ cì-công sáng-miāng gâ̤ chiū, gṳ̀ iǔ cì-công huó̤ng-piĕ sīng ŏ̤ gâ̤ chiū.
- 10 Giǎng Ái-dǐng iǔ ciă kái kâu chṳ̌ lâ̤ ê̤ng ŭ hṳ̂ing; iŏ̤ng kái giǎng ŭ-di̿ bṳ́ing ca̿ si̿ diâu kái.
- 11 Tê cì-diâu kái miâng hǎng Bǐ-sō̤ng; iŏ̤ng kái si̿ gǒ̤ng-lǒ̤ng-kṳ́ing ṳ̌-diū Hō̤-hǐ-là gâ̤ dī-huó̤ng, ŭ sù-cài chṳ̆ géng;
- 12 Ŭ succai gâ̤ géng cèng hǎu: ǐ chṳ̆ céng cṳ́ iáu bǐ ngṳ̀.
- 13 Di̿ nì diâu kái miâng hǎng Kǐ-hē̤ng: iŏ̤ng kái si̿ gǒ̤ng-lǒ̤ng-kṳ́ing ṳ̌-diū Gǔ-ì gâ̤ dī-huó̤ng.
- 14 Di̿ sáng diâu kái miâng hǎng Hí-dǐ-giĕ: iŏ̤ng kái lâu da̿u Ngā-sṳ̄ gâ̤ dóng-bíng.
- 15 Di̿ si̿ kái ciū-sī Bă-luòi kái. Iǎ-uǎ-uǎ Ciōng-Di̿ nà ka̿ing ca̿ gâ̤ nêng bo̿ng da̿u Ái-dǐng hṳ̂ing, hǎng gṳ̀ cá̤-cē̤ng gìng ia̿ng-diū iŏ̤ng hṳ̂ing.
- 16 Iǎ-uǎ-uǎ Ciōng-Di̿ gáu-dō gṳ̀ uā, Hṳ̂ing-di̿ běng sū-mū chiū-dī gâ̤ guǎ-ciě nì mǒng cī-gǔing iè:
- 17. Lâ̤-sī ŭ cì-công huó̤ng-piĕ sīng ŏ̤ chiū-di̿ gâ̤ guǎ-ciě, nì ēng gǒ̤ng iè: iè gâ̤ sî-hē ŭ cì góng ciū ǐ-diāng ŏ̤ sǐ.
- 18. Iǎ-uǎ-uǎ Ciōng-Di̿ uā, Nêng gú-gú ciă nêng gṳè-diū1 ēng hǎu; uòi niōng tāi gṳ̀ ca̿ cì-ciă iáu gṳ̀ po̿-dō bó̤ng-cha̿ing gṳ̀ gâ̤.
- 19. Iǎ-uǎ-uǎ Ciōng-Di̿ nà nâi ca̿ chěng châing-di̿ gŏ̤ iōng gâ̤ tê-sáng, kóng dé̤ng gâ̤ ciā-ciě; dú duo̿i da̿u ŭ-ciă nêng mīng-chîng, chū ŭ nêng tāi gṳ̀ chiǔ sū-mū miâng: gŏ̤ iōng sáng-ŏ gâ̤ miâng dú sī běng ŭ-ciă nêng ta̿i gṳ̀ chiǔ gâ̤.
- 20. Ŭ-ciă nêng tāi lṳ̀ tṳ̆, bu̿ing tíng gâ̤ ciā-ciě, châing-di̿ gâ̤ tê-sáng dú chiǔ miâng làu; cǒng-lâ̤ ŭ nêng ēng-nǎing dǎ̤-diō̤ iáu gṳ̀ po̿-do̿ bó̤ng-chāing gṳ̀ gâ̤.
- 21. Iǎ-uǎ-uǎ Ciōng-Di̿ ciu sǎ̤ ŭ nêng mì-chǐ-dǎ̤ cèng diō̤, ciū giǎng gṳ̀ hiĕ huâng-di̿ lé cì-ǎng bái gŏ chṳ̆ lâ̤, nà nṳ̀ ǐau gṳ̀ biǒ̤-diū ŭ sù-cài.
- 22. Iǎ-uǎ-uǎ Ciōng-Di̿ciu nà giǎng ŭ-ciă nêng hiĕ-huâng-di̿ lé chṳ̆ lâ̤ gâ̤ bái gŏ, ca̿ chěng cìcia á-niông-nêng, duo̿i gṳ̀ da̿u ŭ nêng mīng-chîng.
- 23. Ŭ-ciă nêng ă uā Iŏ̤ng ciū-sī uòi gǒ-dī gâ̤ gǒ, uòi nṳ̀-dī gâ̤ nṳ̀: gṳ̀ sī giǎng Nâng nêng séng-tǐ nà chṳ̆ lâ̤ gâ̤, ciū niōng hǎng gṳ̀ ca̿ Á-niông-nêng.
- 24. Éng-ṳē iŏ̤ng dī nêng e̿ng-gái lī-kṳé dá nǎi, iáu sē-mǎ níng-níng-diū: liōng nêng ciū hō̤ ca̿ ǐ tǐ.
- 25. Sé̤ng-é̤ng sē-mǎ , liōng nêng chiă-séng lū-tǐ, dú mài ēng hǎu i̿-su̿.
← · Di̿ 1 Cióng · Di̿ 3 Cióng →
«Se̿ng-géng» gâ̤ mù-lṳ̀
