Saqlap kelipti (Qayıpnazarov)
Xalqın qorǵap Qoblan qorǵan dúzipti,
Yarın izlep Alpamıs taw gezipti,
Arıslannıń mártligine bas iyip,
Gúlayım qız baǵlardan gúl úzipti.
Máspatshanıń márt joldası Ayparsha,
Alısıptı jaw bolǵansha shilnarsha,
Sozǵan qollar túwe qıyal jetpestey,
Arıwlıqta ay bolıptı bir parsha.
Qası elesleter qıyǵan qálemdi,
Gózzallıǵı tań qaldırar álemdi,
Yar ıshqında basın salıp bazarǵa,
Ǵarip ótken árman etip Sánemdi.
Zamanında alp anadan tuwıptı,
Tuwıptı da ata jolın kuwıptı,
Sırttan kelgen jawǵa qarsı gúreske,
Basın tigip xalıq ushın bel buwıptı.
Bárha isenimdi aqlap kelipti,
Óz xalqın ardaqlap jaqlap kelipti,
Sonıń ushın xalıq biziń kúnlerge,
Atların umıtpay saqlap kelipti.