Sıylasıqtıń sırı sonda (Qayıpnazarov)
Xalıq naqılı:—sıylasań sıy kisimen,
Sıylamasań áytewir bir kisimen,
Úyren atalardıń úlgi isinen,
Sıylasıqtıń sırı sonda, doslarım.
Ata sózi,—aqıl kózi, tıńlay bil,
Átirapına jaqsı dostı jıynay bil,
Sıylı bolıw ushın ózin sıylay bil,
Sıylasıqtıń sırı sonda, doslarım.
Jurt jaqsı kórmeydi tentek, dádekti,
Janına juwıtpa onday ádetti,
Qoldan kelse bol kishpeyil, ádepli,
Sıylasıqtıń sırı sonda, doslarım.
Bilip koy sınaqta xárbir kádemin,
Ózińdi bezeydi ikiram-ádebin,
Kórgen jerde dúziw bolsın sálemin,
Sıylasıqtıń sırı sonda, doslarım.
Ál aspandı gózlep ósken bip-biyik,
Sayasız daraqtay turma zińkiyip,
Dos tapsań júzińdi burma dúńkiyip,
Sıylasıqtıń sırı sonda, doslarım.
Kewlińe jaqpasa alartpa kózdi.
Mánisin ketirip molaytpa sózdi,
Húrmetle burınnan kiyatqan izdi,
Sıylasıqtıń sırı sonda, doslarım.