Súygiń keledi (Qayıpnazarov)
Ámiwdárya jaǵasına jaylasqan,
Kelip keórsen meniń ósken elimdi.
Qaraǵanda kórkine kóz qamasqan,
Aralasan keń salalı jerimdi.
Tábiyat saqıylıq etip hár túrli,
Tósep taslaǵanday jasıl gilemdi.
Jer qushaǵın toltırıp mol ónimli,
Paxta óser tań qaldırǵan álemdi.
Sheldi shegindirip jayıp qanatın,
Qumga hújim jasap baǵlar óspekte.
Elespesiz jatqan dalam, elatım,
Gúllerge oranıp kózge túspekte.
Qansha qıdırsań da, qansha júrseń de,
Azsınasań uzak júrgiń keledi.
Hasıl topıraǵımdı kúnde kórseń de,
Kózge súrme etip súygiń keledi.